1 TIMƆTI 1 - Bisã Bible 2005

Yãdannɛrinɔ gbana laakarii

¹ Makũ Pɔlu, Kirisi Yesu zĩ̀rii lákũ Luda ó Surabari kũ Kirisi Yesu kũ ó wɛ́ dɔiio dìtɛmɛnɛ nà,

² ma takada dí kɛ̃̀nnɛ Timɔti, ma nɛ́'ina Yesu zɛ́ gũn. De Luda kũ ó Dikiri Kirisi Yesuo gbɛ̃kɛ kɛnnɛ kũ sùruuo à n gba aafiaa.

³ Lákũ ma nakaramma nà gɔrɔ kũ matɛn gɛ́ Masedonia bùsun, ǹ gɔ̃ Ɛfesu ǹ o gbɛ̃kenɔnɛ òsun yã kũ àdi kɔ̃ sɛ́ kũ Luda yãoro dańnɛ doro.

⁴ Òsun laakari dɔ gara kũ dizinɔ tɔ́ kɔ̃nɔwɛna kũ à lɛ́ vĩrooa doro. Abire dì su kũ lɛ́kpakɔ̃anaaoomɛ. Àdi tó Luda zĩ kũ àdi bo a náanikɛnaa gũn gɛ́ arɛro.

⁵ Ma yã pìi dìtɛ de ògɔ̃ yenyĩ vĩ yãimɛ, yenyĩ kũ àdi bo nɛ̀sɛpura kũ laasunlɛna dokɔ̃nɔo kũ ludanaanikɛna manafikisarioo gũn.

⁶ Gbɛ̃kenɔ pã̀ yã pìnɔnɛ ò gɛ̃̀ yã pãpã onan.

⁷ Ò ye ògɔ̃ de Musa doka yãdannɛrinɔ ũ, ama ò yã kũ òtɛn o gbázɛ dɔ̃ro ke yã kũ ò zɛ̀anɔ.

⁸ Ó dɔ̃ kũ doka pì mana, tó gbɛ̃ tɛn zĩ kɛa a zɛ́a.

⁹ Ó dɔ̃ dɔ kũ Luda dí doka ditɛ gbɛ̃ mananɔ yãiro, séde dokadarisarinɔnɛ kũ sãgbãnadenɔ kũ ludawɛkɛrisarinɔ kũ durunnakɛrinɔ kũ ludadɔ̃risarinɔ kũ donyĩrisarinɔ kũ de kũ dao dɛ̀rinɔ kũ gbɛ̃dɛrinɔ

¹⁰ kũ zinakɛrinɔ kũ pãpãbɛ̃nɛkɛrinɔ kũ lágilaginɔ kũ ɛ́kɛdenɔ kũ yãdimmarinɔ kũ gbɛ̃ kũ òdi bo yãdannɛna zɛ́de kpɛnɔo ń pínki.

¹¹ Yãzɛde pì kɔ̃ sì kũ baaru nna gakuride kũ Luda arubarikade a kpanaa nàmɛnɛ ma ɔĩo.

Lákũ Luda gbɛ̃kɛ kɛ̀ Pɔlunɛ nà

¹² Ma Kirisi Yesu ó Dikiri kũ à ma gba gbãna sáabu kɛ̀, zaakũ à ma náani kɛ̀ à ma sɛ mà zĩ kɛarɛ.

¹³ Ma a tɔ́ bɛ̃̀nɛɛ sì yã, ma wɛ́ tã̀ a gbɛ̃nɔa, ma gbãna mɔ̀ńnɛ. Bee kũ abireo à sùruu kɛ̀ kũmao, zaakũ ma kɛ̀ wɛ́sirakɛnaa gũmmɛ kũ a náanikɛnasario.

¹⁴ Akũ ó Dikiri gbɛ̃kɛ zɔ̃kɔ̃ɔ kɛ̀mɛnɛ, à tò ma a náani kɛ̀, akũ má yenyĩ kũ à de ó pɔ́ ũ kunna Kirisi Yesu gũn vĩ.

¹⁵ Yã díkĩna bi yãpuramɛ, à kũ̀ ò sí ɔplapla. Kirisi Yesu sù andunia gũn durunnakɛrinɔ surabana yãi. Makũ, ma durunna mɛ́ à de dakenɔ pɔ́la,

¹⁶ akũ Luda ma wɛ̃nda gwà, de mɛna zɔ̃kɔ̃ kũ Kirisi Yesu kɛ̀ kũ makũ durunnakɛri kàsaraao bo gupuraa, de àgɔ̃ de sèeda ũ gbɛ̃ kũ oni a náani kɛ ò wɛ̃̀ndi kũ àdi lákaro lenɔnɛ.

¹⁷ Luda mɛ̀n do légelege, gɔrɔ sĩnda pínki Kína kũ àdi garo akũsɔ̃ òdi a e kũ wɛ́oro gɔ̃ bɛ̀ɛrɛ vĩ kũ gakurio gɔrɔ sĩnda pínki, aami.

¹⁸ Ma nɛ́ Timɔti, lákũ ò gĩnakɛ ò annabikɛyã ò n yã musu nà, matɛn yã pì dannɛ, de ǹgɔ̃ kũna ǹ zĩ̀ mana káo

¹⁹ ludanaanikɛnaa gũn kũ laakariio kpátɛna. Gbɛ̃kenɔ yã pìnɔ kpà sãkoto, akũ ń ludanaanikɛnaa dì lɛ́ kútɛ.

²⁰ Imɛnɛu kũ Alɛsandao kú ń tɛ́. Ma ń kpá Setanwa, de ògɔ̃ dɔ̃ kũ òdi dɔkɛ kũ Ludaoro.