Gàɖézìà 1 - Ɓǎsɔ́ɔ̀ Báɓòɔ̀

Nyíɔún-zà-zà

¹ Céè-ɖɛ̀ nìà kɛ sɔ̀ mɔ̄ Pɔ́ɔ̀ gbo. Ḿ mɔ̀ àpɔ́sò. Ní àpɔ́sò-kũ̀àɔ̀ se ma nyɔǔn-dyù gbo sɔ̀ìn. Nyɔǔn-dyù seɛ nyu ɓɛ́ ḿ ké àpɔ́sò jǔ, kɛɛ Jízɛ̀ Kɛ́ɖɛ́ì kè Gèɖèpɔ́ɔ̀ mɔ̀à ɔ Ɓǎ, ɓɛ́ ɔ zà ma kà ɔ gĩɔ kɛɛ mɔ̀ nyɔ nyuɛ.

² Ḿ kè ɖíí séín ɓě nìà dà ḿ gboɛɛ zà ɓě mɔ̀ cɔ́cì-nyɔ̀ ɓě nìà ɖé Gàɖézìà-ɓòɖòɔ̀ kɔ̃ɛɛ nyíɔún.

³ Gèɖèpɔ́ɔ̀ mɔ̀à à Ɓǎ kɛ kè à Bounɓo Jízɛ̀ Kɛ́ɖɛ́ì mɛ po ɓě mana kɔ̃, ɓɛ́ wa ké ɓě gìɖìǐ nyí.

⁴ Kɛ́ɖɛ́ì tò ma ɔ mìɔùn ɓó à nàmàǔn ɓěɔ̀ jè, ɓɛ́ ɔ ké à ti nyìnììn dyíin ɓɛ́ à nìà múɛɛ xwaún zà kà à Gèɖèpɔ́ɔ̀ mɔ̀à à Ɓǎ kɛɛ mɔ́ ɓɛ́ ɔ kéɛ ma nyuɛ.

⁵ Gèɖèpɔ́ɔ̀ mɛ ɓéɖé ɓàìn-ɓàìn ɓó sè-ná-sèɛ̀ tiín. Kǎà ɔ mɛ nì.

Bɔ̃̌ nɔ̀mɔ̀ dyíinɔ̀ nì dyúáɖò nyɛ̀nɛ̀ɛ̀

⁶ Ḿ giniìn dyi mìɔ kà ɓɛ́ ɓě nì nyɔ ɓɛ́ ɔ ɖá ma kà ɓě dyììn ɖé Kɛ́ɖɛ́ìɛ̀ kpeɖeɛ̀-dyíin-nɔ̀mɔ̀-nɔ̀mɔ̀ múɛɛ kɔ̃ wãuń fṹàǔn, ké ɓě nìǎ bɔ̃̌ nɔ̀mɔ̀ dyíin kà kò ɖò gbo gmɔ̀ǐn nyɛ.

⁷ Kɛɛ bɔ̃̌ nɔ̀mɔ̀ dyíin kà kò ɖò se nì dyɛ mɔ̀ùn. Nyɔ ɖíɛ́ ɓě nì ɓó, ké wa nì ɓě fũ̀à-fṹá nyùɛ̌n, ké wa nì vɔ̃uń ɓɛ́ wa ké bɔ̃̌ nɔ̀mɔ̀ dyíin ɓá Kɛ́ɖɛ́ì dyíɛɛ dyí zàìn.

⁸ Kɛbì à mɔ̀ùn mɔɔ ínjà ɖò sɔ̀ìn ɖé dyɔún wɛ̃ɛ mɛ cɛ̃ bɔ̃̌ nɔ̀mɔ̀ dyíin kà kò ɖò ɓě gbo, ɓɛ́ ɔ kè nyɔ à cɛ̃ ma kà ɓě gboɛɛ ké se hwɔìn nyɛɛ ní, nìí, gboò-wùɖù mɛ nì ɔ kɔ̃.

⁹ À ɖǎa ma cɛ̃ kĩ́ín, ké ḿ nìà cɛ̃iń ɖe kàǔn wɛ̃̀. Nyɔ ɖò dyi bɔ̃̌ nɔ̀mɔ̀ dyíin kà kò ɖò ɓɛ́ ɔ kè nyɔ ɓě kpɔ̃ ma dyi kĩ́ín nyɛɛ se hwɔìn nyɛɛ ɓě gbo dyà ní, nìí, gboò-wùɖù mɛ nì ɔ kɔ̃.

¹⁰ Kàǔn wɛ̃ɛ, ɔ nì kà ḿ nì vɔ̃uń ɓɛ́ nyɔǔn-dyùɛ̀ hwòɖǒ ké ḿ múin dèìn nyɛɛ̀? Má, ḿ nì vɔ̃uń ɓɛ́ Gèɖèpɔ́ɔ̀ hwòɖǒ ké ḿ múin dèìne? Ḿ nì vɔ̃uń ɓɛ́ ḿ ké nyɔǔn-dyùɛ̀ hwòɖǒ dyi dèè? Ḿ dyiɔ́ vɔ̃uń nì, ɓɛ́ ḿ kéɔ́ nyɔǔn-dyùɛ̀ hwòɖǒ dyi dè ní, nìí, ḿ seɔ́ Kɛ́ɖɛ́ìɛ̀ gbo-nì-nyɔ̀ jǔɛ mu.

Kà Pɔ́ɔ̀ nyu ma àpɔ́sò jǔɛ kɛ

¹¹ Ḿ ɖíí ɓě, ḿ mɛ cɛ̃ ɓě ɖɛ nìà kɛ gbo. Bɔ̃̌ nɔ̀mɔ̀ dyíin ɓɛ́ ḿ cɛ̃ ma kà kɛɛ, ɔ se nyɔǔn-dyùɛ̀ nyuu-ɖɛ̀.

¹² Ḿ seɛ ma nyɔ ɖò gbo zà, mɔɔ nyɔ ɖò seɛ ma ḿ tɛ̀mɛ̀ìn. Kɛɛ Jízɛ̀ Kɛ́ɖɛ́ì mìɔùn tɛ̀mɛ̀ìn maa ḿ dyí.

¹³ Ɓě ɖǎ kà ḿ nyu ma cĩ́ɛ ti ɓɛ́ ḿ nì ma kà Júù-nyɔ̀ ɓěɔ̀ ɓiè-ɖɛ̀ ɓěɔ̀ dyi kpɔ̃uń teeɛɛ jè wɔ̃́. Ḿ zi ma Gèɖèpɔ́ɔ̀ cɔ́cì-nyɔ̀ ɓěɔ̀ gǎ dyéɛ̌n mìɔ, ké ḿ vɔ̃ cá ɓɛ́ ḿ ké Gèɖèpɔ́ɔ̀ cɔ́cìɔ̀ mú gbɔɔ̀.

¹⁴ Kà ḿ nyu ma Júù-nyɔ̀ ɓěɔ̀ ɓiè-ɖɛ̀ ɓěɔ̀ dyi kpɔ̃ɔ kɛɛ, ḿ zi ma ḿ mǔè Júù-nyɔ̀ pàɖǎ ɓɛ́ à zɔ̃ ɓɛ́ìn ma wɔ̃ɛɛ kɔ̃. Ḿ kpɔ̃ ma à ɓǎ sùà ɓěɔ̀ kpeɖe ɓěɔ̀ dyi kóɖó-kóɖó, ké ḿ zi ma ḿ mǔè ɓěɔ̀ mɔ̀ùn dyí.

¹⁵ Kɛɛ Gèɖèpɔ́ɔ̀ gã zɔ̃̌ɔ̀ ḿ kĩ́ín ɖé ḿ ɖe xwíníín hwɛ̀ ké ḿ wóɖó ma, ké ɔ ɖá ma ḿ dyììn ɖé ɔ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ mú.

¹⁶ Ké ti ɓɛ́ ɔ poɛ ma gbɔ, ɓɛ́ ɔ ké ma ɔ Dyú-gààɔ̀ ḿ dyí tɛ̀mɛ̀ìn, ɓɛ́ ḿ ké bɔ̃̌ nɔ̀mɔ̀ dyíin ɓá ɔ dyíɛɛ ɓóɖó-dù kà kò ɖò ɓěɛ̀ nyɔ ɓěɔ̀ gbo cɛ̃ɛ, ḿ se nyɔ kà kò ɖò gbo mu, ɓɛ́ ḿ kèɔ̀ kè ké ma ɖɛɔ̀ jè múin gmɔìn.

¹⁷ Ké ḿ se ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú mu, ɓɛ́ ḿ ké ma nyɔ ɓě mɔ̀ ma kà àpɔ́sò kĩ́ín hwɛ̀ ɓɛ́ ḿ dyià àpɔ́sò jǔɛɛ dyé. Kɛɛ ḿ mu ma ɖé Àwéɖéɓìà-ɓòɖòɔ̀ kɔ̃ wàɖà, ké ḿ kɔ́ìn ma ɖé Dìmásìkɔ̀-hwɔ̀ɖɔ̀ɔ̀ mú ɖe.

¹⁸ Zɔ̃ tã zi ma, hwɛ̀ ké ḿ mu ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓɛ́ ḿ ké ma Sífà mɔ̀à Píɖɛ̀ kɛɛ gboi té. Ḿ nyu ma ɖé ɔ gbo wíkì sɔ̃́ kè wé dyúáɖò.

¹⁹ Ḿ se ma ɖé àpɔ́sò kà kò ɖò dyé, kɛɛ ɔ sèìn ma Jĩ́ìn mɔ̀à Bounɓoɔ̀ ɖíí-gààɔ̀ kɛ.

²⁰ Ɖɛ ɓɛ́ ḿ céèà kɛɛ mɔ̀ jǎà. Ḿ se se tɔ́mɔ́uń nì ɓó Gèɖèpɔ́ɔ̀ dyúa.

²¹ Ɔ ɖǎ ma ná nìɛɛ, ḿ mu ma ɖé Síwíɖíà kè Sàɖésìà-ɓòɖò ɓěɔ̀ kɔ̃.

²² Ɖé ti ɓěa múɛɛ, Kɛ́ɖɛ́ìɛ̀ cɔ́cì-nyɔ̀ ɓě nìà ɖé Júɖìà-ɓòɖòɔ̀ kɔ̃ɛɛ se ma ḿ dyé, ɓɛ́ wa ké ma ḿ dyí dyuò.

²³ Ɖɛ ɓě wa dyuò ma dyíɛɛ, ɔ mɔ̀ ɖɛ ɓɛ́ nyɔ tɔ̀ɔ̀ ɓě cɛ̃ ma wa gboɛ. Wa ɖá, “Gàa ɓɛ́ ɔ ɖɛ̀ɓɛ̀ ɓɛ́ ɔ ké ma kà à gǎ dyéìn nyɛɛ, ɔ nìǎ hwìɖǐǐ-taɓa-ɖɛ̀ ɓě ɓɛ́ ɔ vɔ̃ ɓɛ́ ɔ ké ma kà mú gbɔɔ̀ kĩ́ín nyɛɛ jè cɛ̃iń.”

²⁴ Ɔ jèɛɛ, wa ɓàìn ma Gèɖèpɔ́ɔ̀ ɓó ní jè.