Ɛ́zùɖùà 1 - Ɓǎsɔ́ɔ̀ Báɓòɔ̀

Sáwàɖà zà Éézùɖùɛ̀-nyɔ̀ ɓěɔ̀ wuɖu kɔ̃ ɓɛ́ wa ké wa ɓíɖí ɖe mu

¹ Ɖé Sáwàɖà ɓɛ́ ɔ mɔ̀ ma Pɔ́sìà-ɓòɖòɔ̀ kã́á kɛɛ nììn ɓóɖó-wuɖuí-kɔ̃̀-zɔ̃̀ɔ̀ kĩ́ín-kĩ́ín múɛɛ, Bounɓoɔ̀ wùɖù ma Sáwàɖà mɔ̀à Pɔ́sìà-kã̀ǎɔ̀ kɛɛ hwòɖǒ-dyùà gbo. Ɔ jèɛɛ, Sáwàɖà po ma wuɖui ɖé ɔ kã́á-ɓòɖòɔ̀ dà séín, ké ɔ toìn ma céè-ɖɛ̀ dyi ɖekè. Ɖɛ ɓɛ́ Bounɓoɔ̀ cɛ̃ó zɔ̃̌ɔ̀ dyììn ɖé Jɛ̀ɖèmádyà múɛɛ nìǎ kà kpáuń wɛ̃̀.

² Sáwàɖà cɛ̃ɛ, ké ɔ ɖá, “Bounɓo mɔ̀à Gèɖèpɔ́ɔ̀ nìà ɖé dyɔún wɛ̃ɛ ɖǎ ḿ kã́á-ɓòɖò séín nì toɖo-kpàà kɔ̃ɛɛ nyí. Ké ɔ ɖǎa ḿ gbo cɛ̃, ɓɛ́ ḿ ké ɔ bìì gbǒ ɖò po ɖé Jùɖúsɛ̀ɖɛ̀ìn-hwɔ̀ɖɔ̀ nìà ɖé Júɖà-ɓòɖòɔ̀ kɔ̃ɛɛ mú.

³ Gèɖèpɔ́ɔ̀ mɛ nì ɓó ɓě séín mɔ̀à ɔ nyɔ ɓěɛɛ gbo. Ɓě sɔ̀ dyí, ɓɛ́ ɓě ké ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe mu, ɓɛ́ ɓě ké Bounɓo mɔ̀à Éézùɖùɛ̀ Gèɖèpɔ́ɔ̀, ɓɛ́ ɔ nìà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ gbǒɔ̀ po ɖe.

⁴ Bounɓoɔ̀ nyɔ ɓě mɔ̀à toɛ̀-kpɔ̃-nyɔ̀ ɓě nɔ̄ ɓóɖóɛ̀ múɛɛ, ɓě mɔ̀à wa mǔè ɓěɛɛ, ɓě mɛ nyí wa gbo-kpá-kpá, ɓɛ́ wa ké ɖe mu. Ɓě mɛ kpáìn wa séɓàɖà kè góò kè nyúà-ɖɛ̀ ɓě ɔ kè ɖɛ ɖíɛ́ ɓě wa ɓéɖé wa ké wa mìɔùn gbo ɓéɖéɛɛ gbo, ɔ kè hwòɖǒ-wáɖáá-nyìǐ-ɖɛ̀ ɓě ɓó Gèɖèpɔ́ɔ̀ gbǒ muà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú nììn nyɛɛ jè.”

⁵ Hwɛ̀ ké Júɖà-nyɔ̀ ɓěɔ̀ ɓóɖóɔ̀ cu-kpà ɓě kè Bɛ̃́címà-nyɔ̀ ɓěɔ̀ ɓóɖóɔ̀ cu-kpà ɓě kè sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ ɔ kè nyɔ séín ɓɛ́ Gèɖèpɔ́ɔ̀ poɛ hwòɖǒ bũ̌ɛɛ dyé ma ti, ɓɛ́ wa ké Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe kɔ́ìn, ɓɛ́ wa ké Bounɓoɔ̀ gbǒɔ̀ po ɖe.

⁶ Ké nyɔ séín ɓě nì ma ɓó wa ɖeiɛɛ nyí ma wa gbo-kpá-sɔ̃̀. Wa nyí ma wa séɓàɖà-ɖɛ̀-fùù kè góò kè ɖɛ ɓě wa kɔ̃̀ wa ké wa mìɔùn gbo ɓéɖéɛ kè nyúà-ɖɛ̀ ɓě ɔ kè ɖɛ kpa ɖɛ ɖíɛ́ ɓě, dè hwòɖǒ-wáɖáá-nyìǐ-ɖɛ̀ ɓě kɔ̃.

⁷ Ké Kã́á Sáwàɖà síìn ma ɖɛ-fùù ɓě ɓɛ́ Nɛ̀ɓùkànɛ́zà zà zɔ̃̌ɔ̀ kà ɖé Bounɓoɔ̀ gbǒɔ̀ mú, ɓɛ́ ɔ dyiɛ zɔ̃̌ɔ̀ kà kpa, ɓɛ́ ɔ dyiɛ zɔ̃̌ɔ̀ kà ɖé ɔ nììn gèɖèpɔ́ɔ̀ ɓěɔ̀ gbǒɔ̀ mú poɛ.

⁸ Kã́á Sáwàɖà zà ma ɖɛ-fùù ɓěɔ̀ wuɖu kɔ̃, ɓɛ́ Míwɛ̀ɖɛ̀ɖà ɓɛ́ ɔ mɔ̀ ma wíɖí-dyi-dè-nyɔ̀ kɛɛ ké wa síìn, ɓɛ́ ɔ ké wa zɛɖɛ, ɓɛ́ ɔ ké wa Sɛ̀ɓázà ɓɛ́ ɔ mɔ̀ ma Júɖà-nyɔ̀ ɓěɔ̀ nyɔ vɛ̀nɛ̀ kɛɛ xwa nyí.

⁹ Kà ɖɛ ɓěɔ̀ nyu ma jĩ̀ɛ̀ kɛɛ kɛà kɛ̀. Wa mɔ̀ mú-dèɖèìn-ɖɛ̀ ɓɛ́ ɔ mɔ̀ góò saá-saá kɛɛ kpáɖá-nyɔ ɓaɖa-bùè kè mú-dèɖèìn-ɖɛ̀ ɓɛ́ ɔ mɔ̀ séɓàɖà saá-saá kɛ táázĩ̀ìn dyúáɖò kè páni kpáɖá-nyɔ sè mɛ̀nɛ̌ìn-hĩinyɛ

¹⁰ kè góò-gbòɖòò kpáɖá-nyɔ ɓaɖa-bùè kè séɓàɖà-gbòɖòò táázĩ̀ìn sɔ̃́ hɔ̃dɛ̀ɖɛ̀ hĩinyɛ kè ɓaɖa-bùè ɔ kè ɖɛ-fùù tɔ̀ɔ̀ táázĩ̀ìn ɖò.

¹¹ Góò kè séɓàɖà-ɖɛ̀-fùù séín ɓěɔ̀ poìn dyí mɔ̀ táázĩ̀ìn hm̀m̌ kè hɔ̃dɛ̀ɖɛ̀ hĩinyɛ. Sɛ̀ɓázà kpa ma ɖɛ séín ɓěa ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ti ɓɛ́ wa mɔ̀ toɛ̀-kpɔ̃-nyɔ̀ ɓěɔ̀ kɛɛ ké ma ɖé Báɓèɖɔ́ùn-ɓòɖòɔ̀ kɔ̃ sɔ̀ɛ.