Nɔ́ɔ́ 6 - Ɓǎsɔ́ɔ̀ Báɓòɔ̀

Ná-wùɖù ɖíɛ́ ɓě ɖe

¹ Ní dyú, ɔ jǔ ké m̀ dyi nyɔ kà kò ɖòɛ̀ bɔ̃́ùn dyí ɖú ɓó kpa ɖò ɓɛ́ ɔ kpɔ̃ɛɛ jè ní,

² ké wuɖu ɓɛ́ m̀ ɖiɛɛ dyi kpàǎ mɔɔ xwáɖá-gbǎ-mú jǔ, ké ɔ dyi m̀ kpɔ̃ ní,

³ nìí, ɖɛ m̀ mɛ nyu ɓɛ́ m̀ ké m̀ mìɔùn póìn nyɛɛ kɛà kɛ̀, sepóɛɖé m̀ ɖǎ m̀ mǔèɔ̀ xwaún dyi kpá. Fṹà, ɓɛ́ m̀ ké mu, ɓɛ́ m̀ ké m̀ mǔèɔ̀ ɓo zɔ̃̌ dyi jìɖǐ, ɓɛ́ ɔ ké m̀ buɛ̀.

⁴ Mɔ̀ǔn ɖá ɓɛ́ m̀ ké fɔ̀, hwɛ̀ ḿ po níiń, m̀ ké nyíɔ-ɓò ɖò dyéɖéí dè, ɓɛ́ m̀ ké ɖɛ nìà kɛ nyu hwɛ̀.

⁵ Póìn m̀ mìɔùn kà nimii ɖò nyuà xwáɖá-nyɔ̀ ɖò xwaún póɛ kɛ, mɔɔ kà naà ɖò nyuà naà-xwàɖà-gbǎ-nyɔ̀ ɖòɛ̀ xwáɖá wɔ̃ sɔ̀ɔ̀ kɛ.

⁶ Mɔ̀ mɔ̀à fóó-nyɔ̀ɛɛ, dyé kòɛ̀ ɓěɔ̀ nyuu-ɖɛ̀, ɓɛ́ m̀ ké fɔ̀nɔ̀-hwòɖǒ cɛ̃́.

⁷ Wa se gɔ̌mànà ɖò mɔɔ nàìn-nyɔ̀ ɖò mɔɔ wuɖuí-kɔ̃̀-nyɔ̀ ɖò ɓéɖé.

⁸ Kɛɛ wɛ̃́ɛ́ kɛɛ, wa dyéìn waà ɖii-ɖɛ̀ ɓěɔ̀ ti ɓó dyóɖó-bà-tìɔ̀ mú. Wa poìn waà ɖii-ɖɛ̀ ɓěɔ̀ dyí ɓó geɖe-kɔ́-tìǐn.

⁹ Mɔ̀ mɔ̀à fóó-nyɔ̀ɛɛ, ti jĩ̀ xwɛ̌ nì mu ɓó dyi pɛ̃́ìn keɛ́? Tiɔ̀ nyɛ́ hwɛ̀ ɓɛ́ m̀ ké nyíɔún wóɖó kɛ́?

¹⁰ Fóó-nyɔ̀ cɛ̃ɛ, ké ɔ ɖá, “Ní mu nyíɔ wè mɔ́ùn. Ní mu dyí ɖeèìn ɖɛ tííwè. Ní mu sɔ̃ pĩ́ín wáɖáùn ɖɛ wè, ɓɛ́ ḿ ké fɔ̀.”

¹¹ Kɛɛ ti ɔ mɛ̀ìn nyíɔún wɛ̃ɛ, gǎ mu ɔ kɔ̃ dyáùn kà sṹún-gɔ̀-nyɔ̀ ɓɛ́ ɔ bɛ̃̀ìn to-vɔ̃-kàa dyáà nyɔ kɔ̃ɛ.

¹² Fùɖù-fùɖù-nyɔ̀ ɓě ɓɛ́ wa mɔ̀ hwòɖǒ-kɔ̃in-nyìnììn-nyɔ̀ ɓěɛɛ nì sɔ̀ dà mu dà nyuɛń, ké wa nì se tɔ́mɔ́uń.

¹³ Wa pòìn nyɔǔn dyéɖé-pì dya, ké waà ɓo kè waà sɔ̃ ɓěɔ̀ po và.

¹⁴ Wa nì ɖɛ gbà dyí sɔ́uń kánáá pū ɖé waà fɔ̀nɔ̀-hwòɖǒ sɔ̀ìn hwìǐ ɓěɔ̀ mú, ké wa nì zàǔn-zàǔn dyi poɛń ti séín.

¹⁵ Ɔ ná nì jèɛɛ, mú-gbɔɔ̀-gbɔɔ̀ mu wa kɔ̃ dyiìn wàɖà. Wa mu dyi wɛ̀ìn kà dyéɖé-kpɔ̀ɔ̌ kpáà kɛ, ké ɖɛ ké wa dyi kánáìn nyɛɛ ɖò se nìɛ̌ mu.

¹⁶ Ɖɛ mɛ̀nɛ̌ìn-ɖò nì ké Bounɓoɔ̀ nyɛ́ wa mú. Gbào, wa nì mɛ̀nɛ̌ìn-sɔ̃́. Wa nyàìn ɔ dyi.

¹⁷ Wa mɔ̀ nyɔ-mìɔùn-dyí-ɓúáìn-dyèɖè kè se-tɔ́mɔ́-mìɔ̀ kè sɔ̃ ɓɛ́ ɔ ɖáɓá nyɔ se ɖɛ gbà ɖò nyuɛ

¹⁸ kè hwòɖǒ-dyùà ɓɛ́ ɔ sɔ́ ɖɛ gbà dyíɛ kè ɓo ɓɛ́ ɔ fɛ̃́ìn xwa ɓó ɖɛ gbà nyuɛ́ mu jèɛ

¹⁹ kè seɛ̀-zàse-nyu-nyɔ̀ ɔ kè nyɔ ɓɛ́ ɔ po zàǔn-zàǔn dyi ɓó wóɖó-wóɖó ɓě pṹa kɛ.

Ná-wùɖù ɓá gbàɖàùn po jè dyíɛɛ ɖíɛ́ ɓě ɖe

²⁰ Ní dyú, kpɔ̃ m̀ ɓǎà náún-po-wùɖù ɓěɔ̀ dyi kóɖó-kóɖó. Mɔ̀ǔn ɖá ɓɛ́ m̀ ké ɖɛ ɓě ɓɛ́ m̀ ɖe ɖǎ m̀ tɛ̀mɛ̀ìn nyɛɛ dyi pɛ̃́ìn.

²¹ Wa mɛ nì m̀ hwìɖǐi kóɖó-kóɖó kánáá pū. Nyu wa nì ɖɔ-po-ɖɛ̀ mú, ɓɛ́ m̀ kéɛ ɖɔ po.

²² M̀ dyi nàǔn nìǐn, wa mu m̀ nàìn. M̀ dyi nyíɔún nìǐn, wa mu m̀ dyí gmɔ̀ùn. M̀ dyi nyíɔún sɔ̀ǐn, m̀ kè wa mu dɔ́ɔ́ dèìn.

²³ Waà nyɔ-náún-po-wùɖù ɓěɔ̀ mɔ̀ ɖáùnpò, ké waà nyɔ-tɛ̀mɛ̀ìn-ɖɛ̀ ɓěɔ̀ mɔ̀ ce ké ɔ fã, ké waà nyɔ-dyí-ɓàɖàìn-ɓàɖàìn nì ɖé kpeɖe-zà-zà múɛɛ mɔ̀ fɛ̀ɛ̀.

²⁴ Wa mu m̀ dyí gmɔ̀ùn sɔ̀ìn ɖé gàa kà kò ɖò nììn gmàà xwaún. Ɔ mɔ̀ màa ɓɛ́ ɔ ɓéɖéà nyɔ-pɛ́í-po-wùɖùɛ.

²⁵ Mɔ̀ǔn ɖá ɓɛ́ nì hwòɖǒ ké ɔ kíɖíí kpá pū ɓó ɔ dyíin nɔ̀mɔ̀ jè. Mɔ̀ǔn ɖá ɓɛ́ ɔ dyéɖé-kɔ̃-cɛ̃-cɛ̃ɔ̀ ké kpàǎ jǔ, ɓɛ́ ɔ ké m̀ kpɔ̃.

²⁶ Sepóɛɖé m̀ ɓɛ́ìn gbàɖàùn-màà bɛɖɛɛ̀-kpò dyúáɖòɛ̀ wíɖí mú dɔ̃ɔ, kɛɛ ɔ dyi gàa ɖòɛ̀ gmàà jǔǐn, ɔ píɔ́ mɔ̀ nì fɛ̀ɛ̀ gànáɔ̀.

²⁷ Nyɔ ɖò ɓɛ́ìn nyɛ-kɛ̀nɛ̀ hwòɖǒ gbèɖèɛ̀n, ɓɛ́ ɔ mú-po-ɖɔ̀ ké se sĩe?

²⁸ Nyɔ ɖò ɓɛ́ìn nyɛ-kɛ̀nɛ̀ kɔ̃in nàà, ɓɛ́ ɔ ɓo xwíɖíi ké se sĩe?

²⁹ Kǎà ɔ nyu nìɛ̀ ɓá nyɔ ɓɛ́ ɔ dyá ɔ mǔè ɖòɛ̀ gmàà gbo gbǒǔn wɛ̃ɛ jè dyí. Nyɔ kã̀ìn séín ɓɛ́ wa mu wa mǔè ɖòɛ̀ gmàà gbo gbǒǔn dyáùn wɛ̃ɛ ɓéɖé ɓɛ́ wa kéɛ gǎ ɖò dyí dyé wɛ̃́ɛ́ pū.

³⁰ Ɔ jǔ ké mɔ́ dyi nyɔ ɖò ɖáɓáuń nì, ké ɔ dyi ɖii-ɖɛ̀ ɖò dyíɖí, ké ɔ dyiɛ ɖi ní, wa mu ɔ zùǔn zàìn ɓóɛ jè.

³¹ Wa dyi ɔ kpɔ̃ ní, ɔ mu ɖɛ ɓɛ́ ɔ dyíɖíà kɛɛ dú mɛ̀nɛ̌ìn-sɔ̃́ ɖe pɛ́ɛ̀ìn. Ɔ mu ɔ kɔ̃̀ɔ̀-ɖɛ̀ séín tòùn ɓóɛ jè.

³² Kà ɔ nìà náa, gàa ɓɛ́ ɔ mɔ̀ gmaɖe-po-nyɔ̀ɛɛ se hwòɖǒ fɔ̀nɔ̀. Nyɔ nyu ɖɛ nì náa gbɔɔ̀ ɔ mìɔùn mú.

³³ Bũ̌in-puà-puà kè zùǔn-sɔ̀ìn-sɔ̀ìn mɔ̀ ɖɛ ɔ dyé, ké dɛ̃ mu ɔ kɔ̃ nììn kánáá pū.

³⁴ Sepóɛɖé hwɛ̀nɛ̌ mɔ̀ ɖɛ nyuɛ ké nyɔ́nɔ́-ɓǎ kpá dyoɖoún mìɔ, ké ɔ se sɔ̃ ɖe jiɖiɛ́ mu, ké ɔ zà kpa wɛ̃́ɛ́ hwɛ̀.

³⁵ Zaaɔ̀ pɛ́ɛ̀-ɖɛ̀ se ɔ hwòɖǒ dyi dèɛ̀ ɓɛ́ìn, hwɛ̀ ḿ po níiń, nyíí-ɖɛ̀ kúɖúú ké ɔ dyoɖo-hwòɖòɔ̀ wáɖáa.