Nɔ́ɔ́ 9 - Ɓǎsɔ́ɔ̀ Báɓòɔ̀

Hwòɖǒ-fɔ̀nɔ̀-fɔ̀nɔ̀ kè zuɖu-zuɖu

¹ Fɔ̀nɔ̀-hwòɖǒ ɖǎ ɔ gbǒ po. Ɔ gbǒɔ̀ ɓéɖé cúè-ɓò mɛ̀nɛ̌ìn-sɔ̃́.

² Ɔ ɖǎ ɔ nyúà-ɖɛ̀ ɓěɔ̀ ɖáɓá, ké ɔ ɖǎ ɔ wã́ìnɔ̀ cáìn, ké ɔ ɖǎ ɔ téɓèɖèɔ̀ dè, ké ɔ hwɔɔ̀ ɖǎ ti dyé.

³ Ɔ ɖǎ ɔ gbo-nì-màà ɓěɔ̀ ɖoɓo, ɓɛ́ wa ké pá tɔ̀mɔ̀ dya ɓě nì ɖé hwɔɖɔɔ̀ múɛɛ dya dyá, ɓɛ́ wa ké zio po.

⁴ Ɔ ɖá, “Nyɔ kã̀ìn séín ɓɛ́ wa se hwòɖǒ kɔ̃in cɛ̃̀ɛ mɛ pàìn dà.” Ɔ cɛ̃ɛ zuɖuu-nyɔ̀ ɓěɔ̀ gbo, ké ɔ ɖá,

⁵ “Ɓě dyi, ɓɛ́ ɓě ké ní ɖii-ɖɛ̀ɔ̀ ɖò ɖi, ɓɛ́ ɓě ké wã́ìn ɓɛ́ ḿ ɖǎà cáìn nyɛɛ ɖò ná.

⁶ Ɓě táà ɓěɛ̀ se-hwòɖǒ-kɔ̃in-cɛ̃̀-kpèɖè ɓěɔ̀ dyi, ɓɛ́ ɓě ké cĩ́, ɔ kè ɓɛ́ ɓě ké ɖɛ-múin-dyé-hwìèɔ̀ xwíníín kpá.”

⁷ M̀ dyi vɔ̃ ɓɛ́ m̀ ké nyɔ-dyɔ́-ɓaɖa-nyɔ̀ náún po ní, ɖɛ m̀ nìà mɔ́uń wɛ̃ɛ mɔ̀ zùǔn-zàìn-zàìn. M̀ dyi hwòɖǒ-kɔ̃in-nyìnììn-nyɔ̀ dyí ɓàɖàìn ní, m̀ dyé bũ̌in-puà-puà.

⁸ Ɓɔ́ nyɔ-dyɔ́-ɓaɖa-nyɔ̀ dyí ɓàɖàìn, ɔ ní kɔ̃̀ ɖà m̀ mú nyɛ́. Kɛɛ m̀ dyi hwòɖǒ-fɔ̀nɔ̀-nyɔ̀ dyí ɓàɖàìn ní, ɔ mu m̀ mú ɖɛ̀ɓɛ̀ìn.

⁹ M̀ dyi hwòɖǒ-fɔ̀nɔ̀-nyɔ̀ náún po ní, ɔ fɔ̀nɔ̀-hwòɖǒɔ̀ mu kɔ̃ kpáùn. M̀ dyi dyí-sɛ́ɖɛ́ìn-nyɔ̀ ɖɛ tɛ̀mɛ̀ìn ní, ɔ ɖɛ-dyuò-dyuòɔ̀ mu kɔ̃ kpáùn.

¹⁰ Bounɓoɔ̀ dyi-fɛ̃̀ìn-fɛ̃̀ìn mɔ̀ hwòɖǒ-fɔ̀nɔ̀-fɔ̀nɔ̀ gbɔ-dè-dè. Mú-hwɛ̀-nyɔ̀ɔ̀ dyí-dyuò-dyuò dyà ɖɛ-múin-wɔ̃́-wɔ̃́.

¹¹ M̀ dyi mɔ̄ mɔ̀à fɔ̀nɔ̀-hwòɖǒ kɛɛ ɓéɖé ní, nì wé mu dyí vòùn, ké zɔ̃ m̀ ké dà toɖo-kpàà kɔ̃ cĩ́ìn nyɛɛ mu kɔ̃ kpáùn.

¹² M̀ dyi hwòɖǒ fɔ̀nɔ̀ ní, nì hwòɖǒ-fɔ̀nɔ̀-fɔ̀nɔ̀ɔ̀ mu m̀ kpáná dyí nyuùn. Kɛɛ m̀ dyi fɔ̀nɔ̀-hwòɖǒ dyɔ́ ɓaɖa ní, nì muɛ gǎ dyí dyéìn.

¹³ Gbàɖàùn-màà zuɖu-zuɖu vò kuɖu-kuɖu mú. Ɔ sùmù dyúa dyi, ké ɔ se dɛ̃-ɖɛ̀ dyí dyuò.

¹⁴ Ɔ kò ɖé ɔ gbǒɔ̀ wĩín dyi. Ɔ kò kɔ̃-kò-ɖɛ̀ɔ̀ kɔ̃ ɖé hwɔɖɔɔ̀ dà tɔ̀mɔ̀ dya.

¹⁵ Ké ɔ nì zii-nyɔ̀ ɓě ɓɛ́ wa nì waà hwòɖǒ-kpɔ̃-ɖɛ̀ ɓě gbo nàǔn wɛ̃ɛ ɖáuń.

¹⁶ Ɔ ɖá, “Nyɔ kã̀ìn séín ɓɛ́ wa se hwòɖǒ kɔ̃in cɛ̃̀ɛ mɛ pàìn dà.” Ɔ cɛ̃ɛ zuɖuu-nyɔ̀ ɓěɔ̀ gbo, ké ɔ ɖá,

¹⁷ “Dyíɖíí-nì ɖéè ní, ké ɖii-ɖɛ̀ ɓɛ́ nyɔ ɖi vǐè-kà kɛɛ nɔ̀mɔ̀ wɔ̃ mìɔ.”

¹⁸ Kɛɛ wa seɛ dyuò kà nyɔ ɓě ɓɛ́ wa pàìn ɓóɛɛ mɔ̀ǎ gĩɔ-nyɔ̀ kɛ. Wa seɛ dyuò kà ɔ ɖéè ɓěɔ̀ ɖǎ ɖé dɛ̀ ɓɛ́ nyɔ ɓě ɖǎà mɛ́ɛ muà kɛɛ ɖéé ɖé gbɔún nìɛ.