Aanlyn Bybel

2 SAMUƐLI 1 - Bisã Bible 2005

Dauda Solu ga baarumanaa

¹ Solu gana gbɛra Dauda sù kũ zĩ̀blena Amalɛkinɔaao, akũ à gɔ̃̀ Zikilaga gɔrɔ pla.

² A gɔrɔ aakɔ̃de zĩ gɔ̃gbɛ̃ ke bò Solu bùran à sù. A pɔ́kasanɔ kɛ̃kɛ̃na, bùsu ká a mìn. Kũ à kà Dauda kĩnaa, à kùtɛnɛ à wùtɛ a gbɛrɛa.

³ Dauda a là à pì: N bo máa? À wèa à pì: Ma bo Isarailanɔ bùrammɛ.

⁴ Akũ Dauda a là dɔ: À kɛ̀ dera gwee? Ǹ omɛnɛ. Akũ à wèa à pì: Isarailanɔ bò zĩ̀lan ò bàa lɛ̀. Ń daside lɛ̀tɛ ò gàga. Solu kũ a nɛ́ Yonatão gà dɔ.

⁵ Akũ Dauda kɛfɛnna kũ àtɛn baaruu pì kpáarɛ là à pì: N kɛ deran ń dɔ̃ kũ Solu kũ a nɛ́ Yonatão gàa?

⁶ À wèa à pì: À sù à lè má kú Giliboa kpi gɛrɛɛi gwemɛ, akũ ma Solu è, àtɛn gbãna e a sária. Sɔ̃godenɔ kũ sɔ̃denɔ tɛn ká kãao kĩni.

⁷ Kũ à lìtɛ ma kpa, à ma e, akũ à ma sisi. Ma pì: Makũ dí!

⁸ Akũ à ma la, makũmɛ dí ũu? Akũ ma wea ma pì Amalɛki burin ma ũ.

⁹ Akũ à pìmɛnɛ mà naai mà a dɛ, zaakũ á kú ga lɛ́imɛ, bee kũ a wɛ́ kpɛ́ kɛ̃na fíti.

¹⁰ Akũ ma nai ma a dɛ̀, zaakũ má dɔ̃ ani fɔ̃ à ble a lɛtɛnaa gbɛra doro. Akũ ma a kífura kũ à kunaa sɛ̀ kũ zã kũ à danaao, akũ ma suonnɛ la ma dikiri.

¹¹ Akũ Dauda a pɔ́kasanɔ gà à kɛ̃̀, akũ gbɛ̃ kũ ò kú kãaonɔ ń pɔ́nɔ kɛ̃̀kɛ̃ se.

¹² Ò Solu kũ a nɛ́ Yonatão gana ɔ́ɔ dɔ̀ kũ Dikiri gbɛ̃ Isarailanɔ, zaakũ zĩ̀ ń blé. Wɛ́'i bòḿma, akũ ò lɛ́ yĩ̀ ari ɔkɔsi.

¹³ Dauda kɛfɛnna kũ à baaruu pìi kpàarɛ là à pì: N bɛ kú máa? Akũ à pìnɛ: Bòasu nɛ́n ma ũ, Amalɛki buri.

¹⁴ Akũ Dauda a là à pì: À kɛ̀ dera kína kũ Dikiri kà dɛna vĩna dí n kũroo?

¹⁵ Akũ Dauda a kɛfɛnna ke sìsi à pì: Ǹ a lɛ́ ǹ dɛ se. Akũ à a lɛ̀ à dɛ̀.

¹⁶ Zaakũ Dauda gĩnakɛ à pìnɛ: N n zĩda dɛ̀mɛ. N zĩda lɛ́ mɛ́ à n da yãn, n pì n kína kũ Dikiri kàa dɛ̀.

Wɛ̃ndalɛ kũ Dauda sì Solu kũ Yonatão ga yã musu

¹⁷ Dauda wɛ̃nda lɛ̀ díkĩna sì Solu kũ a nɛ́ Yonatão ga yã musu.

¹⁸ À pì ò lɛ̀ɛ pìi dada Yudanɔnɛ. À kú Yasa takadan.

¹⁹ Isarailanɔ gakuridenɔ gàga sĩ̀sĩgɛrɛɛi, gɔ̃sa gbãnanɔ i òmɛ fá!

²⁰ Àsun a baaru kpá Gata zɛ́danlo, de Filisitini nɔgbɛ̃nɔ sún a pɔnna kɛro yãi. Àsun a kpàkpa kɛ Asakɛlɔniro, de gyɔfɔrɔde nɛ́nɔgbɛ̃nɔ sún ayuwii kɛro.

²¹ Plí sún kpá Giliboa gbɛ̀ɛa doro, legũ sún ma bura kũ ò kú gwenɔn doro, gwen ò ɔ sɔ̃̀ gɔ̃sa gbãnanɔ sɛ̃gbakonɔi, nísi dɔkɔna Solu sɛ̃gbakoa lɛ́ zɛ̀!

²² Kũ òtɛn gɔ̃sa gbãna aru fã gua, òtɛni ń gbɛrɛ para, kàzuri pãsĩ Yonatã dì kpɛ gwaro, fɛ̃nɛdade pãsĩ Solu dì su koriro.

²³ Solu kũ Yonatão, gbɛ̃ mana yenyĩdenɔmɛ! Odi kɛ̃kɔ̃a wɛ̃̀ndi ke ganaa gũnlo. Ń wãna de vãunɔla, ń gbãna de músunɔla.

²⁴ Isaraila nɔgbɛ̃nɔ, à wɛ́'i bo Solu ga yã musu. À biza tɛ̃ra yĩ̀árɛ kũ nɔmanablebɔnɔ, à á pɔ́kasanɔ kɛ̀kɛárɛ kũ zãblebɔ kũ ò pì kũ wuraaonɔ.

²⁵ Gɔ̃sa gbãnanɔ i ò zĩ̀lan fá! Yonatã wutɛna gɛ̀ ũ sĩ̀sĩgɛrɛɛi.

²⁶ Ma gbɛ̃ Yonatã, ma gɔ̃ warikɛnaa gũn n yãi, ń manamɛnɛ swáswa. Yenyĩ kũ ń vĩ kũmao sára vĩro, à de nɔ yenyĩla.

²⁷ Gɔ̃sa gbãnanɔ i ò fá! Ń zĩ̀kabɔnɔ kàkatɛ.

« Vorige

Volg ons:

Geborgde skakels

Advertensies