1 TƐSALONIKADENƆ 4 - Bisã Bible 2005

Kunna lákũ Luda yei nà

¹ Yã kũ à gɔ̃̀n dí, ma gbɛ̃nɔ, a mà ó kĩnaa lákũ à mana á kunna ká Ludagu nà. Á kunna de lɛ kɔ̀, ama ótɛn wɛ́ kɛáwa, ótɛn kútɛ kɛárɛ ó Dikiri Yesu gũn, àgɔ̃ kun lɛ àgɔ̃ gɛ́o.

² Á yã kũ o dàárɛ kũ Dikiri Yesu tɔ́o dɔ̃.

³ Luda ye á kunna gɔ̃ adona, à mì kɛ̃ pãpãkɛnaaa.

⁴ Á baadi gɔ̃ a zĩda kũna dɔ̃ kũ bɛ̀ɛrɛɛo gbãsĩ sari,

⁵ adi kɛ kũ dà vãni nidɛnaao lán kifiri kũ ò Luda dɔ̃ronɔ bànlo.

⁶ Yã pìi musu gbɛ̃ke sún a gbɛ̃dake taki kɛ ke à taari kɛnɛro, zaakũ Dikiri ni wɛ́ tã yã bire taka kɛ̀rinɔ a lákũ o gĩnakɛ o òárɛ nà, o á sã gào.

⁷ Luda dí ó sísi ògɔ̃ kú kũ gbãsĩoro, séde ó kunna gɔ̃ adona.

⁸ Abire yãi gbɛ̃ kũ à gì yãdannɛna díi, adi kɛ bisãsirin à gìiro, Luda kũ àdi a Nini kũ à kú adona daógun à gìi.

⁹ Óni le ò yekɔ̃ina yã oárɛro, zaakũ kũ á zĩdao Luda yekɔ̃inaa dàárɛ.

¹⁰ Á kunna de lɛ kɔ̀, á ye ó gbɛ̃ kũ ò kú Masedonia bùsu gũnnɔi ń pínki. Ma gbɛ̃nɔ, o lɛ́ dàáwa, àgɔ̃ kɛ lɛ àgɔ̃ gɛ́o,

¹¹ à zɛ́ wɛtɛ àgɔ̃ kun yãkete sari, á baadi á zĩda yã kɛ à á zĩda zĩ kɛ, lákũ o dìtɛárɛ nà,

¹² de á kunna le à ká bàaidenɔgu, de àsun fu á zĩdaa à da gbɛ̃keiro.

Dikiri sunaa

¹³ Ma gbɛ̃nɔ, o ye àgɔ̃ yãpura dɔ̃ gbɛ̃ kũ ò andunia tònɔ yã musu, de á pɔ súngɔ̃ sira lán gbɛ̃ kũ ò tãmaa vĩronɔ bàro yãi.

¹⁴ Zaakũ o sì kũ Yesu gà à fùtɛ, lɛn dɔ Luda ni tó gbɛ̃ kũ ò andunia tò Yesu gũnnɔ ɛra ò su kãao lɛɛlɛ.

¹⁵ Yã kũ ótɛn oárɛ díkĩna bi Dikiri yãdannɛnaamɛ. Ókɔ̃nɔ gbɛ̃ kpara kũ ónigɔ̃ kun ari Dikiri sugɔrɔ zĩnɔ, óni do gbɛ̃ kũ ò andunia tòo pìnɔnɛ arɛro.

¹⁶ Dikiri mɛ́ ani bo ludambɛ, à kipa kũ yãditɛnnɛnaao kũ malaika gbɛ̃ zɔ̃kɔ̃ɔ kòtooo kũ Luda kãkãki ɔ́o, gbɛ̃ kũ ò gà Kirisi gũnnɔ ni vu bona gan káaku,

¹⁷ abire gbɛra ókɔ̃nɔ gbɛ̃ kpara kũ ó kunnɔ, oni ó sɛ́tɛ kũńwo lɛɛlɛ ari ludambɛ lukun ò da Dikirilɛ ĩa gũn, gbasa ògɔ̃ kú kãao ari gɔrɔ sĩnda pínki.

¹⁸ Abire yãi à kɔ̃ laakari kpátɛ kũ yã pìio.