Aanlyn Bybel

2 SAMUƐLI 11 - Bisã Bible 2005

Dauda yena Basɛbai

¹ Kũ í bò wɛ̀ɛn, gɔrɔ kũ kínanɔ dì gɛ́ zĩ̀ ká, akũ Dauda Yoabu zĩ̀ kũ a ìbanɔ kũ Isarailanɔ ń pínki. Ò Amɔninɔ ásaru kɛ̀, akũ ò lìka Rabai. Dauda sɔ̃ à kú Yurusalɛmu.

² Kũ ɔkɔsi kɛ̀, akũ Dauda fùtɛ a gádoa, àtɛn lika a kpɛ́ musu. Zaa kpɛ́ musu gwe akũ à nɔgbɛ̃ ke è, àtɛn zú o. Nɔgbɛ̃ pì bi nɔ manamɛ manamana,

³ akũ à gbɛ̃ zĩ̀ ò nɔgbɛ̃ pì yã gbɛka. Akũ ò pìnɛ: Ɛliamu nɛ́ Basɛban gwe, Iti buri Uria nanɔmɛ.

⁴ Akũ Dauda gbɛ̃nɔ zĩ̀ ò a sísi. Kũ à sù, akũ Dauda wùtɛ kãao, akũ nɔgbɛ̃ pìi tà bɛ. Àkũ sɔ̃, a okũna gbã̀a bò dufumɛ.

⁵ Kũ à nɔ̀ɔ sì, akũ à lɛ́gbãzã kɛ̀ Daudanɛ à pì a nɔ̀ɔ sì.

⁶ Akũ Dauda gbɛ̃ zĩ̀ Yoabua à pì: Ǹ Iti buri Uria gbarɛmɛnɛ. Akũ Yoabu a gbàrɛnɛ.

⁷ Kũ Uria pìi sù, akũ Dauda Yoabu aafia gbɛ̀ka kũ zĩ̀karinɔ kũ zĩ̀ kũ òtɛn káo.

⁸ Akũ Dauda pìnɛ: Ǹ tá bɛ ǹ zú o. Kũ Uria bò kínabɛa, akũ kína gbɛ̃ zĩ̀a kũ pɔ́bleo.

⁹ Ama Uria dí tá a bɛaro, kínabɛ gãnu gũnn à ìn kũ kínabɛ zĩkɛrinɔ.

¹⁰ Kũ ò ò Daudanɛ ò pì, Uria dí tá a bɛaro, akũ à Uria là à pì: À de n bo tái n sumɛ gwɛɛ? À kɛ̀ dera ńdi tá bɛroo?

¹¹ Uria wèa à pì: Àkpati kũ Isarailanɔ kũ Yudanɔn kú bizakutanɔ gũn. Ma dikiri Yoabu kũ a gbɛ̃nɔn kú zĩ̀lan. Mani fɔ̃ mà tá bɛ mà pɔ́ ble mà í mi, mà wútɛ kũ ma nanɔoro. Kũ n kunnaao mani yã pìi taka kɛro.

¹² Akũ Dauda pìnɛ: Ǹ gɔ̃ la gbãra dɔ, zian mani n gbarɛ. Akũ Uria gɔ̃̀ Yurusalɛmu zĩ birea kũ a gu làa dɔnaao dɔ.

¹³ Dauda a sìsi à pɔ́ blè à í mì kãao, akũ Dauda í kàkanɛ. Ama kũ à bò ɔkɔsi, à gɛ̀ɛ à ì kũ a dikiri kína zĩkɛrinɔomɛ, adi tá a bɛaro.

¹⁴ Kũ gu dɔ̀ Dauda takada kɛ̃̀ Yoabunɛ, akũ à Uria gbàrɛo.

¹⁵ Takada pìi gũn à pì: À Uria dońnɛ arɛ gu kũ zĩ̀ pãsĩn, à bo a kpɛ de ò le ò a dɛ.

¹⁶ Gɔrɔ kũ Yoabu tɛn lika wɛ̃tɛ pìii, akũ à Uria dà gu kũ à dɔ̃ gɔ̃sa gbãnanɔn kún.

¹⁷ Kũ wɛ̃tɛdenɔ bɔ̀tɛ òtɛn zĩ̀ ká kũ Yoabuo, ò Dauda zĩ̀kari kenɔ dɛ̀dɛ. Iti buri Uria kú ń tɛ́.

¹⁸ Akũ Yoabu gbɛ̃ zĩ̀ Daudaa de à zĩ̀ yã gbãnɛ pínki.

¹⁹ À pì zĩ̀rii pìinɛ: Tó n zĩ̀ yã gbã̀ kínanɛ pínki n laka,

²⁰ tó a nɛ̀sɛɛ fùtɛ à n la à pì: Bɔ́ mɛ́ à tò a na wɛ̃tɛi kãnikãni kũ zĩ̀ioo? Á dɔ̃ kũ bĩnimusudenɔ dì kà gbarɛńyĩ zĩtɛroo?

²¹ Dí mɛ́ à Gidiɔn nɛ́ Abimɛlɛki dɛ̀ɛ? Nɔgbɛ̃ mɛ́ à ɔ sɔ̃̀ wísilɔgbɛɛi zaa bĩni musu, akũ à a dɛ̀ Tebeziroo? À kɛ̀ dera a na bĩnii kãnikãni lɛɛ? Tó à ònnɛ lɛ, ǹ onɛ a zɔ̀bleri Uria, Iti buri gà dɔ.

²² Akũ zĩ̀rii pìi dà zɛ́n. Kũ à kà Dauda kĩnaa, à yã kũ Yoabu dàarɛ ònɛ pínki.

²³ À pì: Gbɛ̃nɔ bɔ̀tɛ wɛ̃tɛ gũn òtɛn gbãna mɔwɛrɛ bĩni kpɛmɛ, akũ o pɛḿma ari ń wɛ̃tɛ bĩnilɛa.

²⁴ Ń kàzurinɔn kú zaa bĩni musu, akũ ò kà fã̀ n gbɛ̃nɔ tɛ́ zĩtɛ ò n gbɛ̃kenɔ dɛ̀dɛ. N zɔ̀bleri Uria, Iti buri gà dɔ.

²⁵ Akũ Dauda ò zĩ̀rii pìinɛ: Ǹ o Yoabunɛ àsun tó yã pì kɛnɛ ĩniro. Òdigɔ̃ dɔ̃ gbɛ̃ kũ zĩ̀ ni ń blero. À zĩ̀ ká kũ wɛ̃tɛpidenɔ kũ gbãnao à wɛ̃tɛ pì kakatɛ. Ǹ a gba swɛ̃̀ lɛ.

²⁶ Kũ Uria nanɔ mà a zã gà, à ɔ́ɔ dɔ̀.

²⁷ Kũ ò gɛ̀ɛ kɛ̀ ò làka, Dauda gbɛ̃nɔ zĩ̀ ò sù kãao a bɛa, akũ à gɔ̃̀ a nɔ ũ. À nɛ́ ì kãao gɔ̃gbɛ̃ ũ, akũ yã kũ Dauda kɛ̀ɛ pìi kɛ̀ Dikirinɛ ĩni.

« Vorige

Volg ons:

Geborgde skakels

Advertensies