1 TƐSALONIKADENƆ 5 - Bisã Bible 2005

¹ Ma gbɛ̃nɔ, yã pì kɛna ke a kɛgɔrɔ oárɛna zɛ́ vĩro,

² zaakũ á dɔ̃ sãnsãn lákũ kpãni dì su gwãani nà. Lɛn anigɔ̃ de Dikiri sugɔrɔ zĩ lɛ.

³ Tó gbɛ̃nɔ tɛn pi, ó aafia, ó kun ó laakariia, kakatɛna ni suḿma kãnto lákũ nɛ́'iwãwã dì su nɔ̀sindarea nà, oni boro.

⁴ Ákɔ̃nɔ sɔ̃ ó gbɛ̃nɔ, á kú gusiranlo, gɔrɔ pì ni suáwa lán kpãni bàro,

⁵ zaakũ gupura gbɛ̃nɔn á ũ, fãnantɛ̃ gbɛ̃nɔn á ũ á pínki. Gwãani ke gusira gbɛ̃nɔn ó ũro.

⁶ Abire yãi òsun i o lán dakenɔ bàro. Ò itɛ̃ kɛ ògɔ̃ kú ó laakariia.

⁷ I'orinɔ dì i o gwãani, wɛ̃dɛrinɔ sɔ̃ òdi wɛ̃dɛ kɛ gwãani.

⁸ Ókɔ̃nɔ sɔ̃, zaakũ fãnantɛ̃ gbɛ̃nɔn ó ũ, ògɔ̃ kú kũ laakariio, ò ludanaanikɛna kũ yenyĩo da mɔ̀ uta ũ, ò surabana tãmaa kú mɔ̀ fùra ũ.

⁹ Zaakũ Luda dí ó ditɛ à pɔfɛ̃ kipawáro. À ó dítɛ à ó sura ba ó Dikiri Yesu Kirisi gãimɛ.

¹⁰ Àkũ mɛ́ à gà ó yãi de ògɔ̃ kú kãao, tó ó bɛ̃nɛ ke o andunia tòn yá.

¹¹ Abire yãi à lɛ́ dakɔ̃a, à kɔ̃ gba gbãna, lákũ átɛn kɛ nà.

Pɔlu yãditɛna Tɛsalonikadenɔnɛ

¹² Ma gbɛ̃nɔ, o wɛ́ kɛ̀áwa, à bɛ̀ɛrɛ lí gbɛ̃ kũ òdi zĩ kɛ á tɛ́nɔnɛ, kũ ò iko vĩáwa Dikiri gũn, òtɛni á da zɛ́anɔ.

¹³ À ń gakuri dɔ̃ńnɛ manamana yenyĩ gũn zĩ kũ òtɛn kɛ yãi. Àgɔ̃ nna kũ kɔ̃o.

¹⁴ Ma gbɛ̃nɔ, o lɛ́ dàáwa, à fayasaridenɔ da zɛ́n, à gbɛ̃ yĩdanɔ gba swɛ̃̀ɛ, à laakari dɔ gbãnasaridenɔa, à mɛna kũ gbɛ̃ sĩnda pínkio.

¹⁵ À laakari kɛ, á gbɛ̃ke sún a vãni fĩna bo kũ a vãnioro. À zɛ́ wɛtɛ àgɔ̃ a mana kɛkɔ̃nɛ kũ gbɛ̃ sĩnda pínkio gɔrɔ sĩnda pínki.

¹⁶ Àgɔ̃ kú kũ pɔnnao gɔrɔ sĩnda pínki.

¹⁷ Àgɔ̃ adua kɛ lakanaa sari.

¹⁸ Àgɔ̃ Luda sáabu kpá yã sĩnda pínki musu. Abire mɛ́ à deárɛ a pɔyenyĩna ũ Kirisi Yesu gũn.

¹⁹ Àsun Luda Nini tɛ́ kũ àdi káńgu dɛdɛro,

²⁰ àsun annabikɛyã gya boro.

²¹ À yã sĩnda pínki tàasi ká, àgɔ̃ a mana kũna,

²² à mì kɛ̃ vãnikɛna buri sĩnda pínkia.

²³ Luda Aafiade tó á kunna gɔ̃ kú adona yã sĩnda pínki gũn, à á nini kũ á wɛ̃̀ndiio kũ á mɛ̀ɛo dãkpãárɛ aafia taari sari ari ó Dikiri Yesu Kirisi sugɔrɔ.

²⁴ Luda kũ à á sísi à á sɛ́ náani vĩ, ani yã pì kɛárɛ.

²⁵ Ma gbɛ̃nɔ, à adua kɛwɛrɛ.

²⁶ À fɔ kpá ó gbɛ̃nɔa ń pínki kũ Luda gbɛ̃nɔ lɛ́pɛmmanaao.

²⁷ Ma naárɛ Dikirii, à takada dí kyó kɛ ó gbɛ̃nɔnɛ ń pínki.

²⁸ Ó Dikiri Yesu Kirisi gbɛ̃kɛ kɛárɛ.