Dìtɔ̀wáɖánámɛ̀ 21 - Ɓǎsɔ́ɔ̀ Báɓòɔ̀

Gma ɓě ɓá xwɛ́ nyɔ wóɖóìn kɔ̃ɛɛ jè dyíɛ

¹ “Ɔ jǔ ké ɓě dyi nyɔ ɖò ɓɛ́ wa ɖáɓá kɛɛ xwɛ́ɔ̀ dyi pɛ̃́ɛ dyé ɖé xwáɖá hwìɛ̀, ɖé ɓóɖó ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ nìà ɓě nyíɛń, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ kɔ̃, ké ɓě se nyɔ kéà kúɔ̀ ɖáɓáa dyí dyuò ní,

² nìí, ɓěɛ̀ nyɔ vɛ̀nɛ̀ ɓěɔ̀ kè ɓěɛ̀ tɔ̀ɔ̀-ɓìɔ̀ ɓěɔ̀ mɛ mu ɖé xwɛ́ɔ̀ gbo, ɓɛ́ wa ké kà hwɔɖɔ ɖò-ɖò séín nìǒ xwɛ́ɔ̀ ɖeiɛɛ nyu gbo cɛ̃̀ɛ̀ kɛɛ ɖàɓàìn.

³ Ɔ ɖǎ ná nìǐn, hwɔɖɔɔ̀ nyɔ xwɛ̃́ìn kà ɓó dɛ̀ wa dyéà xwɛ́ɔ̀ kɛɛ dyi mìɔ kɛɛ nyɔ vɛ̀nɛ̀ ɓěɔ̀ mɛ ɖú ɓìɖǐ nyɔ́nɔ́ gmɔ̀ ɖò ɓɛ́ wa séè kũ̀à mú nyùìn ɖò fɔɔ, ké ɔ séè gɛ̀ɛ̀ ɖɔ kpá ɖòɛɛ dyí.

⁴ Ké hwɔɖɔɔ̀ nyɔ vɛ̀nɛ̀ ɓěɔ̀ mɛ kpa ɓìɖǐɔ̀ ɖé bɔɔ-kpà ɓɛ́ wa séè geɖe kɔ̃ nyu ɖò, ké ɔ ɓéɖé zii-nì kɛɛ kɔ̃, ké wa mɛ jaɖa ɓìɖǐɔ̀ bùnù ɖé bɔɔ-kpàɔ̀ kɔ̃.

⁵ Ké Ɖíìváà-nyɔ̀ ɓě mɔ̀à sáa-zà-nyɔ̀ ɓěɔ̀ kɛɛ mɛ gã̀ ɓó dyi ɖekè, sepóɛɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ ɖǎ wa gã, ɓɛ́ wa ké ɔ kũ̀à nyu, kè ɓɛ́ wa ké nyɔǔn mana kɔ̃ po ɖé Bounɓoɔ̀ nyɛ́nɛ́ɔ̀ mú, ɔ kè ɓɛ́ wa ké zaa séín ɓá kɔ̃̀ɔ̀-ɖɛ̀ kɔ̃in vɔ̃̀ìn jè kè hwɔ̀ɖɔ̀-gbàà jè dyíɛɛ wɔ̃ po.

⁶ Ké hwɔɖɔ ɓɛ́ ɔ xwɛ̃́àìn nyɔ wa ɖáɓáà kɛɛ xwɛ́ɔ̀ bũ̌in nyɛɛ nyɔ vɛ̀nɛ̀ ɓěɔ̀ mɛ dèɖèìn xwai ɓó ɓìɖǐ wa jaɖaà bùnù ɖé bɔɔ-kpàɔ̀ kɔ̃ɛɛ xwɛ́ɔ̀ kɔ̃in.

⁷ Ké wa mɛ cɛ̃ɛ, ɓɛ́ wa ké níiń, ‘À sɔ̃ se nyɔmɔɔ nìà kɛ dyi wáɖáìn, mɔɔ ké à dyéɖé se nyɔ ɓɛ́ ɔ wáɖáìn kà nyɔmɔɔ̀ dyiɛɛ dyé.

⁸ Óó Bounɓo, mɔ̀ mɔ̀ nyɔ gbǎà ma kà à nììn nyɛɛ, kpɔ̃ ɓìɖǐ mɔ̀à nì nyɔ ɓě mɔ̀à Éézùɖùɛ̀-nyɔ̀ ɓěɔ̀ kɛɛ nàmàǔnɔ̀ kɔ̃in-ɓáìn-ɖɛ̀ɔ̀ kɛɛ dyi. Ɓɔ́ nì nyɔ ɓěɔ̀ zaa kpɔ̃̀ìn ɓó nyɔ seà ɖɛ gbà ɖò nyuɛɛ nyɔmɔɔ̀ dyi wáɖáìn jè.’ Ké Bounɓoɔ̀ mu zaa-wɔ̃-po-po kéɔ́ má kà wa kɔ̃ dyi ɓó nyɔmɔɔ̀ dyi wáɖáìn jèɛɛ kɔ̃in zĩ̀ìn.

⁹ Kǎà ɓě mu zaa-wɔ̃-po-po kéɔ́ má kà ɓě kɔ̃ dyi ɓó nyɔ seà ɖɛ gbà ɖò nyuɛɛ nyɔmɔɔ̀ dyi wáɖáìn jèɛɛ ɖé ɓě hwìɛ̀ zàùn dyììn ɖé ɖɛ dè Bounɓoɔ̀ hwìɖǐiɛɛ nyu-nyu mú.

Gma ɓě ɓá toɛ̀-kpɔ̃-màà ɓě jè dyíɛ

¹⁰ “Ɔ jǔ ké ɓě dyi ɓěɛ̀ mú-nyɛ́-nyɔ̀ ɓěɔ̀ to kpa, ké Bounɓo mɔ̀à ɓěɛ̀ Gèɖèpɔ́ɔ̀ kɛɛ dyi wa ɓě xwaún dyi po, ké ɓě dyi toɛ̀-kpɔ̃-nyɔ̀ ɓě ɖé zà,

¹¹ ké ɖé toɛ̀-kpɔ̃-nyɔ̀ ɓěɔ̀ hwìɛ̀ kɛɛ, ɓě ɖò dyi ɖé màa nɔ̀mɔ̀ dyíin ɖò dyé, ké nyɔɔ̀ hwòɖǒ dyi ɔ mú ɖɛ̀ɓɛ̀, ké ɔ dyi màaɔ̀ dyi kpɔ̃ɔ mɔ́, ɓɛ́ ɔ ké ɔ gmàà jǔ ní,

¹² nìí, ɔ mɛ kpa màaɔ̀ ɖé ɔ ɓíɖí-taún, ɓɛ́ màaɔ̀ ké ɔ míɔ̀ kpana, ɓɛ́ ɔ ké ɔ xwɛ̃̀ìn ɓěɔ̀ dyí cɛ̃,

¹³ ɓɛ́ ɔ ké ɔ mú-po-ɖɔ̀ɔ̀ gbo zĩàìn. Ɔ mɛ nì ɖé nyɔɔ̀ taàɔ̀ mú, ɓɛ́ ɔ ké ɔ ɖe kè ɔ ɓǎ vĩ̌ ɓó dɛ̀nɛ̀ gàná xwíníín. Ti ɔ ɖǎ vĩ̌ɛ hwɔɛɛ ní, nìí, nyɔɔ̀ mɛ kpɔ̃ ɔ dyi, ɓɛ́ ɔ ké ɔ gmàà jǔ.

¹⁴ Ɔ jǔ ké nyɔɔ̀ hwòɖǒ se ɔ mɔ́ ɖe, ɓɛ́ ɔ ké ɔ gmàà jǔ ní, nìí, ɔ mɛ buɛ̀ màaɔ̀, ɓɛ́ màaɔ̀ ké dà séín ɔ hwòɖǒ mɔ́ɛɛ mu. Ɔ mɛ ɓɔ́ màaɔ̀ peɖeɛ kà nyɔ peɖeà gǐì kɛ. Ɔ mɛ ɓɔ́ màaɔ̀ kpɔ̃ɔ kà nyɔ kpɔ̃à gǐì kɛ, sepóɛɖé ɔ ɖǎ ɔ jè dyuò.

Gma ɓě ɓá nyíɔ́-dyùɛ̀ dúí-sè-ɖɛ̀ jè dyíɛ

¹⁵ “Ɔ jǔ ké gàa ɖò dyi nyɔ́nɔ́ sɔ̃́ dyi kpɔ̃, ké ɔ dyi ɖò mú ɖɛ̀ɓɛ̀, ké ɔ se nyɔ tɔ̀ɔ̀ mú ɖɛ̀ɓɛ̀, ké màa sɔ̃́ɔ̀ dyi ɔ bìì gàa-dyù ɓě wóɖóìn, ké ɔ dyú kĩ́ín-kĩ́ínɔ̀ dyi màa ɓɛ́ ɔ seà mú ɖɛ̀ɓɛ̀ɛ dyú jǔ ní,

¹⁶ nìí, ti ɓɛ́ gàaɔ̀ mu ɔ kɔ̃̀ɔ̀-ɖɛ̀ ɓě ɔ dyú ɓěɔ̀ múin geɛ̌n nììn nyɛɛ, ɔ mɛ ɓɔ́ dyú kéɔ́ má kà ɔ dúí sè, ɓɛ́ ɔ mɔ̀à màa ɔ seà mú ɖɛ̀ɓɛ̀ɛ nììn dyú-gààɔ̀ kɛɛ nììn dúí-sè-ɖɛ̀ɔ̀ ɔ xwa zàà, ɓɛ́ ɔ kéɛ màa ɔ ɖɛ̀ɓɛ̀à múɛɛ nììn dyú-gààɔ̀ nyí.

¹⁷ Ɔ mɛ nyuɛ ɓɛ́ nyɔǔn kéɛ dyuò kà ɓɛ́ màa ɓɛ́ ɔ seà mú ɖɛ̀ɓɛ̀ɛ dyúɔ̀ mɔ̀ ɔ nyíɔ́-dyùɔ̀ kɛ, dyììn ɖé kɔ̃̀ɔ̀-ɖɛ̀ séín ɔ ɓéɖéɛɛ geìn-geìn wáká sɔ̃́ dyúɔ̀ nyí-nyí mú, sepóɛɖé dyúɔ̀ jè tɛ̀mɛ̀ìn nyɔǔn dyí kà ɔ ɓǎ ɖà gàa hwɛ̀ kɛ, ké ɔ mɔ̀ nyɔ mɛ sè ɔ ɓǎɔ̀ dúí.

Gma ɓě ɓá dyú-gàà se wuɖu nyuɛɛ jè dyíɛ

¹⁸ “Ɔ jǔ ké gàa ɖò dyi dyú-gàà ɖò ɓéɖé, ké ɔ dú dyi kùmù, ké ɔ dyi kɛ́ɛ́ ɓéɖé, ké kɛbì ɔ ɖe kè ɔ ɓǎ mɛ zà ɔ kpeɖeɛɛ, ɔ se waà wuɖu dyi kpɔ̃ɔ mɔ́ ní,

¹⁹ nìí, ɔ ɖe kè ɔ ɓǎ mɛ kpɔ̃ dyúɔ̀, ɓɛ́ wa ké dyúɔ̀ ɓó hwɔɖɔ ɓɛ́ wa cĩ́à múɛɛ gmɔ-wɔ̃̀ɔ̀ gbo dyà ɓó hwɔɖɔɔ̀ nyɔ vɛ̀nɛ̀ ɓěɔ̀ dyúa.

²⁰ Ké wa mɛ cɛ̃ɛ nyɔ vɛ̀nɛ̀ ɓěɔ̀ gbo, ɓɛ́ wa ké níiń, ‘À dyú-gàà nìà kɛ dú kùmù ní, ké ɔ ɓéɖé kɛ́ɛ́. Ɔ ní nyu à wuɖu, ké ɔ mɔ̀ fùɖù-fùɖù-nyɔ̀ kè ná-nyɔ̀.’

²¹ Ɔ ɖǎ ná nìǐn, hwɔɖɔɔ̀ gàa séín mɛ taɓaìn ɔ sɔ́ɔ́-kpò dyi, ɓɛ́ ɔ ké mɛ́. Kǎà ɓě mɛ zà ɖɛ gbàɔ̀ ɖé ɓě hwìɛ̀. Ɓě dyiɛ náa nyu ní, nìí, Éézùɖùɛ̀-nyɔ̀ tɔ̀ɔ̀ séín ɓěɔ̀ muɛ wɔ̃́ùn, ɓɛ́ wa ké fã̀àǔn kpá.

Gma-dù kò-kò ɓě

²² “Ɔ jǔ ké nyɔ ɖò dyi nàmàǔn ɓɛ́ìn ɔ gĩɔ kpaa kɛɛ nyu, ké ɓě dyi ɔ ɖáɓá, ké ɓě dyi ɔ xwɛ́ɔ̀ ɓó cu dyai beè ní,

²³ nìí, ɔ xwɛ́ɔ̀ mɛ ɓɔ́ ɓó cuɔ̀ dya goòɛ̀, kɛɛ ɓě mɛ zà ɔ xwɛ́ɔ̀ dyóɖóún ɓó wé dyúáɖòɔ̀ xwíníín, sepóɛɖé xwɛ́ ɓɛ́ ɔ beè kà ɓó cu dyaiɛɛ, Gèɖèpɔ́ɔ̀ gboò-wùɖù nì ɔ kɔ̃. Ɓě mɛ zà ɔ dyóɖóún, ɓɛ́ ɓě ké se ɓóɖó ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ nìà ɓě nyíɛń, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ zɛ̀nɛ̌ po.