Nɔ́ɔ́ 13 - Ɓǎsɔ́ɔ̀ Báɓòɔ̀

Sã́ɖómàà fɔ̀nɔ̀-hwòɖǒ-nɔ̀ɔ̌ ɓěɔ̀ ɖíɛ́ ɓě ɖe

¹ Hwòɖǒ-fɔ̀nɔ̀-dyù kpɔ̃ ɔ ɓǎà ná-wùɖù dyi, kɛɛ ɖɛ-dyɔ́-ɓaɖa-nyɔ̀ ní kpɔ̃ nyɔ-dyí-ɓàɖàìn-wùɖù dyi.

² Hwòɖǒ-kɔ̃in-nɔ̀mɔ̀-nyɔ̀ dyé pɛ́ɛ̀-ɖɛ̀ nɔ̀mɔ̀ dyíin ɓó ɖɛín-ɖɛ̀ ɓě ɔ cɛ̃ kɛɛ jè, kɛɛ ɖɛ kɔ̃̀ jè kpɔ̃ hwòɖǒ-kɔ̃in-nyìnììn-nyɔ̀ hwòɖǒɛɛ mɔ̀ nyɔ ɖɛ gana xwa zàìn jè.

³ Nyɔ ɓɛ́ ɔ gmɔ̀ ɔ wɔ̃ɔ̀ dyíɛɛ gmɔ̀ ɔ fɛ̀ɛ̀ dyí, kɛɛ nyɔ ɓɛ́ ɔ fṹà wɔ̃ xwai ɓó wùɖù jèɛɛ dyà mú-gbɔɔ̀-gbɔɔ̀ ɔ mìɔùn kɔ̃.

⁴ Fóó-nyɔ̀ hwòɖǒ mɔ́ ɖɛ ɖò xwéé ké ɔ seɛ dyéɛ ɓɛ́ìn, kɛɛ dúún-ku-nyɔ̀ dyé ɖɛ séín ɔ hwòɖǒ mɔ́ɛɛ ní.

⁵ Dyí-sɛ́ɖɛ́ìn-nyɔ̀ nyɛ́ se-tɔ́mɔ́-tɔ́mɔ́ mú, kɛɛ hwòɖǒ-kɔ̃in-nyìnììn-nyɔ̀ɛ̀ xwai-nyu-ɖɛ̀ mɔ̀ dɛ̃-ɖɛ̀ kè nyɔ-zùǔn-zàìn-ɖɛ̀.

⁶ Dyí-sɛ́ɖɛ́ìn-sɛ́ɖɛ́ìn gmɔ̀ nyɔ ɓɛ́ ɔ se kɛɛ ɖò ɓéɖéɛɛ dyí, kɛɛ nàmàǔn mɔ̀ hwòɖǒ-kɔ̃in-nyìnììn-nyɔ̀ ɓíɖíi-dyi-po-nyɔ̀.

⁷ Nyɔ ɖíɛ́ ɓě nyu wa mìɔùn bã-nyɔ̀ mú, kɛɛ wa se ɖɛ ɖò ɓéɖé fɔɔ. Ké nyɔ ɖíɛ́ ɓě nyu wa mìɔùn gǎ-dyé-nyɔ̀ mú, kɛɛ wa mɔ̀ bã-nyɔ̀ vɛ̀nɛ̀.

⁸ Bã-nyɔ̀ɛ̀ kɔ́mɔ́-ɖɛ̀ ɓě mɔ̀ ɔ fɛ̀ɛ̀-gbǎà-nyɔ̀, kɛɛ gǎ-dyé-nyɔ̀ se ɖɛ ɓěa ɖò ɓéɖé jèɛɛ, nyɔ ɖò se ɔ vùɖù dyíin ɓàɖàìn ɓɛ́ìn ɓó ɔ fɛ̀ɛ̀ɔ̀ jè.

⁹ Dyí-sɛ́ɖɛ́ìn-nyɔ̀ɛ̀ ce nì fãuń kánáá pū, kɛɛ Gèɖèpɔ́ɔ̀ mu hwòɖǒ-kɔ̃in-nyìnììn-nyɔ̀ɛ̀ ce mɔ́ìn.

¹⁰ Nyɔ-mìɔùn-dyí-ɓúáìn-ɓúáìn dyà zàǔn-zàǔn kánáá pū, kɛɛ nyɔ ɓɛ́ ɔ wɔ̃́ ná-wùɖù múin nyɛɛ mɔ̀ hwòɖǒ-fɔ̀nɔ̀-nyɔ̀.

¹¹ Kɔ́mɔ́-ɖɛ̀ ɓɛ́ nyɔ ɖò poìn dyí ɖé hwìè se dyí sɛ́ɖɛ́ìn múɛɛ ní kò ɔ xwa dyi, kɛɛ kɔ́mɔ́-ɖɛ̀ ɓɛ́ nyɔ mɔ́ìn kɔ̃in mɛ́nɛ́-mɛ́nɛ́ dyììn ɖé gana-kũ̀à nyu-nyu múɛɛ mu kɔ̃ kpáùn kánáá pū.

¹² Ɖɛ ɓɛ́ nyɔ ɖò dè hwòɖǒ kɔ̃ ɓɛ́ ɔ kéɔ́ dyé ké ɔ se dyéɛɛ nyuɛ ké ɔ hwòɖǒ kpá ɖé ɖei mìɔ, kɛɛ hwòɖǒɛ̀-mɔ́ɔ́-ɖɛ̀ ɓɛ́ nyɔ dyéɛɛ hwɔìn fɛ̀ɛ̀-cù.

¹³ Nyɔ mɔ̀ nyɔ ɓɛ́ ɔ po ná-wùɖù dyií dyiɛɛ dyà mú-gbɔɔ̀-gbɔɔ̀ ɔ mìɔùn kɔ̃, kɛɛ nyɔ ɓɛ́ ɔ dyé wuɖuɔ̀ kpéín nyɛɛ dyéɛ pɛ́ɛ̀-ɖɛ̀.

¹⁴ Hwòɖǒ-fɔ̀nɔ̀-nyɔ̀ɛ̀ tɛ̀mɛ̀ìn-ɖɛ̀ hwɔìn ní-dù kɔ̃̀ mú ɓɛ́ fɛ̀ɛ̀-nì sɔ̀ kɛ. Dyììn ɖéɛ múɛɛ, nyɔ ɓɛ́ìn gĩɔ nììn xwáɖá-gbǎ-múɔ̀ dyi ɓàɖàìn.

¹⁵ Fɔ̀nɔ̀-hwòɖǒ sɛ́ɖɛ́ìn dyí nyuɛ ké nyɔǔn-dyùɛ̀ hwòɖǒ dèìn nyɔ múin, kɛɛ se-jǎà-nyu-nyɔ̀ nì mú-gbɔɔ̀-hwìè kɔ̃.

¹⁶ Hwòɖǒ-fɔ̀nɔ̀-nyɔ̀ tɛ̀mɛ̀ìn ɔ ɖɛ-dyuò-dyuò nyɔǔn-dyù dyí ɖé ɖɛ séín mú, kɛɛ zuɖuu-nyɔ̀ wáɖá ɔ zuɖu-zuɖu ɓó píé hwòɖǒǔn dyi.

¹⁷ Hwòɖǒ-kɔ̃in-nyìnììn-kìǎ dyà fũ̀à-fṹá, kɛɛ kíá ɓɛ́ nyɔ ɓɛ́ìn hwòɖǒ kɔ̃ dèɛ̀ kɛɛ dyà gìɖìǐ ɓó nyɔǔn-dyù pṹa.

¹⁸ Gǎ kè dɛ̃ dyi nyɔ ɓɛ́ ɔ zàìn náún-po-wùɖù ɖùǔn dyiɛɛ kɔ̃, kɛɛ nyɔ ɓɛ́ ɔ kpɔ̃ dyí-ɓàɖàìn-wùɖù dyiɛɛ ɓéɖé dya-dè-dè.

¹⁹ Ɖɛ ɓɛ́ nyɔ ɖòɛ̀ hwòɖǒ mɔ́ ké ɔ dyéɛɛ dè ɔ hwòɖǒ dyi mìɔ, kɛɛ zuɖuu-nyɔ̀ɛ̀ hwòɖǒ se ɖɛ gbà kɔ̃ín pòɛ̀n mɔ́ fɔɔ cá.

²⁰ Nyɔ ɓɛ́ ɔ kè hwòɖǒ-fɔ̀nɔ̀-nyɔ̀ naìn múɛɛ fɔ̀nɔ̀ hwòɖǒ, kɛɛ nyɔ ɓɛ́ ɔ kpɔ̃ zuɖuu-nyɔ̀ ɓǎto múɛɛ gbɔɔ̀ mú.

²¹ Fũ̀à-fṹá kpá nàmàǔn-nyɔ̀ kíɖíí, kɛɛ mana mɔ̀ dyí-sɛ́ɖɛ́ìn-nyɔ̀ɛ̀ pɛ́ɛ̀-ɖɛ̀.

²² Hwòɖǒ-kɔ̃in-nɔ̀mɔ̀-nyɔ̀ sè dúí-sè-ɖɛ̀ ɓíɖíi ɓó ɔ nyúà-dyú ɓě bìì, kɛɛ nàmàǔn-nyɔ̀ nììn kɔ́mɔ́ sè dyí-sɛ́ɖɛ́ìn-nyɔ̀ gbo.

²³ Gǎ-dyé-nyɔ̀ ɖò ɓɛ́ìn kũ̀à nyuɛ kóɖó-kóɖó, ɓɛ́ ɔ ké ɖii-ɖɛ̀ ɓáún-ɓáún bã̀ìn ɖé ɔ geɖe gbo, kɛɛ se-dyí-sɛ́ɖɛ́ìn-ɖɛ̀ ɓɛ́ wa nyu ɔ bũ̌ɛɛ sámáa ɓóɛ dyi nyɛ̀nɛ̀ɛ̀.

²⁴ Nyɔ ɓɛ́ ɔ ní tìnììn ɓà-cù dyiɛɛ nyɛ́ ɔ dyú mú, kɛɛ nyɔ ɓɛ́ ɔ ɖɛ̀ɓɛ̀ ɔ dyú múɛɛ zà ɔ kpeɖe mà-kpɛ́ɛ́-kà.

²⁵ Dyí-sɛ́ɖɛ́ìn-nyɔ̀ ɖi ɖɛ, ké ɔ hwòɖǒ dè dyi, kɛɛ mɔ́ nyu hwòɖǒ-kɔ̃in-nyìnììn-nyɔ̀.