Hòzéà 1 - Ɓǎsɔ́ɔ̀ Báɓòɔ̀

¹ Bounɓoɔ̀ wùɖù ma Hòzéà ɓɛ́ ɔ mɔ̀ ma Bééwìɖìɛ̀ dyú-gàà kɛɛ gbo. Ɓó tia ɓaɖaa, gàa ɓěɛ̀ ɖò-ɖò kɔ̃̀ ma Júɖà-ɓòɖòɔ̀ wuɖuí. Wa mɔ̀ Dyùzíà kè Jótàùn kè Éhà ɔ kè Hɛ́sèkádyà. Ké Jɛ́ɖòbóàùn ɓɛ́ ɔ mɔ̀ ma Jɛ̀hóàà dyú-gàà kɛɛ mɔ̀ùn mɔ̀ ma Éézùɖùɛ̀-ɓòɖòɔ̀ kã́á.

Hòzéà gmàà kè ɔ dyú ɓě

² Ti ɓɛ́ Bounɓoɔ̀ dè ma Hòzéà gbo wùɖùɛ̀ gbɔɛɛ, Bounɓoɔ̀ ɖá, “Mu, ɓɛ́ m̀ ké gbàɖàùn-màà ɖò dyi kpɔ̃, ɓɛ́ ɔ ké gbàɖàùn-dyù ɓě wóɖóìn, sepóɛɖé ɓóɖó gànáɔ̀ ɖǎ gbàɖàùn po mìɔ dyììn ɖé ḿ dyi-táà-táà mú.”

³ Ɔ jèɛɛ, Hòzéà mu, ké ɔ kpɔ̃ ma Gómɛ̀ ɓɛ́ ɔ mɔ̀ ma Dìɓáɖáìn dyú-màà kɛɛ dyi. Ké Gómɛ̀ nì ma zùù kɔ̃, ké ɔ wóɖóìn ma gàa-dyù ɖò.

⁴ Hwɛ̀ ké Bounɓoɔ̀ cɛ̃ɛ ma Hòzéà gbo, ké ɔ ɖá, “Jǔìn dyúɔ̀ Jìzéɖéò-nyɛ̀nɛ̀, sepóɛɖé ti sè ɓóɛɛ se ɓoún tɔ̀mɔ̀ ɖe, ɓɛ́ ḿ ké Jɛ́hùɛ̀ gbǒ-xwíníínɔ̀ gǎ kɔ̃ tò ɓó nyɔmɔɔ jĩ̀ kà ɔ wáɖáìn ma kà dyi ɖé Jìzéɖéò-hwɔ̀ɖɔ̀ɔ̀ múɛɛ jè. Dyììn ɖéɛ múɛɛ, ní muɛ nyuùn ɓɛ́ Éézùɖùɛ̀-dyù ɓěɔ̀ kã́á-ɓòɖòɔ̀ jè ké dyi zi.

⁵ Ké ní mu Éézùɖùɛ̀-dyù ɓěɔ̀ pɔnɔɔ̀ jaɖaùn ɖé Jìzéɖéò Bɔɔ-kpàɔ̀ kɔ̃.”

⁶ Sɔ̀ìn ɓóɛ gboɛɛ, Gómɛ̀ nì ma zùù kɔ̃ ɖe, ké ɔ wóɖóìn ma màa-dyù ɖò. Ké Bounɓoɔ̀ cɛ̃ɛ ma Hòzéà gbo, ké ɔ ɖá, “Jǔìn dyúɔ̀ Ɖò-Wùɖùhámà-nyɛ̀nɛ̀, sepóɛɖé ḿ se Éézùɖùɛ̀ɛ̀ gbǒ-xwíníínɔ̀ mú ɖɛ̀ɓɛ̀ɛ̌ mu ɖe fɔɔ cá. Ḿ se wa kɔ̃in zĩ̀ɛ̌n mu ɖe.

⁷ Kɛɛ ní mu Júɖà nììn gbǒ-xwíníínɔ̀ mú ɖɛ̀ɓɛ̀ìn, ɓɛ́ ḿ ké wa póìn. Ɔ se dyììn ɖé toún-vɔ̃̀ìn-ɖɛ̀ ɓě mɔ̀à sé-kpìì kè pɔnɔ mɔɔ gàsíà mɔɔ sǒ mɔɔ sǒ-nàìn-nyɔ̀ ɓěɛɛ mú, kɛɛ ɔ mɔ̀ mɔ̄ Bounɓo mɔ̀à waà Gèɖèpɔ́ɔ̀ kɛɛ mɔ̀ nyɔ muɛ nyuùn.”

⁸ Ti ɓɛ́ Gómɛ̀ ɖǎ ma Ɖò-Wùɖùhámà nɛɛ̀ wɔ̃ zàa, púɛɛ, ɔ nì ma zùù kɔ̃ ɖe, ké ɔ wóɖóìn ma gàa-dyù ɖò ɖe.

⁹ Ké Bounɓoɔ̀ cɛ̃ɛ ma Hòzéà gbo, ké ɔ ɖá, “Jǔìn dyúɔ̀ Ɖò-Ámì-nyɛ̀nɛ̀, sepóɛɖé ɓě se ní nyɔ, ké ḿ se ɓěɛ̀ Gèɖèpɔ́ɔ̀ ɖe.

Gèɖèpɔ́ɔ̀ kpɔ̃ Éézùɖùɛ̀-nyɔ̀ ɓěɔ̀ jè dyi ɖe

¹⁰ “Kɛɛ wɛ̃́ɛ́ kɛɛ, ɓě mɔ̀ Éézùɖùɛ̀-dyù ɓěɛɛ, ɓě mu nììn kà pĩ́ɔ nìà dyóóɔ̀ wĩin, ɓɛ́ nyɔ ɖò seà zɛɖɛɛ ɓɛ́ìn, mɔɔ ɖàɓàìn ɓɛ́ìn ɓó dyí vò jèɛɛ nìà kɛ. Dɛ̀ ɓɛ́ ḿ cɛ̃ɛ ma kà ɓě gbo, ɓɛ́ ḿ dyi níiń, ‘Ɓě se ní nyɔ ɓě ɖeoɛɛ,’ ɖé pá dyúáɖòɔ̀ mú, ɖéɛ̀ ní muɛ ɓě gbo cɛ̃ìn, ɓɛ́ ḿ ké níiń, ‘Ɓě mɔ̀ nì-nì Gèɖèpɔ́ɔ̀ dyú ɓě.’

¹¹ Ɔ ɖǎ ná nìǐn, nìí, Júɖà-nyɔ̀ ɓěɔ̀ kè Éézùɖùɛ̀-dyù ɓěɔ̀ mu dyí poìn ɖe. Ké wa mu wuɖuí-kɔ̃̀-nyɔ̀ dyúáɖò gãùn ɓó wa mìɔùn bìì. Ké wa mu ɓúáùn ɓɛ́ wa ké dúún zaìn ɖé ɓóɖóɔ̀ kɔ̃ ɖe. Jìzéɖéò nììn wéɔ̀ mu wé kpa ɖɛ ɖò jǔùn jǎà cá.