Dìtɔ̀wáɖánámɛ̀ 6 - Ɓǎsɔ́ɔ̀ Báɓòɔ̀

Gma vɛ̀nɛ̀ɔ̀

¹ “Gma séín ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ nyí ḿ ɓɛ́ ḿ ké ɓě tɛ̀mɛ̀ìn nyɛɛ nìǒ wɛ̀. Ɓě mɛ kpɔ̃ gma ɓěɛ̀ dyi ɖé ɓóɖó kɔ̃̀ jè ɓɛ́ ɓě nìà Jɔ́nì-nìɔ̀ péɖéɛń, ɓɛ́ ɓě kéà dyí ɖú, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ kɔ̃.

² Ɓě kè ɓěɛ̀ xwíníín-dyù ɓěɔ̀ hwòɖǒ mɛ fɛ̃̀ìn Bounɓo mɔ̀à ɓěɛ̀ Gèɖèpɔ́ɔ̀ kɛɛ dyi ɖé ɓěɛ̀ fɛ̀ɛ̀-wè séín mú, dyììn ɖé ɔ gma séín ɓě ɓɛ́ ḿ nìà ɓě gbo cɛ̃iń nyɛɛ dyi-kpɔ̃-kpɔ̃ mú. Ɓě dyiɛ náa nyuín, ɓě mu hwèɖèìn.

³ Éézùɖùɛ̀-nyɔ̀ ɓěo, ɓě tò gma ɓěɔ̀ gbo ɖùǔ, ɓɛ́ ɓě ké wa dyi kpɔ̃ kóɖó-kóɖó. Ɓě dyiɛ náa nyuín, nìí, mana mu ɓě kɔ̃ nììn, ké ɓě mu dúún zaìn mìɔ ɖé ɓóɖó bã-bãɔ̀ kɔ̃ kà Bounɓo mɔ̀à ɓě ɓǎ nììn ɓǎ ɓěɛ̀ Gèɖèpɔ́ɔ̀ kɛɛ nyuà ɓě nyɛ́nɛ́ín ɖáìn nyɛ.

⁴ “Ɓě tò ɖùǔo, Éézùɖùɛ̀-nyɔ̀ ɓě! Bounɓoɔ̀ ɖòùn mɔ̀ ɓěà Gèɖèpɔ́ɔ̀.

⁵ Ké ɓě mɛ ɖɛ̀ɓɛ̀ Bounɓo mɔ̀à ɓěɛ̀ Gèɖèpɔ́ɔ̀ kɛɛ mú hwòɖǒɛ̀-ɖé-hwɛ̀-kà ɖé ɓěɛ̀ kpé séín mú.

⁶ Ké wuɖu ɓě ɓɛ́ ḿ cɛ̃à zɛ̃̌ɛ̀ ɓě gboɛɛ mɛ nì ɖé ɓě hwòɖǒ bũ̌,

⁷ ké ɓě mɛ tɛ̀mɛ̀ìn gma ɓěɔ̀ ɓěɛ̀ dyú ɓěɔ̀ hwòɖǒɛ̀-ɖé-hwɛ̀-kà. Ɓě mɛ dèìn gma ɓěɔ̀ jè dɔ́ɔ́ múin, ti ɓě mu ɖé taún nììn nyɛ, kè ti ɓě mu hwìè xwíníín nàǔn nììn nyɛ, kè ti ɓě mu dyi pɛ̃́ìn nyɛ, ɔ kè ti ɓě mu dyí sɔ̀ùn wɛ̃.

⁸ Ké ɓě mɛ po gma ɓěɔ̀ sɔ̃, ɓɛ́ ɓě ké wa ɓó ɓěɛ̀ dyúa-kpà ɓěɔ̀ kɔ̃ jìnììn, ɓɛ́ wa ké ɓěɛ̀ ɖɛ-hwìɖǐi-dyàìn-ɖɛ̀ jǔ.

⁹ Ké ɓě mɛ céè gma ɓěɔ̀ ɓó ɓěɛ̀ gbǒ-wɔ̃̀ ɓěɔ̀ xwìɖì-tɛ̃́ín ɓěɔ̀ kè ɓěɛ̀ gmɔ-wɔ̃̀ ɓěɔ̀ kɔ̃ dyi.

Náún-po-wùɖù ɓá se wuɖu nyu jè dyíɛ

¹⁰ “Kà Bounɓo mɔ̀à ɓěɛ̀ Gèɖèpɔ́ɔ̀ kɛɛ nyuà ɓě ɓǎ nììn ɓǎ ɓě mɔ̀à Ééɓòɖòhɛ̃́ɛ̀ kè Áázè ɔ kè Jékɔ̀ kɛɛ nyɛ́nɛ́ín ɖáìn nyɛɛ, ɔ mu ɓě ɓóɖó ɓɛ́ ɔ ɓéɖé hwɔɖɔ vɛ̀nɛ̀-vɛ̀nɛ̀ nɔ̀mɔ̀ kɔ̃in ɓě ɓɛ́ ɓě se poɛ,

¹¹ kè gbǒ ɓě dyíìn ɖɛ nɔ̀mɔ̀ kɔ̃in ɓě múin ɓɛ́ ɓě se ɖé wa mú poɛ, kè ní-ɓì ɓě ɓɛ́ ɓě se ɓúɖúɛ, ɔ kè géɖéè-gbǎ ɓě kè ɔ́ɖè-gbǎ ɓě ɓɛ́ ɓě se ɓáa nyíìn. Ti ɓɛ́ Bounɓoɔ̀ ɖǎ ɓě ɓóɖóɔ̀ mú kpa, ké ɓě ɖǎ ɖɛ séín ɓě mɔ́ ɖiɛ dyiɛɛ ɖi, ké ɓě ɖǎ ɖoɓoɛɛ ní,

¹² nìí, ɓě mɛ ma mú, ɓɛ́ Bounɓo mɔ̀ nyɔ zàà ɓě Íjè-ɓòɖò kɔ̃̀ kɔ̃ ɓě mɔ̀ ma kà gǐìɛɛ jè ní kɔ̃̀ ɖà ɓě hwìɖǐi sɔ̀.

¹³ Ɓěɛ̀ hwòɖǒ mɛ fɛ̃̀ìn Bounɓo mɔ̀à ɓěɛ̀ Gèɖèpɔ́ɔ̀ kɛɛ dyi, ké ɓě mɛ ɓiè ɔ ɖòùn, ké ɓě mɛ ɖììn wuɖu ɖé ɔ nyɛ́nɛ́ɔ̀ mú.

¹⁴ Ɓě mɛ ɓɔ́ nyɔ ɓě nìà ɓě ɖeiɛɛ nììn gèɖèpɔ́ɔ̀ ɓěɔ̀ kíɖíí síɛ,

¹⁵ sepóɛɖé Bounɓo mɔ̀à ɓěɛ̀ Gèɖèpɔ́ɔ̀ nìà ɖé ɓě hwìɛ̀ kɛɛ mɔ̀ hwɛ̀nɛ̌ Gèɖèpɔ́ɔ̀. Ɔ jǔ ké ɓě dyi gèɖèpɔ́ɔ̀ kà kò ɖò ɓěɔ̀ kíɖíí sí ní, nìí, Bounɓoɔ̀ mu ɓě dyoɖoún kpáìn, ɓɛ́ ɔ ké ɓě ɓóɖó-kpàà kɔ̃ dyi sámá.

¹⁶ “Ɓě ní dɔ̃̌ Bounɓo mɔ̀à ɓěɛ̀ Gèɖèpɔ́ɔ̀ kɛɛ mú kà ɓě nyuɛ ma kà ɖé Másàà-pàɔ̀ múɛ.

¹⁷ Ɓě mɛ kpɔ̃ gma séín ɓě ɓɛ́ ɔ ɖǎà ɓě nyíɛɛ dyi kóɖó-kóɖó.

¹⁸ Ké ɓě mɛ nyu ɖɛ nɔ̀mɔ̀ dyíin ɓɛ́ ɔ dè Bounɓoɔ̀ hwòɖǒ dyiɛ, ɓɛ́ mana ké ɓě kɔ̃ nì, ɔ kè ɓɛ́ ɓě ké ɓóɖó bã-bã ɓɛ́ Bounɓoɔ̀ ɖǎǒ zɔ̃̌ɔ̀ kà ɓě ɓǎ nììn ɓǎ ɓěɔ̀ nyɛ́nɛ́ín ɖáìn nyɛɛ mú mu, ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ.

¹⁹ Bounɓoɔ̀ mu ɓěɛ̀ mú-nyɛ́-nyɔ̀ ɓěɔ̀ ɓó ɓě dyúa dyi kúmúùn kà ɔ ɖǎà ɓě nyɛ́nɛ́ín ɖáìn nyɛ.

²⁰ “Ti ɓěɛ̀ dyú ɓěɔ̀ mu ɓě dyi dièìn ɖé dyúa, ɓɛ́ wa ké níiń, ‘Ɖɛ́ mɔ̀ gma séín ɓě ɓɛ́ Bounɓo mɔ̀à à Gèɖèpɔ́ɔ̀ kɛɛ nyíà ɓě kɛɛ xwíníín nyɛ́?’ ní,

²¹ nìí, ɓě cɛ̃ɛ ɓěɛ̀ dyú ɓěɔ̀ gbo, ɓɛ́ ɓě ké níiń, ‘À mɔ̀ǒ zɔ̃̌ɔ̀ Íjè-kã̀ǎɔ̀ gǐì ɓě ɖé Íjè-ɓòɖòɔ̀ kɔ̃, ké Bounɓoɔ̀ zà zɔ̃̌ɔ̀ à ɖé Íjè-ɓòɖòɔ̀ kɔ̃ dyììn ɖé ɔ gana-sɔ̃̀ɔ̀ mú.

²² Bounɓoɔ̀ nyu ma zɛ̃̀ìn-ɖɛ̀ ɓě kè ɖɛ dĩ́ín-dĩ̀ìn vɛ̀nɛ̀ ɓě Íjè-kã̀ǎɔ̀ kè ɔ gɔ̌mànà-nyɔ̀ ɓěɔ̀ ɔ kè Íjè-nyɔ̀ tɔ̀ɔ̀ ɓěɔ̀ bũ̌ ɓó à mìɔùn dyéɖé waí.

²³ Ké Bounɓoɔ̀ zà ma à ɖé ɓóɖóɔ̀ kɔ̃, ké ɔ dyàà nɔ̄ à, ɓɛ́ ɔ ké à ɓóɖó ɓɛ́ ɔ ɖǎǒ zɔ̃̌ɔ̀ kà à ɓǎ nììn ɓǎ ɓěɔ̀ nyɛ́nɛ́ín ɖáìn nyɛɛ nyí.

²⁴ Hwɛ̀ ké Bounɓo mɔ̀à à Gèɖèpɔ́ɔ̀ kɛɛ cɛ̃ɛ ma à gbo, ɓɛ́ à ké gma séín ɓěɔ̀ dyi kpɔ̃, ɔ kè ɓɛ́ à hwòɖǒ ké ɔ dyi fɛ̃̀ìn. Ɔ jǔ ké à dyiɛ náa nyu ní, nìí, ɔ mu à dyí gmɔ̀ùn, ɓɛ́ mana ké à kɔ̃ nì kà ɔ nìà ɓó zɛ̃̌ɛ̀ kɛ.

²⁵ Ɔ jǔ ké à dyi gma séín ɓɛ́ Bounɓoɔ̀ nyíà à kɛɛ dyi kpɔ̃ kóɖó-kóɖó ní, nìí, à mu dyí sɛ́ɖɛ́ìn.’