Aanlyn Bybel

1 SAMUƐLI 1 - Bisã Bible 2005

Ɛlɛkana kũ a gbɛ̃nɔ

¹ Gɔ̃gbɛ̃ ke kú Rama, Ɛflaimu bùsu gusĩsĩden. Zufu burimɛ, a tɔ́n Ɛlɛkana, Yeroamu nɛ́mɛ. Ɛflaimu buri kũ òdi pi Zufu pì mɛ́ à Tohu ì, akũ Tohu Ɛliu ì, akũ Ɛliu Yeroamu pìi ì.

² Ɛlɛkana nɔnɔ vĩ mɛ̀n pla, a káaku tɔ́n Ana, a plade tɔ́n Penina. Penina mɛ́ à nɛ́nɔ vĩ, Ana sɔ̃ à nɛ́ vĩro.

³ Wɛ̃̀ kũ wɛ̃̀ɛo gɔ̃gbɛ̃ pìi dì bo a wɛ̃tɛ gũn à gɛ́ donyĩ kɛ Dikiri Zĩ̀karidenɛ zaa Silo à sa oa. Ɛli nɛ́gɔ̃gbɛ̃ mɛ̀n planɔ Ɔfini kũ Finɛasio kú gwe Dikiri gbàgbarinɔ ũ.

⁴ Gɔrɔ kũ Ɛlɛkana sa ò, àdi a nɔ̀bɔ kpá a nanɔ Peninaa kũ a nɛ́gɔ̃gbɛ̃nɔ kũ a nɛ́nɔgbɛ̃nɔ ń pínki,

⁵ akũ àdi a lɛu pla kpá Anaa kũ à yei yãi, bee kũ Dikiri à kɛ̀ para ũ.

⁶ A gɔ̃ba pì sɔ̃, àdigɔ̃ a fobo a parakɛna yãi, de à a nɛ̀sɛ futɛnɛ.

⁷ Lɛn àdigɔ̃ kɛnɛ lɛ wɛ̃̀ kũ wɛ̃̀ɛo. Tó Ana gɛ̀ɛ Dikiri kpɛ́ gũn, a gɔ̃ba pìi dì a fobo, akũ àdi ɔ́ɔ dɔ ari à fua à pɔ́ ble.

⁸ Akũ a zã dì a lá: Ana, bɔ́ mɛ́ à n le, ntɛn ɔ́ɔ dɔ, ńdi pɔ́ bleroo? À kɛ̀ dera n nɛ̀sɛɛ yàkaa? Má dennɛ nɛ́gɔ̃gbɛ̃ mɛ̀n kurilaroo?

⁹ Zĩkea kũ ò kú Silo, ò pɔ́ blè ò làka, sa'ori Ɛli vutɛna gbàaa Dikiri kpɛ́ kpɛ́lɛlɛa, akũ Ana fùtɛ

¹⁰ kũ nɛ̀sɛyakana zɔ̃kɔ̃ɔo, à wɛ́ kɛ̀ Dikiria kũ ɔ́ɔdɔo manamana.

¹¹ Akũ à lɛ́ kɛ̀ Dikiria à pì: Dikiri Zĩ̀karide, ǹ tó makũ n zɔ̀bleri yã dɔngu! Ǹ ma wɛ̃nda gwa! Tó ma yã dí sãnguro, akũsɔ̃ n ma gba nɛ́gɔ̃gbɛ̃, mani a kpámma n pɔ́ ũ ari a wɛ̃̀ndi lɛ́n, gɛ̃ ni na a mìia zikiro.

¹² Kũ a wɛ́kɛna Dikiriaa pì tɛn lákaro, akũ Ɛli tɛni a lɛ́ gwa tíii.

¹³ Ana tɛn adua pì kɛ a swɛ̃̀ɛ gũn, a lɛ́ mɛ́ àtɛn kɛ zúkizuki, adi yã o à bò a lɛ́n gbɛ̃ke màro. Ɛli tɛn da wɛ̃ tɛni a dɛmɛ,

¹⁴ akũ à pìnɛ: Wɛ̃ nigɔ̃ n dɛ ari bɔrɛmɛɛ? Ǹ mì kɛ̃ wɛ̃a.

¹⁵ Akũ Ana wèa à pì: Adi kɛ lɛnlo Baa! Nɔgbɛ̃ pɔsiraden ma ũ, mádi wɛ̃ ke í gbãna ke miro. Matɛni ma yã'ũmmananɔ o Dikirinɛmɛ.

¹⁶ Ǹsun makũ n zɔ̀bleri ditɛ nɔgbɛ̃ pã ũro. Ma nɛ̀sɛ yakana kũ ma kunna bídi gũnwo mɛ́ à tò matɛn wɛ́ kɛ la ari tera.

¹⁷ Akũ Ɛli pìnɛ: Ǹ tá aafia. Isarailanɔ Luda n gba pɔ́ kũ n wɛ́ kɛ̀aa.

¹⁸ Akũ Ana pì: Ǹ tó makũ n zɔ̀bleri yã kángu. Akũ à tà à pɔ́ blè a ãnn wère.

Samuɛli inaa

¹⁹ Kũ gu dɔ̀, ò fùtɛ kɔnkɔkɔnkɔ ò gɛ̀ɛ ò donyĩ kɛ̀ Dikirinɛ. Akũ ò ɛ̀ra ò tà ń wɛ̃tɛa Rama. Kũ Ɛlɛkana wùtɛ kũ a nanɔ Anao, a yã dɔ̀ Dikirigu.

²⁰ Gɔrɔ birean à nɔ̀ɔ sì à nɛ́ ì gɔ̃gbɛ̃ ũ, akũ à tɔ́ kpànɛ Samuɛli, zaakũ à pì: Ma a wɛ́ kɛ̀ Dikiriamɛ.

²¹ Akũ Ɛlɛkana fùtɛ kũ a bedenɔ ń pínki, ò ɛ̀ra ò gɛ̀ɛ sa kũ òdi o wɛ̃̀ kũ wɛ̃̀ɛo o Dikiria, ò lɛ́ kũ ò gbɛ̃̀nɛ fĩna bo.

²² Ama Ana dí gɛ́ro. À pì a zãnɛ: Tó nɛ́ pìi kɛ̃̀, akũ mani gɛ́ a mɔ Dikirinɛ, anigɔ̃ kú gwe gɔrɔ sĩnda pínki.

²³ Akũ a zã pìnɛ: Lákũ à kɛ̀nnɛ mana nà ǹ kɛ. Ǹ mɛna ari à kɛ̃. Dikiri tó yã pì kɛ. Akũ nɔgbɛ̃ pì a nɛ́ gwà ari à gɛ̀ɛ à kɛ̃̀o.

²⁴ Kũ à kɛ̃̀, akũ à a sɛ̀ à gɛ̀ɛ kãao Dikiri kpɛ́n Silo kũ zùsa wɛ̃̀ aakɔ̃o kũ wísitio konko do kũ sèwɛ̃o tùru do. Nɛ́ pìi kɛ̀ kɛfɛnna ũ.

²⁵ Kũ ò zùsaa pìi kùtu kpà, akũ ò gɛ̀ɛ kũ nɛ́ pìio Ɛli kĩnaa.

²⁶ Akũ Ana pìnɛ: Baa, ǹ gaafara kɛmɛnɛ! Kũ n kunnaao makũmɛ nɔgbɛ̃ kũ à zɛ la matɛn wɛ́ kɛ Dikiria n wára ũ.

²⁷ Nɛ́ díkĩnan ma wɛ́ kɛ̀ Dikiria, akũ à ma gba pɔ́ kũ ma gbɛ̀kaaa pìi.

²⁸ Abire yãin ma su a kpá Dikiria, de àgɔ̃ kun a pɔ́ ũ ari a wɛ̃̀ndi lɛ́n. Akũ ò donyĩ kɛ̀ Dikirinɛ gwe.

« Vorige

Volg ons:

Geborgde skakels

Advertensies