Aanlyn Bybel

2 SAMUƐLI 12 - Bisã Bible 2005

Annabi Natã kpãkɛ̃na Daudai

¹ Dikiri Natã zĩ̀ Daudaa. Kũ à kà, à pìnɛ: Gɔ̃gbɛ̃ gbɛ̃nɔn pla kenɔ mɛ́ ò kú wɛ̃tɛ ke gũn, gbɛ̃ do bi aruzɛkɛdemɛ, gbɛ̃ do sɔ̃ takasidemɛ.

² Aruzɛkɛde pì sãnɔ kũ zùnɔ vĩ dasidasi,

³ takaside pì sɔ̃ à pɔ́ke vĩro, sã núnu fítinna mɛ̀n doken à lù. Akũ à dàto ari à zɔ̃kɔ̃ kũ̀ a bɛa kũ a nɛ́nɔ. Òdigɔ̃ pɔ́ dokɔ̃nɔ ble òdigɔ̃ í mi ta dokɔ̃nɔn, àdi wùtɛ a pɔtɛ, akũ àtɛni a gwa lán a zĩda nɛ́nɔkpare bà.

⁴ Kũ nibɔɔ kìpa aruzɛkɛde pìia, akũ adi we à sã ke zùu kũ̀ a kpàsaa gũn à nibɔɔ pìi yàri kɛoro. Takaside sã núnu fítinna pìin à sìa à a nibɔɔ pìi yàrii kɛ̀o.

⁵ Akũ Dauda pɔ fɛ̃̀ aruzɛkɛde pì yã musu manamana, à pì Natãnɛ: Dikiri kun! À kũ̀ ò gbɛ̃ kũ à yã pìi kɛ̀ dɛmɛ.

⁶ Lákũ à kɛ̀ lɛ nà, adi a wɛ̃nda gwaro, ani sã pì fĩna bo lɛu siikɔ̃.

⁷ Akũ Natã pì Daudanɛ: Mɔkɔ̃mmɛ ade pì ũ. Dikiri Isarailanɔ Luda mɛ́ à yã dí ò à pì: Ma n ka Isarailanɔ kína ũ, ma n bo Solu ɔĩ,

⁸ akũ ma n dikirii pì bɛ kpàmma, ma a nɔnɔ nànnɛ n ɔĩ. Ma Isarailanɔ kũ Yudanɔ kpàmma n gbɛ̃nɔ ũ. Tó adinɔ kɛ̀mma fíti yã, de mà a pãndenɔ karannɛ dɔ.

⁹ Bɔ́yãi n ma yã gya bòo? N yã kũ má yeiro kɛ̀, n Iti buri Uria dɛ̀ kũ fɛ̃nɛdao, n a nɔ sìa n sɛ̀. N tò Amɔninɔ a dɛ̀ zĩ̀i gũn.

¹⁰ Zaa gbãra yã pãsĩ ni kɛ̃ n bɛa ziki doro, zaakũ n ma gya bò, n Iti buri Uria nɔ sìa n sɛ̀.

¹¹ Akũ Dikiri ɛ̀ra à yã dí ò dɔ à pì: Ǹ ma! Mani tó n zĩda bedenɔ sunyĩ kɛnnɛ. Mani n nɔnɔ símma mà ń kpá n gbɛ̃dake kea n wára, ani wútɛ kũńwo gupuraa.

¹² N yã pìi kɛ̀ asiri gũmmɛ. Makũ sɔ̃ mani yã pì kɛnnɛ gupuraa Isarailanɔ wára ń pínki.

¹³ Akũ Dauda pì Natãnɛ: Ma durunna kɛ̀ Dikirinɛ. Akũ Natã pìnɛ: Dikiri n durunna kɛ̃̀mma, ĩni garo.

¹⁴ Ama lákũ n dɔkɛ kũ Dikirio manamana nà yã pì kɛnaa musu, nɛ́gɔ̃gbɛ̃ kũ nɔgbɛ̃ pìi ì kũnwo ni gamɛ.

¹⁵ Kũ Natã tà bɛ, akũ Dikiri tò nɛ́ kũ Uria nanɔ ì kũ Daudao pì gyã kũ̀.

¹⁶ Akũ Dauda tɛn Luda wɛ́ kɛ nɛ́ pì yã musu kũ lɛ́yĩnaao, gwãani àdigɔ̃ wútɛ zĩtɛmɛ.

¹⁷ A bɛ gbɛ̃ zɔ̃kɔ̃nɔ dìgɔ̃ zɛala de ò a futɛ zĩtɛ, ama àdi wero, àdi pɔ́ ble kũńworo.

¹⁸ A gɔrɔ supplade zĩn nɛ́ pìi gà. Vĩna Dauda ìbanɔ kũ̀, odi fɔ̃ ò ònɛ kũ nɛ́ pìi gàro. Ò pì: Gɔrɔ kũ nɛ́ pì kun, o yã ònɛ, adi ó yã maro. Deran óni onɛ nà sà kũ nɛ́ pìi gàa? Ani yã vãni kɛ.

¹⁹ Dauda è a ìbanɔ tɛn yã kpãni okɔ̃nɛ, akũ à dɔ̃̀ kũ nɛ́ pìi gàmɛ. À ń lá à pì: Nɛ́ pìi gàn yá? Akũ ò wèa ò pì: Ee! À gàmɛ.

²⁰ Dauda fùtɛ zĩtɛ à zú ò, à nísi dɔ̀kɔ à a pɔ́kasanɔ lìtɛ, akũ à gɛ̀ɛ à kùtɛ Dikirinɛ a kpɛ́n. Kũ à ɛ̀ra à tà bɛ, à pɔ́ble gbɛ̀ka, akũ ò kpàa à blè.

²¹ A ìbanɔ a là ò pì: À kɛ̀ dera ntɛn yã kɛ lɛɛ? Gɔrɔ kũ nɛ́ pì kun, n lɛ́ yĩ̀ n ɔ́ɔ dɔ̀. Kũ à gà sà, n futɛ n pɔ́ blè.

²² À wèḿma à pì: Gɔrɔ kũ nɛ́ pì kun, ma lɛ́ yĩ̀ ma ɔ́ɔ dɔ̀, zaakũ ma pì, ke Dikiri ni ma wɛ̃nda gwa à tó nɛ́ pì gɔ̃ kun gwɛɛ, dí mɛ́ à dɔ̃ɔ?

²³ Lán à gà nà sà, bɔ́yãin manigɔ̃ lɛ́yĩna dɔɔ? Mani fɔ̃ mà a vun yá? Mani gɛ́ a kĩnaa, ama ani ɛra à su ma kĩnaaro.

²⁴ Dauda a nanɔ Basɛba laakarii kpàtɛnɛ, akũ à gɛ̀ɛ à wùtɛ kãao. À nɛ́ ì gɔ̃gbɛ̃ ũ, akũ à tɔ́ kpànɛ Sulemanu. Dikiri yei,

²⁵ akũ à annabi Natã zĩ̀a à tɔ́ kpà nɛ́ pìinɛ Yɛdidaya Dikiri yenyĩ pì yãi.

Raba sina Amɔninɔa

²⁶ Ari tera Yoabu kpɛ́ àtɛn zĩ̀ ká kũ Amɔninɔ zaa Raba, akũ à kínabɛ sì.

²⁷ Akũ à gbɛ̃nɔ zĩ̀ Daudaa à pì: Ma zĩ̀i kà kũ Rabadenɔ, akũ ma ń ítɔki sì.

²⁸ Ǹ zĩ̀kari kparanɔ kakara sà, ǹ mɔ́ ǹ lika wɛ̃tɛ pìii ǹ sí. Tó lɛnlo, mani sí, oni ma tɔ́ kpánɛ.

²⁹ Akũ Dauda zĩ̀karinɔ kàkara ń pínki, à gɛ̀ɛ à lɛ̀tɛ Rabaa à sì.

³⁰ Ò ń kína wura fùraa gò a mìia ò kù Daudanɛ. A tìkisi kà kiloo baraakuri, akũsɔ̃ gbɛ̀ bɛ̀ɛrɛde kúa. À wɛ̃tɛ pì pɔ́nɔ nàkɔ̃a manamana,

³¹ akũ à gbɛ̃ kũ ò kú gwenɔ kũ̀kũ à bɔ̀tɛ kũńwo, à ń dá sàkasaka zĩn kũ diga zĩo kũ kpása zĩo, akũsɔ̃ à tò ò kúnku bò. Lɛn à kɛ̀ Amɔni wɛ̃tɛnɔnɛ lɛ pínki, akũ à ɛ̀ra à tà Yurusalɛmu kũ a zĩ̀karinɔ ń pínki.

« Vorige

Volg ons:

Geborgde skakels

Advertensies