Wɛ̀ɖɛ̀ɓèɖésĩ̀ɔ̀ 1 - Ɓǎsɔ́ɔ̀ Báɓòɔ̀

Ɖɛ ɓě ɓɛ́ Jízɛ̀ Kɛ́ɖɛ́ì tɛ̀mɛ̀ìn nyɔǔn dyíɛ

¹ Ɖɛ ɓě nìà nɔ̄ kɛɛ mɔ̀ ɖɛ ɓɛ́ Jízɛ̀ Kɛ́ɖɛ́ì tɛ̀mɛ̀ìn nyɔǔn dyíɛ. Gèɖèpɔ́ɔ̀ nyí ma Jízɛ̀ ɖɛ ɓěɔ̀, ɓɛ́ ɔ kéɛ Gèɖèpɔ́ɔ̀ gbo-nì-nyɔ̀ ɓěɔ̀ ɖɛ ɓě mu kpáùn kàǔn wɛ̃ɛ dyí tɛ̀mɛ̀ìn. Kɛ́ɖɛ́ì tò ma ɔ ínjàɔ̀ ɖé mɔ̄ mɔ̀à ɔ gbo-nì-nyɔ̀ Jɔ̃́ɔ́ kɛɛ gbo, ké ɔ nyuɛ ké ḿ dyuò ma ɖɛ ɓěà dyí.

² Ḿ ɖǎ ɖɛ séín ɓě ɓɛ́ ḿ dyé ma kɛɛ cɛ̃. Zàse ɓɛ́ ḿ nyu ɓá bɔ̃̌ ɓɛ́ ɔ sɔ̀ìn ma kà ɖé Gèɖèpɔ́ɔ̀ gbo, ɔ kè zàse ɓɛ́ Jízɛ̀ Kɛ́ɖɛ́ì nyu ma ɓá ɔ dyíɛɛ, ɔ kɛ̀.

³ Nyɔ ɓě mɔ̀ nyɔ ɓɛ́ wa zàà céè-ɖɛ̀ nìà kɛ wuɖuún wɛ̃, kè nyɔ ɓě ɓɛ́ wa tòà wuɖu ɓě ɓɛ́ Gèɖèpɔ́ɔ̀ dèàìn ḿ wĩín nyɛɛ ɖùǔ gboɛ, ɔ kè nyɔ ɓě ɓɛ́ wa kpɔ̃à ɖɛ ɓě céèà ɖé céè-ɖɛ̀ nìà kɛ múɛ dyiɛɛ, mana nì wa kɔ̃. Sepóɛɖé ti ɓɛ́ ɖɛ ɓě nìà kɛ mu kpáùn wɛ̃ɛ ɖǎ dyi xwɛ̃́ìn.

Jɔ̃́ɔ́ zà cɔ́cì mɛ̀nɛ̌ìn-sɔ̃́ ɓěɔ̀ nyíɔún

⁴ Nyíɔún-zà-wùɖùɛ̀ sɔ̀ìn nɔ̄ mɔ̄ Jɔ̃́ɔ́ gbo. Ḿ zà cɔ́cì-dù mɛ̀nɛ̌ìn-sɔ̃́ ɓě nìà ɖé Ésìà-ɓòɖòɔ̀ kɔ̃ɛɛ nyíɔún. Mana kè gìɖìǐ sɔ̀ìn ɖé Gèɖèpɔ́ɔ̀ kè ɔ gbo-nì-ɖɛ̀ mɛ̀nɛ̌ìn-sɔ̃́ ɓě ɓɛ́ wa nìà ɓó ɔ zèèɔ̀ dyúa kɛ gboɛɛ mɛ nì ɓě kɔ̃. Gèɖèpɔ́ɔ̀ mɔ̀ nyɔ nìà, ké ɔ nì ma, ké ɔ mɔ̀ nyɔ kéà dyiɛ.

⁵ Mana kè gìɖìǐ sɔ̀ìn ɖé Jízɛ̀ Kɛ́ɖɛ́ì mɔ̀à hwòɖǒ-kɔ̃-dè-zàseɔ̀ kɛ gboɛɛ mɛ nì ɓě kɔ̃. Ɔ mɔ̀ nyɔ ɓě muà gĩɔ wóɖóùn wɛ̃ɛ kĩ́ín-kĩ́ínɔ̀. Ɔ mɔ̀ ɓóɖó-kpàà nàìn-nyɔ̀ ɓěɔ̀ wuɖuí-kɔ̃̀-nyɔ̀. Ɔ ɖɛ̀ɓɛ̀ à mú, ké ɔ ɖǎ à gbǎà ɖé à nàmàǔn ɓěɔ̀ xwaún dyììn ɖé ɔ nyɔmɔɔ̀ mú.

⁶ Ɔ ɖǎa nyu ké à mɔ̀ nyɔ ɓě ɓɛ́ ɔ kɔ̃̀à wuɖuíɛɛ mɔ̀ sáa-zà-nyɔ̀ ɓě, ɓɛ́ à ké ɔ Gèɖèpɔ́ɔ̀ mɔ̀à Ɓǎɔ̀ kɛɛ ɓiè. Jízɛ̀ Kɛ́ɖɛ́ì mɛ ɓéɖé ɓàìn-ɓàìn ɔ kè kpé ɓó sè-ná-sèɛ̀ tiín. Kǎà ɔ mɛ nì.

⁷ Gmɔ̀ nɔ̄, ɔ nì ní-kpò ɖò mú dyìɛ̌n. Dyéɖé séín mu ɔ dyéìn. Nyɔ ɓě ɓɛ́ wa taɓa ma ɔ ɖíɛɛ mu ɔ dyéìn ɖekè. Ké xwéɖé-dù séín ɓě nì ɓóɖó-kpàà kɔ̃ɛɛ mu ɔ jè vĩ̌ìn. Kà ɔ mu nììn. Kǎà ɔ mɛ nì.

⁸ Bounɓo Gèɖèpɔ́ɔ̀ ɖá, “Ḿ mɔ̀ Áfàɔ̀ kè Òmégàɔ̀.” Ɔ mɔ̀ nyɔ nìà, ké ɔ nì ma, ké ɔ mɔ̀ nyɔ kéà dyi, ɓɛ́ ɔ mɔ̀à Kpé-séín-ɓéɖé-nyɔ̀ɔ̀ kɛ.

Jɔ̃́ɔ́ dyé dyí-tɛ̀mɛ̀ìn-ɖɛ̀

⁹ Ḿ mɔ̀ ɓěɛ̀ ɖíí-gàà Jɔ̃́ɔ́, ké ɖé Jízɛ̀ múɛɛ, ḿ kè ɓě peɖeìn gǎ-dyé-dyé kè ɔ kã́á-ɓòɖòɔ̀ ɔ kè hwòɖǒ-ku-kuɔ̀ mú. Ḿ nì ma ɖé tóó-kpò wa ɖáìn Pámɔ̀ kɛɛ kɔ̃, sepóɛɖé ḿ cɛ̃ ma Gèɖèpɔ́ɔ̀-wùɖùɔ̀ kè zàse ɓɛ́ Jízɛ̀ nyu ma ɓá ɔ dyíɛɛ jè.

¹⁰ Bounɓoɔ̀ nììn wéɔ̀ ɓaɖaa, Zùùɔ̀ dyi ma ḿ kɔ̃, ké ḿ wɔ̃́ ma mú-páná-wùɖù kè gã̀à-wùɖù hwɔìn nyɛɛ ɖé ḿ ɖeín.

¹¹ Ké wuɖuɔ̀ ɖá, “Céè ɖɛ séín ɓě ɓɛ́ m̀ dyéɛɛ ɓíɖíi, ɓɛ́ m̀ kéɛ ɖéɛ cɔ́cì mɛ̀nɛ̌ìn-sɔ̃́ ɓě nìà kɛ gbo tò. Cɔ́cì ɓěɔ̀ nyɛ́nɛ́ ɓěɔ̀ kɛà kɛ̀: Ɛ́fɛ́sà kè Sámánà kè Pógòmà kè Táɖàtádyà kè Sádà kè Fèɖòdɛ́fìà ɔ kè Ɖéòdùsíà.”

¹² Ḿ cɛ́ɛ̀ ma xwa, ɓɛ́ ḿ ké nyɔ nì ma ḿ gbo wùɖùɛ̌n nyɛɛ dyé. Ké ti ḿ cɛ́ɛ̀ ma xwaa, ḿ dyé ma ɖáùnpò-kɔ̃-dè-ɖɛ̀ ɓě ɓɛ́ wa mɔ̀ ma góò kɛɛ mɛ̀nɛ̌ìn-sɔ̃́.

¹³ Ké ɖé ɖáùnpò-kɔ̃-dè-ɖɛ̀ ɓěɔ̀ hwìɛ̀ kɛɛ, ɖɛ ɖò nyànà ma ɖé dyi, ké ɔ kè nyɔǔn-dyù hwɔìn ma. Ɔ po ma ɖɔ zɛin ɖò mú, ké ɔ jìnììn ma góò-ɖɛ̀ ɖò kɛ́í.

¹⁴ Ɔ dú-mìɔ̀ púɖú ma kà ɓáɖáá-fíɖí nìà kɛ. Ɔ nì ma séɖéé tá-tá. Ɔ dyéɖé ɓěɔ̀ nì ma kà nyɛ-mìɔ̀ nìà kɛ.

¹⁵ Ké ɔ ɓo ɓěɔ̀ nì ma kà bàɖàsǐ fã-fã ɓɛ́ wa ɖèàìn ɖé nɛɛ̀-kpà-ɖèìn-naín nyɛɛ nìà kɛ. Ké ɔ wuɖuɔ̀ nì ma kà ní-dyèɖè síà kɛ.

¹⁶ Ké ɔ ɓéɖé ma dɛ̀nɛ̀-dyù mɛ̀nɛ̌ìn-sɔ̃́ ɖé ɔ ɖiaùn-sɔ̃̀ɔ̀ mú, ké gàsíà ɓéɖé dyéɖé sɔ̃́ námá-námá sɔ̀ ma ɖé ɔ wĩín. Ké ɔ dyúa-kpàɔ̀ nì ma kà dyóɖó fãà cáa.

¹⁷ Ti ḿ dyé ma ɔ kɛɛ, ḿ ɓùɖùìn ma ɓó ɔ ɓo zɔ̃̌ pū kà nyɔ mɛ́à kɛ. Kɛɛ ɔ pɛ̃́ìn ma ɔ ɖiaùn-sɔ̃̀ɔ̀ ḿ kɔ̃, ké ɔ ɖá, “Ɓɔ́ fɛ̃̀ìn. Ḿ mɔ̀ nyɔ kĩ́ín-kĩ́ínɔ̀ kè nyɔ hwɛ̀ìn-gbɔɔ̀.

¹⁸ Ḿ mɔ̀ nyɔ nìà cĩ́ɛń nyɛ. Ḿ mɛ́ ma ní, kɛɛ dyéɛ, ḿ nì cĩ́ɛń, ké ní mu cĩ́ìn kánáá pū. Ḿ ɓéɖé mɛ́-mɛ́ kpé kɔ̃in, ké ḿ ɓéɖé dɛ̀ ɓɛ́ nyɔ ɓě ɖǎà mɛ́ɛ nìà kɛ kpé kɔ̃in.

¹⁹ Kàǔn wɛ̃ɛ, m̀ mɛ céè ɖɛ ɓě ɓɛ́ m̀ dyéà, ɓɛ́ wa mɔ̀à ɖɛ ɓě ɓɛ́ wa nìà kàǔn wɛ̃ kè ɖɛ ɓě mu kpáùn ɖé dyúa kɛɛ ɓíɖíi.

²⁰ Dɛ̀nɛ̀-dyù mɛ̀nɛ̌ìn-sɔ̃́ ɓě ɓɛ́ m̀ dyéà ɖé ní ɖiaùn-sɔ̃̀ɔ̀ múɛ kè ɖáùnpò-kɔ̃-dè-ɖɛ̀ mɛ̀nɛ̌ìn-sɔ̃́ ɓě mɔ̀à góòɛɛ, ɖɛ ní muà cɛ̃ìn nyɛɛ mɔ̀ wa xwíníín ɓɛ́ nyɔ ɖò se dyí dyuò wɛ. Dɛ̀nɛ̀-dyù mɛ̀nɛ̌ìn-sɔ̃́ ɓěɔ̀ mɔ̀ cɔ́cì-dù mɛ̀nɛ̌ìn-sɔ̃́ ɓěɔ̀ ínjà ɓěɔ̀, ké ɖáùnpò-kɔ̃-dè-ɖɛ̀ mɛ̀nɛ̌ìn-sɔ̃́ ɓěɔ̀ mɔ̀ cɔ́cì-dù mɛ̀nɛ̌ìn-sɔ̃́ ɓěɔ̀.