Jónà 1 - Ɓǎsɔ́ɔ̀ Báɓòɔ̀

Jónà se Bounɓoɔ̀ wuɖu nyu

¹ Ti ɖòɛ̀ ɓaɖaa, Bounɓoɔ̀ wùɖù ma Jónà mɔ̀ ma Àmítàìɛ̀ dyú-gàà kɛɛ gbo, ké ɔ ɖá,

² “Mu ɖé hwɔɖɔ vɛ̀nɛ̀ mɔ̀à Nínívà kɛɛ mú, ɓɛ́ m̀ ké hwɔɖɔɔ̀ nyɔ ɓě zaa kpɔ̃̀ìn, sepóɛɖé ḿ ɖǎ waà hwòɖǒ-kɔ̃in-nyìnììn-nyìnììnɔ̀ dyéɖéi hwɔ̀ìn.”

³ Kɛɛ Jónà se ma Bounɓoɔ̀ wuɖuɔ̀ nyu, ké ɔ vɔ̃ ma ɓɛ́ ɔ ké ma Bounɓoɔ̀ dyúa gbǔ. Ɔ jèɛɛ, ɔ sɔ̀ ma dyí, ɓɛ́ ɔ ké ma ɖé Tásìà-hwɔ̀ɖɔ̀ɔ̀ mú mu. Ɔ mu ma ɖé Jɔ́pà-hwɔ̀ɖɔ̀ɔ̀ mú, ké ɔ dyé ma méè ɖò. Méèɔ̀ nì ma ɖé Tásìà-hwɔ̀ɖɔ̀ɔ̀ mú muɛń. Ké Jónà pɛ́ɛ̀ ma méèɔ̀ mú-kpá-wìɖìɔ̀, ké ɔ dyá ma ɖé méèɔ̀ mú, ké wa zà ma méèɔ̀ ɖua, ɓɛ́ wa ké ma Tásìà-hwɔ̀ɖɔ̀ɔ̀ mú mu.

⁴ Púɛɛ, Bounɓoɔ̀ tò ma dìì vɛ̀nɛ̀ ɖò dyóóɔ̀ kɔ̃. Dììɔ̀ ku ma wɔ̃ mìɔ jèɛɛ, ɔ nì kà méèɔ̀ mu ma wɛ̀ìn nyɛ.

⁵ Ké méèǐn-gɔ̀ɖɔ̀ɔ̀ ɓěɔ̀ fɛ̃̀ìn ma ní mìɔ cá. Ɔ jèɛɛ, wa ɖò-ɖò pòìn ma waà gèɖèpɔ́ɔ̀ kpéi, ɓɛ́ ɔ ké ma wa gbo kpá, ké wa wáɖá ma gbɛ̌ ɓě nì ma méèɔ̀ múɛɛ níɔ, ɓɛ́ méèɔ̀ ké ma xwa fɛ̃́ìn. Ɓó tia ɓaɖaa, Jónà nì ma ɖé méèɔ̀ gbɔ, ké ɔ nì ma nyíɔ vɛ̀nɛ̀ ɖò mú.

⁶ Ké méèɔ̀ càpèɔ̀ dyɛ̀ìn ma ɔ mɔ́ɔ dyi, ké ɔ túò ma ɔ, ké ɔ ɖá, “Xwɛ̌ nyu ɓɛ́ m̀ dyi kà mɔ́uń nì cá kɛ́? Sɔ̀ dyí, ɓɛ́ m̀ ké nììn gèɖèpɔ́ɔ̀ kpéi pòìn. Ti ɖíɛ́ ɓě ní, ɔ mu dyɛ̀ à wìǐn dyéìn, ɓɛ́ ɓěà ké se mú gbɔɔ̀.”

⁷ Ti ɓɛ́ càpèɔ̀ ɖǎ ma Jónà gbo wùɖùɛ̀ hwɔɛɛ, méèǐn-gɔ̀ɖɔ̀ɔ̀ ɓěɔ̀ cɛ̃ìn cɛ̃̀ìn ma gbo, ké wa ɖá, “Ɓěà poìn dyí, ɓɛ́ ɓěà ké gbo-ɖàɓàìn-ɖɛ̀ ɖò nyu, ɓɛ́ ɓěà ké nyɔ kɔ̃̀ jè ɖɛ gbà nìà kɛ nìà à kɔ̃ dyiɛń nyɛɛ dyé.” Ké wa nyu ma gbo-ɖàɓàìn-ɖɛ̀ɔ̀, ké ɔ kpɔ̃ ma Jónà.

⁸ Ɔ jèɛɛ, wa diè ma ɔ dyi, ké wa ɖá, “Mɔ̀ mɔ̀ nyɔ nyuɛ ké ɖɛ gbà nìà kɛ dyià à kɔ̃ɛɛ̀? Cɛ̃ɛ à gbo. Dɛ̌ m̀ sɔ̀ kɛ́? Xwɛ̌ nì ɓíɖí-ɓòɖòɛ̀ nyɛ́nɛ́ jǔ kɛ́? Ké xwéɖé-dùɔ̀ nyɛ́ m̀ sɔ̀ múɛ́? Ɖɛ́ mɔ̀ nì kũ̀à kɛ́?”

⁹ Ké Jónà jǔ ma wa gɔ̃̌, ké ɔ ɖá, “Ḿ mɔ̀ Híìbúɖúù-nyɔ̀, ké ḿ ɓiè Bounɓo Gèɖèpɔ́ɔ̀ mɔ̀ nyɔ kɔ̃̀à ɖɛ séín wuɖuí, ké ɔ nyuà dyóóɔ̀ kè ɓóɖó-kpàɔ̀ kɛ.”

¹⁰ Ké ɔ cɛ̃ɛ ma wa gbo kà ɓɛ́ ɔ nì ma vɔ̃uń ɓɛ́ ɔ ké ma Bounɓoɔ̀ dyúa gbǔɛ. Ɖɛ nìà kɛ po ma wa fã̀àǔn mìɔ jèɛɛ, wa cɛ̃ɛ ma ɔ gbo, ké wa ɖá, “Ɖɛ́ mɔ̀ ɖɛ m̀ nyuà kɛɛ xwíníín nyɛ́?”

¹¹ Ɓó tia ɓaɖaa, dyóóɔ̀ nyìnììn ma mìɔ cá. Ɔ jèɛɛ, wa diè ma Jónà dyi, ké wa ɖá, “Ɖɛ́ à mɛ nyu m̀ bũ̌, hwɛ̀ ɓɛ́ dyóóɔ̀ ké ɓɔ́í kpá ɓó à bììɛ́?”

¹² Ké ɔ jǔ ma wa gɔ̃̌, ké ɔ ɖá, “Ɓě ɖú ḿ dyí, ɓɛ́ ɓě ké ḿ níɔ po. Ɓě dyiɛ náa nyuín, nìí, dyóóɔ̀ mu ɓɔ́í kpáùn ɓó ɓě bìì, sepóɛɖé ḿ dyuòɛ̀ jɛ́ɛ́ kà mɔ̄ mɔ̀ nyɔ nyuɛ ké dìì vɛ̀nɛ̀ nìà kɛ dyìàìn ɓě kɛ̀.”

¹³ Wɛ̃́ɛ́ kɛɛ, méèǐn-gɔ̀ɖɔ̀ɔ̀ ɓěɔ̀ vɔ̃ ma gana-kà, ɓɛ́ wa ké ma kpóó kpɔ̃. Kɛɛ wa seɛ ma nyuɛ ɓɛ́ìn, sepóɛɖé dììɔ̀ ku ma wɔ̃ mìɔ cá.

¹⁴ Ɔ jèɛɛ, wa ɓaà ma Bounɓoɔ̀, ké wa ɖá, “Bounɓo, à ɓaà m̀ ní, mɔ̀ǔn ɖá ɓɛ́ m̀ ké à gĩɔ kɔ̃ dyà ɓó gàa nìà kɛ fɛ̀ɛ̀ɔ̀ jè. M̀ mɛ ɓɔ́ à dyi kpɔ̃ɔ kà nyɔ kpɔ̃à nyɔ ɓɛ́ ɔ wáɖáìn nyɔ se ɖɛ gbà nyuɛɛ nyɔmɔɔ dyi kɛ. Sepóɛɖé mɔ̀ mɔ̀ nyɔ nyu ɖɛ séín ɖǎà kpáa.”

¹⁵ Ti ɓɛ́ wa ɖǎ ma ɓaà hwɔɛɛ, wa ɖú ma Jónà dyí, ké wa po ma ɔ níɔ. Púɛɛ, dyóóɔ̀ nyìnììn-nyìnììnɔ̀ kpá ma ɓɔ́í.

¹⁶ Ké méèǐn-gɔ̀ɖɔ̀ɔ̀ ɓěɔ̀ fɛ̃̀ìn ma Bounɓoɔ̀ dyi mìɔ cá. Ké wa zà ma sáa ɖé Bounɓoɔ̀ gbo, ké wa ɖi ma wuɖu ɓó ɔ dyúa.

¹⁷ Ti ɓɛ́ méèǐn-gɔ̀ɖɔ̀ɔ̀ ɓěɔ̀ po ma Jónà níɔ kɛɛ, Bounɓoɔ̀ nyuɛ ma ké zimii vɛ̀nɛ̀ ɖò mana ma ɔ. Ké Jónà nyu ma ɖé zimiiɔ̀ xwíníín dyóɖóaún-wè tã kè máaún-hwùɖù tã.