Néhɔ̃̀ 1 - Ɓǎsɔ́ɔ̀ Báɓòɔ̀

¹ Céè-ɖɛ̀ nìà kɛ cɛ̃ dyí-tɛ̀mɛ̀ìn-ɖɛ̀ ɓɛ́ Néhɔ̃̀ ɓɛ́ ɔ sɔ̀ ma ɖé Ɛ́kòsà-hwɔ̀ɖɔ̀ɔ̀ múɛɛ dyé ma ɓá gǎ nì ma Nínívà-hwɔ̀ɖɔ̀ɔ̀ kɔ̃ dyiɛń nyɛɛ jè dyíɛɛ jè.

Bounɓoɔ̀ kpáìn Nínívà-hwɔ̀ɖɔ̀ɔ̀ dyoɖoún

² Bounɓoɔ̀ mɔ̀ hwɛ̀nɛ̌ kè kpa-zà-Gèɖèpɔ́ɔ̀. Ɔ zà kpa ɖé ɔ dyoɖo-hwòɖòɔ̀ mú. Bounɓoɔ̀ zàìn ɔ mú-nyɛ́-nyɔ̀ ɓěɔ̀ kpa dyí, ké ɔ dyoɖoɔ̀ nì wa kɔ̃ kánáá pū.

³ Bounɓoɔ̀ dyoɖo-hwòɖò mɛɛ̀ ní, ké ɔ kpé ɓúá dyí mìɔ. Bounɓoɔ̀ tò nyɔ ɓě ɓɛ́ zaa wáɖá dúún wɛ̃ɛ gǎ kɔ̃ wɛ̃́ɛ́ pū. Bounɓoɔ̀ mùìn ɖé wɔ́ɔ́-pìɔ̌ kè dìì mú, ké ní-kpò ɓěɔ̀ mɔ̀ púu-púu sɔ̀ ɔ ɓo xwíɖíiɛ.

⁴ Ɔ po dyóóɔ̀ ɓɔ́í, ké dyóóɔ̀ ma ɓó dyi. Ɔ nyuɛ ké ní vɛ̀nɛ̀ séín ɓěɔ̀ ma. Pìǐ ɓɛ̀ɖɛ̀ɛ̀-ɓɛ̀ɖɛ̀ɛ̀ séín nì ɖé Básàùn-ɓòɖòɔ̀ kɔ̃ɛ kè cu-gɔ̃̀ séín nì ɖé Kámɛ̀-tòɖòɔ̀ dyaa wáɖá dyéɖéí nyɛ̀nɛ̀ɛ̀, ké cu-bùè séín nì ɖé Ɖɛ́ɓèɖɔ́ùn-ɓòɖòɔ̀ kɔ̃ɛɛ mɛ́ ɖé dyi nyɛ̀nɛ̀ɛ̀.

⁵ Bounɓoɔ̀ dyi xwáɖáún wóɖó ní, toɖo vɛ̀nɛ̀ ɓěɔ̀ túò dyi, ké toɖo mɛ́nɛ́ɛ́ ɓěɔ̀ ɖe ní. Ɓóɖó-kpà gànáà kè nyɔ séín nìɛ̀ kɔ̃ɛɛ tɛɖɛ kɔ̃in ɓó ɔ dyúa.

⁶ Ɔ dyi dyoɖoún kpáín, nyɛ́ ɓɛ́ìn ɔ dyúa dyi nyànàà kɛ́? Nyɛ́ ɓɛ́ìn ɔ dyoɖo ku wɔ̃ɔ̀ xwa kɛ́? Ɔ dyoɖoɔ̀ ku wɔ̃ kà nyɛ nìà kɛ. Ɔ dyiɛ púè ní, sɔ́ɔ́-kpò ɓě wɛ̀ìn dyi ɓó ɔ dyúa.

⁷ Bounɓoɔ̀ kpeɖe nɔ̀mɔ̀ dyíin. Ɖé ɔ gbo mɔ̀ nyɔ vǐè-naín ɖé fũ̀à-fṹá-tì mú. Ɔ kɔ̃̀ ɖé nyɔ ɓě ɓɛ́ wa pèɖèìn ɖé ɔ gboɛɛ jè gbo.

⁸ Kɛɛ ɔ gbɔɔ̀ nyɔ ɓě ɓɛ́ wa vɔ̃ ɔ gboɛɛ mú kà dyíí-nì gbɔɔ̀à ɖɛ múɛ. Ɔ nyuɛ ké ɔ mú-nyɛ́-nyɔ̀ ɓěɔ̀ hwɛ̀ mɛ́ɛ nyɛ̀nɛ̀ɛ̀.

⁹ Ɖɛ kã̀ìn séín wa sɔ́ dyí ɓó Bounɓoɔ̀ gbo vɔ̃ jèɛɛ, ɔ poɛ ɓɔ́í. Ɔ pòìn ɔ mú-nyɛ́-nyɔ̀ ɓěɔ̀ ɖɛ gbo kpa dyúáɖò nyɛ̀nɛ̀ɛ̀, ké ɔ se ɓéɖé ɔ kéɛ pòìn kpa sɔ̃́.

¹⁰ Ɔ po wa dyéɖé kà nyɔ sãà wí-gbɛ̌ ní, nyɔ poà dyéɖéɛ. Wa sĩ ɓó dyi kà mɔɔ́-fèɖè dyɛ-dyɛ sĩà kɛ.

¹¹ Nínívà-hwɔ̀ɖɔ̀ wè, má, nyɔ ɖò ɖǎ ɖé m̀ mú sɔ̀, ké ɔ ɖǎ ɖɛ gbà dyí sɔ́ ɓá Bounɓoɔ̀ dyí, ké ɔ ɖǎ nyɔǔn ná gbà ɓě mú poe?

¹² Bounɓoɔ̀ cɛ̃ɛ Júɖà-nyɔ̀ ɓěɔ̀ gbo, ké ɔ ɖá, “Gǎ ɓɛ́ ḿ ɖǎ ɓě kɔ̃ tòɛɛ ɖǎ dyí vòɛ̌n zi. Ḿ se ɓě gǎ ɖò kɔ̃ tòɛ̌ mu ɖe. Àsíwíɖíà-nyɔ̀ ɓěɔ̀ ku dyi, ké wa vò dyí dyɛo, kɛɛ ní mu ɓó wa hwìǐ zàùn, ɓɛ́ wa jè ké dyi zi.

¹³ Ní muá Àsíwíɖíà-nyɔ̀ ɓěɔ̀ gɛ̀ɛ̀ɔ̀ ɓě ɖɔ jaɖaùn, ké ní mu wa dyɔ̀ɔ̌ ɓɛ́ wa sã̀ìn ma kà ɓěɛɛ ɓě bũ̌in cɛ̃ìn.”

¹⁴ Nínívà-nyɔ̀ ɓě, Bounɓoɔ̀ ɖá ɓěɛ̀ xwíníín-dyù ɖò se ɓíɖíi sèɛ̌ mu, ɓɛ́ ɔ ké ɓěɛ̀ nyɛ́nɛ́ɔ̀ dyúa kpa. Ké ɔ mu kũùn-kpò sɛ-sɛ kè kũùn-kpò mɛ-mɛ ɓě ɓɛ́ wa nìà ɖé ɓěɛ̀ gèɖèpɔ́ɔ̀ ɓěɔ̀ mú-ɓièìn-gbò ɓěɔ̀ múɛɛ dyíin nyìnììn. Ké ɔ mu ɓěɛ̀ xwɛ́-ɓì ɓěɔ̀ ti dyéìn, sepóɛɖé ɓěɛ̀ kpeɖe se hwɔɖɔún-dyà-kà nì.

¹⁵ Júɖà-nyɔ̀ ɓě, ɓě gmɔ̀ ɖéa kà kíá ɓɛ́ ɔ nì bɔ̃̌ nɔ̀mɔ̀ dyíin dyàǔn wɛ̃ɛ nì ɖé toɖo ɓěɔ̀ dya dyiɛń nyɛ. Ɔ nì bɔ̃̌ nɔ̀mɔ̀ dyíin ɓá gìɖìǐ jè dyíɛɛ dyàǔn. Ɓě paá ɓěɛ̀ hwɔ ɓěɔ̀, ɓɛ́ ɓě kéá wuɖu ɓě ɓɛ́ ɓě ɖǎ ma kà ɖi ɖé Gèɖèpɔ́ɔ̀ dyúa kɛɛ nyu. Hwòɖǒ-kɔ̃in-nyìnììn-nyɔ̀ ɓěɔ̀ se ɓě to kɔ̃ dyàǎ mu ɖe fɔɔ cá, sepóɛɖé wa ɖǎ ɓó cɛ̃̀.