Wɛ̀ɖɛ̀ɓèɖésĩ̀ɔ̀ 11 - Ɓǎsɔ́ɔ̀ Báɓòɔ̀

Zàse sɔ̃́ ɓěɔ̀

¹ Sɔ̀ìn ɓóɛ gboɛɛ, wa nyí ma ḿ cu wɔɖɔɔ ɖò kà kùì-kpà nìà kɛ, ɓɛ́ ḿ kéɛ ma ɖɛ ɓě ɖàɓàìn. Ké wa cɛ̃ɛ ma ḿ gbo, ké wa ɖá, “Sɔ̀ dyí, ɓɛ́ m̀ ké Gèɖèpɔ́ɔ̀ gbǒɔ̀ kè ɔ sáa-kɔ̃-zàìn-gbààɔ̀ ɖàɓàìn, ɓɛ́ m̀ ké nyɔ ɓě nìà Gèɖèpɔ́ɔ̀ ɓièɛ̌n ɖé ɔ gbǒɔ̀ múɛɛ dyí gbɛ̌ìn.

² Kɛɛ mɔ̀ǔn ɖá ɓɛ́ m̀ ké gbǒɔ̀ kɔ̃̀pã́ùn vɛ̀nɛ̀ɔ̀ ɖàɓàìn. Táà dyi, sepóɛɖé wa ɖǎ ɔ ɓóɖó-dù kà kò ɖò ɓěɛ̀ nyɔ ɓěɔ̀ xwáɖáún zàìn, ɓɛ́ wa ké hwɔɖɔ hwɛ̀ǐn-hwɛ̀ǐnɔ̀ nyɔ ɓěɔ̀ wɔ̃ zi ɓó dɛ̀nɛ̀ kpáɖá-nyɔ sɔ̃́ sè sɔ̃́ xwíníín.

³ Ní mu ní zàse sɔ̃́ ɓěɔ̀ tòùn. Wa mu ɖɔ-zɔ̃̀ mú poùn, ké wa mu wuɖu ɓě ɓɛ́ Gèɖèpɔ́ɔ̀ mu wa wĩín dèìn nyɛɛ cɛ̃ìn ɓó wé táázĩ̀ìn dyúáɖò kè hɔ̃dɛ̀ɖɛ̀ sɔ̃́ kè kpáɖá-nyɔ tã xwíníín.”

⁴ Zàse sɔ̃́ ɓě nìà kɛɛ, wa mɔ̀ ɔ́ɖè-gɔ̃̀ sɔ̃́ɔ̀ kè ɖáùnpò sɔ̃́ ɓɛ́ wa nyànàà ɓó ɓóɖó-kpàà Wuɖuí-kɔ̃̀-nyɔ̀ɔ̀ dyúa dyiɛ.

⁵ Ɔ jǔ ké nyɔ ɖò dyi vɔ̃ ɓɛ́ ɔ ké wa ɖɛ gbà bũ̌ nyuín, nìí, nyɛ sɔ̀ wa wɔ̃ ɓěɔ̀ mú, ké ɔ gbɔɔ̀ wa mú-nyɛ́-nyɔ̀ ɓěɔ̀ mú. Ɖé hwìè nìà kɛ múɛɛ, nyɔ ɓě mu mɔ́ùn ɓɛ́ wa ké wa ɖɛ gbà bũ̌ nyuɛɛ, kǎà wa mu mɛ́ìn.

⁶ Wa ɓéɖé kpé ɓɛ́ wa ké dyɔɔ̀ dyí kpɔ̃, ɓɛ́ ti wa dyi wuɖu ɓɛ́ Gèɖèpɔ́ɔ̀ dèìn wa wĩín nyɛɛ cɛ̃iń nììn nyɛɛ, ní ké se ɖaɓa. Ké wa ɓéɖé ní ɓěɔ̀ kpé kɔ̃in, ɓɛ́ wa kéɛ nyuín ɓɛ́ wa ké nyɔmɔɔ mú zɛ̃̀ìn. Ké wa ɓéɖé kpé ɓó ɓóɖó-kpàà kɔ̃in, ɓɛ́ wa kéɛ gǎ-dyéìn-ɖɛ̀ kã̀ìn-kã̀ìn mú nyùìn, ti jĩ̀ kà ɓɛ́ wa mɔ́ɔ nyuɛ dyiɛ.

⁷ Ké wa ɖǎ wa zàseɔ̀ nyuɛ hwɔ ní, xwáɖá-xwíɖíi-nìmìì ɓɛ́ ɔ muà ɓí vɛ̀nɛ̀ tɔ̀mɔ̀ǔn-tɔ̀mɔ̀ǔnɔ̀ mú sɔ̀ùn wɛ̃ɛ mu wa gbo vɔ̃ùn. Ké ɔ mu wa wɔ̃ ziìn, ɓɛ́ ɔ ké wa ɖáɓá.

⁸ Ké waà xwɛ́ ɓěɔ̀ mu ɖé hwɔɖɔ vɛ̀nɛ̀ kɔ̃̀ mú ɓɛ́ wa kɔ̀ìn ma wa Wuɖuí-kɔ̃̀-nyɔ̀ɔ̀ kɔ́ɖɔ́sìɔ̀ kɔ̃in nyɛɛ hwìèɔ̀ dyíin pɛ̃́ɛ kpaùn. Hwɔɖɔɔ̀ nɔ́ɔ́-nyɛ̀nɛ̀ mɔ̀ Sáɖɔ̀ùn kè Íjè.

⁹ Ɓó wé tã kè fáún-fáún xwíníín nyɛɛ, nyɔ kò-kò séín ɓě sɔ̀ìn xwéɖé-dù kò-kò ɓě kè ɓóɖó-dù kò-kò ɓě kɔ̃ɛ kè nyɔ ɓě po wuɖu kò-kò ɓěɛɛ mu xwɛ́ ɓěɔ̀ dya gmɔ̀ùn, ké wa se wɔ̃́ɔ mu ɓɛ́ nyɔ ɖò ké wa dyóɖóún zà.

¹⁰ Ɓóɖó-kpàà nyɔ ɓě mu múàǔn kpáùn ɓó nyɔ ɓě nìà kɛ mɛ́ jè. Wa mu hwɔ paùn, ké wa mu wa mǔè ɓě ɖɛ ɓě nyíìn, sepóɛɖé kpáá-ɖɛ̀-cɛ̃-nyɔ̀ sɔ̃́ ɓě nìà kɛ ɖǎ ɓóɖó-kpàà nyɔ ɓě gǎ-dyé-dyé pàɖǎ gbo dyà.

¹¹ Ké ti ɓɛ́ wé tã kè fáún-fáún ɖǎ ma ziɛɛ, fɛ̀ɛ̀ ɓɛ́ ɔ dyà cĩ́-cĩ́ sɔ̀ìn ɖé Gèɖèpɔ́ɔ̀ gboɛɛ dyi ma wa mú, ké wa sɔ̀ ma dyí. Ké nyɔ séín ɓě dyé ma wa kɛɛ zi ma fɛ̃̀ǐn mìɔ.

¹² Ké zàse sɔ̃́ ɓěɔ̀ wɔ̃́ ma wuɖu zoo ɖò sɔ̀ìn ɖé dyɔún. Ké wuɖuɔ̀ cɛ̃ɛ wa gbo, ké ɔ ɖá, “Ɓě dyi nɔ̄ dyií.” Ké wa mu ma ɖé dyɔún, ɖé ní-kpò ɖò mú, ɓó waà mú-nyɛ́-nyɔ̀ ɓěɔ̀ dyéɖé waí.

¹³ Ké ɓó ti déínɔ̀ ɓaɖaa, ɓóɖó-kpàà túò ma dyi mìɔ. Hwɔɖɔɔ̀ wáká ɓaɖa-bùè nììnɔ̀ gbɔɔ̀ ma mú. Ɓóɖó-kpàà dyi-túò-túòɔ̀ ɖáɓá ma nyɔ-kpò táázĩ̀ìn mɛ̀nɛ̌ìn-sɔ̃́. Nyɔ tɔ̀ɔ̀ ɓěɔ̀ zi ma fɛ̃̀ǐn mìɔ, ké wa nyí ma Gèɖèpɔ́ɔ̀ nìà ɖé dyɔún wɛ̃ɛ ɓàìn-ɓàìn.

¹⁴ Wìì-ɖɛ̀ɔ̀ sɔ̃́ nììnɔ̀ ɖǎ dyi zi. Kɛɛ ḿ ɖáo, ɔ tã nììnɔ̀ mu dyiìn kàǔn.

Gã̀àɔ̀ mɛ̀nɛ̌ìn-sɔ̃́ nììnɔ̀

¹⁵ Ké ínjàɔ̀ mɛ̀nɛ̌ìn-sɔ̃́ nììnɔ̀ ɓaɖa ma ɔ gã̀àɔ̀. Ké mú-páná-wùɖù ɓě dyi ma ɖé dyɔún, ké wa ɖá, “Ɓóɖó-kpàɔ̀ kã́á-ɓòɖòɔ̀ ɖǎ à Wuɖuí-kɔ̃̀-nyɔ̀ɔ̀ kè Kɛ́ɖɛ́ì ɓɛ́ ɔ ɖoɓo ma kà kɛɛ kɔ̃̀ɔ̀-ɖɛ̀ jǔ, ké ɔ mu ɔ wuɖuí kɔ̃̀ùn kánáá pū.”

¹⁶ Ké nyɔ vɛ̀nɛ̀ kpáɖá-nyɔ sè hĩinyɛ ɓɛ́ wa dèɖě ma kà ɓó waà zèè ɓěɔ̀ kɔ̃ dya ɓó Gèɖèpɔ́ɔ̀ dyúa kɛɛ ɓùɖùìn ma wa dyúa-kpà ɓěɔ̀ kɔ̃, ké wa ɓiè ma Gèɖèpɔ́ɔ̀,

¹⁷ ké wa ɖá, “Bounɓo, mɔ̀ mɔ̀à kpé-séín-ɓéɖé-Gèɖèpɔ́ɔ̀ kɛɛ, mɔ̀ mɔ̀ nyɔ nìà, ké m̀ nì ma kɛɛ, à po m̀ zùo kà ɓɛ́ m̀ ɖǎ nì nyɔ-wuɖuí-kɔ̃̀-kpè vɛ̀nɛ̀ɔ̀ dyí ɖú, ké m̀ ɖǎ nyɔ-wuɖuí-kɔ̃̀-kɔ̃̀ɔ̀ gbɔ dèɛ.

¹⁸ Ɓóɖó-dù ɓěɔ̀ kpá ma dyoɖoún, kɛɛ nì dyoɖo-wèɔ̀ ɖǎ dyi. Ɔ mɔ̀ǎ ti ɓɛ́ m̀ ké nyɔ ɓě ɖǎ ma mɛ́ɛ zaa wɔ̃ po. Ɔ mɔ̀ǎ ti ɓɛ́ m̀ ké nì gbo-nì-nyɔ̀ ɓě mɔ̀à nì kpáá-ɖɛ̀-cɛ̃-nyɔ̀ ɓěɔ̀ kè nì nyɔ ɓěɔ̀ ɔ kè nyɔ ɓě fɛ̃̀ìn kà nì nyɛ́nɛ́ɔ̀ dyiɛɛ dyú mɛ́nɛ́ɛ́ kè vɛ̀nɛ̀ pɛ́ɛ̀. Ɔ mɔ̀ǎ ti ɓɛ́ m̀ ké nyɔ ɓě gbɔɔ̀à ɓóɖó-kpàà múɛɛ mú gbɔɔ̀.”

¹⁹ Ké Gèɖèpɔ́ɔ̀ gbǒ nìà ɖé dyɔún wɛ̃ɛ kaà ma, ké nyɔǔn ɓɛ́ìn gma-gbɔ̀ɖɔ̀ɔ̀ kɔ̃̀ mú ɓɛ́ dèè-wùɖùɔ̀ nìà kɛɛ ɖé gbǒɔ̀ mú dyéɛ. Ké wɛ́ɖɛ́-wɛ́ɖɛ́ nì ma poɛń, ké kuɖu-kuɖu nì ma dyiɛń, ké zɛ nì ma pánáuń. Ké ɓóɖó-kpàà túò ma dyi, ké sɔ̃̀ɔ̀-kpò ɓáún-ɓáún nì ma wáɖáuń.