Nɔ́ɔ́ 15 - Ɓǎsɔ́ɔ̀ Báɓòɔ̀

Sã́ɖómàà fɔ̀nɔ̀-hwòɖǒ-nɔ̀ɔ̌ ɓěɔ̀ ɖíɛ́ ɓě ɖe

¹ Gɔ̃̌-jǔ-wùɖù ɓɛɖɛɛ̀ dyí po dyoɖo ɓɔ́í, kɛɛ gana-wùɖù po dyoɖo kɔ̃.

² Hwòɖǒ-fɔ̀nɔ̀-nyɔ̀ wùɖù hwòɖǒ-fɔ̀nɔ̀-kà, kɛɛ zuɖuu-nyɔ̀ɛ̀ wɔ̃ púè zuɖuu-ɖɛ̀.

³ Bounɓoɔ̀ dyéɖé nì dà séín, ké ɔ nì ɖɛ-gbà-nyu-nyɔ̀ kè ɖɛín-ɖɛ̀-nyu-nyɔ̀ dyéɛń.

⁴ Miɔ ɓɛ́ ɔ wùɖù wuɖu ɓɛɖɛɛ̀ dyíɛɛ nì kà fɛ̀ɛ̀-cù nìà kɛ, kɛɛ nyɔ-puà-wùɖù dyà hwòɖǒɛ̀-ɖé-ɖei-kpá-kpá.

⁵ Zuɖuu-nyɔ̀ po ɔ ɓǎà ná-wùɖù dyií dyi, kɛɛ nyɔ ɓɛ́ ɔ kpɔ̃ ɔ ɓǎà nyɔ-dyí-ɓàɖàìn-wùɖù dyiɛɛ mɔ̀ hwòɖǒ-fɔ̀nɔ̀-nyɔ̀.

⁶ Kɔ́mɔ́-ɖɛ̀ ɓáún-ɓáún nì ɖé dyí-sɛ́ɖɛ́ìn-nyɔ̀ ɓíɖí-gbǒǔn, kɛɛ fũ̀à-fṹá-ɖɛ̀ saá-saá kpa hwòɖǒ-kɔ̃in-nyìnììn-nyɔ̀ nììnɔ̀.

⁷ Hwòɖǒ-fɔ̀nɔ̀-nyɔ̀ wùɖù fɔ̀nɔ̀-hwòɖǒ-ɖɛ̀ ɓě, kɛɛ zuɖuu-nyɔ̀ se ná nì.

⁸ Hwòɖǒ-kɔ̃in-nyìnììn-nyɔ̀ɛ̀ sáa-zàìn-ɖɛ̀ nyàìn Bounɓoɔ̀ dyi, kɛɛ ɔ hwòɖǒ dèìn dyí-sɛ́ɖɛ́ìn-nyɔ̀ɛ̀ ɓaà-wùɖù múin.

⁹ Bounɓoɔ̀ nyɛ́ hwòɖǒ-kɔ̃in-nyìnììn-nyɔ̀ɛ̀ nyuu-ɖɛ̀ mú, kɛɛ ɔ ɖɛ̀ɓɛ̀ nyɔ ɓɛ́ ɔ kpɔ̃ ɓó dyí-sɛ́ɖɛ́ìn-ɖɛ̀ nyu-nyu gboiɛɛ mú.

¹⁰ Nyɔ mɔ̀ nyɔ ɓɛ́ ɔ sɔ̀ hwìè sɛ́ɖɛ́ìn dyíɔ̀ xwíníín nyɛɛ, Gèɖèpɔ́ɔ̀ zà ɔ kpeɖe gana-kà. Nyɔ mɔ̀ nyɔ ɓɛ́ ɔ nyɛ́ nyɔ-dyí-ɓàɖàìn-ɓàɖàìn múɛɛ mu mɛ́ìn.

¹¹ Gĩɔ mɔ̀ dɛ̀ ɓɛ́ nyɔ ɓě ɖǎà mɛ́ɛ muà kɛɛ nì wáɖáá ɓó Bounɓoɔ̀ dyúa. Kà ɔ nìà náa, nìí, ɖɛ́ nì ɖé nyɔǔn-dyùɛ̀ hwòɖǒ-dyùà dyéɖéí ɓɛ́ ɔ vǐè Bounɓoɔ̀ dyíɛ́?

¹² Ɖɛ-dyɔ́-ɓaɖa-nyɔ̀ se mɔ́ nyɔ ɖò ké ɔ náún po. Ɔ ní diè hwòɖǒ-fɔ̀nɔ̀-nyɔ̀ ɖò dyi.

¹³ Dyɔ́-dyùǎ ɓéɖé múàǔn-kpá-hwòɖò-dyùà ɖéɛ ɖeín, kɛɛ wìì nyuɛ ké nyɔ hwòɖǒ-dyùà wɛ̀ìn dyi.

¹⁴ Ɖɛ-múin-ɖe-hwòɖò-dyùà mɔ́ fɔ̀nɔ̀-hwòɖǒ dyi, kɛɛ zuɖuu-ɖɛ̀ mɔ̀ zuɖuu-nyɔ̀ɛ̀ ɖii-ɖɛ̀.

¹⁵ Wé séín mɔ̀ wé nyìnììn dyíin ɓó gǎ-dyé-nyɔ̀ bìì, kɛɛ nyɔ kɔ̃̀ hwòɖǒ-dyùà ɓɛ́ múà dyíìn múin kánáá pūɛɛ, wé séín mɔ̀ hwɔ-pa-wè ɓó ɔ bìì.

¹⁶ Ɔ kpa ɖɛ ɓɛ́ m̀ ké ɖɛ tííwè ɓéɖé, ɓɛ́ m̀ ké Bounɓoɔ̀ dyi fɛ̃̀ìn, ké ɔ zi ɓɛ́ m̀ ké kɔ́mɔ́-ɖɛ̀ kúɖúú ɓéɖé, nìí ɓɛ́ fũ̀à-fṹá ké ɖé m̀ mú dyíɛɛ dyí.

¹⁷ Ɔ kpa ɖɛ ɓɛ́ m̀ kè nyɔ ɓɛ́ ɓě ɖɛɓɛìn múɛɛ ké vàǎ pɛ̀ɛ̀ ɖi, ké ɔ zi ɓɛ́ m̀ kè nì mú-nyɛ́-nyɔ̀ ké ɓìɖǐ-hwɔ̀ ɖiɛɛ dyí.

¹⁸ Nyɔ kɔ̃̀ dyoɖo-hwòɖò xwɛ̃́ìn dyiɛɛ po zà-ɖɛín dyi, kɛɛ nyɔ kɔ̃̀ dyoɖo-hwòɖò mɛɛ̀ kɛɛ po zà-ɖɛín ɓɔ́í.

¹⁹ Wí-gbǎ kã̀ìn fóó-nyɔ̀ɛ̀ hwìè dyí, kɛɛ dyí-sɛ́ɖɛ́ìn-nyɔ̀ɛ̀ hwìè nì bóo-dyóo.

²⁰ Hwòɖǒ-fɔ̀nɔ̀-dyù jè po ɔ ɓǎ múàǔn, kɛɛ zuɖuu-nyɔ̀ zàìn ɔ ɖe zùǔn.

²¹ Nyɔ ɓɛ́ ɔ se fɔ̀nɔ̀-hwòɖǒ ɖò ɓéɖéɛɛ hwòɖǒ dèìn zuɖuu-ɖɛ̀ nyu-nyu múin, kɛɛ nyɔ ɓɛ́ ɔ fɔ̀nɔ̀ hwòɖǒɛɛ nyu dyí-sɛ́ɖɛ́ìn-ɖɛ̀.

²² Nyɔ ɖò se náún-po-nyɔ̀ ɓéɖé ní, ɔ dyí-sɔ́-ɖɛ̀ ɓě ní wóɖó mú, kɛɛ nyɔ-náún-po-nyɔ̀ sɛ́ɖɛ́ìn dyí kúɖúú dyà nyɔ-dyí-sɔ́-ɖɛ̀ mú-wóɖó-wóɖó.

²³ Gɔ̃̌-jǔ-wùɖù sɛ́ɖɛ́ìn dyí nì múà mìɔ. Wuɖu ɓɛ́ nyɔ ɖò cɛ̃ ké ɔ nì páún wɛ̃ɛ, ɔ zi dyíin nɔ̀mɔ̀ǔn mìɔ.

²⁴ Hwìè ɓɛ́ hwòɖǒ-fɔ̀nɔ̀-nyɔ̀ nà gboɛɛ mɔ̀ hwìè mùìn ɖé dyií, ɓɛ́ ɔ mu ɖé fɛ̀ɛ̀ múɛ, ké ɔ se nyɔ mùìn ɖé ɓíɖíi, ɓɛ́ ɔ mu ɖé gĩɔ kɛ.

²⁵ Bounɓoɔ̀ wáɖá nyɔ-mìɔùn-dyí-ɓúáìn-nyɔ̀ɛ̀ gbǒ, kɛɛ ɔ gmɔ̀ jɔ̌ɔ̀-màà pá dyí.

²⁶ Hwòɖǒ-kɔ̃in-nyìnììn-nyɔ̀ɛ̀ hwìɖǐi-poìn-ɖɛ̀ nyàìn Bounɓoɔ̀ dyi, kɛɛ ɔ hwòɖǒ dèìn ɖɛ ɓɛ́ nyɔ se kɛɛ ɖò ɓéɖéɛɛ cɛ̃ kɛɛ múin.

²⁷ Nyɔ mɔ̀ nyɔ kɔ̃̀ hwòɖǒ nyu pá-pá ɓó kpáná se dyí sɛ́ɖɛ́ìn po jèɛɛ dyà ɔ mìɔùn nììn gbǒ-xwíníín fũ̀à-fṹá kɔ̃, kɛɛ nyɔ ɓɛ́ ɔ nyɛ́ nyɔ-gbo-pa-wìɖì múɛɛ mu cĩ́ìn.

²⁸ Dyí-sɛ́ɖɛ́ìn-nyɔ̀ poìn hwìɖǐi hwɛ̀ ké ɔ jǔ gɔ̃̌, kɛɛ hwòɖǒ-kɔ̃in-nyìnììn-nyɔ̀ɛ̀ wɔ̃ɔ̀ púè ɖɛ gbà.

²⁹ Bounɓoɔ̀ tɔmɔìn hwòɖǒ-kɔ̃in-nyìnììn-nyɔ̀ bũ̌in, kɛɛ ɔ wɔ̃́ dyí-sɛ́ɖɛ́ìn-nyɔ̀ɛ̀ ɓaà-wùɖù.

³⁰ Dyɔ́-dyùǎ po nyɔ múàǔn, ké bɔ̃̌ nɔ̀mɔ̀ dyíin dyà nyɔ kpóɖó-dyùàɔ̀ dyi-káná-káná.

³¹ Nyɔ mɔ̀ nyɔ ɓɛ́ ɔ kpɔ̃ nyɔ-dyí-ɓàɖàìn-wùɖù mɔ̀ nyɔ-fɛ̀ɛ̀-nyí-nyɔ̀ɛ dyiɛɛ mɔ̀ hwòɖǒ-fɔ̀nɔ̀-nyɔ̀.

³² Nyɔ mɔ̀ nyɔ ɓɛ́ ɔ zàìn ná-wùɖù ɖùǔ dyiɛɛ zàìn ɔ mìɔùn zùǔn, kɛɛ nyɔ ɓɛ́ ɔ kpɔ̃ nyɔ-dyí-ɓàɖàìn-wùɖù dyiɛɛ wɔ̃́ ɖɛ múin ɖe mìɔ.

³³ Bounɓoɔ̀ dyi-fɛ̃̀ìn-fɛ̃̀ìn mɔ̀ nyɔ fɔ̀nɔ̀-hwòɖǒ tɛ̀mɛ̀ìn-nyɔ̀, ké m̀ ɓéɖé ɓɛ́ m̀ ké m̀ mìɔùn ɓíɖíi dyà, hwɛ̀ ɓɛ́ nyɔ ɖò ké m̀ dya dè.