Wɛ́ɖɛ́ 1 - Ɓǎsɔ́ɔ̀ Báɓòɔ̀

DÚ KĨ́ÍN-KĨ́ÍNƆ̀ ( 1:1–41:13 ) Nyɔ ɓě ɓɛ́ mana nì kɔ̃ɛ

¹ Nyɔ ɓě ɓɛ́ mana nì kɔ̃ɛɛ mɔ̀ nyɔ ɓě ɓɛ́ wa ní kpɔ̃ hwòɖǒ-kɔ̃in-nyìnììn-nyɔ̀ ɓěɛ̀ ná-wùɖù dyi, mɔɔ ké wa ní sí nàmàǔn-nyɔ̀ ɓě nììn kpeɖe kíɖíí, mɔɔ ké wa ní po ɖé nyɔ ɓě ɓɛ́ wa se ɖɛ ɓě ɓá Bounɓoɔ̀ jè dyíɛɛ kpéín dyéɛɛ gbo gbɔɛ.

² Kɛɛ wa hwòɖǒ dèìn ɖé Bounɓoɔ̀ gma ɓěɔ̀ dyi-kpɔ̃-kpɔ̃ múin, ké wa nàìn gma ɓěɔ̀ jè hwìɖǐi ɓó ti séín.

³ Nyɔ ɓě nì náa kè cu-gɔ̃̀ ɓě ɓɛ́ wa mɛ ɓó ní ɖòɛ̀ kpóó-gbìǐɛɛ hwɔìn ní. Cu ɓěɔ̀ tòɖò-tì dyi ɓó nyini ní, wa tòɖò kánáá pū, ké wa ní wáɖá mí fɔɔ cá. Nyɔ ɓě nì náa, ɖɛ kã̀ìn séín wa kpa sɔ̃ún wɛ̃ɛ wóɖó mú kánáá pū.

⁴ Kɛɛ hwòɖǒ-kɔ̃in-nyìnììn-nyɔ̀ ɓěɔ̀ jè se ná nì fɔɔ. Wa hwɔìn feɖe ɓɛ́ pìɔ̌ kpaà kɛ.

⁵ Ɔ ná nì jèɛɛ, hwòɖǒ-kɔ̃in-nyìnììn-nyɔ̀ ɓěɔ̀ zaa mu wa kpɔ̃ùn wɛ̃́ɛ́ pū. Wa ɖò se dyí-sɛ́ɖɛ́ìn-nyɔ̀ ɓěɔ̀ hwìɛ̀ nìɛ̌ mu.

⁶ Bounɓoɔ̀ gmɔ̀ dyí-sɛ́ɖɛ́ìn-nyɔ̀ ɓěɔ̀ dyí, kɛɛ hwòɖǒ-kɔ̃in-nyìnììn-nyɔ̀ ɓěɔ̀ mu mú gbɔɔ̀ùn.