Wɛ̀ɖɛ̀ɓèɖésĩ̀ɔ̀ 14 - Ɓǎsɔ́ɔ̀ Báɓòɔ̀

Nyɔ ɓě ɖǎà gbǎà kɛɛ wɛ́ɖɛ́

¹ Ké ḿ gmɔ̀ ma ɖé, ké Ɓáɖáá-dyùɔ̀ nyànà ma ɖé Zádyɔún-tòɖòɔ̀ dyai. Nyɔ-kpò táázĩ̀ìn hɔ̃dɛ̀ɖɛ̀ ɖò kè kpáɖá-nyɔ sɔ̃́ sè hĩinyɛ ɓɛ́ wa ɓéɖé ma Ɓáɖáá-dyùɔ̀ nyɛ́nɛ́ɔ̀ kè ɔ Ɓǎɔ̀ nyɛ́nɛ́ɔ̀ ɖé wa dyúa-kpàɔ̀ kɔ̃ɛɛ nì ma ɖé ɔ gbo.

² Ké ḿ wɔ̃́ ma wuɖu ɖò sɔ̀ìn ɖé dyɔún. Ɔ nì ma kà ní-dyèɖè síà kɛ, ké ɔ nì ma kà zɛ pánáà kɛ. Wuɖu ḿ wɔ̃́ ma kɛɛ nì ma kà gbǎɖí ɓɛ́ nyɔ ɓě ɓaɖaà kɛɛ wuɖu nìà kɛ.

³ Wa nyànà ma ɓó zèèɔ̀ kè mɛɛ-ɖɛ̀ cĩ́-cĩ́ hĩinyɛ ɓěɔ̀ ɔ kè nyɔ vɛ̀nɛ̀ ɓěɔ̀ dyúa dyi. Wa ɓeɖe ma wɛ́ɖɛ́ ɖìè ɖò ɓɛ́ nyɔ ɖò se cɛ̃́ɛ ɓɛ́ìn nyɛ, ɔ sèìn nyɔ-kpò táázĩ̀ìn hɔ̃dɛ̀ɖɛ̀ ɖò kè kpáɖá-nyɔ sɔ̃́ sè hĩinyɛ ɓě ɓɛ́ wa ɖǎ gbǎà nɔ̄ ɓóɖó-kpàà kɔ̃ɛɛ ɖòùn.

⁴ Wa mɔ̀ nyɔ ɓě ɓɛ́ wa se wa mìɔùn dyíin nyìnììn ɖé màa jè múɛ. Wa séè nyɔ́nɔ́ dyi kpɔ̃ ɖò. Wa sí Ɓáɖáá-dyùɔ̀ kíɖíí dɛ̀ séín ɓɛ́ ɔ muɛ. Wa ɖǎ gbǎà ɖé nyɔ tɔ̀ɔ̀ séín ɓěɔ̀ hwìɛ̀, ké wa mɔ̀ nyɔ ɓě ɓɛ́ Gèɖèpɔ́ɔ̀ kè Ɓáɖáá-dyùɔ̀ mu dyéìn nyɛɛ kĩ́ín-kĩ́ínɔ̀.

⁵ Ké wa se ma wa se ɖò wĩín wɔ̃́. Wa se kɛɛ ɖò béɖé.

Ínjà tã ɓěɔ̀ bɔ̃̌ ɓěɔ̀

⁶ Ké ḿ dyé ma ínjà ɖò ɖéé ɖé dyɔɔ̀ dyí wãa kpauń. Ɔ ɓéɖé ma sè-ná-sèɛ̀ bɔ̃̌ nɔ̀mɔ̀ dyíin, ɓɛ́ ɔ ké ɔ jè zio po ɖé nyɔ ɓě nì nɔ̄ ɓóɖó-kpàà kɔ̃ɛɛ gbo, ɖé ɓóɖó-dù séín kè xwéɖé-dù séín kè nyɔ ɓě po wuɖu kò-kò ɓěɛ ɔ kè nyɔ-dù kò-kò séín gbo.

⁷ Ké ínjàɔ̀ cɛ̃ɛ ma ɖé wuɖu zoo mú, ké ɔ ɖá, “Ɓě fɛ̃̀ìn Gèɖèpɔ́ɔ̀ dyi, ɓɛ́ ɓě ké ɔ ɓàìn-ɓàìn nyí. Sepóɛɖé tiɔ̀ ɖǎ dyi, ɓɛ́ ɔ ké nyɔǔn zaa wɔ̃ po. Ɓě ɓiè nyɔ mɔ̀ nyɔ mɛ ma kà dyɔɔ̀ kè ɓóɖó-kpàɔ̀ kè dyóóɔ̀ ɔ kè ní-dù ɓěɔ̀ kɛ.”

⁸ Ké ínjà ɖò sí ma ínjàɔ̀ kĩ́ín-kĩ́ínɔ̀ kíɖíí, ké ɔ ɖá, “Ɔ ɖǎ wáɖá. Báɓèɖɔ́ùn-hwɔ̀ɖɔ̀ vɛ̀nɛ̀ɔ̀ ɖǎ wáɖá. Ɔ mɔ̀ nyɔ nyuɛ ké ɓóɖó-dù séín náà ɔ wã́ìn kàmà-kàmà mɔ̀à ɔ gbàɖàùn-po-poɔ̀ kɛ.”

⁹ Ké ínjà ɖò sí ma ínjà sɔ̃́ ɓěɔ̀ mɔ̀ùn kíɖíí ɖe, ké ɔ cɛ̃ɛ ma ɖé wuɖu zoo mú, ké ɔ ɖá, “Nyɔ ɖò dyi xwáɖá-xwíɖíi-nìmììɔ̀ kè ɔ hwɔìn-ɖɛ̀ɔ̀ ɓiè, ké ɔ dyi bɛ̃̌ ɖò ɔ dyúa-kpàɔ̀ mɔɔ ɔ sɔɔ̀ kɔ̃ ɓéɖéín,

¹⁰ nìí, ɔ mu Gèɖèpɔ́ɔ̀ wã́ìn mɔ̀à ɔ dyoɖo ɓɛ́ ɔ seà ɖɛ ɖò caìn, ké ɔ ɖǎa ɖé ɔ dyoɖo-kòpòɔ̀ mú púè kɛɛ ɖò náùn. Nyɛ kè sɔ́fà-sɔ̀ɔ̌ mu ɔ gǎ dyéìn ɖé Gèɖèpɔ́ɔ̀ ínjà ɓěɔ̀ kè Ɓáɖáá-dyùɔ̀ dyúa.

¹¹ Ké nyɛ ɓɛ́ ɔ dyéàìn ɔ gǎa nyànà-sòɔ̀ mu dyií muùn kánáá pū. Nyɔ ɓě ɓɛ́ wa ɓièà xwáɖá-xwíɖíi-nìmììɔ̀ kè ɔ hwɔìn-ɖɛ̀ɔ̀ kɛ ɔ kè nyɔ ɓě ɓɛ́ wa ɓéɖéà ɔ bɛ̃̌ mɔ̀à ɔ nyɛ́nɛ́ɔ̀ kɛɛ, wa se fɔ̀-fɔ̀ ɖò ɓéɖéɛ ɓɛ́ìn ɓó máaún kè dyóɖóaún.”

¹² Ɖɛ nìà kɛ xwíníín mɔ̀, Gèɖèpɔ́ɔ̀-nyɔ̀ ɓěɔ̀ ɓéɖé wa ké hwòɖǒ ku tee. Ɔ mɔ̀ nyɔ ɓě ɓɛ́ wa nyu ɖɛ ɓě ɓɛ́ Gèɖèpɔ́ɔ̀ cɛ̃ɛ, ké wa taɓa Jízɛ̀ hwìɖǐǐɛ.

¹³ Ké ḿ wɔ̃́ ma wuɖu ɖò sɔ̀ìn ɖé dyɔún, ké ɔ ɖá, “Céè ɖɛ nìà kɛ. Mana nì nyɔ ɓě ɓɛ́ wa mu Bounɓoɔ̀ mú mɛ́ìn sɔ̀ìn dà ké dyúa muɛɛ kɔ̃.” Ké Zùùɔ̀ ɖá, “Ǹdye, kà ɔ nì, ɓɛ́ wa ké wa kũ̀à-nyu-nyuɔ̀ xwaún fɔ̀, sepóɛɖé waà kpeɖe ɓěɔ̀ mu wa kíɖíí síìn.”

Ɓóɖó-kpàà mɔɔ́-cɛ̃-cɛ̃ɔ̀

¹⁴ Ké ḿ gmɔ̀ ma ɖé, ké dyéɛ, ní-kpò púú ɖò nì ma ɖé. Ké nyɔ ɖò kè nyɔǔn-dyù hwɔìn nyɛɛ kò ma ní-kpòɔ̀ kɔ̃. Ɔ dèìn ma góò-gbàǎ ɖò dú, ké ɔ ɓéɖé ma ɖǎ námá-námá ɖò xwa.

¹⁵ Ké ínjà ɖò sɔ̀ ma ɖé Gèɖèpɔ́ɔ̀ gbǒɔ̀ mú, ké ɔ páná ma mú ɖé nyɔ kò ma kà ɖé ní-kpòɔ̀ kɔ̃ɛɛ gbo, ké ɔ ɖá, “Cɛ̃̀ìn nì ɖǎɔ̀ mɔɔ́ɔ̀, sepóɛɖé mɔɔ́-cɛ̃-tìɔ̀ ɖǎ dyi. Ɓóɖó-kpàà mɔɔ́ɔ̀ ɖǎ kɔ́ mìɔ.”

¹⁶ Ɔ jèɛɛ, nyɔ kò ma kà ɖé ní-kpòɔ̀ kɔ̃ɛɛ po ma ɖǎɔ̀, ké ɔ cɛ̃ ma mɔɔ́ɔ̀ nɔ̄ ɓóɖó-kpàà kɔ̃.

¹⁷ Ké ínjà ɖò sɔ̀ ma Gèɖèpɔ́ɔ̀ gbǒ nì ma ɖé dyɔún wɛ̃ɛ mú ɖe, ké ɔ mɔ̀ùn ɓéɖé ma ɖǎ námá-námá ɖò ɖe.

¹⁸ Ké ínjà ɖò ɓɛ́ ɔ mɔ̀ùn ɓéɖé ma kà kpé ɓó nyɛ kɔ̃in nyɛɛ sɔ̀ ma ɖé Gèɖèpɔ́ɔ̀ sáa-kɔ̃-zàìn-gbààɔ̀ gbo. Ké ɔ páná ma mú ɖé nyɔ ɓéɖé ma kà ɖǎ námá-námáɔ̀ kɛɛ gbo, ké ɔ ɖá, “Cɛ̃̀ìn nì ɖǎɔ̀ géɖéè ɓě nìà ɓóɖó-kpàɔ̀ kɔ̃ɛ ɓo ɓěɔ̀, sepóɛɖé waà ɓo ɓěɔ̀ ɖǎ bo.”

¹⁹ Ké ínjàɔ̀ po ma ɔ ɖǎɔ̀ nɔ̄ ɓóɖó-kpàà kɔ̃, ké ɔ cɛ̃ ma géɖéèɔ̀ ɓo ɓěɔ̀, ké ɔ po ma wa ɖé ɓí kɔ̃̀ mú ɓɛ́ wa píníàìn wa ɓo ɓěɔ̀ múɛɛ mú. Ɓíɔ̀ mɔ̀ Gèɖèpɔ́ɔ̀ dyoɖo vɛ̀nɛ̀ɔ̀.

²⁰ Wa píníìn ma géɖéèɔ̀ ɓo ɓěɔ̀ mú ɖé ɓí ɖò nì ma ɖé hwɔɖɔɔ̀ píéɛɛ mú. Ké nyɔmɔɔ sɔ̀ ma ɖé ɓíɔ̀ mú, ké ɔ sí ma dyi tee, ké ɔ dyi-zi-ziɔ̀ nyu ma máa hɔ̃dɛ̀ɖɛ̀ sɔ̃́, ké sǒ ɖò dyi ma ɔ gbo síín, nìí, ɔ ɓɛ́ìn ma ɔ kɔún sèɛ̀n.