1 TƐSALONIKADENƆ 3 - Bisã Bible 2005

¹ Kũ ódi fɔ̃ ò mɛna doro, o zɛo ò gɔ̃ Atɛni ó tɛ̃nɛ,

² o ó gbɛ̃ndo Timɔti, Luda zĩkɛri dake Kirisi baarunnakpanaa gũn zĩ̀áwa, de à á gba gbãna à á nɛ̀sɛ kpátɛárɛ á ludanaanikɛnaa gũn,

³ de á gbɛ̃ke laakari sún futɛ wɛ́tãmmanaa pì yãiro. Á dɔ̃ kũ á zĩdao kũ Luda abire taka dìtɛwɛrɛ.

⁴ Gɔrɔ kũ ó kú á kĩnaa, o gĩnakɛ o òárɛ kũ oni wɛ́ tãwá, akũ à kɛ̀ lɛ lákũ á dɔ̃ nà.

⁵ Abire yãi kũ mani fɔ̃ mà mɛna doro, ma a zĩ̀ à á ludanaanikɛna gwa. Ke Ibilisi á yɔ̃ à á gwá, ó zĩ kɛ̀ pãn yá, ó dɔ̃ro.

⁶ Kũ Timɔti sù sà, à á ludanaanikɛna kũ á yenyĩo baaruu kpàwɛrɛ. À pì ó yã dìgɔ̃ dɔágu kũ laasun manao, akũsɔ̃ átɛni ó bɛgɛ kɛ lákũ ótɛni á bɛgɛ kɛ nà.

⁷ Ma gbɛ̃nɔ, á ludanaanikɛna yã mɛ́ à tò ó laakari kpatɛna á yã musu ó wɛ́tãmmana kũ ó wario gũn pínki.

⁸ Zaakũ á zɛna gíngin Dikiri gũn, tera o ĩam pà sà.

⁹ Óni fɔ̃ ò Luda sáabu kpá á yã musu. O ó Luda sáabu kpà manamana kũ pɔnna zɔ̃kɔ̃ kũ odì kɛ a arɛ á yãiio.

¹⁰ Gwãani kũ fãnantɛ̃o odìgɔ̃ wɛ́ kɛ manamana, de ò le ò wɛ́ sikɔ̃lɛ, ò pɔ́ kũ à kĩ̀a á ludanaanikɛnaa gũn papaárɛ.

¹¹ Luda ó De kũ ó Dikiri Yesuo zɛ́ porowɛrɛ ò su ò á gwa.

¹² Dikiri yenyĩ kũ á vĩ kũ kɔ̃o kũ gbɛ̃ sĩnda pínkio karaárɛ, à dadaála lán yenyĩ kũ ó vĩ kãáo bà,

¹³ à á swɛ̃̀ gba gbãna de àgɔ̃ kun gbãsĩ sari taarisaridenɔ ũ Luda ó De arɛ ó Dikiri Yesu kũ a gbɛ̃nɔ pínki sugɔrɔa.