Aanlyn Bybel

2 SAMUƐLI 14 - Bisã Bible 2005

Abusalomu suna Yurusalɛmu

¹ Zeruya nɛ́ Yoabu dɔ̃ kũ kína pɔ kpɛ́ kú Abusalomua,

² akũ à gbɛ̃nɔ zĩ̀ Tɛkoa, ò nɔgbɛ̃ ɔ̃ndɔ̃de ke sɛ̀ ò sù kãao. Akũ à pìnɛ: Ǹ kɛ lándɔ̃ ntɛn wɛ̃nda kɛ bà. Ǹ gyaanɔ pɔ́kasanɔ da. Ǹsun nísi dɔkɔro. Ǹ kɛ lákũ nɔgbɛ̃ kũ a gbɛ̃ gà àtɛni a ɔ́ɔ dɔ à gìi kɛ̀ bà.

³ Ǹ gɛ́ kína kĩnaa lɛ, ǹ yã díkĩna onɛ. Akũ Yoabu yã kàka nɔgbɛ̃ pìinɛ.

⁴ Kũ Tɛkoa nɔgbɛ̃ pìi gɛ̀ɛ à kína lè, à kùtɛnɛ kũ à mìio zĩtɛ à pì: Kína, ǹ ma mì sí!

⁵ Akũ kína pì a là à pì: Bɔ́n ń yeii? À wèa à pì: Gyaanɔn ma ũ, ma zã gà.

⁶ Makũ n zɔ̀bleri, má nɛ́gɔ̃gbɛ̃nɔ vĩ gbɛ̃nɔn pla. Kũ òtɛn fìti kɛ ń kɔ̃ tɛ̃nɛ bura, gbɛ̃ke kun à ń kpaatɛro. Akũ gbɛ̃ do a gbɛ̃ do lɛ̀ à dɛ̀.

⁷ Akũ ma bedenɔ fùtɛ ń pínki, ò pì makũ n zɔ̀bleriinɛ mà a nɛ́ kũ à a gbɛ̃ndo dɛ̀ɛ pì kpáḿma ò dɛ, kũ à a gbɛ̃ndo dɛ̀ yãi. Ò ye ò yàka mì'oro tɛ́de kũ à gɔ̃̀mɛnɛ túbibleri ũ pì tɛ́ dɛmɛ, de ma zã súngɔ̃ tɔ́ ke buri vĩ andunia gũn doro yãi.

⁸ Akũ kína pì nɔgbɛ̃ pìinɛ: Ǹ tá bɛ, mani yã gwa n yã pìi musu.

⁹ Akũ Tɛkoa nɔgbɛ̃ pìi pì: Ma dikiri kína, taari pì wí ma musu kũ ma de bedenɔ, mɔkɔ̃n ǹgɔ̃ kun taari sari kũ n kíkɛo.

¹⁰ Akũ kína pì: Tó gbɛ̃ke lɛ́ pà yã pìia, ǹ mɔ́ kãao ma kĩnaa la, ani le à wari dɔmma doro.

¹¹ Akũ nɔgbɛ̃ pìi pì: Kína, ǹ sì kũ Dikiri n Ludao, de mɔrakari sún ma nɛ́ mɛ̀n do kũ à gɔ̃̀ lakiti kɛro yãi. Akũ kína pìi pì: Kũ Dikirio n nɛ́ pìi mìkã ke ni lɛ́tɛ zĩtɛro.

¹² Akũ nɔgbɛ̃ pìi pì: Ma dikiri kína, makũ n zɔ̀bleri ǹ ma gba zɛ́ mà ɛra mà yã onnɛ. À wèa à pì: Ǹ o!

¹³ Akũ à pìnɛ: Bɔ́yãi n yã dí taka kpàkũsũ kũ Luda gbɛ̃nɔɔ? Yã kũ n òmɛnɛ mɛ́ à n da yãn, zaakũ ńdi gbɛ̃ kũ n pɛaa gbɛsɛ n su kãaoro.

¹⁴ Ó pínki óni ga, ónigɔ̃ de lán í kũ à kɔ̀tɛ zĩtɛ gbɛ̃ke dí le à sɛ̀tɛ doro bà. Luda dì gbɛ̃ kũ ò pɛ̀aa wɛ̃̀ndi boro, àdi zɛ́ wɛtɛ ade ɛra à suawamɛ.

¹⁵ Ma su yã pì o ma dikiri kínanɛmɛ, zaakũ gbɛ̃nɔ tò vĩna ma kũ. Akũ makũ n zɔ̀bleri ma pì mani yã pì onnɛ. Òdigɔ̃ dɔ̃ro ke ĩni ma wɛ́kɛna sí

¹⁶ ǹ ma bo gbɛ̃ kũ à ye à makũ kũ ma nɛ́o zĩtɛ kũ Luda tòwɛrɛ sí ó ɔĩ.

¹⁷ Ma dikiri kína, makũ n zɔ̀bleri ma pì n yã ni tó ma laakari kpátɛ, zaakũ ń de lán Luda malaikaa bàmɛ, ndì sã kpá yã mana kũ a vãniooi pínki. Dikiri n Luda gɔ̃ kú kũnwo.

¹⁸ Akũ kína pìnɛ: Ǹsun gí yã kũ matɛni n la onaairo. Akũ nɔgbɛ̃ pìi pì: Ǹ o ma dikiri kína!

¹⁹ Akũ kína a là à pì: Yoabu lɛ́ kú yã pìi gũn yá? Nɔgbɛ̃ pìi wèa à pì: Ma dikiri kína, kũ n kunnaao yã kũ n òo pì gɛna arɛ kũ kpɛo vĩro. Ee, n zɔ̀bleri Yoabu mɛ́ à yã pìi kàkamɛnɛ pínki.

²⁰ N zɔ̀bleri Yoabu kɛ̀ lɛ, de à le à yã kũ à lokona tera díkũ kɛkɛ yãimɛ. Ma dikiri, ń ɔ̃ndɔ̃ lán Luda malaikaa bàmɛ, ń yã kũ à kɛ̀ andunia gũn dɔ̃ pínki.

²¹ Akũ kína gɛ̀ɛ à ò Yoabunɛ: Tɔ̀, mani yã pì kɛ sà. Ǹ gɛ́ ǹ kɛfɛnna Abusalomu gbɛsɛ ǹ su kãao.

²² Akũ Yoabu kùtɛ kínanɛ kũ à mìio, à a sáabu kpà à pì: Ma dikiri kína, makũ n zɔ̀bleri, ma dɔ̃̀ gbãra sà kũ ma yã kàngu, zaakũ n ma yã mà.

²³ Akũ Yoabu fùtɛ à gɛ̀ɛ à Abusalomu gbɛ̀sɛ zaa Gesuru à sù kãao Yurusalɛmu.

²⁴ Akũ kína pì: Ǹ onɛ à gɛ́ vutɛ a zĩda bɛa, ó wɛ́ ni kɛ siikɔ̃ro. Akũ Abusalomu gɛ̀ɛ à vùtɛ a bɛa, odi wɛ́ sikɔ̃lɛ kũ kínaoro.

²⁵ Gɔ̃ mana ke kú Isarailanɔ tɛ́ lán Abusalomu bàro. Òdigɔ̃ a manakɛ yã o manamana. Sɛna zaa a gɛ̀sɛɛa ari à gɛ̀ɛ pɛ́ a mìdangura mamberu ke kúaro.

²⁶ Àdigɔ̃ a mì bo wɛ̃̀ kũ wɛ̃̀ɛomɛ. Àdi kɛa tìkisi. Tó à bò, àdi yɔ̃ kilooa, a tìkisii dìgɔ̃ de kiloo plala.

²⁷ À nɛ́gɔ̃gbɛ̃nɔ ì gbɛ̃nɔn aakɔ̃ kũ nɛ́nɔgbɛ̃o mɛ̀n do. Nɛ́nɔgbɛ̃ pì tɔ́n Tama. Nɔ manamɛ.

²⁸ Abusalomu kú Yurusalɛmu ari wɛ̃̀ pla wɛ́sina kínalɛ sari.

²⁹ Akũ à Yoabu sìsi à gɛ́arɛ kína kĩnaa, ama Yoabu dí we à sù a kĩnaaro. Akũ à ɛ̀ra à a sìsi dɔ, adi we à sùro.

³⁰ Akũ à pì a zĩkɛrinɔnɛ: À Yoabu bura kũ à kú ma pɔ́ sarɛ gwa, a nagã mà. À gɛ́ à tɛ́ sɔ̃a. Akũ Abusalomu zĩkɛrinɔ gɛ̀ɛ ò tɛ́ sɔ̃̀ Yoabu bura pìia.

³¹ Akũ Yoabu fùtɛ à gɛ̀ɛ Abusalomu bɛa, à a là à pì: Bɔ́yãi n zĩkɛrinɔ tɛ́ sɔ̃̀ ma buraaa?

³² Akũ Abusalomu wèa à pì: Ǹ gwa, ma gbɛ̃ zĩ̀mma ma pì ǹ mɔ́ mà n zĩ kínaa, de ǹ a la bɔ́ mɛ́ à tò à ma gbɛsɛ zaa Gesuru à sù kũmaoo? Ma kunna gwe sã̀namɛnɛ de gu díla! Má ye mà kɔ̃ e kũ kínao tera. Tó má taari ke vĩ, à ma dɛ.

³³ Akũ Yoabu gɛ̀ɛ à yã pìi ò kínanɛ. Akũ kína Abusalomu sìsi. Kũ à sù, à kùtɛnɛ kũ a mìio zĩtɛ. Akũ kína lɛ́ pɛ̀a.

« Vorige

Volg ons:

Geborgde skakels

Advertensies