Ɛ́séɖɔ̀ 5 - Ɓǎsɔ́ɔ̀ Báɓòɔ̀

Mózè kè Eɖóún nì ɓó Íjè-kã̀ǎɔ̀ dyúa

¹ Sɔ̀ìn ɓóɛ gboɛɛ, Mózè kè Eɖóún mu ma ɖé Féwòɖò gbo, ké wa cɛ̃ɛ ma ɔ gbo, ké wa ɖá, “Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ ɖá, m̀ mɛ táà ɔ nyɔ ɓěɔ̀ dyi, ɓɛ́ wa ké mu, ɓɛ́ wa ké ɔ bìì hwɔ ɖò pa ɖé gbǎùn-fúɖúáɔ̀ kɔ̃.”

² Ké Féwòɖò cɛ̃ɛ ma wa gbo, ké ɔ ɖá, “Nyɛ́ mɔ̀ Bounɓoɔ̀ kɛ́, ɓɛ́ ḿ kéà ɔ wuɖu nyu, nìí ɓɛ́ ḿ kéà Éézùɖùɛ̀-nyɔ̀ ɓěɔ̀ dyi táà, ɓɛ́ wa kéà mu kɛ́? Ḿ se Bounɓoɔ̀ dyí dyuò, ké ḿ se Éézùɖùɛ̀-nyɔ̀ ɓěɔ̀ dyi táǎ mu, ɓɛ́ wa ké mu.”

³ Ké Eɖóún kè Mózè ɖá, “À kè Bounɓo mɔ̀à Híìbúɖúù-nyɔ̀ ɓěɔ̀ Gèɖèpɔ́ɔ̀ kɛɛ ɖǎ gmɔ̌ìn. Ɔ jèɛɛ, táà à dyi, ɓɛ́ à ké wé tã hwìè-kpà kpa ɖé gbǎùn-fúɖúáɔ̀ kɔ̃, ɓɛ́ à ké sáa zà ɖé Bounɓo mɔ̀à à Gèɖèpɔ́ɔ̀ kɛɛ gbo. Ɔ se ná nìǐn, ɔ mu à ɖáɓáùn dyììn ɖé wɛ́ mɔɔ to mú.”

⁴ Kɛɛ Féwòɖò cɛ̃ɛ ma Mózè kè Eɖóún gbo, ké ɔ ɖá, “Ɖɛ́ kɔ̃̀ jè ɓě zàà nyɔ ɓěɔ̀ kũ̀à gbo kɛ́? Ɓě nyuɛ ɓɛ́ nyɔ ɓěɔ̀ ké kũ̀à gbo ɖe mu wàɖà!

⁵ Ɓě dyé kà ɓěɛ̀ nyɔ ɓěɔ̀ ɖǎ dyí vò ké wa ɖǎ Íjè-nyɔ̀ ɓěɔ̀ dyí ziɛ. Ké ɓě mɔ́ ɓɛ́ ɓě ké waà kũ̀àɔ̀ ɓɔ́í poò?”

⁶ Ɓó wé dyúáɖòɔ̀ xwíníín nyɛɛ, Féwòɖò cɛ̃ɛ ma gǐì-ɓǎ ɓěɔ̀ kè Éézùɖùɛ̀-nyɔ̀ ɓě ɓɛ́ gǐì-ɓǎ ɓěɔ̀ gã ma ɓɛ́ wa ké ma Éézùɖùɛ̀-nyɔ̀ ɓěɔ̀ kɔ̃in nìɛɛ gbo, ké ɔ ɖá,

⁷ “Ɓěǐn ɖá ɓɛ́ ɓě ké nyɔ ɓěɔ̀ pìǐ ɓɛ́ wa poà bèɖěkè ɓě hwòɖǒǔn wɛ̃ɛ ɖò nyí ɖe. Wa mɛ mɔ́ wa mìɔùn nììn pìǐ dyi.

⁸ Ké wa mɛ mɛ bèɖěkè jĩ̀ kà ɓɛ́ wa mɛ ma kà kĩ́ín nyɛ. Ɓě mɛ ɓɔ́ɔ kɔ̃ zàà. Wa fó ní. Ɔ jè wa cɛ̃à, ké wa ɖá, ‘Táà à dyi, ɓɛ́ à ké à Gèɖèpɔ́ɔ̀ gbo sáa zàǎ muo’ kɛ̀.

⁹ Ɓě mɛ kùìn kũ̀àɔ̀ wɔ̃ ɖe mìɔ ɓó wa bìì, ɓɛ́ wa ké kũ̀à nyuɛń nì kánáá pū, wa ní kɔ̃̀ ɖà se ɖò ɖùǔ gbo tò.”

¹⁰ Ɔ jèɛɛ, gǐì-ɓǎ ɓěɔ̀ kè kɔ̃in-nyɔ̀ ɓěɔ̀ mu ma, ké wa cɛ̃ɛ ma nyɔ ɓěɔ̀ gbo, ké wa ɖá, “Féwòɖò ɖá ɔ se ɓě pìǐ ɖò nyíɛ mu ɖe.

¹¹ Ké ɔ ɖá, ɓě mɛ mu, ɓɛ́ ɓě ké ɓě mìɔùn nììn pìǐ dyi mɔ́ ɖé dɛ̀ kã̀ìn séín ɓɛ́ ɓě ɓɛ́ìn ɖò dyéɛ kɛ. Kɛɛ ɓěɛ̀ kũ̀àɔ̀ se kɔ̃ sɔ̀ɔ̌ mu fɔɔ cá.”

¹² Ké nyɔ ɓěɔ̀ gbɛ̀ìn ma Íjè-ɓòɖòɔ̀ gboi dà séín, ɓɛ́ wa ké pìǐ dyi mɔ́.

¹³ Ké gǐì-ɓǎ ɓěɔ̀ nì ma wa kɔ̃ nɛ́iń kánáá pū. Wa nìɛ̀ cɛ̃iń, ké wa ɖá, “Ɓě ɓéɖé ɓě ké wé séín nììn kũ̀àɔ̀ nyuɛ hwɔ kà dyúáɖò kà ɓě nyuɛ ma ti ɓɛ́ à nyí ma kà ɓě pìǐɛ.”

¹⁴ Ké gǐì-ɓǎ ɓěɔ̀ ɖú ma Éézùɖùɛ̀-nyɔ̀ ɓěɔ̀ kɔ̃in-nyɔ̀ ɓěɔ̀ ɓaɖa kpàǐ. Wa diè ma kɔ̃in-nyɔ̀ ɓěɔ̀ dyi, ké wa ɖá, “Ɖɛ́ kɔ̃̀ jè ɓě seà mabã̀a kè zɛ̃̌ɛ̀ nììn kũ̀àɔ̀ dyí hwɔ kà ɓě nyuɛ ma kà nyuɛ kĩ́ín nyɛɛ kɛ́?”

¹⁵ Hwɛ̀ ké Éézùɖùɛ̀-nyɔ̀ ɓěɔ̀ kɔ̃in-nyɔ̀ ɓěɔ̀ mu, ké wa wùɖù ma Féwòɖò gbo, ké wa ɖá, “Ɓɔ̌ɔ̀, ɖɛ́ kɔ̃̀ jè m̀ nyuà kà à kɛ́?

¹⁶ Gǐì-ɓǎ ɓěɔ̀ se à mɔ̀à nì gbo-nì-nyɔ̀ ɓěɛ̀ kɛɛ pìǐ ɖò nyí. Kɛɛ wɛ̃́ɛ́ kɛɛ, wa nɛ́ à kɔ̃, ɓɛ́ à ké bèɖěkè jĩ̀ náa nyu. Ɓó kɔ̃in ɖeɛɛ, wa ɓaɖa à, kɛɛ m̀ mìɔùn nììn nyɔ ɓěɔ̀ mɔ̀ nyɔ nyu ɖɛ gbàɔ̀.”

¹⁷ Ké Féwòɖò ɖá, “Ɓě mɔ̀ fóó-nyɔ̀. Ɓě fó ní. Ɔ jè ɓě cɛ̃à, ké ɓě ɖá, ‘Táà à dyi, ɓɛ́ à ké Bounɓoɔ̀ gbo sáa zàǎ muo’ kɛ̀.

¹⁸ Ɓó kàǔn wɛ̃ɛ, ɓě fṹà, ɓɛ́ ɓě ké kũ̀à gbo ɖe mu. Wa se ɓě pìǐ ɖò nyíɛ mu ɖe fɔɔ. Ké ɓó kɔ̃in ɖeɛɛ, ɓě ɓéɖé ɓě ké bèɖěkè jĩ̀ kà ɓě mɛ ma kĩ́ín nyɛɛ mɛ ke.”

¹⁹ Ti ɓɛ́ Féwòɖò cɛ̃ɛ ma kɔ̃in-nyɔ̀ ɓěɔ̀ gbo kà wa ɓéɖé ɓɛ́ wa ké bèɖěkè jĩ̀ kà wa mɛ ma ɓó wé séín nyɛɛ mɛ, ɓɛ́ ɔ ké ɖé hwɛ̀ kɛɛ, wa dyéɛ ma kà ɔ mɔ̀ fũ̀à-fṹá vɛ̀nɛ̀ ɓó wa bììɛ.

²⁰ Ti ɓɛ́ wa sɔ̀ ma ɓó Féwòɖò gboɛɛ, wa dyɛ̀ìn ma Mózè kè Eɖóún ɓɛ́ wa nì ma kà wa fòɛ̌n nyɛ.

²¹ Ké wa cɛ̃ɛ ma Mózè kè Eɖóún gbo, ké wa ɖá, “Bounɓoɔ̀ mɛ dyé ɓě, ɓɛ́ ɔ ké ɓě gǎ kɔ̃ tò. Ɓě mɔ̀ nyɔ nyuɛ ké à jè ɖǎà Féwòɖò kè ɔ gɔ̌mànà-nyɔ̀ ɓěɔ̀ dyi nyàìn, ké ɓě ɖǎà wa gàsíà ɓɛ́ wa ké à ɖáɓáìn nyɛɛ xwa nyíɛ̀.”

Mózè dè Gèɖèpɔ́ɔ̀ zaa

²² Ti ɓɛ́ kɔ̃in-nyɔ̀ ɓěɔ̀ ɖǎ ma Mózè kè Eɖóún gbo wùɖùɛ̀ hwɔɛɛ, Mózè ɓaà ma Bounɓoɔ̀, ké ɔ ɖá, “Ɓɔ̌ɔ̀, ɖɛ́ kɔ̃̀ jè m̀ ɖǎ nyɔ ɓěɛ̀ fũ̀à-fṹá nyùìn nyɛ́? Ɖɛ nìà kɛ kɔ̃̀ jè m̀ ɖoɓoà ḿ wɛ̃ɛ̀?

²³ Sɔ̀ìn ɓó ti ɓɛ́ ḿ ɖǎ ma ɖé Féwòɖò gbo mu, ké ḿ wùɖù ma ɔ gbo ɖé nì nyɛ́nɛ́ múɛɛ, dyéɛ, ɔ ɖǎ fũ̀à-fṹá jĩ̀ kàà nyɔ ɓěɛ̀ nyùìn, ké m̀ se ɖɛ ɖò nyuɛń nì, ɓɛ́ m̀ ké wa póìn fɔɔ cá.”