Jĩ́ìn 1 - Ɓǎsɔ́ɔ̀ Báɓòɔ̀

Nyíɔún-zà-zà

¹ Ḿ mɔ̀ Jĩ́ìn mɔ̀à Gèɖèpɔ́ɔ̀ kè Bounɓo Jízɛ̀ Kɛ́ɖɛ́ìɛ̀ gbo-nì-nyɔ̀ kɛɛ mɔ̀ nyɔ céè céè-ɖɛ̀ nìà kɛ. Ḿ zà ɓě mɔ̀à xwéɖé-dù ɓaɖa-bùè sè sɔ̃́ ɓě ɓeàìn ɓóɖó-kpàà dà séín dyiɛɛ nyíɔún.

Hwìɖǐǐ-taɓa-taɓa kè hwòɖǒ-fɔ̀nɔ̀-fɔ̀nɔ̀

² Ḿ ɖíí ɓě, ɓě dyi mú-dɔ̃̌-dɔ̃̌ kã̀ìn-kã̀ìn ɓě dyí dyéɛń nìǐn, ɓě mɛ ɖáìn múà-ɖɛ̀ vɛ̀nɛ̀,

³ sepóɛɖé ɓě dyuòɛ̀ kà mú-dɔ̃̌-dɔ̃̌ dyi ɓěɛ̀ hwìɖǐǐ-taɓa-taɓa kɔ̃ dyiín, nìí, ɔ muɛ nyuùn ɓɛ́ ɓě ké hwòɖǒ-ku-ku ɓéɖéɛ.

⁴ Kɛɛ ɓě wɔ̃́ ɓɛ́ ɓěɛ̀ hwòɖǒ-ku-kuɔ̀ ké dyúa mu kánáá pū, ɓɛ́ ɓě ké ɖɛ hwɛ̀ gàná cá, ɓɛ́ ɓě ké se ɖɛ ɖò mú bɛ̀ɖɛ̀.

⁵ Ɓě ɖò se hwòɖǒ-fɔ̀nɔ̀-fɔ̀nɔ̀ ɓéɖéín, nyɔɔ̀ mɛ zɔ̀ìn Gèɖèpɔ́ɔ̀, ké Gèɖèpɔ́ɔ̀ muɛ ɔ nyíìn, sepóɛɖé ɖɛ ɖò se Gèɖèpɔ́ɔ̀ xwaún dyi ku. Ɔ nyí nyɔǔn séín ɖɛ, ké ɔ ní dèɛ̀ wuɖu kɔ̃.

⁶ Kɛɛ ɔ jǔ ké nyɔɔ̀ dyi Gèɖèpɔ́ɔ̀ ɖɛ ɖò zɔ̀ìn ní, ɔ mɛ taɓa ɔ hwìɖǐǐ, ɓɛ́ ɔ ké se hwìɖǐi poìn kɛbì ɔ mu ɖɛɔ̀ dyéìn ní. Sepóɛɖé nyɔ poàìn hwìɖǐiɛɛ nì kà dyóó-kpɛ̀ ɓɛ́ pìɔ̌ ɓaɖaà, ké ɔ ɖúà dyiíɛɛ nìà kɛ.

⁷ Nyɔ nìà kɛ ní ɖá ɓɛ́ ɔ kéɛ hwìɖǐi poìn kà ɔ mu Bounɓoɔ̀ ɖɛ ɖò xwaún dyéìn wɛ̃.

⁸ Sepóɛɖé ɔ ɓéɖé hwòɖǒ sɔ̃́, ké ɔ dyeìn ɔ nyuu-ɖɛ̀ séín múin.

Gǎ-dyé-dyé kè bã-bã

⁹ Gèɖèpɔ́ɔ̀ dyi à ɖíí-gàà dyé gǎ kɛɛ dyií ɖúín, ɔ mɛ kpá múàǔn ɓóɛ jè.

¹⁰ Ké Gèɖèpɔ́ɔ̀ dyi à ɖíí-gàà mɔ̀ bã-nyɔ̀ kɛɛ ɓíɖíi dyàǐn, ɔ mɛ kpá múàǔn ɓóɛ jè, sepóɛɖé bã-nyɔ̀ɔ̀ jè mu dyi ziìn kà cu-bùè jè zià dyiɛ.

¹¹ Sepóɛɖé dyóɖóɔ̀ wóɖó xwáɖáún, ké ɔ ɓéɖé zùzù. Ɔ fã̀ìn pìǐɔ̀, ké ɔ dyɛ, ké ɔ bùèɔ̀ keè ɔ dúi, ké ɔ dyíin-nɔ̀mɔ̀-nɔ̀mɔ̀ɔ̀ sɔ̀ ɔ mú. Kà dyúáɖòɔ̀ kǎà ti ɓɛ́ bã-nyɔ̀ɔ̀ mu ɔ ɖɛ ɓě nyuɛń nììn nyɛɛ, ɔ jè mu dyi ziɛ nyuùn.

Mú-dɔ̃̌-dɔ̃̌

¹² Mana nì nyɔ ɓɛ́ mú-dɔ̃̌-dɔ̃̌ dyi ɔ kɔ̃ dyiín, ɔ ku hwòɖǒ teeɛɛ kɔ̃. Sepóɛɖé ɔ jǔ ké ɔ dyi dúún ku, ké ɔ dyi mú-dɔ̃̌-dɔ̃̌ɔ̀ mú ziín, nìí, ɔ mu fɛ̀ɛ̀-gbàǎ ɓɛ́ Gèɖèpɔ́ɔ̀ ɖǎà nyɔ ɓě ɖɛ̀ɓɛ̀ ɔ múɛɛ nyɛ́nɛ́ín ɖáìn nyɛɛ dyéìn.

¹³ Nyɔ ɖò dyi mú-dɔ̃̌-dɔ̃̌ dyéɛń nìǐn, ɔ mɛ ɓɔ́ɔ cɛ̃ɛ, ɓɛ́ ɔ ké níiń, “Gèɖèpɔ́ɔ̀ mɔ̀ nyɔ dɔ̃̌à ḿ múɛ̀.” Sepóɛɖé ɖɛ ɖò se Gèɖèpɔ́ɔ̀ mú dɔ̃̌ɔ ɓɛ́ìn, ɓɛ́ ɔ ké ɖɛ gbà nyu. Ké Gèɖèpɔ́ɔ̀ mìɔùn ní dɔ̃̌ nyɔ ɖò mú.

¹⁴ Nyɔ ɖòɛ̀ ɖɛ-gbà-nyu-tò mɔ̀ɔ̀ nyu-nyɔ̀, ké ɔ dyé mú-dɔ̃̌-dɔ̃̌. Ɖɛ-gbà-nyu-tòɔ̀ jiɖi ɔ, ké ɔ nyuɛ ɓɛ́ ɔ ké ɖɛ gbà nyu.

¹⁵ Pūín, ɔ nì kà ɔ ɖɛ-gbà-nyu-tòɔ̀ nì xwíɖí, ké ɔ wóɖóìn nàmàǔn. Ké nàmàǔn mɔ̀ùn dyi ɓúá ní, ɔ wóɖóìn mɛ́-mɛ́ kɛ.

¹⁶ Ní ɖɛ̀ɓɛ̀-ɖìǐ ɓě, nyɔ ɖò ní ɖá ɓɛ́ ɔ ké ɓě cá.

¹⁷ Nyíí-ɖɛ̀ nɔ̀mɔ̀ dyíin séín kè jĩ́á-jè-ɖɛ̀ sɛ́ɖɛ́ìn dyí séín sɔ̀ìn ɖé dyɔún. Wa sɔ̀ìn ɖé Gèɖèpɔ́ɔ̀ mɔ̀ nyɔ nyuà ce séín nyɛɛ gbo. Ɔ ní zĩàìn gbo, mɔɔ ɔ ní cɛ́ɛ̀ xwa ké tíe ní kpɔ̃, ké ɔ ní cɛ́ɛ̀ xwa dyɛ mɔ̀ùn.

¹⁸ Ɔ nyuɛ ké à nì ɖé ɔ mìɔùn nììn hwòɖǒɛ̀-wɔ̃́-wɔ̃́ mú, dyììn ɖé jǎà-wùɖùɔ̀ mú, ɓɛ́ à ké pá kĩ́ín-kĩ́ínɔ̀ ɓéɖé ɖé ɔ mɛɛ-ɖɛ̀ séín ɓěɔ̀ hwìɛ̀.

Wuɖuɔ̀ wɔ̃́-wɔ̃́ kèɛ̀ nyu-nyu

¹⁹ Ní ɖɛ̀ɓɛ̀-ɖìǐ ɓě, ɓě mɛ dyuò ɖɛ nìà kɛ dyí. Ɔ mɔ̀, nyɔǔn séín mɛ fṹà ɓó ɖùǔ tò jè, kɛɛ wa mɛ mɛɛ̀ ɓó wùɖù jè, ké wa mɛ mɛɛ̀ ɓó dyoɖoún kpá jè.

²⁰ Sepóɛɖé nyɔǔn-dyùɛ̀ dyoɖo seɛ nyuɛ ɓɛ́ìn, ɓɛ́ Gèɖèpɔ́ɔ̀ dyí-sɛ́ɖɛ́ìn-ɖɛ̀ ɓěɔ̀ ké nì.

²¹ Ɔ jèɛɛ, ɓě mɛ táà kpeɖe nyìnììn kɔ̃in séín ɔ kè ɖɛ gbà kúɖúú ɓě dyi. Ɓě mɛ dyà ɓě mìɔùn ɓíɖíi, ɓɛ́ ɓě ké wuɖu ɓɛ́ Gèɖèpɔ́ɔ̀ ɖǎà ɓá ɖé ɓě mú, ɓɛ́ ɔ ɓɛ́àìn ɓě póɛ̀n nyɛɛ dyi kpɔ̃.

²² Ɓěǐn ɖá ɓɛ́ ɓě ké ɓě mìɔùn cá ɖé wuɖuɔ̀ ɖùǔ-gbo-tò-tò ɖòùn mú, kɛɛ ɓě mɛ nyu ɖɛ ɔ cɛ̃ɛ tee.

²³ Sepóɛɖé nyɔǔn séín ɓɛ́ wa tò wuɖuɔ̀ ɖùǔ gbo, ké wa ní nyu ɖɛ wuɖuɔ̀ cɛ̃ɛ, nyɔ wa kèɔ̀ kè hwɔìn nyɛɛ, ɔ kɛ̀. Wa nì kà gàa ɓɛ́ ɔ gmɔ̀àìn sɛ́ɓɛ́ɛ̀ mú, ké ɔ dyé kà ɔ dyúa nyu nìɛ̀ kɛɛ nìà kɛ.

²⁴ Ɔ gmɔ̀ ɔ mìɔùn, ké ɔ mu, ké wàɖà cá kɛɛ, kà ɔ nyuɔ́ má nìɛ̀ kɛɛ sɔ̀ ɔ hwìɖǐi.

²⁵ Kɛɛ nyɔ mɔ̀ nyɔ ɓɛ́ ɔ gmɔìn kà gma zi dyí sɛ́ɖɛ́ǐn, ɓɛ́ ɔ buɛ̀à nyɔǔn wɛ̃ɛ múin, ké ɔ nyuà náa tee, ké ɔ tòà ɖùǔ, ké ɖɛɔ̀ ní sɔ̀à ɔ hwìɖǐi, kɛɛ ɔ nyu ɖɛ ɔ cɛ̃à kɛɛ, Gèɖèpɔ́ɔ̀ mu nyɔ nìà kɛ mana kɔ̃ poùn ɖé ɖɛ ɓě ɓɛ́ ɔ nyuà kɛɛ mú.

²⁶ Nyɔ ɖò dyi ɖé ɓě hwìɛ̀ nì, ké ɔ dyiɛ hwìɖǐi poìn kà ɔ mɔ̀ Gèɖèpɔ́ɔ̀ ɓiè-nyɔ̀ɛ, ké ɔ se ɔ mìɔùn nììn miɔɔ̀ wuɖuí kɔ̃̀ ní, nìí, ɔ cá ɔ mìɔùn. Ɔ ɓiè-ɓièɔ̀ se ɖɛ ɖò mú nì.

²⁷ Ɖɛ ɓɛ́ Gèɖèpɔ́ɔ̀ mɔ̀à Ɓǎɔ̀ kɛɛ ɖáìn ɓiè-ɓiè sɛ́ɖɛ́ìn dyí se kɛɛ ɖò ɓéɖéɛɛ kɛà kɛ̀. Ɔ mɔ̀, ɓɛ́ nyɔǔn ké xwíè-dyù kè jɔ̌ɔ̀-màà ɓěɔ̀ gbo gmɔ̀ ɖé waà gǎ-dyé-dyé ɓěɔ̀ mú, ɔ kè ɓɛ́ nyɔǔn ké wa mìɔùn dyí gmɔ̀, ɓɛ́ ɓóɖó-kpàà ní kɔ̃̀ ɖà wa dyíin nyìnììn.