Jasúé 1 - Ɓǎsɔ́ɔ̀ Báɓòɔ̀

Bounɓoɔ̀ cɛ̃ɛ kà Jasúé mɛ ɖu Kénà-ɓòɖòɔ̀ toún wɛ̃

¹ Ti ɓɛ́ Mózè mɔ̀à Bounɓoɔ̀ gbo-nì-nyɔ̀ɔ̀ kɛɛ ɖǎ ma mɛ́ɛ, Bounɓoɔ̀ cɛ̃ɛ ma Jasúé mɔ̀à Núùnɛ̀ dyú-gààɔ̀, ké ɔ mɔ̀ ma kà Mózèɛ̀ sɔ̃-xwíɖíi-dè-nyɔ̀ɔ̀ kɛɛ gbo, ké ɔ ɖá,

² “Ní gbo-nì-nyɔ̀ Mózè ɖǎ mɛ́. Ɓó kàǔn wɛ̃ɛ, m̀ kè Éézùɖùɛ̀-dyù séín ɓěɔ̀ mɛ sɔ̀ dyí, ɓɛ́ ɓě ké Jɔ́nì-nìɔ̀ péɖé, ɓɛ́ ɓě ké ɓóɖó ní muà ɓě nyíìn nyɛɛ kɔ̃ mu.

³ Ní mu ɓě pá séín ɓɛ́ ɓě mu kɔ̃in nàùn wɛ̃ɛ nyíìn kà ḿ nyuɛ ma kà Mózè nyɛ́nɛ́ín ɖáìn nyɛ.

⁴ Ké kà ɓěɛ̀ ɓóɖóɔ̀ mu ɓɛ́ìn nyɛɛ mɔ̀ sɔ̀ìn ɖé gbǎùn-fúɖúá nìà ɖé ɓóɖóɔ̀ zɔ̃̌in nyɛɛ gbo, nyinià ɖé Ɖɛ́ɓèɖɔ́ùn-tòɖò ɓě nìà ɖé ɓóɖóɔ̀ xwía kɛɛ gboɛ kè sɔ̀ìn ɖé Dyùféɖétì-nìɔ̀ wĩín kè Hítì-ɓòɖò nìà ɖé dyóɖó-xwáɖáún-wóɖóìn-naínɔ̀ kɛɛ gbo, muà ɖé Mɛ́ɖɛ̀tɔ̀wéɖénìà-dyòǒ nìà ɖé dyóɖó-dyi-kpáìn-naínɔ̀ kɛɛ wĩín nyɛ.

⁵ Kà ḿ nyu ma kà ɓó Mózè gbo nìɛ̀ kɛɛ, kǎà ní mu ɓó m̀ gbo nììn ɖekè, ké nyɔ ɖò se ɓó m̀ dyúa dyi nyànàà ɓɛ́ǐn mu ɖé nì fɛ̀ɛ̀-wè séín mú. Ḿ se m̀ dyi táǎ mu, ké nì jè se ḿ hwìɖǐi sɔ̀ɔ̌ mu.

⁶ Ɔ jèɛɛ, m̀ mɛ ku dyi, ɓɛ́ m̀ ké hwòɖǒ ku, sepóɛɖé mɔ̀ mɔ̀ nyɔ mu nyɔ ɓěɛ̀ ɓóɖó ɓɛ́ ḿ ɖáìnǒ zɔ̃̌ɔ̀ wa ɓǎ nììn ɓǎ ɓěɔ̀ nyɛ́nɛ́ín nyɛɛ kɔ̃ kpaùn, ɓɛ́ wa kéɛ wuɖuí kɔ̃̀.

⁷ M̀ mɛ ɓɔ́ fã̀à peɖeɛ, kɛɛ m̀ mɛ ku hwòɖǒ. Ké m̀ mɛ kpɔ̃ gma séín ɓɛ́ ní gbo-nì-nyɔ̀ Mózè nyí ma kà m̀ wɛ̃ɛ dyi kóɖó-kóɖó. M̀ mɛ sí gma ɓěɔ̀ kíɖíí, ké mɔ̀ǔn ɖá ɓɛ́ m̀ ké ɖé ɖiaún mɔɔ kunuaún kpáìn. Ɔ jǔ ké m̀ dyi wa dyi kpɔ̃ kóɖó-kóɖó ní, nìí, dà séín ɓɛ́ nì mu muùn wɛ̃ɛ, nì nyuu-ɖɛ̀ séín mu dúún zaìn.

⁸ M̀ mɛ zà gma-cèè-ɖɛ̀ɔ̀ wuɖuún ti séín, ɓɛ́ m̀ ké ɖɛ m̀ zàà wuɖuún ɖé gma-cèè-ɖɛ̀ɔ̀ múɛɛ jè hwìɖǐi poìn ɓó máaún kè dyóɖóaún, ɓɛ́ m̀ ké ɖɛ séín céèà ɖéɛ múɛɛ dyi kpɔ̃ kóɖó-kóɖó. M̀ dyiɛ náa nyuín, nìí, nì nyuu-ɖɛ̀ séín mu mú wóɖóùn, ɓɛ́ wa ké dúún zaìn.

⁹ Má, ḿ cɛ̃ɛ m̀ gbo kà m̀ mɛ ku dyi, ɓɛ́ m̀ ké hwòɖǒ kuɛe? M̀ mɛ ɓɔ́ fɛ̃̀ìn, ké nì hwòɖǒ mɛ ɓɔ́ ɖé ɖei kpáa, sepóɛɖé mɔ̄ Bounɓo mɔ̀à nì Gèɖèpɔ́ɔ̀ kɛɛ mu ɓó m̀ gbo nììn dà séín ɓɛ́ nì mu muùn wɛ̃.”

Jasúé cɛ̃ɛ Éézùɖùɛ̀-nyɔ̀ ɓěɔ̀ gbo, ɓɛ́ wa ké ti dyé

¹⁰ Ti ɓɛ́ Bounɓoɔ̀ ɖǎ ma Jasúé gbo wùɖùɛ̀ hwɔɛɛ, Jasúé cɛ̃ɛ ma Éézùɖùɛ̀-nyɔ̀ ɓěɔ̀ nàìn-nyɔ̀ ɓěɔ̀ gbo, ké ɔ ɖá,

¹¹ “Ɓě mu, ɓɛ́ ɓě ké zio po ɖé jàɖàìn-hwɔ̀ɖɔ̀ɔ̀ múin, ɓɛ́ ɓě ké níiń, ‘Ɓě mɛ naɓaà ɓěɛ̀ hwìè-kɔ̃-ɖìì-ɖɛ̀ ɓě, sepóɛɖé ɓěà mu Jɔ́nì-nìɛ̀ péɖéìn ɓó zɔ̃̀ɔ̀, ɓɛ́ ɓěà ké ɓóɖó ɓɛ́ Bounɓo mɔ̀à ɓěà Gèɖèpɔ́ɔ̀ kɛɛ muà ɓěà nyíìn, ɓɛ́ ɓěà kéà wuɖuí kɔ̃̀ɛɛ dyí ɖú.’ ”

¹² Hwɛ̀ ké Jasúé cɛ̃ɛ ma Wuɖuɓíín nììn xwéɖé-dùɔ̀ kè Gáà nììn xwéɖé-dùɔ̀ ɔ kè Mànásì nììn xwéɖé-dù fáún-fáúnɔ̀ gbo, ké ɔ ɖá,

¹³ “Ɔ mɛ nì ɓě hwìɖǐi kà ɓɛ́ Mózè mɔ̀à Bounɓoɔ̀ gbo-nì-nyɔ̀ɔ̀ kɛɛ cɛ̃ɛ ma ɓě gbo kà Bounɓo mɔ̀à ɓěà Gèɖèpɔ́ɔ̀ kɛɛ ɖǎ ɓě ɓóɖó nìà kɛ nyí, ɓɛ́ ɓě kéɛ kɔ̃ cĩ́ ɖé gìɖìǐ múɛ.

¹⁴ Ɓěɛ̀ gmàà ɓě kè ɓěɛ̀ dyú ɓě ɔ kè ɓěɛ̀ nyúà-ɖɛ̀ ɓěɔ̀ mɛ sè nɔ̄ ɓóɖó ɓɛ́ Mózè nyíà ɓě nɔ̄ Jɔ́nì-nìɛ̀ dyóɖó-xwáɖáún-wóɖóìn-naínɔ̀ kɛɛ kɔ̃. Kɛɛ ɓě mɔ̀ gàa séín ɓɛ́ìn to vɔ̃ɔ kɛɛ, ɓě ɖú ɓěɛ̀ toún-vɔ̃̀ìn-ɖɛ̀ ɓěɔ̀ dyí, ɓɛ́ ɓě ké ɓěɛ̀ ɖíí-gàà ɓěɔ̀ dyúa sí, ɓɛ́ ɓě ké Jɔ́nì-nìɛ̀ péɖé kĩ́ín. Ɓě mɛ kpá ɓěɛ̀ ɖíí-gàà ɓěɔ̀ gbo tee,

¹⁵ ɓɛ́ Bounɓoɔ̀ kéɛ nyu ɓɛ́ wa ké ɓóɖó ɓɛ́ ɔ muà wa nyíìn nyɛɛ wuɖuí kɔ̃̀, ɓɛ́ wa mɔ̀ùn ké ɖé gìɖìǐ mú cĩ́ kà ɓě mɔ̀ùn cĩ́à gìɖìǐ múɛ, hwɛ̀ ɓɛ́ ɓě ké nɔ̄ ɓóɖó ɓɛ́ Mózè nyíà ɓěɛɛ kɔ̃ ɖe dyi, ɓɛ́ ɓě kéɛ mú cĩ́.”

¹⁶ Ké Wuɖuɓíín nììn xwéɖé-dùɔ̀ kè Gáà nììn xwéɖé-dùɔ̀ ɔ kè Mànásì nììn xwéɖé-dù fáún-fáúnɔ̀ jǔ ma Jasúé gɔ̃̌, ké wa ɖá, “Ɖɛ kã̀ìn séín ɓɛ́ m̀ cɛ̃à à gboɛɛ, à muɛ nyuùn, ké dɛ̀ kã̀ìn séín nì mu à ɖoɓoùn wɛ̃ɛ, à mu ɖé muùn.

¹⁷ Kà à nyu ma kà Mózèɛ̀ wuɖu nyuɛ kɛɛ, kǎà à mu nììn wuɖu nyuùn ɖekè. Ké Bounɓo mɔ̀à nì Gèɖèpɔ́ɔ̀ kɛɛ mɛ nì ɓó m̀ gbo kà dyúáɖò kà ɔ nì ma kà ɓó Mózè gboɛ.

¹⁸ Nyɔ ɓɛ́ ɔ mu m̀ gbo vɔ̃ùn, ké ɔ se ɖɛ séín nì mu cɛ̃ìn nyɛɛ nyuɛ́ mu kɛɛ, à mu nyɔɔ̀ ɖáɓáùn. Ɖɛ m̀ ɓéɖé ɓɛ́ m̀ ké nyuɛɛ mɔ̀ ɓɛ́ m̀ ké dyi ku, ɓɛ́ m̀ ké hwòɖǒ ku mìɔ.”