Tɔ̀ɔ̀-ɓìɔ̀ 1 - Ɓǎsɔ́ɔ̀ Báɓòɔ̀

Júɖà nììn xwéɖé-dùɔ̀ kè Símìɔ̀ nììn xwéɖé-dùɔ̀ kpɔ̃ Àɖónì-Bɛ́zɛ̀

¹ Ti ɓɛ́ Jasúé ɖǎ ma mɛ́ɛ, Éézùɖùɛ̀-nyɔ̀ ɓěɔ̀ diè ma Bounɓoɔ̀ dyi, ké wa ɖá, “Nyɛ́ mu à bìì Kénà-nyɔ̀ ɓěɔ̀ gbo vɔ̃ɔ́ muùn kĩ́ín nyɛ́?”

² Ké Bounɓoɔ̀ jǔ ma wa gɔ̃̌, ké ɔ ɖá, “Júɖà nììn xwéɖé-dùɔ̀ mɔ̀ nyɔ mɛ mu. Gmɔ̀ nɔ̄, ḿ ɖǎ wa ɓóɖóɔ̀ ɓě xwaún dyi po.”

³ Hwɛ̀ ké Júɖà-gàà ɓěɔ̀ cɛ̃ɛ ma Símìɔ̀-gàà ɓě mɔ̀à wa ɖíí ɓěɔ̀ kɛɛ gbo, ké wa ɖá, “Ɓě dyi à gbo ɖé à nììn pá ɓɛ́ wa nyíà à kɛɛ mú, ɓɛ́ ɓěà ké Kénà-nyɔ̀ ɓěɔ̀ gbo vɔ̃. Ɔ ɖǎ ná nìǐn, nìí, à kè ɓě mu ɖé ɓě nììn páɔ̀ mú muùn.” Ké Símìɔ̀-gàà ɓěɔ̀ sí ma wa kíɖíí.

⁴ Ti ɓɛ́ Júɖà-nyɔ̀ ɓěɔ̀ kpa ma toɔ̀ kɛɛ, Bounɓoɔ̀ po ma Kénà-nyɔ̀ ɓěɔ̀ kè Pɛ́wìɖì-nyɔ̀ ɓěɔ̀ wa xwaún dyi. Ké wa ɖáɓá ma gàa táázĩ̀ìn ɓaɖa-bùè ɖé Bɛ́zɛ̀-hwɔ̀ɖɔ̀ɔ̀ mú.

⁵ Wa dyɛ̀ìn ma Bɛ́zɛ̀-hwɔ̀ɖɔ̀ɔ̀ kã́á kɔ̃̀ nyɛ́nɛ́ mɔ̀ Àɖónì-Bɛ́zɛ̀ kɛɛ ɖé dyi, ké wa vɔ̃ ma ɔ gbo, ké wa ɖu ma Kénà-nyɔ̀ ɓěɔ̀ kè Pɛ́wìɖì-nyɔ̀ ɓěɔ̀ toún.

⁶ Púɛɛ, Àɖónì-Bɛ́zɛ̀ gbǔ ma, ké wa kpá ma ɔ kíɖíí, ké wa kpɔ̃ ma ɔ, ké wa cɛ̃ ma ɓó ɔ jìì-kpòɖò ɓěɔ̀ kè ɔ ɓìɛ̀-kpòɖò ɓěɔ̀.

⁷ Hwɛ̀ ké Àɖónì-Bɛ́zɛ̀ cɛ̃ɛ ma, ké ɔ ɖá, “Kǎà ḿ cɛ̃ ma kã́á kpáɖá-nyɔ tã ɓaɖa-bùè ɓěɛ̀ jìì-kpòɖò kè waà ɓìɛ̀-kpòɖò ɓě ɓó, ké wa cɛ̃́ ɖii-ɖɛ̀-bùǒ dyi ɖé ní téɓèɖèɔ̀ xwíɖíi. Ɓó kàǔn wɛ̃ɛ, Gèɖèpɔ́ɔ̀ nìǎ ḿ kpa dyí zàǐn ɓó ɖɛ ɓɛ́ ḿ nyu ma kà wa bũ̌ɛɛ jè.” Ké wa kpa ma ɔ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké ɔ mɛ́ìn ma ɖé.

Júɖà nììn xwéɖé-dùɔ̀ ɖu Jùɖúsɛ̀ɖɛ̀ìn-hwɔ̀ɖɔ̀ɔ̀ kè Hɛ́bɔ̀nɔ̀-hwɔ̀ɖɔ̀ɔ̀ toún

⁸ Ké Júɖà-gàà ɓěɔ̀ vɔ̃ ma Jùɖúsɛ̀ɖɛ̀ìn-hwɔ̀ɖɔ̀ɔ̀ gbo, ké wa ɖú ma hwɔɖɔɔ̀ dyí. Wa ɖáɓá ma nyɔ ɓě nì ma ɖé hwɔɖɔɔ̀ múɛɛ gàsíà dyí, ké wa fɔ̃ ma hwɔɖɔɔ̀.

⁹ Sɔ̀ìn ɓóɛ gboɛɛ, Júɖà-gàà ɓěɔ̀ mu ma Kénà-nyɔ̀ ɓě cĩ́ ma ɖé Kénà Toɖo-ɓòɖòɔ̀ kè Nɛ́gà-ɓòɖòɔ̀ ɔ kè bɔɔ-kpà hwɔ ma ɖé toɖo-ɓòɖòɔ̀ dyóɖó-xwáɖáún-wóɖóìn-naínɔ̀ dyíɛ kɔ̃ɛɛ gbo vɔ̃ùn.

¹⁰ Ké wa vɔ̃ ma Kénà-nyɔ̀ ɓě cĩ́ ma ɖé Hɛ́bɔ̀nɔ̀-hwɔ̀ɖɔ̀ɔ̀ múɛɛ gbo. Ké wa ɖu ma Sésàì kè Àhímà ɔ kè Táámàì ɓěɛ̀ gbǒ-xwíníín ɓěɔ̀ toún. Hɛ́bɔ̀nɔ̀-hwɔ̀ɖɔ̀ɔ̀ nyɛ́nɛ́ ɔ jǔ ma kĩ́ín nyɛɛ mɔ̀ Kíjà-Áɓà.

Àníè ɖu Déɓì-hwɔ̀ɖɔ̀ɔ̀ toún

¹¹ Ké sɔ̀ìn ɓóɛ gboɛɛ, Júɖà-gàà ɓěɔ̀ vɔ̃ ma nyɔ ɓě cĩ́ ma ɖé Déɓì-hwɔ̀ɖɔ̀ɔ̀ múɛɛ gbo. Hwɔɖɔɔ̀ nyɛ́nɛ́ ɔ jǔ ma kĩ́ín nyɛɛ mɔ̀ Kíjà-Séfɛ̀.

¹² Ɓó tia ɓaɖaa, Kéɖɛ̀ po ma wuɖui, ké ɔ ɖá, “Nyɔ mɔ̀ nyɔ mu Kíjà-Séfɛ̀-hwɔ̀ɖɔ̀ɔ̀ toún ɖuùn wɛ̃ɛ, ní mu ɔ ní dyú-màà mɔ̀à Ákàsà kɛɛ nyíìn, ɓɛ́ ɔ ké ɔ gmàà jǔ.”

¹³ Ké Àníè ɓɛ́ ɔ mɔ̀ ma Kɛ́nàà dyú-gàà kɛɛ ɖu ma hwɔɖɔɔ̀ toún. Ɔ jèɛɛ, Kéɖɛ̀ nyí ma ɔ dyú-màà mɔ̀à Ákàsà kɛɛ Àníè, ɓɛ́ ɔ ké ɔ gmàà jǔ. Kɛ́nà mɔ̀ ma Kéɖɛ̀ɛ̀ ɖíí-gàà dyùwè.

¹⁴ Wé kɔ̃̀ ɓaɖa ɓɛ́ Àníè kè Ákàsà kpɔ̃ìn ma dyiɛɛ, Àníè cɛ̃ɛ ma Ákàsà gbo, ké ɔ ɖá, “Zɔ̀ìn m̀ ɓǎ pá ɖò ɓó à bìì.” Ɔ jèɛɛ, Ákàsà sɔ̀ ma ɔ jǎkasìɔ̀ kɔ̃ún, ké ɔ mu ma ɖé ɔ ɓǎ gbo. Ké ɔ ɓǎ diè ma ɔ dyi, ké ɔ ɖá, “Ɖɛ́ m̀ mɔ́ kɛ́?”

¹⁵ Ké Ákàsà jǔ ma ɔ gɔ̃̌, ké ɔ ɖá, “Ní mɔ́ ɓɛ́ m̀ ké wɛ́ɛ ḿ pá ɓɛ́ ɔ ɓéɖé ní-dù ɓě kɛɛ nyí, sepóɛɖé pá ɓɛ́ m̀ ɖǎà ḿ nyí ɖé Nɛ́gà-ɓòɖòɔ̀ kɔ̃ɛɛ se ní ɖò ɓéɖé.” Ɔ jèɛɛ, Kéɖɛ̀ nyí ma ɔ pá ɓɛ́ ɔ ɓéɖé ma ní-dù ɓě ɖé ɔ xwía kè ɔ zɔ̃̌in nyɛ.

Júɖà kè Bɛ̃́címàà xwéɖé-dù ɓěɔ̀ nììn to-ɖu-ɖu

¹⁶ Sɔ̀ìn ɓóɛ gboɛɛ, Mózèɛ̀ bùǐ-gàà mɔ̀à Kénɛ̀-nyɔ̀ɔ̀ kɛɛ nììn xwíníín-dyù ɓě kè Júɖà-nyɔ̀ ɓěɔ̀ sɔ̀ ma ɖé Hwɛ̃-Gbǎ-hwɔ̀ɖɔ̀ɔ̀ mú, ké wa cĩ́ ma ɖé Júɖà Gbǎùn-fúɖúáɔ̀ kɔ̃, ɖé nyɔ ɓě cĩ́ ma ɖeɛɛ hwìɛ̀. Júɖà Gbǎùn-fúɖúáɔ̀ hwɔ ɖé Áwɔ̀ɖɔ̀-hwɔ̀ɖɔ̀ɔ̀ wáún dyí ɖé Nɛ́gà-ɓòɖòɔ̀ kɔ̃.

¹⁷ Hwɛ̀ ké Júɖà-gàà ɓěɔ̀ kè wa ɖíí ɓě mɔ̀à Símìɔ̀-gàà ɓěɔ̀ kɛɛ poìn ma gbo, ké wa kpa ma Kénà-nyɔ̀ ɓě nì ma ɖé Zɛ́fà-hwɔ̀ɖɔ̀ɔ̀ múɛɛ to kɔ̃. Ké wa gbɔɔ̀ ma hwɔɖɔ gànáɔ̀ mú. Ɔ jèɛɛ, wa jǔìn ma hwɔɖɔɔ̀ Hɔ́mà-nyɛ̀nɛ̀ kɔ̃̀ xwíníín mɔ̀ mú-gbɔɔ̀-gbɔɔ̀ kɛ.

¹⁸ Ké Júɖà-gàà ɓěɔ̀ ɖú ma Gázà-hwɔ̀ɖɔ̀ɔ̀ kè Àkéɖɔ̀ùn-hwɔ̀ɖɔ̀ɔ̀ ɔ kè Ɛ́kɔ̀nɔ̀-hwɔ̀ɖɔ̀ɔ̀ dyí ɖekè, dè hwɔɖɔ-kpàǎ ɓě nì ma hwɔɖɔ ɓěɛ̀ ɖeiɛɛ kɔ̃.

¹⁹ Bounɓoɔ̀ nì ma ɓó Júɖà-gàà ɓěɔ̀ gbo, ké wa ɖú ma Kénà Toɖo-ɓòɖòɔ̀ dyí. Kɛɛ wa se ma nyɔ ɓě nì ma ɖé bɔɔ-kpàɔ̀ kɔ̃ɛɛ ɖé dyi kúmúɛ ɓɛ́ìn, sepóɛɖé nyɔ ɓěɔ̀ hwíì-sǒ ɓěɔ̀ mɔ̀ ma nɛɛ̀-kpà saá-saá.

²⁰ Ké Kéɖɛ̀ mɔ̀ùn kúmú ma Ánàkìɛ̀ dyú-gàà tã ɓěɔ̀ gbǒ-xwíníín-nyɔ̀ ɓěɔ̀ ɖé Hɛ́bɔ̀nɔ̀-hwɔɖɔɔ̀ mú dyi. Ɔ mɔ̀ hwɔɖɔ ɓɛ́ Éézùɖùɛ̀-nyɔ̀ vɛ̀nɛ̀ ɓěɔ̀ nyí ma kà ɔ kà Mózè nyuɛ zɔ̃̌ɔ̀ kà ɔ nyɛ́nɛ́ín ɖáìn nyɛ.

²¹ Kɛɛ Bɛ̃́címà nììn xwéɖé-dùɔ̀ se ma Jɛ́ɓù-nyɔ̀ ɓě cĩ́ ma Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ ɖé dyi kúmú. Ɔ jèɛɛ, Jɛ́ɓù-nyɔ̀ ɓěɔ̀ cĩ́ ɖé Bɛ̃́címà nììn xwéɖé-dùɔ̀ hwìɛ̀ ke ɓó zɛ̃̌ɛ̀.

Ífèɖèìn kè Mànásì nììn xwéɖé-dù ɓěɔ̀ ɖu Bɛ́fèò-hwɔ̀ɖɔ̀ɔ̀ toún

²² Sɔ̀ìn ɓóɛ gboɛɛ, Ífèɖèìn kè Mànásì mɔ̀à Jòséɛ̀ dyú-gàà ɓěɔ̀ kɛɛ xwéɖé-dù ɓěɔ̀ kpa ma Bɛ́fèò-hwɔ̀ɖɔ̀ɔ̀ to kɔ̃, ké Bounɓoɔ̀ nì ma ɓó wa gbo.

²³ Ti ɓɛ́ wa tò ma gàa ɓě ɓɛ́ wa ké ma Bɛ́fèò-hwɔ̀ɖɔ̀ kɔ̃̀ nyɛ́nɛ́ mɔ̀ ma kà Ɖúzì kĩ́ín nyɛɛ dyéɖé gboi kpaìn nyɛɛ,

²⁴ hwɔɖɔ-dyéɖé-gboi-kpaìn-nyɔ̀ ɓěɔ̀ dyé ma gàa ɖò, ké ɔ nì ma ɖé hwɔɖɔɔ̀ mú sɔ̀ǔn, ké wa diè ma ɔ dyi, ké wa ɖá, “Zàìn à ɓàɖàìn-hwìè dyá hwɔɖɔɛ̀ kɛɛ da. Nìí, à mu m̀ wìǐn dyéìn.”

²⁵ Ɔ jèɛɛ, gàaɔ̀ zàìn ma wa hwìèɔ̀ da. Ké Ífèɖèìn-gàà ɓěɔ̀ kè Mànásì-gàà ɓěɔ̀ dyá ma ɖé hwɔɖɔɔ̀ mú, ké wa ɖáɓá ma nyɔ séín nì ɖé hwɔɖɔɔ̀ múɛɛ gàsíà dyí nyɛ̀nɛ̀ɛ̀. Kɛɛ wa póìn ma gàaɔ̀ kè ɔ gbǒ-xwíníín-nyɔ̀ séín ɓěɔ̀ ní.

²⁶ Sɔ̀ìn ɓóɛ gboɛɛ, gàaɔ̀ mu ma ɖé Hítì-nyɔ̀ ɓěɔ̀ ɓóɖóɔ̀ kɔ̃. Ké ɔ dè ma ɖé hwɔɖɔ ɖò, ké ɔ jǔìn ma hwɔɖɔɔ̀ Ɖúzì-nyɛ̀nɛ̀, ké nyɛ́nɛ́ɔ̀ nì hwɔɖɔɔ̀ dú ke ɓó zɛ̃̌ɛ̀.

Nyɔ ɓě ɓɛ́ Éézùɖùɛ̀-nyɔ̀ ɓěɔ̀ se Kénà-ɓòɖòɔ̀ kɔ̃ dyi kúmúɛ

²⁷ Mànásì nììn xwéɖé-dùɔ̀ se ma Kénà-nyɔ̀ ɓě nì ma hwɔɖɔ ɓěɛ̀ múɛɛ ɖé dyi kúmú. Hwɔɖɔ ɓěɔ̀ mɔ̀ Bɛ́sàùn kè Táánà kè Dóɔ̀ kè Ìɓéɖéàùn kè Mɛ̀gíɖò ɔ kè waà hwɔɖɔ-kpàǎ ɓěɔ̀. Sepóɛɖé Kénà-nyɔ̀ ɓěɔ̀ jìnìɛ̀n ma kɔ̃ kóɖó-kóɖó, ɓɛ́ wa ké ma ɖé ɓóɖóɔ̀ mú cĩ́ kánáá pū.

²⁸ Ti ɓɛ́ Éézùɖùɛ̀-nyɔ̀ ɓěɔ̀ ɖǎ ma gmɛ̀nɛ̀ɛ̀ kpa kóɖó-kóɖóɛɛ, wa se ma Kénà-nyɔ̀ ɓěɔ̀ ɖé ɓóɖóɔ̀ múin kúmú gàná cá, kɛɛ wa nyu ma wa pɔ́ɖɔ́sɔ́ mú.

²⁹ Ké Ífèɖèìn nììn xwéɖé-dùɔ̀ se ma Kénà-nyɔ̀ ɓě cĩ́ ma ɖé Gézɛ̀-hwɔ̀ɖɔ̀ɔ̀ múɛɛ ɖé dyi kúmú. Ɔ jèɛɛ, Kénà-nyɔ̀ ɓěɔ̀ sè ma ɖé wa hwìɛ̀.

³⁰ Ké Zɛ́ɓíúɖɔ̀ùn nììn xwéɖé-dùɔ̀ se ma Kénà-nyɔ̀ ɓě cĩ́ ma ɖé Kítɔ̀nɔ̀-hwɔ̀ɖɔ̀ɔ̀ kè Nàháɖò-hwɔ̀ɖɔ̀ɔ̀ múɛɛ ɖé dyi kúmú. Ɔ jèɛɛ, wa sè ɖé wa hwìɛ̀, ké wa nyu ma Kénà-nyɔ̀ ɓěɔ̀ pɔ́ɖɔ́sɔ́ mú.

³¹ Ké Ásè nììn xwéɖé-dùɔ̀ se ma nyɔ ɓě cĩ́ ma ɖé hwɔɖɔ ɓěɛ̀ múɛɛ ɖé dyi kúmú. Hwɔɖɔ ɓěɔ̀ mɔ̀ Ákò kè Zíɖɔ̀ùn kè Áɖàɓì kè Ázì kè Hɛ́ɓà kè Áfè ɔ kè Wíɖíhɔ̀.

³² Ɔ jèɛɛ, Ásè nììn xwéɖé-dùɔ̀ cĩ́ ma ɖé Kénà-nyɔ̀ ɓě nì ma kà ɖé ɓóɖóɔ̀ múɛɛ hwìɛ̀.

³³ Ké Náfátàɖì nììn xwéɖé-dùɔ̀ se ma nyɔ ɓě cĩ́ ma ɖé Bɛ̀-Sɛ́mɛ̀-hwɔ̀ɖɔ̀ɔ̀ kè Bɛ̀-Ánàfì-hwɔ̀ɖɔ̀ɔ̀ múɛɛ ɖé dyi kúmú. Ɔ jèɛɛ, wa mɔ̀ùn cĩ́ ma ɖé Kénà-nyɔ̀ ɓě nì ma ɖé ɓóɖóɔ̀ múɛɛ hwìɛ̀. Ké Kénà-nyɔ̀ ɓě cĩ́ ma ɖé hwɔɖɔ ɓěɛ̀ múɛɛ nyu ma pɔ́ɖɔ́sɔ́-kũ̀à ɓó wa bìì.

³⁴ Ké Ámɔ̀-nyɔ̀ ɓěɔ̀ kúmú ma Dɛ̃́ìn nììn xwéɖé-dùɔ̀ ɖé bɔɔ-kpàɔ̀ kɔ̃in, ké wa mu ma ɖé Kénà Toɖo-ɓòɖòɔ̀ kɔ̃. Ámɔ̀-nyɔ̀ ɓěɔ̀ se ma wɔ̃́ɔ ɓɛ́ìn ɓɛ́ Dɛ̃́ìn nììn xwéɖé-dùɔ̀ ké ma ɖé bɔɔ-kpàɔ̀ kɔ̃ dyi.

³⁵ Ké Ámɔ̀-nyɔ̀ ɓěɔ̀ jìnìɛ̀n ma kɔ̃ kóɖó-kóɖó, ɓɛ́ wa ké ma ɖé Hɛ́wɛ̀ɖɛ̀-tòɖòɔ̀ gbo kè Àjáɖɔ̀ùn-hwɔ̀ɖɔ̀ɔ̀ ɔ kè Sááɓììn-hwɔ̀ɖɔ̀ɔ̀ mú cĩ́ ɖekè. Kɛɛ ti ɓɛ́ Ífèɖèìn kè Mànásì nììn xwéɖé-dù ɓěɔ̀ ɖǎ ma gmɛ̀nɛ̀ɛ̀ kpa kóɖó-kóɖóɛɛ, púɛɛ, wa nyu ma Ámɔ̀-nyɔ̀ ɓěɔ̀ mɔ̀ùn pɔ́ɖɔ́sɔ́ mú.

³⁶ Ɓó tia ɓaɖaa, Ámɔ̀-nyɔ̀ ɓěɔ̀ ɓóɖóɔ̀ kpɔ̃̀ìn ma Àkáɖáɓììn-tòɖòɔ̀ wĩin, ké ɔ zĩ̀ìn ɖé Sɛ́ɖà-hwɔ̀ɖɔ̀ɔ̀ mú, ké ɔ zi ɓó.