Wɛ̀ɖɛ̀ɓèɖésĩ̀ɔ̀ 12 - Ɓǎsɔ́ɔ̀ Báɓòɔ̀

Màaɔ̀ kè ɖɔ-sɛ̀ɔ̀

¹ Ké ɖàɓàìn-ɖɛ̀ ɖò kpá ma ɖé dyɔún. Màa ɖò kɔ̃̀ mú-po-ɖɔ̀ mɔ̀ ma dyóɖóɔ̀ kɛɛ nì ma ɖé. Ké ɔ ɓéɖé ma dɛ̀nɛ̀ɔ̀ ɖé ɔ ɓo xwíɖíi. Ké ɔ dèìn ma gbàǎ ɖò ɓɛ́ wa nyùìn dɛ̀nɛ̀-dyù ɓaɖa-bùè sè sɔ̃́ kɛɛ dú.

² Ɔ nì ma zùù kɔ̃, ké póó-xwìɖì nì ma ɔ puàǔn, ké ɔ po ma kpé, ɓɛ́ ɔ ké ma ɓíɖíi dyi.

³ Ké ɖàɓàìn-ɖɛ̀ ɖò kpá ma ɖé dyɔún ɖe. Gmɔ̀ nɔ̄, ɖɔ-sɛ̀ zĩ-zã ɖò nì ma ɓó. Ɔ ɓéɖé ma dú-ɓò mɛ̀nɛ̌ìn-sɔ̃́ kè gmɛ̌ ɓaɖa-bùè. Ɔ dèìn ma gbàǎ mɛ̀nɛ̌ìn-sɔ̃́ dú.

⁴ Ké ɔ vɔ̃ɔ̀ dyi-káɖá-káɖá zà ma dɛ̀nɛ̀ mɛ́nɛ́ɛ́ ɓěɔ̀ dú tã nììnɔ̀ ɖé dyɔɔ̀ dyí, ké ɔ wáɖá ma wa ɓíɖíi nɔ̄ ɓóɖó-kpàà kɔ̃. Ké ɖɔ-sɛ̀ɔ̀ nyànà ma màa ɓɛ́ ɔ nì ma kà ɓíɖíi dyiɛ mɔ́uń wɛ̃ɛ dyúa dyi, ɓɛ́ dyúɔ̀ dyi wóɖó nyɛ̀nɛ̀ɛ̀ ní, ɔ kéɛ mana.

⁵ Màaɔ̀ wóɖóìn ma dyú-gàà ɖò ɓɛ́ ɔ mu ɓóɖó-dù séín wuɖuí kɔ̃̀ùn gana-kà kɛ. Ké wa bǎ ma ɓó dyúɔ̀, ké wa kpa ma ɔ ɖé Gèɖèpɔ́ɔ̀ kè ɔ zèèɔ̀ gbo.

⁶ Ké màaɔ̀ gbǔ ma, ké ɔ mu ma ɖé gbǎùn-fúɖúá ɖò kɔ̃, dɛ̀ ɓɛ́ Gèɖèpɔ́ɔ̀ ɖǎ ma ɔ bìì pá ɖò nyuɛ, ké dɛ̀ ɓɛ́ wa ké ma ɔ dyí gmɔ̀ìn ɓó wé táázĩ̀ìn dyúáɖò kè hɔ̃dɛ̀ɖɛ̀ sɔ̃́ kè kpáɖá-nyɔ tã xwíníín nyɛ.

⁷ Ké wa ɖú ma to vɔ̃ kpàǐ ɖé dyɔún. Makɔ́ kè ɔ nììn ínjà ɓěɔ̀ vɔ̃ ma ɖɔ-sɛ̀ɔ̀ gbo, ké ɖɔ-sɛ̀ɔ̀ kè ɔ nììn ínjà ɓěɔ̀ vɔ̃ ma wa gbo.

⁸ Ké wa ɖu ma ɖɔ-sɛ̀ɔ̀ kè ɔ ínjà ɓěɔ̀, ké wa se ma pá ɖò ɖé dyɔún ɓéɖé ɖe fɔɔ.

⁹ Wa po ma ɖɔ-sɛ̀ vɛ̀nɛ̀ɔ̀ ɓíɖíi. Ɔ mɔ̀à sɛ sùàɔ̀ ɓɛ́ wa ɖáìn Nɔɔ́-nàmàǔn mɔɔ Sétɔ̃̀ ɓɛ́ ɔ mɔ̀ nyɔ cáà ɓóɖó-kpà gànáà kɛ. Wa po ma ɔ kè ɔ ínjà ɓěɔ̀ ɓíɖíi nɔ̄ ɓóɖó-kpàà kɔ̃.

¹⁰ Ké ḿ wɔ̃́ ma wuɖu vɛ̀nɛ̀ ɖò ɖé dyɔún, ké wuɖuɔ̀ ɖá, “Kàǔn wɛ̃ɛ, Gèɖèpɔ́ɔ̀ pó-póɔ̀ ɖǎ dyi. À Gèɖèpɔ́ɔ̀ kpéɔ̀ kè ɔ kã́á-ɓòɖòɔ̀ ɖǎ dyi, ké Kɛ́ɖɛ́ì ɓɛ́ ɔ ɖoɓo ma kà kɛɛ nììn kpéɔ̀ ɖǎ dyi. Sepóɛɖé nyɔ mɔ̀à Gèɖèpɔ́ɔ̀ zaa-dè-nyɔ̀ ɓá à ɖíí ɓěɔ̀ dyí, ɓɛ́ ɔ nyànà ma à Gèɖèpɔ́ɔ̀ dyúa dyi, ké ɔ dè ma kà ɔ zaa máaún kè dyóɖóaún wɛ̃ɛ, wa ɖǎ ɔ ɓíɖíi po.

¹¹ À ɖíí ɓěɔ̀ ɖu ma ɔ toún dyììn ɖé Ɓáɖáá-dyùɔ̀ nyɔmɔɔ̀ mú, ɔ kè dyììn ɖé waà zàse ɓěɔ̀ mú. Sepóɛɖé wa se ma waà fɛ̀ɛ̀ɔ̀ jè kàmà mìɔ, ké wa wɔ̃́ ɓɛ́ wa ké ma mɛ́.

¹² Ɔ jèɛɛ, dyɔɔ̀ ɓě, ɔ kè ɓě mɔ̀ nyɔ séín ɓě cĩ́à ɖéɛɛ, ɓě mɛ kpá múàǔn. Kɛɛ ɓóɖó-kpà kè dyóó, ɓě jè mɔ̀ wìì-ɖɛ̀. Sepóɛɖé Nɔɔ́-nàmàǔn ɖǎ ɖé ɓě gbo ɓíɖíi dyi, ké ɔ kpá dyoɖoún mìɔ, sepóɛɖé ɔ dyuò kà ɔ tiɔ̀ ɖǎ ɓoún xwã́ kɛ.”

¹³ Ti ɓɛ́ ɖɔ-sɛ̀ɔ̀ dyéɛ ma kà wa ɖǎ ma ɔ ɓíɖíi po nɔ̄ ɓóɖó-kpàà kɔ̃ɛɛ, ɔ kpá ma màa ɓɛ́ ɔ ɖǎ ma kà dyú-gààɔ̀ wóɖóìn nyɛɛ kíɖíí.

¹⁴ Kɛɛ wa nyí ma ke vɛ̀nɛ̀ɔ̀ pìɔ̌-kpà sɔ̃́ɔ̀ màaɔ̀, ɓɛ́ ɔ ké ma wã, ɓɛ́ ɔ ké ma ɖé ɔ nììn pá nì ma kà ɖé gbǎùn-fúɖúáɔ̀ kɔ̃ɛɛ mú mu. Ɖéɛ̀ wa mu ma ɔ dyí gmɔ̀ùn tee ɓó zɔ̃ tã kè fáún-fáún xwíníín, ɓɛ́ sɛɔ̀ ní kɔ̃̀ ɖà ɔ kpɔ̃.

¹⁵ Ní sɔ̀ ma sɛɔ̀ wĩín kà ní vɛ̀nɛ̀ nìà kɛ, ɓɛ́ ɔ ké ma màaɔ̀ kíɖíí sí, ɓɛ́ níɔ̀ zi-ziɔ̀ ké ma ɔ kpa.

¹⁶ Kɛɛ ɓóɖó-kpàà kpá ma màaɔ̀ gbo. Ɓóɖó-kpàà kaà ma wɔ̃, ké ɔ ná ma ní sɔ̀ìn ma kà ɖé ɖɔ-sɛ̀ɔ̀ wĩín nyɛɛ nyɛ̀nɛ̀ɛ̀.

¹⁷ Ké ɖɔ-sɛ̀ɔ̀ kpáìn ma màaɔ̀ dyoɖoún, ké ɔ kpa ma to màaɔ̀ nyúà-dyú tɔ̀ɔ̀ ɓěɔ̀ kɔ̃. Ɔ mɔ̀ nyɔ ɓě ɓɛ́ wa nyuà ɖɛ ɓě ɓɛ́ Gèɖèpɔ́ɔ̀ cɛ̃ɛ, ké wa nyuà zàse ɓá Jízɛ̀ dyíɛ. Ké ɖɔ-sɛ̀ɔ̀ nyànà ma dyóóɔ̀ gbìǐ dyi.