Aanlyn Bybel

1 SAMUƐLI 3 - Bisã Bible 2005

Dikiri lɛ́zuna Samuɛlii

¹ Nɛ́gɔ̃gbɛ̃ Samuɛli tɛn zĩ kɛ Dikirinɛ Ɛli ɔĩ. Gɔrɔ birea Dikiri yã dì su gbɛ̃a likalikaro, akũ wɛ́gupu'ena kun dasiro.

² Zĩkea Ɛli wutɛna a wútɛkia. A wɛ́ bùsa, àtɛn gu e manamana doro.

³ Samuɛli wutɛna Dikiri kpɛ́n, gu kũ Luda àkpati kunwa. Luda fitila dí ga kɔ̀ro.

⁴ Akũ Dikiri lɛ́ zù Samuɛlii. À wèa à pì: Makũ dí!

⁵ Akũ à bàa lɛ̀ à gɛ̀ɛ Ɛli kĩnaa à pì: N lɛ́ zùmain yá? Ma su. Akũ à pìnɛ: Mádi lɛ́ zunyĩro. Ǹ gɛ́ wútɛ. Akũ à ɛ̀ra à gɛ̀ɛ à wùtɛ.

⁶ Dikiri ɛ̀ra à lɛ́ zùi dɔ, akũ à ɛ̀ra à gɛ̀ɛ Ɛli kĩnaa à pì: N lɛ́ zùmain yá? Ma su. Akũ à pì: Ma nɛ́, mádi lɛ́ zunyĩro. Ǹ gɛ́ wútɛ.

⁷ Samuɛli sɔ̃ à Dikiri dɔ̃ gĩaro, Dikiri yã dí sua yã kɔ̀ro.

⁸ Dikiri ɛ̀ra à lɛ́ zùi a gɛ̃̀n aakɔ̃de, akũ à fùtɛ à gɛ̀ɛ Ɛli kĩnaa dɔ à pì: N lɛ́ zùmain yá? Ma su. Akũ Ɛli dɔ̃̀ sà kũ Dikiri mɛ́ àtɛn lɛ́ zu kɛfɛnna pìii.

⁹ Akũ à pìnɛ: Ǹ gɛ́ wútɛ. Tó à lɛ́ zùnyĩ sà, ǹ pi: Ǹ yã o Dikiri, n zɔ̀bleri sã dɔ. Akũ Samuɛli gɛ̀ɛ à wùtɛ a wútɛkia.

¹⁰ Dikiri sù à zɛ̀ gwe, à lɛ́ zùi lákũ à kɛ̀ yã nà à pì: Samuɛli! Samuɛli! Akũ Samuɛli pì: Ǹ yã o Dikiri, makũ n zɔ̀bleri ma sã dɔ.

¹¹ Akũ Dikiri pìnɛ: Ǹ ma! Mani yã kɛ Isarailanɔ tɛ́, gbɛ̃ kũ à a baaruu mà ni kɛkɛ à sã wɛ̃mɛ.

¹² Gɔrɔ birea mani àlesi kũ ma dɔ̀ Ɛli bedenɔa kɛ pínki zaa a naanaa ari a mìdɛnaaa.

¹³ Ma pìnɛ mani tó yã gɔ̃ wí a bedenɔ musu ari gɔrɔ sĩnda pínki yã vãni kũ à a yã dɔ̃ yãi. A nɛ́nɔ ń zĩda kpe bò, akũ adi gíńnɛro.

¹⁴ Abire yãi ma la dà Ɛli bedenɔ yã musu ma pì: Sa'ona ke gbadana ni Ɛli bedenɔ taari kɛ̃ḿma zikiro.

¹⁵ Samuɛli wùtɛ ari gu dɔ̀, akũ à Dikiri kpɛ́ gbànɔ wɛ̃̀wɛ̃. À wɛ́gupu kũ à è ona Ɛlinɛ vĩna vĩ.

¹⁶ Akũ Ɛli a sìsi à pì: Samuɛli ma nɛ́! À wèa à pì: Makũ dí!

¹⁷ Akũ à a là à pì: À pìnnɛ deraa? Ǹsun yã pì utɛmɛnɛro. Tó n yã kũ à ònnɛ ke ùtɛmɛnɛ, Luda yã kɛnnɛ pãsĩpãsĩ.

¹⁸ Akũ Samuɛli yã pìi bàbanɛ pínki, adi a ke utɛnɛro. Akũ Ɛli pì: Dikirimɛ a ũ. Lákũ à kɛ̀nɛ mana nà à kɛ.

¹⁹ Samuɛli tɛn zɔ̃kɔ̃ kũ, akũsɔ̃ Dikiri kú kãao. Adi tó yã kũ à òo lɛ̀tɛ pãro.

²⁰ Akũ Isaraila kũ ò kú zaa Dã ari Bɛsɛbanɔ dɔ̃̀ ń pínki sà kũ Samuɛli bi Dikiri annabiimɛ yãpura.

²¹ Dikiri dìgɔ̃ bo àgɔ̃ su Samuɛlia Silo, gu kũ à a zĩda mɔ̀nɛn káaku. Àdi yã onɛ, akũ Isarailanɔ tɛni a yã ma ń pínki.

« Vorige

Volg ons:

Geborgde skakels

Advertensies