Dìtɔ̀wáɖánámɛ̀ 3 - Ɓǎsɔ́ɔ̀ Báɓòɔ̀

Éézùɖùɛ̀-nyɔ̀ ɓěɔ̀ ɖu Kã́á Ógì toún

¹ “Sɔ̀ìn ɓóɛ gboɛɛ, à ɖú ma hwìè muà ɖé Básàùn-ɓòɖòɔ̀ kɔ̃ɛɛ dyí. Ké Ógì mɔ̀à Básàùn-ɓòɖòɔ̀ kã́áɔ̀ kɛ kè ɔ nyɔ séín ɓěɔ̀ dyi ma à wɔ̃, ɓɛ́ wa ké à gbo vɔ̃ ɖé Ɛ̀dɛ́ɖɛ́ì-hwɔ̀ɖɔ̀ɔ̀ mú.

² Kɛɛ Bounɓoɔ̀ cɛ̃ɛ ma ḿ gbo, ké ɔ ɖá, ‘Ɓě ɓɔ́ Kã́á Ógì dyi fɛ̃̀ìn, sepóɛɖé ḿ ɖǎ ɔ kè ɔ nyɔ ɓěɔ̀ kè ɔ ɓóɖóɔ̀ ɓě xwaún dyi po. Ɓě mɛ nyu ɖɛ ɓě nyuà Síhɔ̃̀ mɔ̀à Ámɔ̀-nyɔ̀ ɓěɔ̀ kã́á, ɓɛ́ ɔ cĩ́ ma kà ɖé Hɛ́ɓɔ̀ùn-hwɔ̀ɖɔ̀ɔ̀ múɛ bũ̌ɛɛ ɔ bũ̌.’

³ “Ɔ jèɛɛ, Bounɓo mɔ̀à à Gèɖèpɔ́ɔ̀ kɛɛ po ma Ógì mɔ̀à Básàùn-ɓòɖòɔ̀ kã́áɔ̀ kɛ kè ɔ nyɔ séín ɓěɔ̀ à xwaún dyi, ké à ɖáɓá ma wa tee, ké wa ɖò se ma sè.

⁴ Ɓó tia ɓaɖaa, à ɖú ma waà hwɔɖɔ séín ɓěɔ̀ dyí. Hwɔɖɔ ɖò se ma ɖé nì, ɓɛ́ à ké se ma ɔ dyí ɖú. Hwɔɖɔ séín à ɖú ma dyíɛɛ mɔ̀ hwɔɖɔ kpáɖá-nyɔ tã. Wa nì ma ɖé Ágò-gbɛ̌ɛ̀ gàná nìà ɖé Básàùn-ɓòɖò ɓɛ́ Kã́á Ógì kɔ̃̀à wuɖuíɛ kɔ̃ɛɛ mú.

⁵ Ké hwɔɖɔ séín ɓě à ɖú ma kà dyíɛɛ mɔ̀ toún-pèɖèìn-hwɔ̀ɖɔ̀ ɓě ɓɛ́ wa ɓéɖé ma gmɔ tɔ̀mɔ̀ dya ɓě kè gmɔ-wɔ̃̀ ɓě kè waà gbǎìn-ɖɛ̀ ɓě kɛ. Ɓó kɔ̃in ɖeɛɛ, à ɖú ma hwɔɖɔ-kpàǎ ɓáún-ɓáún ɓě se ma gmɔ ɖei nì kɛɛ dyí ɖekè.

⁶ Ké kà à nyu ma kà Síhɔ̃̀ mɔ̀à Hɛ́ɓɔ̀ùn-hwɔ̀ɖɔ̀ɔ̀ kã́áɔ̀ kɛ kè ɔ nyɔ ɓěɔ̀ kɛɛ, kǎà à nyu ma wa. À gbɔɔ̀ ma nyɔ séín nì hwɔɖɔ ɖò-ɖò séín à ɖú dyíɛ múɛɛ mú nyɛ̀nɛ̀ɛ̀.

⁷ Kɛɛ à ɖú ma nyúà-ɖɛ̀ séín kè ɖɛ ɓě nì ma hwɔɖɔ ɓěɔ̀ múɛɛ dyí, ɓɛ́ wa ké à to-gbo-zà-ɖɛ̀ jǔ.

⁸ “Kǎà à nyu ma Ámɔ̀-kã̀ǎ sɔ̃́ ɓě cĩ́ ma kà ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ kɛɛ ɓóɖóɔ̀ xwa zàà. Waà ɓóɖóɔ̀ sɔ̀ìn ɖé Áánɔ̀-nìɔ̀ wĩín, ké ɔ nyini ɖé Hɛ́mɔ̀-tòɖòɔ̀ gbo.

⁹ Zíɖɔ̀ùn-nyɔ̀ ɓěɔ̀ ɖáìn Hɛ́mɔ̀-tòɖòɔ̀ Síwìɖìɔ̀ùn-tòɖò, ké Ámɔ̀-nyɔ̀ ɓěɔ̀ ɖáìn toɖoɔ̀ Sɛ́nì-tòɖò.

¹⁰ À ɖú hwɔɖɔ séín ɓě nì ma kà ɖé bɔɔ-kpàɔ̀ kɔ̃ɛ kè Gíɖèà-ɓòɖò gànáɔ̀ ɔ kè Básàùn-ɓòɖò gànáɔ̀ dyí, ké à mu tee ké à dyɛ̀ìn Sàɖékà-hwɔ̀ɖɔ̀ kè Ɛ̀dɛ́ɖɛ́ì-hwɔ̀ɖɔ̀ ɓɛ́ Ógì mɔ̀à Básàùn-kã̀ǎɔ̀ kɔ̃̀à wuɖuíɛ.”

¹¹ Ɔ nì ná kɛɛ, Kã́á Ógì mɔ̀ ma Wɛ́ɖɛ́fà-nyɔ̀ ɓěɔ̀ xwéɖé wè sè ma ɓíɖíiɛɛ hwɛ̀ìn-gbɔ. Sepóɛɖé ɔ ɓúá ma dyai jèɛɛ, wa nyùìn ma ɔ kɔ̃-pɛ̃́-ɖɛ̀ɔ̀ nɛɛ̀-kpà. Ɔ kɔ̃-pɛ̃́-ɖɛ̀ɔ̀ tɔ̀mɔ̀-tɔ̀mɔ̀ mɔ̀ ɓáɖáa sɔ̃́ kè jìì-ɓàɖàǎ sɔ̃́ ké ɔ xwíɖí-kù mɔ̀ ɓáɖáa dyúáɖò kà wa nììn ɖɛ-ɖàɓàìn-ɖàɓàìn nyu ma nìɛ̀ kɛ. Ké nyɔ ɓɛ́ìn ɔ kɔ̃-pɛ̃́-ɖɛ̀ɔ̀ dyéɛ ke ɖé Ámànà-nyɔ̀ ɓěɔ̀ hwɔɖɔ mɔ̀à Wáɖáɓà kɛɛ mú.

Xwéɖé-dùɔ̀ nyɔ ɓě ké ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ nìɛ

¹² Ké Mózè kpa ma wuɖu dyúa, ké ɔ ɖá, “Ti ɓɛ́ à ɖú ma ɓóɖóɛ̀ dyí ɓɛ́ ɔ ké ma à kɔ̃̀ɔ̀-ɖɛ̀ jǔɛɛ, ḿ nyí ma Wuɖuɓíín nììn xwéɖé-dùɔ̀ kè Gáà nììn xwéɖé-dùɔ̀ Àwóɖóè-hwɔ̀ɖɔ̀ nìà ɖé Áánɔ̀-nìɔ̀ wĩín nyɛ kè Gíɖèà Toɖo-ɓòɖòɔ̀ fáún-fáún kèɛ̀ hwɔɖɔ ɓěɔ̀.

¹³ Ké ḿ nyí Mànásì nììn xwéɖé-dù fáún-fáúnɔ̀ Gíɖèà-ɓòɖòɔ̀ wáká tɔ̀ɔ̀ kè Básàùn-ɓòɖò gàná ɓɛ́ Kã́á Ógì kɔ̃̀ ma kà wuɖuíɛ.” Hwɛ̀ ɓɛ́ Éézùɖùɛ̀-nyɔ̀ ɓěɔ̀ kéà Ágò-gbɛ̌ɛ̀ ɓɛ́ ɔ nìà ɖé Básàùn-ɓòɖòɔ̀ kɔ̃ɛɛ dyí ɖúɛɛ, gbɛ̌ɛ̀ɔ̀ mɔ̀ ma Wɛ́ɖɛ́fà-nyɔ̀ ɓěɔ̀ ɓóɖó.

¹⁴ Kɛɛ Jáwìɖì ɓɛ́ ɔ mɔ̀ ma Mànásìɛ̀ xwíníín-dyù ɓěɔ̀ ɖòɛɛ ɖú ma Ágò-gbɛ̌ɛ̀ gànáɔ̀ dyí. Ágò-gbɛ̌ɛ̀ɔ̀ mu tee ké ɔ dyɛ̀ìn Gísù-ɓòɖòɔ̀ bã̀àɔ̀ kè Máákà-ɓòɖòɔ̀ bã̀àɔ̀. Ké Jáwìɖì ɖáìn ma hwɔɖɔ ɓě nì ma ɖé gbɛ̌ɛ̀ɔ̀ múɛɛ ɔ mìɔùn nyɛ́nɛ́ín. Ɔ jèɛɛ, wa ɖáìn hwɔɖɔ ɓěɔ̀ Jáwìɖì ɓíɖí-hwɔ̀ɖɔ̀ ɓě ke ɓó zɛ̃̌ɛ̀.

¹⁵ Ké Mózè kpa wuɖu dyúa, ké ɔ ɖá, “Ḿ nyí ma Gíɖèà-ɓòɖòɔ̀ Mákìɛ̀ xwíníín-dyù ɓě sɔ̀à Mànásì nììn xwéɖé-dùɔ̀ múɛ.

¹⁶ Ké ḿ nyí ma Wuɖuɓíín nììn xwéɖé-dùɔ̀ kè Gáà nììn xwéɖé-dùɔ̀ ɓóɖó sɔ̀ìn kà ɖé Gíɖèà-ɓòɖòɔ̀ zɔ̃̌in, ɓɛ́ ɔ dyià ɖé Áánɔ̀ Bɔɔ-kpàɔ̀ kɔ̃ nyiniɛ. Bɔɔ-kpàɔ̀ hwòɖǒǔn mɔ̀ ma bã̀àɔ̀, ké ɔ dyi tee ké ɔ dyɛ̀ìn ma Jáɓò-nì mɔ̀à Ámànà-nyɔ̀ ɓěɔ̀ ɓóɖóɔ̀ bã̀àɔ̀ kɛ.

¹⁷ Ké waà ɓóɖóɔ̀ bã̀à ɓɛ́ ɔ nìà ɖé dyóɖó-dyi-kpáìn-naínɔ̀ kɛɛ mɔ̀ Jɔ́nì-nìɔ̀, ké bã̀àɔ̀ sɔ̀ìn ɖé Kìnɛ́wɛ̀ɖɛ̀ Dòùnɓìǎɔ̀ gbo ké ɔ nyini ɖé Tɔ̃́ Dòùnɓìǎ ɓɛ́ ɔ nìà ɖé Pígà-tòɖòɔ̀ dyóɖó-dyi-kpáìn-naínɔ̀ kɛɛ gbo.

¹⁸ “Sɔ̀ìn ɓóɛ gboɛɛ, ḿ cɛ̃ɛ ma ɓě mɔ̀à Wuɖuɓíín nììn xwéɖé-dùɔ̀ kè Gáà nììn xwéɖé-dùɔ̀ ɔ kè Mànásì nììn xwéɖé-dù fáún-fáúnɔ̀ nyɔ ɓěɔ̀ kɛɛ gbo, ké ḿ ɖá, ‘Bounɓo mɔ̀à ɓěɛ̀ Gèɖèpɔ́ɔ̀ kɛɛ ɖǎ ɓě ɓóɖó nìà kɛ nyí, ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ. Kɛɛ ɓěɛ̀ gàa-zà-nyɔ̀ séín mɛ ɖú waà toún-vɔ̃̀ìn-ɖɛ̀ ɓěɔ̀ dyí, ɓɛ́ wa ké waà ɖíí ɓě mɔ̀à Éézùɖùɛ̀-nyɔ̀ tɔ̀ɔ̀ ɓěɔ̀ kɛɛ dyúa nì, ɓɛ́ wa séín ké Jɔ́nì-nìɔ̀ péɖé.

¹⁹ Kɛɛ ɓěɛ̀ gmàà ɓěɔ̀ kè ɓěɛ̀ dyú ɓěɔ̀ ɔ kè ɓěɛ̀ nyúà-ɖɛ̀ kúɖúú ɓěɔ̀ mɛ sè hwɔɖɔ ɓě ɓɛ́ ḿ ɖǎà ɓě nyíɛɛ mú.

²⁰ Ɓě mɛ kpá ɓěɛ̀ ɖíí ɓěɔ̀ gbo tee ɓɛ́ wa ké ɓóɖó ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ nìà wa nyíɛń ɖé Jɔ́nì-nìɔ̀ ɖeín nyɛɛ dyí ɖú, ɓɛ́ Bounɓoɔ̀ kéɛ nyu ɓɛ́ wa ké gìɖìǐ mú cĩ́ kà ɔ ɖǎà ɓě bìì nyu ɖekèɛ. Ɔ ɖǎ ná nìǐn, ɓě ɖò-ɖò mɛ kɔ́ìn ɓóɖó ɓɛ́ ḿ ɖǎà ɓě nyíɛɛ kɔ̃ ɖe.’

²¹ “Ɓó tia ɓaɖaa, ḿ cɛ̃ɛ ma Jasúé gbo, ké ḿ ɖá, ‘Nì dyéɖé ɖǎ ɖɛ séín ɓɛ́ Bounɓo mɔ̀à nì Gèɖèpɔ́ɔ̀ kɛɛ nyuà kã́á sɔ̃́ ɓěɔ̀ bũ̌ɛɛ dyé. Kǎà Bounɓoɔ̀ mu kã́á-ɓòɖò séín ɓɛ́ m̀ nìà mú muɛń nyɛɛ nyuùn ɓó m̀ bìì.

²² M̀ kè nì nyɔ ɓěɔ̀ mɛ ɓɔ́ wa dyi fɛ̃̀ìn, sepóɛɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ mɔ̀ nyɔ mu ɓě bìì vɔ̃ùn.’

Gèɖèpɔ́ɔ̀ se wɔ̃́ ɓɛ́ Mózè ké Kénà-ɓòɖòɔ̀ kɔ̃ mu

²³ “Ɓó tia ɓaɖaa, ḿ ɓaà ma Bounɓoɔ̀, ké ḿ ɖá,

²⁴ ‘Óó Bounɓo Ɖɛɓíɔ́, m̀ ɖǎ nì dĩ́ín-dĩ̀ìnɔ̀ kè nì kpé vɛ̀nɛ̀ɔ̀ mɔ̄ mɔ̀à nì gbo-nì-nyɔ̀ɔ̀ kɛɛ dyí tɛ̀mɛ̀ìn gbɔ dè, sepóɛɖé gèɖèpɔ́ɔ̀ ɖò se ɖé dyɔɔ̀ dyí mɔɔ nɔ̄ ɓóɖó-kpàà kɔ̃ nì, ɓɛ́ ɔ ké kũ̀à ɓě kè díɖí-ɖɛ̀ vɛ̀nɛ̀ ɓě m̀ nyuà kɛɛ nyu.

²⁵ Ɓɔ̌ɔ̀, ní ɓaà m̀ ní, wɔ̃́ ɓɛ́ ḿ ké Jɔ́nì-nìɔ̀ péɖé, ɓɛ́ ḿ ké bãa-ɓòɖò nìà ɖé níɔ̀ ɖeín nyɛɛ dyé. Ɔ mɔ̀ toɖo-ɓòɖò nɔ̀mɔ̀ dyíinɔ̀ kè Ɖɛ́ɓèɖɔ́ùn-ɓòɖòɔ̀.’

²⁶ “Kɛɛ Bounɓoɔ̀ kpáìn ma ḿ dyoɖoún ɓó ɓě jè, ké ɔ se ma ní wuɖuɔ̀ wɔ̃́ɔ mɔ́. Ké ɔ cɛ̃ɛ ma ḿ gbo, ké ɔ ɖá, ‘Kǎà ɔ mɛ nì! Ɓɔ́ ḿ ɖɛ nìà kɛ jè gbo cɛ̃ɛ ɖe fɔɔ.

²⁷ Dyá ɖé Pígà-tòɖòɔ̀ dú-hwìɛ̀, ɓɛ́ m̀ ké ɓóɖóɔ̀ kɔ̃in gmɔìn. Gmɔìn ɓóɖóɔ̀ wáká séín kɔ̃ dyi, ɓɛ́ m̀ kéɛ dyéɖéí dè, sepóɛɖé m̀ se Jɔ́nì-nìɔ̀ péɖéɛ mu.

²⁸ Cɛ̃ ɖɛ Jasúé ké nyuɛɛ ɔ gbo, ké m̀ mɛ kùìn ɔ hwòɖǒǔn, ɓɛ́ m̀ ké ɔ kpéí po, sepóɛɖé ɔ mɔ̀ nyɔ mu nyɔ ɓěɔ̀ nàìn-nyɔ̀ jǔùn, ɓɛ́ ɔ ké nyɔ ɓěɔ̀ Jɔ́nì-nìɔ̀ péɖéìn, ɓɛ́ ɔ kéɛ nyu ɓɛ́ nyɔ ɓěɔ̀ ké ɓóɖó nì muà dyéìn nyɛɛ dyí ɖú.’

²⁹ “Ɓó tia ɓaɖaa, à nì ma bɔɔ-kpà nìà ɓó Bɛ̀-Píò-hwɔ̀ɖɔ̀ɔ̀ wáún wɛ̃ɛ kɔ̃.