Ìzíkìò 1 - Ɓǎsɔ́ɔ̀ Báɓòɔ̀

DYÍ-TƐ̀MƐ̀ÌN-ƉƐ̀ KĨ́ÍN-KĨ́ÍN ÌZÍKÌÒ DYÉ MA ƁÁ GÈƉÈPƆ́Ɔ̀ DYÍƐ ( 1:1–7:27 ) Gèɖèpɔ́ɔ̀ zèèɔ̀

^1-3 Mɔ̄ Ìzíkìò mɔ̀à sáa-zà-nyɔ̀ mɔ̀à Búzìɛ̀ dyú-gààɔ̀ kɛɛ, wa kpa ma ḿ kè Kã́á Jɛ̀hódyàcĩ̀ìn ɔ kè Éézùɖùɛ̀-nyɔ̀ ɖíɛ́ ɓě ɖé Báɓèɖɔ́ùn-ɓòɖòɔ̀ kɔ̃. À mɔ̀ ma toɛ̀-kpɔ̃-nyɔ̀ ɓě, ké à cĩ́ ma ɓó Kéɓà-nìɔ̀ wĩín. Wé ɖòɛ̀ ɓaɖaa, ḿ dyéɛ, ké dyɔɔ̀ kaà ma, ké ḿ dyé ma dyí-tɛ̀mɛ̀ìn-ɖɛ̀ ɖò ɓá Gèɖèpɔ́ɔ̀ dyí. Ɖɛ nìà kɛ kpá ma ɖé à zɔ̃ hm̀m̌ nììnɔ̀ dɛ̀nɛ̀ hĩinyɛ nììnɔ̀ wé hm̀m̌ nììnɔ̀ ɓaɖa. Ɓó tia ɓaɖaa, ḿ nyuá ma zɔ̃ kpáɖá-nyɔ ɓaɖa-bùè. Ké Bounɓoɔ̀ wùɖù ma ḿ gbo, ké ɔ kpéɔ̀ dyi ma ḿ kɔ̃.

⁴ Ɓó tia ɓaɖaa, ḿ dyé ma dìì vɛ̀nɛ̀ ɖò sɔ̀ìn ɖé xwía. Ké ní-kpò vɛ̀nɛ̀ ɖò nì ma ɖé dyɔɔ̀ dyí, ké wɛ́ɖɛ́-wɛ́ɖɛ́ nì ma ɖéɛ mú poɛń. Ké ce vɛ̀nɛ̀ ɖò gbǎìn ma ní-kpòɔ̀ wɔ̃, ké ɔ nì kà nyɛ-ɓɔ́ɔ́ nìà kɛ. Ké nyɛ-ɓɔ́ɔ̀ hwòɖǒǔn nì kà nɛɛ̀-kpà bo-bo nìà kɛ.

⁵ Ké ɖɛ hwɔìn mɛɛ-ɖɛ̀ nì cĩ́ɛń nyɛɛ hĩinyɛ nì ma ɖé nyɛ-ɓɔ́ɔ̀ mú. Wa hwɔìn ma nyɔǔn-dyù,

⁶ kɛɛ wa ɖò-ɖò ɓéɖé ma dyúa hĩinyɛ kè pìɔ̌-kpà hĩinyɛ.

⁷ Waà ɓo ɓěɔ̀ sɛ́ɖɛ́ìn ma dyí, ké ɔ nì ma kà ɓìɖǐ-dyùɛ̀ ɓo nìà kɛ, ké ɔ fã kà bàɖàsǐ ɓɛ́ wa ɖǎ nyáa po, ké ɔ fã kɛɛ nìà kɛ.

⁸ Wa ɓéɖé nyɔǔn-dyùɛ̀ sɔ̃ ɓó waà pìɔ̌-kpà ɓě nìà waà wáká hĩinyɛɔ̀ kɔ̃ɛɛ xwíɖíi. Kà wa hĩinyɛɔ̀ dyúa ɓěɔ̀ kè pìɔ̌-kpà ɓěɔ̀ nyu kà nìɛ̀.

⁹ Wa kpá gbɛ̌ɛ̀ mú, ké waà pìɔ̌-kpà ɓěɔ̀ tiniìn tìnììn dyi. Wa ɖò-ɖò dyi muɛń nìǐn, nìí, wa mu dyúa déín, ké wa ní cáɖá.

¹⁰ Kà waà dyúa ɓěɔ̀ nyu kà nìɛ̀. Wa ɖò-ɖò séín ɓéɖé nyɔǔn-dyùǎ, ké wa ɖò-ɖò séín ɓéɖé ganìǎ-dyùǎ hwɔ ɖé wa ɖiaún dyí, ké wa ɖò-ɖò séín ɓéɖé ɓìɖǐ-dyùǎ hwɔ ɖé wa kunuaún dyí, ké wa ɖò-ɖò séín ɓéɖé ke-dyùǎ ɖé wa kíɖíí.

¹¹ Kǎà waà dyúa ɓěɔ̀ nyu nìɛ̀. Waà pìɔ̌-kpà ɓěɔ̀ sɔ̃́ pɛ́ɛ̀ kɔ̃in, ké wa tò dyií. Wa ɖò-ɖòɛ̀ pìɔ̌-kpà sɔ̃́ tìnììn wa mǔè ɖò nììn pìɔ̌-kpà dyi ɖé wáká sɔ̃́ɔ̀ kɔ̃, ké wa ɖò-ɖò ɓáìn pìɔ̌-kpà sɔ̃́ ɔ mìɔùn bũ̌in.

¹² Wa ɖò-ɖò dyi muɛń nìǐn, nìí, wa mu dyúa déín, ké wa ní cáɖá. Dɛ̀ séín Bounɓoɔ̀ Zùùɔ̀ mu mùìn nyɛɛ, ɖéɛ̀ wa mɔ̀ùn mùìn. Wa dyi muɛń nìǐn, wa ní cáɖá.

¹³ Mɛɛ-ɖɛ̀ nì cĩ́ɛń ɓěɔ̀ gbɛ̌ɛ̀ɔ̀ hwòɖǒǔn nì pū kà nyɛ-kɛ̀nɛ̀ nìà kɛ. Ɔ nì pū kà nyɔ vũàà dɔ̀ɔ̀-kpà dyiɛ. Nyɛ nì wãuńɔ̀ fã ma ní mìɔ, ké wɛ́ɖɛ́-wɛ́ɖɛ́ sɔ̀ ma ɖéɛ mú.

¹⁴ Ké mɛɛ-ɖɛ̀ nì cĩ́ɛń ɓěɔ̀ nì ma mu nya dyi ɖe nyuɛń kà wɛ́ɖɛ́-wɛ́ɖɛ́ poà kɛ.

¹⁵ Ti ɓɛ́ ḿ nì ma mɛɛ-ɖɛ̀ nì cĩ́ɛń ɓěɔ̀ dyi dyéɛń nyɛɛ, púɛɛ, ḿ dyé ma hwíì ɖò ɓó ɓíɖíi, ɓó mɛɛ-ɖɛ̀ nì cĩ́ɛń ɓéɖé dyúa hĩinyɛ ɓěɔ̀ ɖò-ɖò wáún.

¹⁶ Kà hwíì hĩinyɛ ɓěɔ̀ nyu ma nìɛ̀ kɛɛ kɛà kɛ̀. Wa nì ma fãuń kà sɔ́ɔ́ kpa ɖɛ ɓéɖé hwúe-dyèɖè ɖò nìà kɛ. Ké wa hĩinyɛɔ̀ hwɔìn ma ní nyɛ̀nɛ̀ɛ̀. Wa ɖò-ɖò nì kà hwíì deìn mú nìà kɛ.

¹⁷ Ɔ jǔ ké hwíì ɓěɔ̀ dyi nàǔn nìǐn, wa ɓɛ́ìn wáká hĩinyɛ ɓěɔ̀ ɖò kɔ̃ mùɛ̀n, ɓɛ́ wa ké se cáɖá.

¹⁸ Hwíì ɓěɔ̀ gbɛ̌ɛ̀ ɓěɔ̀ tɔ̀mɔ̀ ma dya, ké wa nì ma díɖí mìɔ cá. Ké dyéɖé toɖoìn ma gbɛ̌ɛ̀ hĩinyɛ ɓěɔ̀ bũ̌in dà séín.

¹⁹ Ti ɓɛ́ mɛɛ-ɖɛ̀ nì cĩ́ɛń ɓěɔ̀ mu daí sɔ̀ìn nyɛɛ ní, nìí, hwíì ɓě nìà ɓó wa wáún wɛ̃ɛ mɔ̀ùn sɔ̀ìn daí ɖekè. Ké ti ɓɛ́ mɛɛ-ɖɛ̀ nì cĩ́ɛń ɓěɔ̀ sɔ̀ ɓó ɓíɖíi dyíɛɛ ní, nìí, hwíì ɓěɔ̀ mɔ̀ùn sɔ̀ ɓó ɓíɖíi dyí ɖekè.

²⁰ Dɛ̀ séín ɓɛ́ Zùùɔ̀ mɔ́ muɛ dyiɛɛ, ɖéɛ̀ mɛɛ-ɖɛ̀ nì cĩ́ɛń ɓěɔ̀ mùìn. Wa kè hwíì ɓěɔ̀ naìn ma mú, sepóɛɖé Zùùɔ̀ nì ma ɖé hwíì ɓěɔ̀ mú.

²¹ Mɛɛ-ɖɛ̀ nì cĩ́ɛń ɓěɔ̀ mɔ̀ùn dyi daí sɔ̀ìn ní, nìí, hwíì ɓěɔ̀ mɔ̀ùn sɔ̀ìn daí ɖekè. Ké mɛɛ-ɖɛ̀ nì cĩ́ɛń ɓěɔ̀ mɔ̀ùn dyi dà ɖò sèìn ní, nìí, wa mɔ̀ùn sèìn ɓó ɖekè. Ké mɛɛ-ɖɛ̀ nì cĩ́ɛń ɓěɔ̀ dyi ɓó ɓíɖíi dyí sɔ̀ ní, nìí, wa mɔ̀ùn sɔ̀ ɓó ɓíɖíi dyí ɖekè. Sepóɛɖé Zùùɔ̀ nì ɖé hwíì ɓěɔ̀ mú.

²² Ké ɓó kɔ̃in ɖeɛɛ, ḿ dyé ma ɖɛ hwɔìn ɖɛ-kɔ̃-dè-ɖɛ̀ vɛ̀nɛ̀ ɖò, ké ɔ nì ma ɓó mɛɛ-ɖɛ̀ nì cĩ́ɛń ɓěɔ̀ kɔ̃in. Ɔ nì ma fãuń pū kà sɛ́ɓɛ́ɛ̀ nìà kɛ, ké ɔ nì ma díɖí mìɔ cá.

²³ Ké mɛɛ-ɖɛ̀ nì cĩ́ɛń ɓěɔ̀ pìɔ̌-kpà ɓěɔ̀ pɛ́ɛ̀ ma kɔ̃in, ké wa tiniìn tìnììn ma dyi ɖé ɖɛ-kɔ̃-dè-ɖɛ̀ɔ̀ xwíɖíi. Ké wa ɖò-ɖò ɓáìn pìɔ̌-kpà sɔ̃́ ɔ mìɔùn bũ̌in.

²⁴ Mɛɛ-ɖɛ̀ nì cĩ́ɛń ɓěɔ̀ dyi daí sɔ̀ìn ní, ní wɔ̃́ waà pìɔ̌-kpà ɓěɔ̀ jĩ̌. Jĩ̌ɔ̀ nì pū kà ní-tòɛ̀ jĩ̌ nìà kɛ. Ɔ nì pū kà kpé-séín-ɓéɖé-Gèɖèpɔ́ɔ̀ wuɖu dyià kɛ. Ɔ nì pū kà sójà kúɖúúɛ̀ jĩ̌ dyià kɛ. Wa dyi dà dyúáɖò dyi nyànà ní, nìí, wa wáɖá waà pìɔ̌-kpà ɓěɔ̀ ní.

²⁵ Ti ɓɛ́ wa nyànà ma ɓó dà dyúáɖò dyi, ké wa ɖǎ ma waà pìɔ̌-kpà ɓěɔ̀ wáɖá kɛɛ, púɛɛ, ḿ wɔ̃́ ma wuɖu ɖò ɖé ɖɛ-kɔ̃-dè-ɖɛ̀ nì ma kà ɖé wa kɔ̃in nyɛɛ kɔ̃in.

²⁶ Ké ḿ dyé ma ɖɛ hwɔìn zèè ɖò ɖé ɖɛ-kɔ̃-dè-ɖɛ̀ nì ma kà ɖé wa kɔ̃in nyɛɛ kɔ̃. Zèèɔ̀ kè sɔ́ɔ́ ɓéɖé ɓùɖǔù-dyèɖè mɔ̀ sááfɔ̀ kɛɛ hwɔìn ní. Ké ɖɛ hwɔìn nyɔǔn-dyù ɖò kò ma ɖé zèè nì ma kà ɖéé ɖé dyiíɛɛ kɔ̃.

²⁷ Ké ḿ dyéɛ, ké sɔ̀ìn ɓó ɔ gbe-zèɖè muà dyiíɛɛ nì pū kà nɛɛ̀-kpà bo-bo nìà ɖé nyɛ-ɓɔ́ɔ́ ɖò múɛ, ké sɔ̀ìn ɓó dyià ɓíɖíiɛɛ nì kà nyɛ nìà kɛ. Ké ce vɛ̀nɛ̀ ɖò gbǎìn ɔ wɔ̃.

²⁸ Ce nì ma ɔ ɖeiɛɛ nì pū kà ní-mɛ̀nɛ̀ nìà ɖé ní-kpò ɖò mú ɓó ní-ɖaɓa-wè ɖòɛ̀ ɓaɖaa nìà kɛ. Ɖɛ nìà kɛ mɔ̀ ma Bounɓoɔ̀ dĩ́ín-dĩ̀ìnɔ̀ ce. Ti ɓɛ́ ḿ dyéɛ ma kɛɛ, púɛɛ, ḿ jìɖǐ ma dyi. Hwɛ̀ ké ḿ wɔ̃́ ma nyɔ ɖòɛ̀ wuɖu.