Tátɔ̀ 3 - Ɓǎsɔ́ɔ̀ Báɓòɔ̀

Nyuu-kpèɖè nɔ̀mɔ̀ dyíin

¹ M̀ mɛ dyàà nì nyɔ ɓěɔ̀ hwìɖǐi, ɓɛ́ wa ké waà wuɖuí-kɔ̃̀-nyɔ̀ ɓěɔ̀ kè waà gɔ̌mànà-nyɔ̀ ɓěɔ̀ xwíɖíi nì, ɓɛ́ wa ké wa wuɖu nyu, ɓɛ́ wa ké ti dyé ɓɛ́ wa ké ɖɛ nɔ̀mɔ̀ dyíin séín nyu.

² Cɛ̃ɛ wa gbo, ɓɛ́ wa ní kɔ̃̀ ɖà nyɔ ɖò ɖɛ gbà kɔ̃ún cɛ̃, ɓɛ́ wa ké se jɛ, kɛɛ ɓɛ́ wa ké kpeɖeín nɔ̀mɔ̀. Wa mɛ ɓéɖé kpeɖe nɔ̀mɔ̀ dyíin ɓó nyɔǔn séín gbo.

³ Sepóɛɖé à mɔ̀ùn zuɖu ma, ké à se ma nyɔǔn wuɖu nyu, ké à se ma hwìè nɔ̀mɔ̀ dyíinɔ̀ xwíníín nì kĩ́ín. À mɔ̀ ma ɖɛ-gbà-nyu-tò kè à hwòɖǒɛ̀-dyi-dè-ɖɛ̀ kã̀ìn-kã̀ìn séín ɓěɛ̀ gǐì ɓě. À zĩ̀ìn ma à ti ɖé hwòɖǒ-kɔ̃in-nyìnììn-nyìnììn kè hwɛ̀nɛ̌ mú. Nyɔ ɖíɛ́ ɓě nyɛ́ ma à mú, ké à mɔ̀ùn nyɛ́ ma wa mɔ̀ùn mú.

⁴ Ti ɓɛ́ Gèɖèpɔ́ɔ̀ mɔ̀à à Póìn-nyɔ̀ɔ̀ kɛɛ tɛ̀mɛ̀ìn ma ɔ kpeɖeín-nɔ̀mɔ̀-nɔ̀mɔ̀ɔ̀ kè ɔ ɖɛ̀ɓɛ̀ǐn-ɖɛ̀ɓɛ̀ǐnɔ̀ nyɔǔn dyíɛɛ,

⁵ ɔ póìn ma à. Ɔ se ma ɓó kũ̀à nɔ̀mɔ̀ dyíin ɓɛ́ à ɖǎ ma nyuɛɛ jè, kɛɛ ɔ póìn ma à ɖé ɔ mìɔùn nììn nyɔǔn-wìǐn-dyé-dyé mú. Ɔ póìn ma à dyììn ɖé dèɖè-dèɖè kɔ̃̀ mú ɓɛ́ Zùù Hwɛ̀ǐn-hwɛ̀ǐnɔ̀ nyíà nyɔ wóɖó-wóɖó ɖìè kè fɛ̀ɛ̀ ɖìè kɛɛ mú.

⁶ Sepóɛɖé Gèɖèpɔ́ɔ̀ po ma ɔ Zùù Hwɛ̀ǐn-hwɛ̀ǐnɔ̀ à kɔ̃ dyììn ɖé Jízɛ̀ Kɛ́ɖɛ́ì mɔ̀à à Póìn-nyɔ̀ɔ̀ kɛɛ mú.

⁷ Ɔ nyuɛ náa, ɓɛ́ ɔ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ kéɛ nyu ɓɛ́ à ké dyí sɛ́ɖɛ́ìn ɓó Gèɖèpɔ́ɔ̀ gbo, ɓɛ́ sè-ná-sèɛ̀ fɛ̀ɛ̀ ɓɛ́ à dèà hwòɖǒ kɔ̃ɛɛ ké à kɔ̃̀ɔ̀-ɖɛ̀ jǔ.

⁸ Ɖɛ nìà kɛ mɔ̀ ɖɛ wa cɛ̃, ké à ɓɛ́ìn hwòɖǒ kɔ̃ dèɛ̀ kɛ. Ḿ mɔ́ ɓɛ́ m̀ ké ɖɛ ɓě nìà kɛ jìì kɔ̃ nɛ́ìn, ɓɛ́ nyɔ ɓě ɓɛ́ wa taɓa Gèɖèpɔ́ɔ̀ hwìɖǐǐɛɛ ké ɖɛ nìà kɛ jè gbo kɔ̃̀. Ɖɛɔ̀ mɔ̀, ɓɛ́ wa ké dúún ku, ɓɛ́ wa ké nɔ̀mɔ̀ dyíin nyu. Ɖɛ ɓě nìà kɛ nɔ̀mɔ̀ dyíin, ké wa mɔ̀ ɓó nyɔǔn nɔ̀mɔ̀ dyíin dyé jè.

⁹ Kɛɛ m̀ mɛ táà ɖɛ cá-cá jè dòǐn-zà-zà kè ɖíì-po-po zɛin kè ɖɛín-zà-zà ɔ kè dòǐn-zà-zà ɓá gmaɔ̀ jè dyíɛɛ dyi. Wa se nyɔ ɖò gbo kpáa ɓɛ́ìn, ké wa se ɖɛ ɖò mú nì.

¹⁰ M̀ mɛ pòìn nyɔ ɓɛ́ ɔ dyà mú-ge-ge kɛɛ náún sɔ̃́, ké nìí, m̀ mɛ táà ɔ jè dyi.

¹¹ Sepóɛɖé m̀ dyuò kà nyɔ nì kà kɛɛ nyìnììn dyíin, ké ɔ nàmàǔn ɓěɔ̀ wáɖá ɔ zaa dúún wɛ̃.

Náún-po-wùɖù

¹² Ḿ dyi Átìmà mɔɔ Tíkíkà ɖé m̀ gbo ɖoɓo ní, nìí, m̀ mɛ vɔ̃ cá ɓɛ́ m̀ ké ɖé ḿ gbo Nìkɔ́pɔ́ɖè-hwɔ̀ɖɔ̀ɔ̀ mú dyi, sepóɛɖé ḿ ɖǎa gbɔ po, ɓɛ́ ḿ ké ɖé sɔ̃̀ɔ̀-tìɔ̀ dyéìn.

¹³ Vɔ̃ ɓɛ́ m̀ ké Zínà mɔ̀à kùì-nyɔ̀ɔ̀ kɛ kè Àpɔ́ɖè cuò nɔ̀mɔ̀ dyíin. M̀ mɛ dyéɛ jè gbo, ɓɛ́ wa ké ɖɛ séín ɓě ɓɛ́ wa mɔ́ɛɛ ɓéɖé.

¹⁴ À nyɔ ɓěɔ̀ mɛ cɛ̃́ kà wa ké dúún ku ɓɛ́ wa ké kũ̀à nɔ̀mɔ̀ dyíin nyuɛɛ jè, ɓɛ́ wa ké nyɔ ɓě kɔ̃̀ ɓɛ́ wa ké ɖɛ dyéɛɛ gbo kpá. Wa cĩ́-cĩ́ ɓéɖé ɓɛ́ ɔ ké ɖɛ ɖò mú nì.

¹⁵ Nyɔ séín ɓě nìà nɔ̄ ḿ gboɛɛ zà m̀ nyíɔún. Ḿ zà nyɔ ɓě ɖɛ̀ɓɛ̀à à mú ɖé hwìɖǐǐ-taɓa-ɖɛ̀ ɓěɔ̀ múɛɛ nyíɔún. Mana mɛ nì ɓě séín kɔ̃.