Ɛsɔ́ɖɔ́ 6 - Ɓǎsɔ́ɔ̀ Báɓòɔ̀

Kã́áɔ̀ dè Mɔ́ɖékáì dya

¹ Ɓó máaún-hwùɖùa múɛɛ, kã́áɔ̀ se ma mɔ́ɔ ɓɛ́ìn. Ɔ jèɛɛ, ɔ ɖoɓo ma nyɔ, ɓɛ́ wa ké ɔ ɓóɖóɔ̀ kpáá-ɖɛ̀-sùà-cèè-ɖɛ̀ɔ̀ ɔ gbo dya. Ké ɔ cɛ̃ɛ, ɓɛ́ wa ké ɖɛ ɓě ɖǎ ɖé céè-ɖɛ̀ɔ̀ mú céè ɖé ɔ nììn ɓóɖó-wuɖuí-kɔ̃̀-tìɔ̀ múɛɛ wuɖuún zà ɖé ɔ gbo.

² Wa céèɛ̀ ma ɖé céè-ɖɛ̀ɔ̀ mú kà Mɔ́ɖékáì mɔ̀ nyɔ dyà ma gàa sɔ̃́ ɓě mɔ̀à Bífànà kè Téwɛ̀ɖɛ̀ ɓɛ́ wa mɔ̀ ma kà sójà ɓě mɔ̀ ma kà kã́áɔ̀ gbǒ-wɔ̃̀ dyí-gmɔ̀-nyɔ̀ ɓěɔ̀ ɖòɛɛ kã́áɔ̀ sɔ́-sɔ́ɔ̀ píé kɛ. Gàa sɔ̃́ ɓěa sɔ́ ma Kã́á Àhàzúwàɖà, ɓɛ́ wa ké ma ɔ ɖáɓá.

³ Hwɛ̀ ké kã́áɔ̀ diè ma ɖɛi, ké ɔ ɖá, “Ɖɛ́ mɔ̀ dya-dè-dè mɔɔ pɛ́ɛ̀-ɖɛ̀ ɓɛ́ Mɔ́ɖékáì ɖǎ dyé ɓó ɖɛ nìà kɛ jè kɛ́?” Ké ɔ gbo-nì-nyɔ̀ ɓěɔ̀ jǔ ma ɔ gɔ̃̌, ké wa ɖá, “Ɓɔ̌ɔ̀, nyɔ ɖò séè ɖɛ ɖò nyu ɓó ɔ bììo.”

⁴ Ké kã́áɔ̀ diè ma ɖɛi, ké ɔ ɖá, “Nyɔ ɖò nì kɔ̃̀pã́ùnɔ̀ múù?” Ɓó tia ɓaɖaa, Hémà nì ma kà ɖé kɔ̃̀pã́ùnɔ̀ mú dyáuń nyɛ̀nɛ̀ɛ̀. Ɔ dyi, ɓɛ́ ɔ ké ma kã́áɔ̀ kpé zɔ̀ìn, ɓɛ́ ɔ ké ma Mɔ́ɖékáì beè ɓó nyɔ-beèìn-naín ɓɛ́ ɔ ɖǎ ma kà po ɓó ɔ bììɛɛ dya.

⁵ Ké kã́áɔ̀ gbo-nì-nyɔ̀ ɓěɔ̀ jǔ ma ɔ gɔ̃̌, ké wa ɖá, “Hémà nyànà ɖé kɔ̃̀pã́ùnɔ̀ mú dyi.” Ké kã́áɔ̀ ɖá, “Ɓě tòɛ̀ ɔ ké dyá.”

⁶ Ti ɓɛ́ Hémà ɖǎ ma dyáa, kã́áɔ̀ diè ma ɔ dyi, ké ɔ ɖá, “Ɖɛ́ kã́áɔ̀ mɛ nyu ɓó nyɔ ɔ hwòɖǒ mɔ́ dya dèɛ̀ dyiɛɛ bììɛ́?” Púɛɛ, Hémà nìɛ̀ ma cɛ̃iń ɖé ɔ hwòɖǒ bũ̌, ké ɔ ɖá, “Nyɛ́ kà kò ɖò nì ɓɛ́ kã́áɔ̀ kéà dya dèɛ̀ mɔ́ɛ́? Ɔ sèìn mɔ̄.”

⁷ Ɔ jèɛɛ, Hémà jǔ ma kã́áɔ̀ gɔ̃̌, ké ɔ ɖá, “Ɖɛ wa mɛ nyu nyɔ ɓɛ́ kã́áɔ̀ hwòɖǒ mɔ́ dya dèɛ̀ dyiɛ bììɛɛ, ɔ kɛà kɛ̀.

⁸ Wa mɛ dyà gã́ùn ɓɛ́ kã́áɔ̀ mìɔùn po múɛ ɔ kè sǒ ɓɛ́ kã́áɔ̀ mìɔùn kpá kɔ̃ún wɛ̃, ɓɛ́ wa ké kã́áɔ̀ mìɔùn nììn sǒ-bɛ̃̀ìn-ɖɛ̀ ɓěɔ̀ ɓó sǒɔ̀ dú dèìn.

⁹ Ɔ ɖǎ ná nìǐn, nìí, kã́áɔ̀ mɛ gã ɔ gɔ̌mànà-nyɔ̀ vɛ̀nɛ̀ ɓěɔ̀ ɖò, ɓɛ́ ɔ ké gàaɔ̀ ɖɔún po, ɓɛ́ ɔ ké gàaɔ̀ sǒɔ̀ kɔ̃ún kòìn, ɓɛ́ ɔ ké sǒɔ̀ dyúa sí ɖé hwɔɖɔɔ̀ píé hwòɖǒǔn. Nyɔ vɛ̀nɛ̀ɔ̀ mɛ nì sǒɔ̀ dyúa, ɓɛ́ ɔ ké wuɖui poɛ kpa, ɓɛ́ ɔ ké níiń, ‘Ɓě dyé kà kã́áɔ̀ nyu nyɔ ɔ hwòɖǒ mɔ́ dya dèɛ̀ dyiɛɛ dya dèɛ̀ kɛ.’ ”

¹⁰ Púɛɛ, kã́áɔ̀ cɛ̃ɛ ma Hémà gbo, ké ɔ ɖá, “Fṹà, ɓɛ́ m̀ ké gã́ùnɔ̀ kè sǒɔ̀ dyí ɖú, ɓɛ́ m̀ ké ɖɛ m̀ cɛ̃à kɛɛ Mɔ́ɖékáì mɔ̀à Júù-nyɔ̀ɔ̀ kɛɛ bìì nyu. Ɔ mɔ̀ nyɔ nìà ɖé ní gmɔ-wɔ̃̀ɔ̀ gboɛ. M̀ mɛ nyuɛ séín. Mɔ̀ǔn ɖá m̀ ké ɖɛ ɓě m̀ cɛ̃à kɛɛ ɖò ɓíɖíi sèo.”

¹¹ Ɔ jèɛɛ, Hémà dyà ma gã́ùnɔ̀ kè sǒɔ̀, ké ɔ po ma Mɔ́ɖékáì gã́ùnɔ̀ mú, ké ɔ kòìn ma ɔ sǒɔ̀ kɔ̃ún. Hémà zi ma sǒɔ̀ dyúa, ké ɔ nì ma Mɔ́ɖékáì ɖé hwɔɖɔɔ̀ píé hwòɖǒǔn kpauń. Ɔ nì ma zio poɛń ɓó ɔ dyúa, ké ɔ ɖá, “Ɓě dyé kà kã́áɔ̀ nyu nyɔ ɔ hwòɖǒ mɔ́ dya dèɛ̀ dyiɛɛ dya dèɛ̀ kɛ.”

¹² Sɔ̀ìn ɓóɛ gboɛɛ, Mɔ́ɖékáì mu ma ɖé kã́áɔ̀ gmɔ-wɔ̃̀ɔ̀ gbo ɖe. Kɛɛ Hémà fṹà, ké ɔ mu ma ɔ ɓíɖí-taún. Ɔ wáɖá ma ɖɔ dúi ɓó dɛ̃ nyu ma ɔ kɛɛ jè.

¹³ Ké ɔ zaìn ma ɖɛ séín kpá ma kà kɛɛ ɔ gmàà Zɔ́wɛ̀ɖɛ̀ kè ɔ ɓǎto séín ɓěɔ̀ gbo kɔ̃in. Hwɛ̀ ké ɔ gmàà Zɔ́wɛ̀ɖɛ̀ kè ɔ ɓǎto ɓě mɔ̀ ma hwòɖǒ-fɔ̀nɔ̀-nyɔ̀ɛɛ cɛ̃ɛ ma ɔ gbo, ké wa ɖá, “Kà ɓɛ́ Mɔ́ɖékáì kɔ̃̀ dyúa ɓɛ́ m̀ ɖǎà ɓó dyi kpáa gbɔ dèɛɛ mɔ̀à Júù-nyɔ̀ ɓěɔ̀ ɖòɛɛ, m̀ se ɔ dyí ɓɛ́ìn. Ɔ mu m̀ toún ɖuùn wɛ̃́ɛ́ pū.”

Wa beè Hémà

¹⁴ Ti ɓɛ́ wa kèɔ̀ kè nì ma dɔ́ɔ́ dèɛ̌n nyɛɛ, gbo-nì-nyɔ̀ ɓě sɔ̀ìn ma ɖé kã́áɔ̀ gboɛɛ dyi ma Hémà ɖáùn, ɓɛ́ ɔ ké ma ɖii-ɖɛ̀-hwɔ̀ ɓɛ́ Ɛsɔ́ɖɔ́ ɖǎ ma kà naɓaà kɛɛ kɔ̃ mu wàɖà.