1 TƐSALONIKADENƆ 1 - Bisã Bible 2005

Tɛsalonikadenɔ zɛ́mɔnnɛnaa

¹ Makũ Pɔlu kũ Silasio kũ Timɔtio, ókɔ̃nɔ mɛ́ o takada díkĩna kɛ̃̀ Tɛsalonika sɔsi gbɛ̃ kũ ò kú De Luda kũ Dikiri Yesu Kirisio gũnnɔnɛ. Luda gbɛ̃kɛ kɛárɛ, à á gba aafiaa.

² Ó aduakɛnaa gũn á yã dìgɔ̃ dɔógu gɔrɔ sĩnda pínki, odìgɔ̃ Luda sáabu kpá á pínki yã musu.

³ Lákũ átɛn zĩ kɛ á ludanaanikɛnaaa nà, átɛn kokari kɛ yenyĩ gũn, akũsɔ̃ átɛn mɛna kɛ wɛ́dɔna ó Dikiri Yesu Kirisii yãi, yã pìnɔ dìgɔ̃ dɔógu Luda ó De arɛ.

⁴ Ó gbɛ̃ Luda yenyĩdenɔ, ó dɔ̃ kũ Luda á sɛ́,

⁵ zaakũ kũ o baaru nna kpàárɛ, ódi su kũ yã'onaao adoro, o su kũ Luda Nini gbãnaomɛ, yã pì ó kũna gbãna manamana. Á dɔ̃ lákũ ó kú á tɛ́ nà á aafia yãi,

⁶ akũ a gɔ̃ ókɔ̃nɔ kũ Dikirio dàdarinɔ ũ. Wari zɔ̃kɔ̃ɔ gũn a yã pìi sì kũ pɔnna kũ Luda Nini dàáguo,

⁷ akũ a zɛ́ mɔ̀ Yesude kũ ò kú Masedonia bùsu gũnnɔnɛ kũ Girisi bùsuuo pínki.

⁸ Dikiri yã bò á kĩnaa, adi zɛ Masedonia kũ Girisio adoro, á Yesu náanikɛna yã dàgula pínki, à baarukpana vĩ doro.

⁹ Òtɛn o lákũ o zɛ́ lè á kĩnaa nà, lákũ a kpɛ lì tãnanɔnɛ, a arɛ dɔ̀ Ludaa nà, akũ átɛn do Luda Wɛ̃̀ndide Yãpuradei,

¹⁰ átɛni a Nɛ́ Yesu kũ à a fùtɛ bona gan dã ari à bo ludambɛ, à su ó sí pɔfɛ̃ kũ Luda ni kipaḿmaa.