Wɛ̀ɖɛ̀ɓèɖésĩ̀ɔ̀ 15 - Ɓǎsɔ́ɔ̀ Báɓòɔ̀

Ínjà ɓéɖé ma kà nyɔ-gǎ-dyéìn-ɖɛ̀ hwɛ̀ìn-gbɔ ɓěɔ̀ kɛ

¹ Ké ḿ dyé ma ɖàɓàìn-ɖɛ̀ vɛ̀nɛ̀ ɖò ɖé dyɔún ɖe, ké ɔ mɔ̀ ma nyɔǔn dyi-giniìn-ɖɛ̀. Ɔ mɔ̀ ma ínjà mɛ̀nɛ̌ìn-sɔ̃́ kè waà nyɔ-gǎ-dyéìn-ɖɛ̀ mɛ̀nɛ̌ìn-sɔ̃́. Nyɔ-gǎ-dyéìn-ɖɛ̀ hwɛ̀ìn-gbɔ ɓěɔ̀ nìàǒ wɛ̀, sepóɛɖé wa ɖǎ kpáín, Gèɖèpɔ́ɔ̀ dyoɖoɔ̀ ɖǎ dyi zi.

² Ké ḿ dyé ma ɖɛ hwɔ dyóó ɓɛ́ wa nyuìn sɛ́ɓɛ́ɛ̀, ɓɛ́ ɔ kè nyɛ caìn nyɛ. Ké ḿ dyé ma nyɔ ɓě ɓɛ́ wa ɖǎ ma xwáɖá-xwíɖíi-nìmììɔ̀ kè ɔ hwɔìn-ɖɛ̀ɔ̀ ɔ kè nyɔ kɔ̃̀ nyɛ́nɛ́ ɓɛ́ ɔ mɔ̀à nɔ̀ɓàɔ̀ kɛɛ toún ɖuɛ. Wa nyanaìn ma dyóó ɓɛ́ wa nyùàìn sɛ́ɓɛ́ɛ̀ kɛɛ wáún dyi. Wa ɓéɖé ma gbǎɖí ɓě ɓɛ́ Gèɖèpɔ́ɔ̀ nyí ma wa kɛɛ xwa.

³ Wa nì ma Mózè mɔ̀à Gèɖèpɔ́ɔ̀ gbo-nì-nyɔ̀ɔ̀ kɛ kè Ɓáɖáá-dyùɔ̀ wɛ́ɖɛ́ɔ̀ ɓeɖeɛń, ké wɛ́ɖɛ́-wùɖùɔ̀ ɖá, “Bounɓo Gèɖèpɔ́ɔ̀, mɔ̀ mɔ̀ nyɔ ɓéɖéà kpé séín nyɛɛ, nì nyuu-ɖɛ̀ ɓěɔ̀ ɓúá kɔ̃in, ké wa kpa ɖɛ mìɔ. Mɔ̀ mɔ̀à ɓóɖó-dù séínɛ̀ Kãa kɛɛ, nì kpeɖe ɓěɔ̀ sɛ́ɖɛ́ìn dyí, ké nì nyu jǎà.

⁴ Bounɓo, nyɛ́ se m̀ fɛ̃̀ǐn muɛ́? Nyɛ́ se nì nyɛ́nɛ́ɔ̀ ɓàǐn muɛ́? Sepóɛɖé m̀ ɖòùn mɔ̀ mú-hwɛ̀-nyɔ̀ɔ̀. Ɓóɖó-dù séín ɓěɔ̀ mu m̀ ɓièɛ̌n dyiìn, sepóɛɖé m̀ ɖǎ nì dyí-sɛ́ɖɛ́ìn-ɖɛ̀ nyu-nyuɔ̀ nyɔǔn séín dyí tɛ̀mɛ̀ìn.”

⁵ Ti ɖɛ nìà kɛ ɖǎ ma dyi ziɛɛ, ḿ gmɔ̀ ma ɖé, ké Gèɖèpɔ́ɔ̀ jàɖàìn-gbò kɔ̃̀ mú ɓɛ́ ɔ kè ɔ nyɔ ɓěɔ̀ dyéàìn, ɓɛ́ ɔ nìà ɖé dyɔún wɛ̃ɛ kaà.

⁶ Ké ínjà mɛ̀nɛ̌ìn-sɔ̃́ ɓě ɓɛ́ wa ɓéɖé ma kà gǎ-dyéìn-ɖɛ̀ mɛ̀nɛ̌ìn-sɔ̃́ ɓěɔ̀ kɛɛ sɔ̀ ma ɖé Gèɖèpɔ́ɔ̀ gbǒɔ̀ mú. Wa po ma ɖénì-ɖɔ̀ púú se zɛ̀nɛ̌ kpɔ̃ ɖò mú, ké wa jìnììn ma góò-ɖɛ̀ ɓě kɛ́í.

⁷ Ké mɛɛ-ɖɛ̀ cĩ́-cĩ́ hĩinyɛ ɓěɔ̀ ɖò nyí ma ínjà mɛ̀nɛ̌ìn-sɔ̃́ ɓěɔ̀ góò-pǎni mɛ̀nɛ̌ìn-sɔ̃́ ɓɛ́ Gèɖèpɔ́ɔ̀ mɔ̀ nyɔ ɓɛ́ ɔ muà cĩ́ìn kánáá púɛɛ dyoɖoɔ̀ dyí ma múɛ.

⁸ Ké nyànà-sò ɓɛ́ ɔ sɔ̀ ma Gèɖèpɔ́ɔ̀ dĩ́ín-dĩ̀ìnɔ̀ kè ɔ kpéɔ̀ múɛɛ dyíìn ma ɔ gbǒɔ̀ múin. Ké nyɔ ɖò se ma gbǒɔ̀ mú dyáa ɓɛ́ìn, ɔ sèìn ɓɛ́ ínjà mɛ̀nɛ̌ìn-sɔ̃́ ɓěɔ̀ gǎ-dyéìn-ɖɛ̀ mɛ̀nɛ̌ìn-sɔ̃́ɔ̀ ké ma dyi zi hwɛ̀.