Ɛ́séɖɔ̀ 4 - Ɓǎsɔ́ɔ̀ Báɓòɔ̀

Gèɖèpɔ́ɔ̀ nyí Mózè zɛ̃̀ìn-ɖɛ̀-nyu-kpè

¹ Ké Mózè diè ma Bounɓoɔ̀ dyi ɖe, ké ɔ ɖá, “Ɔ jǔ ké wa se ní wuɖuɔ̀ jǎà po, ké wa se ní wuɖuɔ̀ ɖùǔ gbo tò, ké wa dyi níiń, ‘Bounɓoɔ̀ mɔ̀ nyɔ se m̀ ɖoɓoo’ ní ɖé?”

² Hwɛ̀ ké Bounɓoɔ̀ diè ma ɔ dyi, ké ɔ ɖá, “Ɖɛ́ nìà ɓó m̀ xwaún wɛ̃́?” Ké Mózè ɖá, “Ɔ mɔ̀ kùì-kpàe.”

³ Ké Bounɓoɔ̀ ɖá, “Poɛ dyi!” Ké Mózè poɛ ma dyi, ké ɔ zɛ̃̀ìn ma sɛ mú. Púɛɛ, Mózè gbǔɛ ma dyúa.

⁴ Hwɛ̀ ké Bounɓoɔ̀ cɛ̃ɛ ma ɔ gbo ɖe, ké ɔ ɖá, “Pɛ́ɛ̀ nì sɔ̃ɔ̀, ɓɛ́ m̀ ké sɛɔ̀ vɔ̃ dyí ɖúìn.” Ɔ jèɛɛ, Mózè pɛ́ɛ̀ ma sɔ̃, ké ɔ kpɔ̃ ma sɛɔ̀ dyi, ké sɛɔ̀ zɛ̃̀ìn ma kùì-kpà mú ɖe ɖé ɔ xwaún.

⁵ Ké Bounɓoɔ̀ ɖá, “Ɖɛ nìà kɛ muɛ nyuùn ɓɛ́ wa kéɛ jǎà po kà mɔ̄ mɔ̀ Bounɓo mɔ̀à wa ɓǎ Ééɓòɖòhɛ̃́ɛ̀ kè Áázè ɔ kè Jékɔ̀ɛ̀ Gèɖèpɔ́ɔ̀ kɛɛ mɔ̀ nyɔ ɖǎ m̀ dyí wóɖóìn nyɛ.”

⁶ Hwɛ̀ ké Bounɓoɔ̀ cɛ̃ɛ ma Mózè gbo ɖe, ké ɔ ɖá, “Po nì sɔ̃ɔ̀ ɓó nì kɛ́ɔ̀ kɔ̃, ɓó nì gã́ùnɔ̀ xwíɖíi.” Ké Mózè kpa ma ɔ gã́ùnɔ̀ xwíɖíi sɔ̃. Ti ɔ zà ma ɓó sɔ̃ɛɛ, caà kpɔ̃ ma ɔ sɔ̃ɔ̀ kɛɛ nyuɛ ké ɔ sɔ̃ɔ̀ nì ma séɖéé.

⁷ Ké Bounɓoɔ̀ ɖá, “Kpa nì sɔ̃ɔ̀ ɖé nì gã́ùnɔ̀ xwíɖíi ɖe!” Ké Mózè kpa ma ɖé sɔ̃ ɖe. Ké ti ɔ zàà ma ɖéɛ kɛɛ, caà-wɛ̀ɔ̀ hwɛ̀ ma ɔ sɔ̃ɔ̀ bũ̌in, ké ɔ sɔ̃ɔ̀ nì ma kà ɔ dyɔɔ̀-kùɔ̀ wáká tɔ̀ɔ̀ ɓěɔ̀ nyuà nìɛ̀ kɛ.

⁸ Ké Bounɓoɔ̀ ɖá, “Ɔ jǔ ké wa se nì wuɖuɔ̀ jǎà po, ké wa se zɛ̃̀ìn-ɖɛ̀ kĩ́ínɔ̀ jè jǎà po ní, wa mu zɛ̃̀ìn-ɖɛ̀ sɔ̃́ nììnɔ̀ jè jǎà poùn.

⁹ Kɛɛ ɔ jǔ ké wa se zɛ̃̀ìn-ɖɛ̀-dù sɔ̃́ ɓěɛ̀ jè jǎà po, ké wa se nì wuɖuɔ̀ ɖùǔ gbo tò ní, m̀ mɛ píní ní sɔ̀ìn ɖé Náà-nìɔ̀ kɔ̃, ɓɛ́ m̀ kéɛ ɓóɛ ɓóɖó-kpà dyɛ-dyɛɔ̀ kɔ̃ púè. Ɔ ɖǎ ná nìǐn, ní ɓɛ́ m̀ píníà ɖé níɔ̀ kɔ̃ɛɛ mu nyɔmɔɔ mú zɛ̃̀ìn ɓó ɓíɖíiɔ̀.”

¹⁰ Ké Mózè cɛ̃ɛ ma Bounɓoɔ̀ gbo, ké ɔ ɖá, “Ɓɔ̌ɔ̀, ḿ se wùɖùɛ̀ dyuò. Ḿ se ma wùɖùɛ̀ dyuò kĩ́ín, hwɛ̀ ḿ po níiń, ti ɓɛ́ m̀ ɖǎ mɔ̄ mɔ̀à nì gbo-nì-nyɔ̀ɔ̀ kɛɛ gbo wùɖùɛ. Ní wuɖu pɛɛ̀ ní, ké ní miɔɔ̀ ku xwa.”

¹¹ Ké Bounɓoɔ̀ cɛ̃ɛ ma ɔ gbo, ké ɔ ɖá, “Nyɛ́ mɔ̀ nyɔ nyí nyɔǔn-dyù wɔ̃ kɛ́? Nyɛ́ mɔ̀ nyɔ nyuɛ ɓɛ́ nyɔǔn-dyù dyi sṹ mɔɔ ké ɔ se wùɖùɛ̀ ɓɛ́ìn nyɛ́? Nyɛ́ mɔ̀ nyɔ nyuɛ ɓɛ́ nyɔǔn-dyù dyi dyi dyé mɔɔ ɓɛ́ ɔ dyi dyéɖéín dyi kpè kɛ́? Ɔ se mɔ̄ mɔ̀à Bounɓoɔ̀ kɛɛ̀?

¹² Ɔ jèɛɛ, m̀ mɛ mu. Ní mu m̀ gbo kpáùn, ɓɛ́ m̀ ké wùɖù, ké ní mu m̀ ɖɛ m̀ ké cɛ̃ kɛɛ tɛ̀mɛ̀ìn.”

¹³ Kɛɛ Mózè ɖá, “Ɓɔ̌ɔ̀, ní ɓaà m̀ ní, ɖoɓo nyɔ kà kò ɖò, ɓɛ́ ɔ ké ɖɛ nìà kɛ nyu.”

¹⁴ Púɛɛ, Bounɓoɔ̀ kpáìn ma Mózè dyoɖoún mìɔ, ké ɔ ɖá, “Ké nì ɖíí Eɖóún mɔ̀à Ɖíìváà-nyɔ̀ɔ̀ kɛɛ jè ɖéɛ́? Ḿ dyuò kà ɔ dyuò wùɖùɛ̀ kɛ. Ɔ ɖǎ hwìè kɔ̃ nì nɔ̀ɔ̀, ké ɔ nì m̀ gbo dyiɛń. Ɔ dyi m̀ dyé ní, ɔ mu múàǔn kpáùn mìɔ.

¹⁵ M̀ mɛ wùɖù ɔ gbo, ɓɛ́ m̀ ké ɔ wuɖu wĩín po. Ní mu ɓě sɔ̃́ɔ̀ gbo kpáùn, ɓɛ́ ɓě ké wùɖù, ké ní mu ɓě ɖɛ ɓě ɓɛ́ ɓě ké nyuɛɛ tɛ̀mɛ̀ìn.

¹⁶ Eɖóún mu nyɔ ɓěɔ̀ gbo wùɖùùn ɓó m̀ bìì. Ké ɔ mu nì wɔ̃ jǔùn, ké nì mu ɔ wuɖu wĩín poùn kà Gèɖèpɔ́ɔ̀ poà nyɔǔn wuɖu wĩín nyɛ.

¹⁷ Kɛɛ m̀ mɛ ɓéɖé kùì-kpà nìà kɛ xwa, ɓɛ́ m̀ kéɛ zɛ̃̀ìn-ɖɛ̀ ɓě nyùìn.”

Mózè mu Íjè-ɓòɖòɔ̀ kɔ̃ ɖe

¹⁸ Ti ɓɛ́ Bounɓoɔ̀ ɖǎ ma Mózè gbo wùɖùɛ̀ hwɔɛɛ, Mózè mu ma ɖé ɔ bùǐ-gàà mɔ̀à Jɛ́tòɖò kɛɛ gbo, ké ɔ cɛ̃ɛ ma ɔ gbo, ké ɔ ɖá, “Ní mɔ́ ɓɛ́ ḿ ké ɖé ní nyɔ ɓěɔ̀ gbo ɖe mu ɖé Íjè-ɓòɖòɔ̀ kɔ̃, ɓɛ́ ḿ kéɛ dyé kɛbì wa ɖò nì toɖo kɔ̃ ke ní.” Ké Jɛ́tòɖò ɖá, “Ḿ wɔ̃́ ní, mu. Gìɖìǐ mɛ nì m̀ kɔ̃.”

¹⁹ Ti ɓɛ́ Mózè nì ma ɖé Míɖìàùn-ɓòɖòɔ̀ kɔ̃ keɛɛ, Bounɓoɔ̀ cɛ̃ɛ ma ɔ gbo, ké ɔ ɖá, “Mu ɖé Íjè-ɓòɖòɔ̀ kɔ̃ ɖe, sepóɛɖé nyɔ séín ɓě mɔ́ ma kà m̀ ɖáɓáa dyiɛɛ, wa ɖǎ mɛ́ɛ hwɛ̀.”

²⁰ Ɔ jèɛɛ, Mózè ɖú ma ɔ gmààɔ̀ kè ɔ dyú-gàà ɓěɔ̀ dyí. Ké ɔ po ma wa jǎkasì ɖò kɔ̃ún, ké ɔ kɔ́ìn ma ɖé Íjè-ɓòɖòɔ̀ kɔ̃ ɖe. Ɔ kpa ma ɔ kùì-kpà ɓɛ́ Gèɖèpɔ́ɔ̀ ɖá ɔ mɛ kpa ma kà kɛ.

²¹ Ɓó hwìèɔ̀ kɔ̃ɛɛ, Bounɓoɔ̀ cɛ̃ɛ ma Mózè gbo, ké ɔ ɖá, “Ti ɓɛ́ nì mu ɖé Íjè-ɓòɖòɔ̀ kɔ̃ nyiniìn nyɛɛ, m̀ mɛ nyu zɛ̃̀ìn-ɖɛ̀ séín kɔ̃̀ kpé ḿ ɖǎà m̀ nyíɛɛ ɓó Féwòɖò dyéɖé waí. Kɛɛ ní mu ɔ hwòɖǒ-dyùàɔ̀ kùmùìn, ké ɔ se nyɔ ɓěɔ̀ dyi táǎ mu, ɓɛ́ wa ké mu.

²² Ɔ ɖǎ ná nìǐn, m̀ mɛ cɛ̃ɛ Féwòɖò gbo kà ḿ ɖáìn Éézùɖùɛ̀-dyù ɓěɔ̀ ní nyíɔ́-dyù-gàà kɛ.

²³ Ɔ jèɛɛ, cɛ̃ɛ Féwòɖò gbo kà ḿ ɖá, ɔ mɛ táà ní dyú-gààɔ̀ dyi, ɓɛ́ ɔ ké ḿ ɓièɛ. Kɛɛ ɔ nɔ́ɔ̀ ké ɔ se ɔ dyi táà, ɓɛ́ ɔ ké mu. Ɔ jèɛɛ, ní mu ɔ nììn nyíɔ́-dyù-gààɔ̀ ɖáɓáùn.”

²⁴ Ti ɓɛ́ Mózè kè ɔ gbǒ-xwíníínɔ̀ nyini ma dɛ̀ wa ké ma pɛ̃́ ɓó hwìèɔ̀ kɔ̃ɛɛ, Bounɓoɔ̀ kè Mózè gmɔ̌ìn ma, ké Bounɓoɔ̀ mɔ́ ma ɔ ɖáɓáa dyi.

²⁵ Kɛɛ Zìpówàɖà mɔ̀à Mózèɛ̀ gmààɔ̀ kɛɛ nyu ma sɔ́ɔ́-námá-námá ɖò ɖǎ-dyù mú, ké ɔ ɖáɓá ma ɔ dyú-gààɔ̀ sàà. Ké ɔ ɖú ma sàà-dùɔ̀ dyí, ké ɔ poɛ ma ɓó Mózè ɓo kɔ̃, ké ɔ ɖá, “M̀ mɔ̀ nyɔmɔɔ-dyi-wáɖá-dyù-ɓǎ ɓó ḿ bìì.”

²⁶ Ɔ cɛ̃ ɖɛ nìà kɛ ɓá sàà-mɛ́-mɛ́ɔ̀ jè dyí. Púɛɛ, Bounɓoɔ̀ táà ma Mózè dyi.

²⁷ Hwɛ̀ ɓɛ́ Mózè ké ma Íjè mu hwìèɔ̀ kɔ̃ kpáa, Bounɓoɔ̀ cɛ̃ɛ ma Eɖóún gbo, ké ɔ ɖá, “Mu ɖé gbǎùn-fúɖúáɔ̀ kɔ̃, ɓɛ́ m̀ kè Mózè ké gmɔ̌ìn.” Ɔ jèɛɛ, Eɖóún mu ma, ké ɔ kè Mózè gmɔ̌ìn ma ɓó Gèɖèpɔ́ɔ̀ toɖoɔ̀ wáún, ké ɔ nyá ma Mózè wɔ̃ ɖé ɔ nyíɔún-zà-zà mú.

²⁸ Hwɛ̀ ké Mózè cɛ̃ ma ɖɛ séín kɔ̃̀ jè Bounɓoɔ̀ ɖǎ ma kà ɔ ɖoɓo, ɓɛ́ ɔ ké ma kà cɛ̃ kɛ ɔ kè zɛ̃̀ìn-ɖɛ̀ séín ɓɛ́ Bounɓoɔ̀ ɖǎ ma ɔ gbo cɛ̃, ɓɛ́ ɔ ké ma nyuɛɛ jè Eɖóún gbo.

²⁹ Ké Mózè kè Eɖóún mu ma ɖé Íjè-ɓòɖòɔ̀ kɔ̃, ké wa poìn ma Éézùɖùɛ̀-nyɔ̀ vɛ̀nɛ̀ séín ɓěɔ̀ dyí.

³⁰ Ké Eɖóún zaìn ma ɖɛ séín ɓě ɓɛ́ Bounɓoɔ̀ cɛ̃ ma kà Mózè gboɛɛ wa gbo kɔ̃in, ké Mózè nyu ma zɛ̃̀ìn-ɖɛ̀ ɓěɔ̀ ɓó wa dyéɖé waí.

³¹ Ké wa poɛ ma jǎà. Ké ti ɓɛ́ wa wɔ̃́ɔ ma kà Bounɓoɔ̀ ɖǎ kà Íjè-nyɔ̀ ɓěɔ̀ nì wa dyi pĩ́àǔn wɛ̃ɛ dyé, ké wa jè ɖǎ ɔ hwòɖǒ kpɔ̃ɛɛ, púɛɛ, wa taɓa ma dú hwuɖu, ké wa ɓiè ma Bounɓoɔ̀.