Jóɓò 1 - Ɓǎsɔ́ɔ̀ Báɓòɔ̀

Jóɓòɛ̀ nyɛ́nɛ́ín-nyɛ̀nɛ̀

¹ Gàa ɖò cĩ́ zɔ̃̌ɔ̀ ɖé ɓóɖó ɖò mɔ̀ Dyúzèɛɛ kɔ̃. Ɔ nyɛ́nɛ́ mɔ̀ Jóɓò. Jóɓò mɔ̀ ma dyí-sɛ́ɖɛ́ìn-nyɔ̀. Ɔ fɛ̃̀ìn ma Gèɖèpɔ́ɔ̀ dyi, ké ɔ cĩ́-cĩ́ɔ̀ se ma kɛɛ ɖò ɓéɖé. Ɔ nyɛ́ ma ɖɛ-gbà-nyu-nyu mú.

² Ɔ wóɖóìn ma gàa-dyù mɛ̀nɛ̌ìn-sɔ̃́ kè màa-dyù tã.

³ Ɔ bã ma ké ɔ zi nyɔ séín nì ma ɖé dyóɖó-xwáɖáún-wóɖóìn-naínɔ̀ kɛɛ dyí. Ɔ ɓéɖé ma ɓáɖáá táázĩ̀ìn mɛ̀nɛ̌ìn-sɔ̃́ kè sǒ-nì-gbu-kɔ̃ún táázĩ̀ìn tã kè jǎkasì nyɔ́nɔ́ hɔ̃dɛ̀ɖɛ̀ hm̀m̌ kè ɓìɖǐ táázĩ̀ìn dyúáɖò ɔ kè gbo-nì-nyɔ̀ kúɖúú ɓě.

⁴ Jóɓòɛ̀ dyú-gàà ɓěɔ̀ ɖò-ɖò kɔ̃̀ ma wa nììn wé, ɓɛ́ wa ké hwɔ pa ɖé wa ɓíɖí-taún. Ɖò nììn wé dyi ɓó nyini ní, nìí, ɔ ɖá ɔ ɖíí-gàà tɔ̀ɔ̀ ɓěɔ̀ kè ɔ ɖíí-màà tã ɓěɔ̀, ɓɛ́ ɔ kè wa ké ɖɛ ɖi, ɓɛ́ wa ké náá-ɖɛ̀ ɓě ná.

⁵ Ti ɓɛ́ waà hwɔ-pa-wè ɓěɔ̀ mu ɖé hwɛ̀ìn nyɛɛ, nìí, Jóɓò ɖá wa, ké ɔ po wa wáká. Ɔ sɔ̀ dyí ɓó gànà-kṹún mɛ̀nɛ̀ɛ̀, ké ɔ nyu fɔ̃ɔ-sàǎ-zàìn-ɖɛ̀ ɓó wa ɖò-ɖò séín bìì. Jóɓò nyuɛ ma náa, sepóɛɖé ɔ ɖá, “Ti ɖíɛ́ ɓěǐn, ní dyú ɓěɔ̀ ɖǎ nàmàǔn nyu, ké wa ɖǎ dyɛ̀ɛ̀ Gèɖèpɔ́ɔ̀ wuɖuún ɖaɓa ɖé wa hwòɖǒ bũ̌.” Kǎà Jóɓò nyuɛ ma tee.

Nɔɔ́-nàmàǔn kè Gèɖèpɔ́ɔ̀ dè dɔ́ɔ́ ɓá Jóɓò jè dyí

⁶ Wé ɖòɛ̀ ɓaɖaa, Gèɖèpɔ́ɔ̀ ínjà ɓěɔ̀ dyi ma ɓó Gèɖèpɔ́ɔ̀ dyúa. Ké Nɔɔ́-nàmàǔn sí ma wa hwìɛ̀ ɖekè.

⁷ Ké Bounɓoɔ̀ diè ma Nɔɔ́-nàmàǔn dyi, ké ɔ ɖá, “Dɛ̌ m̀ sɔ̀ kɛ́?” Ké Nɔɔ́-nàmàǔn jǔ ma Bounɓoɔ̀ gɔ̃̌, ké ɔ ɖá, “Ḿ sɔ̀ muùn dyi nyuɛń ɖé ɓóɖó-kpàɔ̀ kɔ̃e. Ḿ nì ɓóɖó-kpàɔ̀ kɔ̃ dyi téɛńe.”

⁸ Ké Bounɓoɔ̀ ɖá, “Má, m̀ dyé ní gbo-nì-nyɔ̀ mɔ̀à Jóɓò kɛɛ níe? Má, m̀ dyéɛ kà nyɔ ɖò se ɓóɖó-kpàɔ̀ kɔ̃ nì kà ɔ nìà kɛe? Ɔ mɔ̀ nyɔ sɛ́ɖɛ́ìn dyí. Ɔ fɛ̃̀ìn mɔ̄ Gèɖèpɔ́ɔ̀ dyi, ké ɔ cĩ́-cĩ́ɔ̀ se kɛɛ ɖò ɓéɖé. Ɔ nyɛ́ ɖɛ-gbà-nyu-nyu mú.”

⁹ Hwɛ̀ ké Nɔɔ́-nàmàǔn jǔ ma Bounɓoɔ̀ gɔ̃̌, ké ɔ ɖá, “Nì hwòɖǒ ɖá Jóɓò fɛ̃̀ìn mɔ̀ Gèɖèpɔ́ɔ̀ dyi pídyie?

¹⁰ Má, m̀ po ɔ kè ɔ gbǒ-xwíníín gànáɔ̀ kè ɔ kɔ̃̀ɔ̀-ɖɛ̀ séín gmɔ múe? Dyéɛ, m̀ po ɔ sɔ̃ún-kpa-ɖɛ̀ séín mana kɔ̃, ké ɔ nyúà-ɖɛ̀ ɓěɔ̀ ɖǎ dúún zaìn ɖé ɓóɖó-kpàɔ̀ kɔ̃.

¹¹ Kɛɛ pɛ́ɛ̀ nì sɔ̃ɔ̀ dɔ̃̌ùn, ɓɛ́ m̀ kéɛ ɔ kɔ̃̀ɔ̀-ɖɛ̀ séín ɓěɔ̀ kɔ̃ po. M̀ dyiɛ náa nyuín, ɔ mu kà m̀ dyéɖéín gmɔ̀ùn, ɓɛ́ ɔ ké m̀ vàɖǎ cá.”

¹² Ké Bounɓoɔ̀ cɛ̃ɛ ma Nɔɔ́-nàmàǔn gbo, ké ɔ ɖá, “Gmɔ̀ nɔ̄, ɔ kɔ̃̀ɔ̀-ɖɛ̀ séínɔ̀ nìàǒ wɛ̀, kɛɛ mɔ̀ǔn ɖá ɓɛ́ m̀ ké ɔ mìɔùn dyi tìnììn.” Hwɛ̀ ké Nɔɔ́-nàmàǔn sɔ̀ ma ɓó Bounɓoɔ̀ dyúa.

Jóɓòɛ̀ dyú ɓěɔ̀ kè ɔ kɔ́mɔ́-ɖɛ̀ ɓěɔ̀ gbɔɔ̀ mú

¹³ Wé ɖòɛ̀ ɓaɖaa, Jóɓòɛ̀ dyú ɓěɔ̀ nì ma ɖɛ ɖiɛń, ké wa nì ma wã́ìn náuń ɖé waà ɖíí-gàà vɛ̀nɛ̀ ɓíɖí-taún.

¹⁴ Ké kíá ɖò dyà ma Jóɓò gbo peɖeɛ, ké ɔ ɖá, “Ɓɔ̌ɔ̀, ɓìɖǐ ɓěɔ̀ nìɔ̌ má ɓóɖó xwa cɛ́ɛ̀ǐn ɖé geɖeɔ̀ gbo, ké jǎkasì nyɔ́nɔ́ ɓěɔ̀ nìɔ̌ má dyi ɖiɛń ɓó wa wáún.

¹⁵ Kɛɛ Síɓà-nyɔ̀ ɓěɔ̀ dyi, ké wa kpá à kɔ̃, ké wa ɖáɓá nì gbo-nì-nyɔ̀ ɓěɔ̀ gàsíà dyí, ké wa kpa nyúà-ɖɛ̀ séín ɓěɔ̀. Ḿ ɖòǔn kpá xwáɖáún, ké ḿ dyiàà m̀ gbo cɛ̃ìn nyɛ̀.”

¹⁶ Wuɖuɔ̀ gã̀ ma ɔ wĩín dyi, ké kíáɔ̀ ɖò wóɖó xwáɖáún ɖe, ké ɔ ɖá, “Ɓɔ̌ɔ̀, zɛ sí nì ɓáɖáá ɓěɔ̀ kè nì gbo-nì-nyɔ̀ ɓěɔ̀ mú, ké ɔ hwɔ wa ɖáɓáa. Ḿ ɖòǔn mɔ̀ nyɔ póɛ xwaún, ké ḿ dyiàà m̀ gbo cɛ̃ìn nyɛ̀.”

¹⁷ Wuɖuɔ̀ gã̀ ma ɔ wĩín dyi, ké kíá ɖò mɔ̀ùn wóɖó ma xwáɖáún ɖe, ké ɔ ɖá, “Ɓɔ̌ɔ̀, Kàdíà-nyɔ̀ ɓěɔ̀ ge mú dú tã. Wa dyi, ké wa kpá à kɔ̃, ké wa ɖáɓá nì gbo-nì-nyɔ̀ ɓěɔ̀ gàsíà dyí, ké wa kpa nì sǒ-nì-gbu-kɔ̃ún ɓěɔ̀. Ḿ ɖòǔn kpá xwáɖáún, ké ḿ dyiàà m̀ gbo cɛ̃ìn nyɛ̀.”

¹⁸ Wuɖuɔ̀ gã̀ ma ɔ wĩín dyi, ké kíá ɖò mɔ̀ùn wóɖó ma xwáɖáún ɖe, ké ɔ ɖá, “Ɓɔ̌ɔ̀, nì dyú-gàà kè nì dyú-màà ɓěɔ̀ nìɔ̌ má ɖɛ ɖiɛń, ké wa nìɔ̌ má wã́ìn náuń ɖé waà ɖíí-gàà vɛ̀nɛ̀ɔ̀ ɓíɖí-taún,

¹⁹ ké dìì vɛ̀nɛ̀ ɖò sɔ̀ìn ɖé gbǎùn-fúɖúáɔ̀ kɔ̃, ké ɔ tĩ́ gbǒɔ̀ gã hĩinyɛɔ̀, ké gbǒɔ̀ wáɖáìn wa séín kɔ̃in, ké wa ɖǎ mɛ́. Ḿ ɖòǔn póɛ xwaún, ké ḿ dyiàà m̀ gbo cɛ̃ìn nyɛ̀.”

²⁰ Hwɛ̀ ké Jóɓò sɔ̀ ma dyí, ké ɔ fáìn ma ɔ mìɔùn ɖɔún dyi, ké ɔ kpana ma ɔ míɔ̀, ɓɛ́ ɔ kéɛ nyɔǔn dyí tɛ̀mɛ̀ìn kà ɔ kpá wìǐn nyɛ. Ké ɔ kpá ma ɓó ɓíɖíi dyi, ké ɔ ɖú ma Gèɖèpɔ́ɔ̀ ɓiè kpàǐ.

²¹ Ké ɔ ɖá, “Ḿ fɔ̀nɔ̀ ma gbɔ tá-tá, ké ḿ wóɖó ma ɖé ḿ ɖe xwíníín, ké ní mu gbɔ fɔ̀nɔ̀ùn tá-tá ɖe, ɓɛ́ ḿ ké ɓóɖó-kpàà kɔ̃ sɔ̀. Bounɓoɔ̀ mɔ̀ nyɔ nyí ma ḿ ɖɛ ɓěɔ̀, ké Bounɓoɔ̀ mɔ̀ nyɔ ɖǎà wa ḿ xwai zà ɖeɛ̀. Ɓàìn-ɓàìn mɛ nì ɔ nyɛ́nɛ́ɔ̀ kɔ̃.”

²² Jóɓò se ma nàmàǔn nyu ɖé ɖɛ séín ɓěɛ̀ ɖò mú, hwɛ̀ ḿ po níiń, ɔ ké ma Gèɖèpɔ́ɔ̀ ɖɛ gbà nyu jè kpɔ̃ɛ.