Máfíò 1 - Ɓǎsɔ́ɔ̀ Báɓòɔ̀

Jízɛ̀ ɓǎ nììn ɓǎ ɓě

¹ Ɖɛ ɓě céè ɓá Jízɛ̀ Kɛ́ɖɛ́ì mɔ̀à Dèɓéɛ̀ xwíníín-dyùɔ̀ kɛɛ ɓǎ nììn ɓǎ ɓěɔ̀ jè dyíɛɛ, wa kɛà kɛ̀. Dèɓé mɔ̀ ma Ééɓòɖòhɛ̃́ɛ̀ xwíníín-dyù.

² Ééɓòɖòhɛ̃́ɛ̀ wóɖóìn ma Áázè, ké Áázè wóɖóìn ma Jékɔ̀, ké Jékɔ̀ wóɖóìn ma Júɖà kè ɔ ɖíí ɓěɔ̀.

³ Ké Júɖà wóɖóìn ma Pɛ́wɛ̀ɖɛ̀ kè Zɛ́wàɖà. Wa ɖeɛ̀ nyɛ́nɛ́ mɔ̀ ma Támà. Ké Pɛ́wɛ̀ɖɛ̀ wóɖóìn ma Hɛ́wɔ̀ɖɔ̀ùn, ké Hɛ́wɔ̀ɖɔ̀ùn wóɖóìn ma Wáɖáùn.

⁴ Ké Wáɖáùn wóɖóìn ma Ámìnáɖà, ké Ámìnáɖà wóɖóìn ma Násɔ̀ùn, ké Násɔ̀ùn wóɖóìn ma Sámɔ̀.

⁵ Ké Sámɔ̀ wóɖóìn ma Bóà. Bóà ɖeɛ̀ nyɛ́nɛ́ mɔ̀ ma Wéɖéháà. Ké Bóà wóɖóìn ma Óɓè. Óɓè ɖeɛ̀ nyɛ́nɛ́ mɔ̀ ma Wuɖufí. Ké Óɓè wóɖóìn ma Jɛsé.

⁶ Ké Jɛsé wóɖóìn ma Dèɓé mɔ̀ ma kà ɓóɖóɔ̀ kã́á kɛ. Ké Dèɓé wóɖóìn ma Sã́ɖómà. Sã́ɖómà ɖe mɔ̀ ma Dyùwáɖádyàà gmàà kĩ́ín.

⁷ Ké Sã́ɖómà wóɖóìn ma Wíɖíhɔ̀bóàùn, ké Wíɖíhɔ̀bóàùn wóɖóìn ma Àbíjà, ké Àbíjà wóɖóìn ma Ásà.

⁸ Ké Ásà wóɖóìn ma Jɛ̀hósáfà, ké Jɛ̀hósáfà wóɖóìn ma Jɛ̀hówàɖàùn, ké Jɛ̀hówàɖàùn wóɖóìn ma Dyùzíà.

⁹ Ké Dyùzíà wóɖóìn ma Jótàùn, ké Jótàùn wóɖóìn ma Áhàzì, ké Áhàzì wóɖóìn ma Hɛ́sèkádyà.

¹⁰ Ké Hɛ́sèkádyà wóɖóìn ma Mànásì, ké Mànásì wóɖóìn ma Ámɔ̀ùn, ké Ámɔ̀ùn wóɖóìn ma Jòsádyà.

¹¹ Ké Jòsádyà wóɖóìn ma Jɛ̀hódyàcĩ̀ìn kè ɔ ɖíí ɓěɔ̀, ti ɓɛ́ wa nyu zɔ̃̌ɔ̀ kà Éézùɖùɛ̀-nyɔ̀ ɓěɔ̀ toɛ̀-kpɔ̃-nyɔ̀ mú, ɓɛ́ wa dyià wa ɖé Báɓèɖɔ́ùn-ɓòɖòɔ̀ kɔ̃ kpa kɛ.

¹² Ti ɓɛ́ wa ɖǎ ma nyɔ ɓěɔ̀ ɖé Báɓèɖɔ́ùn-ɓòɖòɔ̀ kɔ̃ kpaa, Jɛ̀hódyàcĩ̀ìn wóɖóìn ma Sɛ́àtíè, ké Sɛ́àtíè wóɖóìn ma Zɛ̀wáɖáɓèɓò.

¹³ Ké Zɛ̀wáɖáɓèɓò wóɖóìn ma Àbíù, ké Àbíù wóɖóìn ma Ɛ̀ɖìákĩ̀ìn, ké Ɛ̀ɖìákĩ̀ìn wóɖóìn ma Ázɔ̀.

¹⁴ Ké Ázɔ̀ wóɖóìn ma Záɖò, ké Záɖò wóɖóìn ma Ákĩ̀ìn, ké Ákĩ̀ìn wóɖóìn ma Ɛ̀ɖíù.

¹⁵ Ké Ɛ̀ɖíù wóɖóìn ma Ɛ̀ɖɛ̀ázà, ké Ɛ̀ɖɛ̀ázà wóɖóìn ma Máfàùn, ké Máfàùn wóɖóìn ma Jékɔ̀.

¹⁶ Ké Jékɔ̀ wóɖóìn ma Jòsé ɓɛ́ ɔ mɔ̀ ma Meɖéɛ̀ dyú-ɓǎ kɛ. Meɖé mɔ̀ ma Jízɛ̀ ɓɛ́ wa ɖáìn Kɛ́ɖɛ́ì kɛɛ ɖe.

¹⁷ Nìí, sɔ̀ìn Ééɓòɖòhɛ̃́ɛ̀ gbo ké Dèɓé gbo muɛɛ, ɔ mɔ̀ ma xwéɖé-dù deìn dúún ɓaɖa-bùè sè hĩinyɛ. Ké sɔ̀ìn Dèɓé nììn tiɔ̀ gbo, ké ti ɓɛ́ wa kpa ma kà nyɔ ɓěɔ̀ ɖé Báɓèɖɔ́ùn-ɓòɖòɔ̀ kɔ̃ɛɛ gbo nyiniɛɛ, ɔ mɔ̀ ma xwéɖé-dù deìn dúún ɓaɖa-bùè sè hĩinyɛ. Ké sɔ̀ìn ɓó tia gbo ké Kɛ́ɖɛ́ì nììn jè gbo dyiɛɛ, ɔ mɔ̀ ma xwéɖé-dù deìn dúún ɓaɖa-bùè sè hĩinyɛ.

Jízɛ̀ Kɛ́ɖɛ́ì wóɖó jè

¹⁸ Kà Jízɛ̀ Kɛ́ɖɛ́ì nyu ma wóɖóɛ kɛɛ, ɔ kɛà kɛ̀. Jòsé kpɔ̃ ma Jízɛ̀ ɖe Meɖé ɓéeín, kɛɛ hwɛ̀ ɓɛ́ wa ké ma dyi kpɔ̃ìn nyɛɛ, Meɖé dyéɛ ma kà ɓɛ́ Zùù Hwɛ̀ǐn-hwɛ̀ǐnɔ̀ muɛ ma nyuùn, ɓɛ́ ɔ ké ma dyú ɖò ɓéɖéɛ.

¹⁹ Ké Jòsé mɔ̀ nyɔ kpɔ̃ ma kà Meɖé ɓéeín nyɛɛ mɔ̀ ma nyɔ ɓɛ́ ɔ nyu dyí-sɛ́ɖɛ́ìn-ɖɛ̀ teeɛ. Kɛɛ ɔ se mɔ́ ɓɛ́ ɔ ké ma ɔ dɛ̃ nyùìn ɓó nyɔǔn dyúa. Ɔ jèɛɛ, ɔ poɛ ma gbɔ, ɓɛ́ ɔ ké ma ɔ dyi táà nyàà.

²⁰ Ti ɓɛ́ ɔ nì ma ɖɛ nìà kɛ jè hwìɖǐi poɛ̌n nyɛɛ, púɛɛ, Bounɓoɔ̀ ínjà ɖò wóɖóìn ma ɔ dyí ɖé dya-dya mú, ké ɔ ɖá, “Jòsé, mɔ̀ mɔ̀à Dèɓéɛ̀ xwíníín-dyùɔ̀ kɛɛ, mɔ̀ǔn ɖá ɓɛ́ m̀ ké fɛ̃̀ìn, ɓɛ́ m̀ ké se Meɖé dyi kpɔ̃, ɓɛ́ ɔ ké nì gmàà jǔ, sepóɛɖé Zùù Hwɛ̀ǐn-hwɛ̀ǐnɔ̀ mɔ̀ nyɔ nyu, ké ɔ nìà zùù kɔ̃ kɛ̀.

²¹ Ɔ mu gàa-dyù ɖò wóɖóìn, ké m̀ mɛ jǔìn dyúɔ̀ Jízɛ̀-nyɛ̀nɛ̀, sepóɛɖé ɔ mɔ̀ nyɔ mu ɔ nyɔ ɓěɔ̀ póìn sɔ̀ìn ɖé waà nàmàǔn ɓěɔ̀ xwaún.”

²² Ɖɛ séín ɓě nìà kɛ kpá ma, ɓɛ́ ɖɛ ɓɛ́ Bounɓoɔ̀ cɛ̃ zɔ̃̌ɔ̀ ɖé ɔ kpáá-ɖɛ̀-cɛ̃-nyɔ̀ ɖò múɛɛ ké jǎà kpá. Ɖɛ ɔ cɛ̃ zɔ̃̌ɔ̀ kɛɛ kɛà kɛ̀. Ɔ ɖá,

²³ “Gmɔ̀ nɔ̄, màa-dyù gmɔ̀ ɖò ɓɛ́ ɔ se toɖo kɔ̃ jè dyuòɛɛ mu zùù kɔ̃ nììn, ké ɔ mu gàa-dyù ɖò wóɖóìn, ké ɔ nyɛ́nɛ́ mu Ìmádyùɛ̀ jǔùn.” Nyɛ́nɛ́ɔ̀ xwíníín mɔ̀ Gèɖèpɔ́ɔ̀ nì à gbo.

²⁴ Ɔ jèɛɛ, ti ɓɛ́ Jòsé wóɖó ma nyíɔún wɛ̃ɛ, ɔ nyu ɖɛ ɓɛ́ Bounɓoɔ̀ ínjàɔ̀ cɛ̃ ma kà ɔ gboɛ. Ɔ kpɔ̃ ma Meɖé dyi.

²⁵ Kɛɛ ɔ kèɔ̀ kè se ma da nì tee ké Meɖé wóɖóìn ma dyúɔ̀ hwɛ̀. Ké Jòsé jǔìn ma ɔ Jízɛ̀-nyɛ̀nɛ̀ɔ̀.