Wɛ̀ɖɛ̀ɓèɖésĩ̀ɔ̀ 20 - Ɓǎsɔ́ɔ̀ Báɓòɔ̀

Zɔ̃ táázĩ̀ìnɔ̀

¹ Ké ḿ dyé ma ínjà ɖò ɖe, ké ɔ sɔ̀ìn ma ɖé dyɔún. Ɔ ɓéɖé ma ɓí vɛ̀nɛ̀ tɔ̀mɔ̀ǔn-tɔ̀mɔ̀ǔnɔ̀ kaàìn-ɖɛ̀ɔ̀ kè dyɔ̀ɔ̌ vɛ̀nɛ̀ ɖò xwa.

² Ké ɔ kpɔ̃ ma ɖɔ-sɛ̀ ɓɛ́ ɔ mɔ̀à sɛ sùàɔ̀, ɓɛ́ ɔ mɔ̀à Nɔɔ́-nàmàǔn, ɓɛ́ ɔ mɔ̀à Sétɔ̃̀ kɛ. Ké ínjàɔ̀ sã ma ɔ, ɓɛ́ ɔ ké ma zɔ̃ táázĩ̀ìn ɖò ɖé dyɔ̀ɔ̌ɔ̀ mú nyu.

³ Ké ínjàɔ̀ po ma ɔ ɓí vɛ̀nɛ̀ɔ̀ mú, ké ɔ kãa ma, ké ɔ sũɛ ma kɔ̃in, ɓɛ́ ɔ ní kɔ̃̀ ɖà ma ɓóɖó-dù ɓěɔ̀ cá ɖe fɔɔ, ɓɛ́ zɔ̃ táázĩ̀ìnɔ̀ ké ma zi hwɛ̀. Ɔ ɖǎ ná nìǐn, ɔ ɓéɖé ɔ ké buɛ̀ ɓó ti tííwè xwíníín.

⁴ Ké ḿ dyé ma zèè ɓě, ké nyɔ ɓě ɓɛ́ wa nyí ma kpé, ɓɛ́ wa ké ma zaa wɔ̃ poɛɛ kò ma wa kɔ̃. Ké ḿ dyé ma nyɔ ɓě ɓɛ́ wa ɖǎ zɔ̃̌ɔ̀ dúí cɛ̃ ɓó zàse ɓě ɓɛ́ wa nyu ma kà Jízɛ̀ jè kè ɓó Gèɖèpɔ́ɔ̀-wùɖùɔ̀ jè kɛɛ zùù ɓěɔ̀. Wa se ma xwáɖá-xwíɖíi-nìmììɔ̀ kè ɔ hwɔìn-ɖɛ̀ɔ̀ ɓiè, ké wa se ma nimiiɔ̀ bɛ̃̌ ɖò wa dyúa-kpà mɔɔ wa sɔ̃ kɔ̃ ɓéɖé. Wa ɓéɖé ma fɛ̀ɛ̀, ké wa kè Kɛ́ɖɛ́ì kɔ̃̀ ma nyɔǔn wuɖuí ɓó zɔ̃ táázĩ̀ìn xwíníín.

⁵ Nyɔ tɔ̀ɔ̀ ɓě ɖǎ ma mɛ́ɛ se ma fɛ̀ɛ̀ ɓéɖé tee, ké zɔ̃ táázĩ̀ìnɔ̀ zi ma hwɛ̀. Nyɔ-gĩɔ-wóɖó-wóɖó kĩ́ín-kĩ́ínɔ̀ nìàǒ wɛ̀.

⁶ Nyɔ ɓě ɓɛ́ wa nìà gĩɔ-wóɖó-wóɖó kĩ́ín-kĩ́ín nììnɔ̀ múɛɛ, wa ɓéɖé múà, ké wa mɔ̀ Gèɖèpɔ́ɔ̀ nyɔ ɓě. Gĩɔɔ̀ sɔ̃́ nììnɔ̀ se wa kpé kɔ̃ún ɓéɖé. Wa mu Gèɖèpɔ́ɔ̀ kè Kɛ́ɖɛ́ìɛ̀ sáa-zà-nyɔ̀ ɓě jǔùn. Wa kèɔ̀ kè mu nyɔǔn wuɖuí kɔ̃̀ùn tee, ɓɛ́ zɔ̃ táázĩ̀ìnɔ̀ ké zi.

⁷ Zɔ̃ táázĩ̀ìnɔ̀ ɖǎ ziín, wa mu Sétɔ̃̀ buɛ̀ìn, ɓɛ́ ɔ ké kpɔɖɔ ɖeín sɔ̀.

⁸ Ké ɔ mu muùn, ɓɛ́ ɔ ké ɓóɖó-dù ɓě nì ɓóɖó-gã̀ hĩinyɛɔ̀ gboiɛɛ cá. Ɓóɖó-dù ɓěɔ̀ mɔ̀ Gógì kè Mágɔ̀. Nɔɔ́-nàmàǔn mu wa dyí poìn ɓó to vɔ̃ jè. Nyɔ ɓěɔ̀ vò dyí mìɔ kà pĩ́ɔ nìà dyóó wĩin nyɛɛ nìà kɛ.

⁹ Wa ɓèìn ma ɓóɖó-kpàà kɔ̃in, ké wa bĩ Gèɖèpɔ́ɔ̀-nyɔ̀ ɓěɔ̀ jàɖàìn-hwɔ̀ɖɔ̀ɔ̀ kè hwɔɖɔ ɓɛ́ ɔ ɖɛ̀ɓɛ̀à múɛɛ ɖei. Kɛɛ nyɛ sɔ̀ ma ɖé dyɔún, ké ɔ ɓɛ ma ɓó wa dyi nyɛ̀nɛ̀ɛ̀.

¹⁰ Ké wa po ma Nɔɔ́-nàmàǔn ɓɛ́ ɔ cá ma kà wa kɛɛ ɖé nyɛ-gbà-wɔ̃̀ kɔ̃̀ mú sɔ́fà-sɔ̀ɔ̌ nìà wãuń wɛ̃ɛ mú, dɛ̀ ɓɛ́ xwáɖá-xwíɖíi-nìmììɔ̀ kè nyɔ ɖáìn ɔ mìɔùn kpáá-ɖɛ̀-cɛ̃-nyɔ̀ kɛɛ nìà kɛ. Ké wa mu gǎ dyéìn ɓó máaún kè dyóɖóaún kánáá pū.

Zaa-wɔ̃-po-po nì ɓó zèè púú vɛ̀nɛ̀ɔ̀ dyúa kɛ

¹¹ Ké ḿ dyé ma zèè púú vɛ̀nɛ̀ ɖò ɔ kè nyɔ kò ma ɔ kɔ̃ɛ. Ɓóɖó-kpàà kè dyɔɔ̀ gbǔ ma ɔ dyúa. Pá ɖò se ma wa bìì sè.

¹² Ké ḿ dyé ma nyɔ ɓě ɖǎ ma mɛ́ɛ dyú kè vɛ̀nɛ̀, ké wa nyànà ma ɖé zèèɔ̀ dyúa dyi. Céè-ɖɛ̀ ɓě kaà ma dyí, ké céè-ɖɛ̀ ɖò kaà ma dyí ɖe. Ɔ mɔ̀ ma fɛ̀ɛ̀-cèè-ɖɛ̀. Wa po ma nyɔ ɓě ɖǎ ma mɛ́ɛ zaa wɔ̃ sɔ̀ìn ɖé ɖɛ ɓě ɓɛ́ wa nyu ma, ɓɛ́ wa céèà ɖé céè-ɖɛ̀ ɓěɔ̀ múɛɛ mú.

¹³ Ké dyóóɔ̀ zà ma nyɔ ɓě ɓɛ́ wa ɖǎ ma ɖé ɔ mú mɛ́ìn nyɛɛ xwáɖáún. Gĩɔ kè dɛ̀ ɓɛ́ nyɔ ɓě ɖǎà mɛ́ɛ nìà kɛɛ zà ma nyɔ ɓě nì ma wa múɛɛ xwáɖáún ɖekè. Ké wa po ma wa séín zaa wɔ̃ kà wa kũ̀à-sɔ̃̀ nyu ma nìɛ̀ kɛ.

¹⁴ Ké wa po ma gĩɔ kè dɛ̀ ɓɛ́ nyɔ ɓě ɖǎ ma mɛ́ɛ nì ma kɛɛ ɖé nyɛ-gbà-wɔ̃̀ɔ̀ mú. Nyɛ-gbà-wɔ̃̀ nìà kɛ mɔ̀ gĩɔ sɔ̃́ nììnɔ̀.

¹⁵ Ké wa po ma nyɔ ɓě kɔ̃̀ nyɛ́nɛ́ se ma fɛ̀ɛ̀-cèè-ɖɛ̀ɔ̀ mú céèɛɛ nyɛ-gbà-wɔ̃̀ɔ̀ mú.