Dìtɔ̀wáɖánámɛ̀ 19 - Ɓǎsɔ́ɔ̀ Báɓòɔ̀

Mú-vǐè-hwɔ̀ɖɔ̀ ɓě

¹ “Ti ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ ɖǎ ɓóɖó ɓɛ́ ɔ nìà ɓě nyíɛń, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ nyɔ ɓěɔ̀ mú gbɔɔ̀, ké ɓě ɖǎ waà ɓóɖóɔ̀ dyí ɖú, ké ɓě ɖǎ waà hwɔɖɔ ɓěɔ̀ kè waà gbǒ ɓěɔ̀ mú cĩ́ ní,

^2-3 nìí, ɓě mɛ ge ɓóɖóɔ̀ wáká tã mú, ké wáká ɖò-ɖò séín mɛ ɓéɖé hwɔɖɔ ɖò ɓɛ́ nyɔ ɓɛ́ìn mú nyiniɛ wàɖà kɛ. Ké nyɔ ɖò dyi ɔ mǔè ɖò ɖáɓá ní, nìí, ɓɛ́ ɔ ké ɖé hwɔɖɔɔ̀ mú pèɖèìn.

⁴ Gma ɓě ɓá nyɔ ɖò dyi ɔ mǔè ɖò ɖáɓáín, ɓɛ́ ɔ kéà ɖé hwɔɖɔ ɓěɔ̀ ɖò mú pèɖèìn ní, ɓɛ́ ɔ kéà cĩ́ɛɛ jè dyíɛɛ kɛà kɛ̀. Ɔ jǔ ké nyɔ ɖò dyi ɔ mǔè ɖò ɖáɓá seó-ɖei-dyé-kà, ké ɔ se ɔ mǔèɔ̀ hwòɖǒ gbà ɖò ɓéɖé kĩ́ín ní, nìí, nyɔɔ̀ ɓɛ́ìn ɖé hwɔɖɔ ɓěɔ̀ ɖò mú pèɖèɛ̀n.

⁵ Ɔ hwɔìn kà, ɔ jǔ ké nyɔ sɔ̃́ dyi xwáɖá xwíɖíi mu, ɓɛ́ wa ké cu cɛ̃, ké nyɔ ɖò dyi jùɛ̀ cu ɖàɓàǐn nì, ké ɔ jùɛ̀ɔ̀ dyi ɖoún wã, ké ɔ dyi ɔ mǔèɔ̀ dya sí, ké ɔ dyi mɛ́ín, nìí, nyɔɔ̀ mɛ pèɖèìn ɖé hwɔɖɔ ɓěɔ̀ ɖò mú, ɓɛ́ ɔ ké ɔ fɛ̀ɛ̀ɔ̀ póìn.

⁶ Ɔ jǔ ké hwɔɖɔɔ̀ dyi dyúáɖò nì nyɛ̀nɛ̀ɛ̀ ní, hwìè-kpà muà ɖé ɔ múɛɛ mu mú tɔ̀mɔ̀ùn mìɔ, ké nyɔ kéà nyɔ ɖǎà mɛ́ɛ nyɔmɔɔ̀ kpa zàa ɓɛ́ìn nyɔɔ̀ kúmúɛ̀n, ɓɛ́ ɔ ké ɔ kpɔ̃, ɓɛ́ ɔ ké ɔ ɖáɓá ɖé ɔ dyoɖo-hwòɖòɔ̀ mú. Nyɔɔ̀ se kɔ̃̀ ɓɛ́ ɔ kéɔ́ má mɛ́, sepóɛɖé ɔ seó ɖei dyé, ké ɔ se nyɔ mɛ́à kɛɛ hwòɖǒ gbà ɖò ɓéɖé kĩ́ín.

⁷ Ɖɛ nìà kɛ jè ḿ cɛ̃à ɓě gbo, ɓɛ́ ɓě kéà hwɔɖɔ tã wáká po ɓó ɓě mìɔùn bììɛ.

⁸ “Ɔ jǔ ké Bounɓo mɔ̀à ɓěɛ̀ Gèɖèpɔ́ɔ̀ kɛɛ ɖǎ ɓěɛ̀ ɓóɖóɔ̀ dyí ɓúáìn, ké ɔ ɖǎ ɓóɖó gànáɔ̀ ɓě nyí kà ɔ nyuà ɓě ɓǎ nììn ɓǎ ɓěɔ̀ nyɛ́nɛ́ín ɖáìn nyɛɛ ní,

⁹ nìí, ɓě mɛ gã hwɔɖɔ tãɔ̀ ɖò ɖe. Bounɓoɔ̀ mu ɓě ɓóɖó nìà kɛ nyíìn, ɔ jǔ ké ɓě dyi ɖɛ séín ḿ cɛ̃à zɛ̃̌ɛ̀ ɓě gboɛɛ nyu, ké ɓě dyi Bounɓo mɔ̀à ɓěɛ̀ Gèɖèpɔ́ɔ̀ kɛɛ mú ɖɛ̀ɓɛ̀, ké ɓě dyi ɔ kpeɖe séín ɓěɔ̀ kíɖíí sí kánáá pū ní.

¹⁰ Ɓě mɛ nyu ɖɛ nìà kɛ, ɓɛ́ ɓě ké se nyɔ ɓɛ́ ɔ se ɖɛ gbà nyuɛɛ nyɔmɔɔ dyi wáɖáìn ɖé ɓěɛ̀ ɓóɖó ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ nìà ɓě nyíɛń, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ kɔ̃, ɓɛ́ zaa ké se ɓě dúún wáɖá ɓó kú ɖáɓá jè.

¹¹ “Kɛɛ ɔ jǔ ké nyɔ ɖò dyi ɔ mǔè ɖò hwòɖǒ gbà ɓéɖé, ké ɔ dyi ɔ hwìè fò, ké ɔ dyi ɔ gbààǔn po, ké ɔ dyi nyɔɔ̀ ɖáɓá, hwɛ̀ ké ɔ dyi ɖé hwɔɖɔ ɓěɔ̀ ɖò mú pèɖèìn ní,

¹² nìí, ɔ ɓíɖí-hwɔ̀ɖɔ̀ɔ̀ nyɔ vɛ̀nɛ̀ ɓěɔ̀ mɛ ɖá nyɔɔ̀ ɖe, ɓɛ́ wa ké nyɔɔ̀ hwɔɖɔɔ̀ mú zà, ɓɛ́ wa ké nyɔɔ̀ nyɔ kéà nyɔ ɖǎà mɛ́ɛ nyɔmɔɔ̀ kpa zàa xwa nyí, ɓɛ́ ɔ mɔ̀ùn ké mɛ́.

¹³ Ɓě mɛ ɓɔ́ nyɔɔ̀ wìì ɖò kɔ̃ ɓéɖéɛ, ɓɛ́ zaa-dúún-wáɖá-wáɖá nìà Éézùɖùɛ̀-ɓòɖòɔ̀ kɔ̃ ɓó nyɔ seà ɖɛ gba nyuɛɛ nyɔmɔɔ̀ dyi wáɖáìn jèɛɛ ké ɓó sɔ̀, ɓɛ́ mana ké ɓě kɔ̃ nì.

Sèìn-sèìn-bã̀à ɓě

¹⁴ “Ɓě ní ɖá ɓɛ́ ɓě ké sɔ́ɔ́-kpò ɓě mɔ̀ bã̀à ɓě ɓɛ́ wa ɖǎǒ zɔ̃̌ɔ̀ cɛ̃ ɖé ɓóɖó ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ nìà ɓě nyíɛń, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛ múɛɛ daí zàìn.

Gma ɓě ɓá zàse nyu jè dyíɛ

¹⁵ “Zàse dyúáɖòɛ̀ wuɖu mɛ ɓɔ́ɔ nyuɛ ɓɛ́ ɓě ké nyɔ ɖò zaa dúún wáɖá ɓó ɖɛ gbà mɔɔ nàmàǔn ɓɛ́ wa ɖá ɔ nyuɛɛ jè. Ɖɛ ɓɛ́ìn nyɔ ɖò zaa dúún wáɖáa kɛɛ mɛ mɔ̀, ɔ jǔ ké nyɔ-kpò sɔ̃́ mɔɔ nyɔ-kpò tã dyiɛ zàse nyu ní.

¹⁶ Ɔ jǔ ké nyɔ ɖò dyi vɔ̃ ɓɛ́ ɔ ké ɔ mǔè ɖò ɖɛ gbà bũ̌ nyu dyììn ɖé seɛ̀-zàse nyu-nyu mú ní,

¹⁷ nìí, nyɔ sɔ̃́ zàà ɖɛɔ̀ múɛɛ mɛ mu sáa-zà-nyɔ̀ ɓě kè tɔ̀ɔ̀-ɓìɔ̀ ɓě muà kũ̀à kɔ̃ún nììn ɓó tia ɓaɖaa gbo, ɖé dɛ̀ ɓě ɓièìn kà Bounɓoɔ̀ kɛ.

¹⁸ Ké tɔ̀ɔ̀-ɓìɔ̀ ɓěɔ̀ mɛ ɖe zaaɔ̀ múin nɔ̀mɔ̀ dyíin, ké wa dyiɛ dyé kà zàseɔ̀ tɔ́mɔ́ se, ké ɖɛ ɔ cɛ̃à ɔ ɖííɔ̀ kɔ̃ún wɛ̃ɛ se jǎà kɛɛ ní,

¹⁹ nìí, ɓě mɛ nyu ɖɛ ɔ hwòɖǒ mɔ́ ɓɛ́ ɔ kéà ɔ ɖííɔ̀ gbo kpáa ɔ bũ̌, ɓɛ́ ɓě ké ɖɛ gbàɔ̀ ɖé ɓě hwìɛ̀ zà.

²⁰ Ɓě dyiɛ náa nyu ní, nìí, nyɔ tɔ̀ɔ̀ séín ɓěɔ̀ muɛ wɔ̃́ùn, ɓɛ́ wa ké fã̀àǔn kpá, ké wa se ɖɛ gbà nìà kɛ ɖé ɓě hwìɛ̀ nyuɛ́ mu ɖe.

²¹ Ɖé zaa nì kàa múɛɛ, ɓě mɛ ɓɔ́ nyɔɔ̀ wìì ɖò kɔ̃ ɓéɖéɛ. Gǎ ɓɛ́ zàseɔ̀ mɔ́ ɓɛ́ ɔ kéɔ́ kà ɔ ɖííɔ̀ kɔ̃ dyiɛɛ, kǎà ɓě mɛ nyuɛ ɔ bũ̌ ɖekè, kɛbì ɔ mɛ mɔ̀ fɛ̀ɛ̀ mɔɔ dyéɖé mɔɔ nyɛ́nɛ́ mɔɔ sɔ̃ mɔɔ ɓo kɛ.