Wuɖufí 1 - Ɓǎsɔ́ɔ̀ Báɓòɔ̀

Ɛ̀ɖìmɛ́ɖɛ̀ kè ɔ gbǒ-xwíníín-nyɔ̀ ɓě jàɖàìn ɖé Móà-ɓòɖò kɔ̃

¹ Ti ɓɛ́ tɔ̀ɔ̀-ɓìɔ̀ ɓě nì ma Éézùɖùɛ̀-ɓòɖòɔ̀ nàǐn nyɛɛ, púɛɛ, mɔ́ vɛ̀nɛ̀ ɖò kpá ma ɖé Éézùɖùɛ̀-ɓòɖòɔ̀ kɔ̃. Ɓó tia ɓaɖaa, gàa ɖò kè ɔ gmàà ɔ kè waà dyú-gàà sɔ̃́ sɔ̀ ma ɖé Bɛ́fèɖèhɛ̃́ɛ̀-hwɔ̀ɖɔ̀ nìà ɖé Júɖà-ɓòɖòɔ̀ kɔ̃ɛɛ mú, ké wa jàɖàìn ma ɖé ɓóɖó mɔ̀ Móà kɛɛ kɔ̃, ɓɛ́ wa ké ma ɖé cĩ́ ɓó ti wè mú.

² Gàaɔ̀ nyɛ́nɛ́ mɔ̀ ma Ɛ̀ɖìmɛ́ɖɛ̀, ké ɔ gmààɔ̀ nyɛ́nɛ́ mɔ̀ ma Nìómì, ké waà dyú-gàà sɔ̃́ ɓěɔ̀ nyɛ́nɛ́ mɔ̀ ma Máɖɔ̀ùn kè Kíɖìɔ̀ùn. Wa mɔ̀ Ɛ́fàɖà-nyɔ̀ ɓě. Wa mu ma ɖé Móà-ɓòɖòɔ̀ kɔ̃, ké wa cĩ́ ma ɖé.

³ Kɛɛ Nìómìɛ̀ dyú-ɓǎ mɔ̀à Ɛ̀ɖìmɛ́ɖɛ̀ kɛɛ mɛ́ ma, ké Nìómì kè ɔ dyú-gàà sɔ̃́ ɓěɔ̀ ɖòùn sè ma.

⁴ Hwɛ̀ ké ɔ dyú-gàà sɔ̃́ ɓěɔ̀ kpɔ̃ ma Móà-màà ɓě dyi. Waà màa ɓěɔ̀ ɖòɛ̀ nyɛ́nɛ́ mɔ̀ ma Ɔ́pà, ké nyɔ tɔ̀ɔ̀ nyɛ́nɛ́ mɔ̀ ma Wuɖufí. Ti ɓɛ́ wa ɖǎ ma ɖé ɓóɖóɔ̀ kɔ̃ zɔ̃ ɓaɖa-bùè nyuɛɛ,

⁵ púɛɛ, Máɖɔ̀ùn kè Kíɖìɔ̀ùn mɛ́ ma ɖekè, ké Nìómì ɖòùn sè ma. Ɔ se ma dyú-ɓǎ mɔɔ dyú ɖò ɓéɖé ɖe.

Wuɖufí sí Nìómì kíɖíí, ké wa mu ɖé Bɛ́fèɖèhɛ̃́ɛ̀-hwɔ̀ɖɔ̀ɔ̀ mú

⁶ Wé ɖòɛ̀ ɓaɖaa, Nìómì wɔ̃́ɔ ma kà ɓɛ́ Bounɓoɔ̀ ɖǎ ɔ nyɔ ɓěɔ̀ wìǐn dyé, ké ɔ ɖǎ wa ɖii-ɖɛ̀ nyí ɖeɛ. Ɔ jèɛɛ, ɔ kè ɔ dyúɛ̀ gmàà sɔ̃́ ɓěɔ̀ naɓaà ma ɓɛ́ wa ké ma ɖé Móà-ɓòɖòɔ̀ kɔ̃ sɔ̀.

⁷ Ké wa kpá ma hwìè xwíníín, ɓɛ́ wa ké ma ɖé Júɖà-ɓòɖòɔ̀ kɔ̃ mu.

⁸ Ti ɓɛ́ wa nì ma hwìèɔ̀ kɔ̃ɛɛ, Nìómì cɛ̃ɛ ma ɔ dyúɛ̀ gmàà sɔ̃́ ɓěɔ̀ gbo, ké ɔ ɖá, “Ɓě kɔ́ìn ɖe, ɓɛ́ ɓě ké ɓěɛ̀ ɖe ɓě gbo ɖe mu. Bounɓoɔ̀ mɛ nyu ɓě nɔ̀mɔ̀ dyíin dyí kà ɓě mɔ̀ùn nyuàà nyɔ ɓě kpáà dyiɛ kè mɔ́ún dyíɛ.

⁹ Ké ɔ mɛ kpá ɓě gbo, ɓɛ́ ɓě ké dyú-ɓǎ ɖìè ɓě dyi kpɔ̃ ɖe, ɓɛ́ ɓě ké ɓě mìɔùn nììn ɓíɖí-taún kɔ̃̀.” Ké ɔ nyá ma wa wɔ̃. Púɛɛ, wa ɖú ma kpé-po-wùɖùǐ,

¹⁰ ké wa ɖá, “À kè mɔ̀ mu nì nyɔ ɓěɔ̀ gbo ɖe muùn wɛ̃́ɛ́.”

¹¹ Kɛɛ Nìómì cɛ̃ɛ ma wa gbo, ké ɔ ɖá, “Ní dyú-màà ɓě, ɓě kɔ́ìn ɖe. Ɖɛ́ kɔ̃̀ jè ɓě kéà ḿ kíɖíí síɛ́? Ɓě dyéɛ, má, ḿ se dyú ɖò wóɖóɛ̀n ɓɛ́ìn ɖe, ɓɛ́ wa ké ɓěɛ̀ dyú-ɓǎ ɓě jǔe?

¹² Ní dyú-màà ɓě, ɓě kɔ́ìn ɓě ɓíɖí ɖe, sepóɛɖé ḿ ɖǎ nyɛ mìɔ, ké ḿ se dyú-ɓǎ ɓéɖéɛ ɓɛ́ìn ɖe. Kɛbì ḿ mɛ dèɔ̌ máa hwòɖǒ kɔ̃ kà ḿ ɓɛ́ìnɔ̌ má dyú-ɓǎ ɓéɖéɛ keɛɛ ní, ké ḿ dyiɔ́ má dyú-ɓǎ ɖò dyéɛ ɓɛ́ìn ɓó máaǔn, ɓɛ́ ḿ kéɔ́ má dyú wóɖóìn ní,

¹³ nìí, ɓě seɔ́ má dyú-ɓǎ ɖò dyi kpɔ̃ɔ́ muù? Ɓě ɓɛ́ìnɔ̌ má hwòɖǒ kuɛ, ɓɛ́ wa kéɔ́ má ɖɛ hwɛ̀ hwɛ̀ɛ̀? Ní dyú-màà ɓě, ɓě ɓɔ́ ḿ kíɖíí síɛ, sepóɛɖé Bounɓoɔ̀ ɖǎ ḿ gǎ-kà kpɔ̃, ké ɓě jè nyùìn ḿ wìì.”

¹⁴ Ti ɓɛ́ Nìómì hwɔ ma wùɖùɛ̀ kɛɛ, wa ɖú ma kpé-po-wùɖùǐ ɖe. Ké Ɔ́pà po ma ɔ dàɔ̀ hwuɖu ɖǎ hwɔ dyììn ɖé ɔ wɔ̃-nyá-nyá mú. Kɛɛ Wuɖufí mɔ̀ùn sí ma ɔ dàɔ̀ kíɖíí wɛ̃́ɛ́.

¹⁵ Hwɛ̀ ké Nìómì cɛ̃ɛ ma ɔ gbo, ké ɔ ɖá, “Dyéɛ kà ɓɛ́ nì mǔè-bɔ̀nɔ̌ɔ̀ ɖǎ ɔ nyɔ ɓěɔ̀ kè ɔ gèɖèpɔ́ɔ̀ ɓěɔ̀ gbo ɖe muɛ. Sí ɔ kíɖíí, ɓɛ́ ɓě ké ɖe mu.”

¹⁶ Kɛɛ Wuɖufí cɛ̃ɛ ma ɔ gbo, ké ɔ ɖá, “Ɓɔ́ ḿ ɓɔ́í poɛ ɓó nì kíɖíí sí jè. Ḿ kè mɔ̀ mu muùn wɛ̃́ɛ́. Dɛ̀ nì mu muùn wɛ̃ɛ, ɖéɛ̀ ní mu muùn, ké dɛ̀ nì mu cĩ́ìn nyɛɛ, ɓóɛ̀ ní mu cĩ́ìn. Nì nyɔ ɓěɔ̀ mu ní nyɔ ɓě jǔùn, ké nì Gèɖèpɔ́ɔ̀ mu ní Gèɖèpɔ́ɔ̀ jǔùn.

¹⁷ Dɛ̀ nì mu mɛ́ìn nyɛɛ, ɓóɛ̀ ní mu mɛ́ìn, ké ɓóɛ̀ wa mu ḿ dyóɖóún zàìn. Bounɓoɔ̀ mɛ zà ɖé ní fɛ̀ɛ̀ɔ̀, ɔ jǔ ké gĩɔ ɖòùn se à gbo zaìn ní.”

¹⁸ Ti ɓɛ́ Nìómì dyéɛ ma kà ɓɛ́ Wuɖufí ɖǎa ma kɔ̃ jìnììn kóɖó-kóɖó, ɓɛ́ wa ké mu wɛ̃́ɛ́ kɛɛ, ɔ se ma Wuɖufí kɔ̃ nɛ́ ɖe ɓó ɔ ɓíɖí ɖe kɔ́ìn jè.

¹⁹ Sɔ̀ìn ɓóɛ gboɛɛ, wa sɔ̃́ɔ̀ mu ma tee, ké wa nyini ma ɖé Bɛ́fèɖèhɛ̃́ɛ̀-hwɔ̀ɖɔ̀ɔ̀ mú. Ti ɓɛ́ wa dyá ma hwɔɖɔɔ̀ kɛɛ, hwɔɖɔ gànáɔ̀ túò ma dyi ɓó wa jè. Ké màa ɓě nì ma ɖé hwɔɖɔɔ̀ múɛɛ cɛ̃ɛ ma, ké wa ɖá, “Nyɔ nìà kɛ mɔ̀ Nìómìì?”

²⁰ Ké Nìómì cɛ̃ɛ ma wa gbo, ké ɔ ɖá, “Ɓě ɓɔ́ ḿ Nìómì ɖáìn ɖe, kɛɛ ɓě mɛ ɖáìn ḿ Máwàɖà, sepóɛɖé kpé-séín-ɓéɖé-Gèɖèpɔ́ɔ̀ ɖǎ ḿ ɖɛ nɛɛ̀-nɛɛ̀ bũ̌ nyu.

²¹ Ti ḿ sɔ̀ ma ɓóɖóɛ̀ múɛɛ, ní xwa ɓěɔ̀ dyíìn ma dyi, kɛɛ Bounɓoɔ̀ ɖǎ ní fóɖóúnɔ̀ ɖe dyà. Ɖɛ́ kɔ̃̀ jè ɓě nìà ḿ Nìómì ɖáǐn ɖeɛ́? Sepóɛɖé Bounɓo mɔ̀à kpé-séín-ɓéɖé-Gèɖèpɔ́ɔ̀ kɛɛ ɖǎ ḿ zaa dúún wáɖá, ké ɔ ɖǎ ḿ gǎ kɔ̃ dyà.”

²² Kǎà Nìómì kè ɔ dyúɛ̀ gmàà Wuɖufí mɔ̀à Móà-mààɔ̀ kɛɛ nyu ma ɖé Móà-ɓòɖòɔ̀ kɔ̃ sɔ̀ɔ̀. Ti wa dyi ma kà ɖé Bɛ́fèɖèhɛ̃́ɛ̀-hwɔ̀ɖɔ̀ɔ̀ múɛɛ mɔ̀ ma báɖè-cɛ̃-tìɔ̀ gbɔ-dè-dè.