Dìtɔ̀wáɖánámɛ̀ 17 - Ɓǎsɔ́ɔ̀ Báɓòɔ̀

¹ “Ɓě mɛ ɓɔ́ ɓìɖǐ mɔɔ ɓáɖáá ɓɛ́ ɔ ɓéɖé kɛɛ ɖò ké ɔ kɔ́ dyíɛɛ Bounɓo mɔ̀à ɓěɛ̀ Gèɖèpɔ́ɔ̀ kɛɛ gbo sáa zàìn, sepóɛɖé ɔ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛɛ dyi-nyàìn-ɖɛ̀.

^2-3 “Ɔ jǔ ké gàa ɖò mɔɔ màa ɖò dyi ɓě hwìɛ̀ cĩ́ ɖé hwɔɖɔ ɓě ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ nyíà ɓěɛɛ ɖò mú, ké ɔ dyi gèɖèpɔ́ɔ̀ kà kò ɖò ɓě dyúa dú hwuɖu taɓa, ké ɔ dyi wa ɓiè, mɔɔ ké ɔ dyi dú hwuɖu taɓa, ɓɛ́ ɔ ké dyóɖóɔ̀ mɔɔ dɛ̀nɛ̀ɔ̀ mɔɔ dɛ̀nɛ̀ mɛ́nɛ́ɛ́ ɓěɔ̀ ɖò ɓiè ní, nìí, ɔ nyu Bounɓoɔ̀ nàmàǔn bũ̌, ké ɔ jaɖa dèè-wùɖù nìà ɓó ɓě kè Bounɓoɔ̀ pṹa kɛɛ mú, sepóɛɖé ɔ ɖǎ ɖɛ ɓɛ́ ḿ ɖá ɓě mɛ ɓɔ́ nyuɛ kɛɛ nyu jè.

⁴ Ɔ jǔ ké wa dyiɛ ɔ jè ɓě gbo cɛ̃, mɔɔ ké ɓě dyiɛ wɔ̃́ ní, nìí, ɓě mɛ ɖe ɖɛ ɓě wɔ̃́à náa jè múin nɔ̀mɔ̀ dyíin. Ɔ jǔ ké ɔ dyi jǎà jǔ jɛ́ɛ́ kà ɓɛ́ ɔ ɖǎ ɖɛ ɓɛ́ ɔ nyàìn kà Gèɖèpɔ́ɔ̀ dyiɛɛ nyu ɖé Éézùɖùɛ̀-nyɔ̀ ɓěɔ̀ hwìɛ̀ kɛɛ ní,

⁵ nìí, ɓě mɛ kpɔ̃ gàa mɔɔ màa mɔ̀ nyɔ nyuà ɖɛ gbàɔ̀ kɛ, ɓɛ́ ɓě ké ɔ ɓó hwɔɖɔɔ̀ gmɔ-wɔ̃̀ɔ̀ gbo kpa, ɓɛ́ ɓě ké ɔ sɔ́ɔ́-kpò dyi taɓaìn, ɓɛ́ ɔ ké mɛ́.

⁶ Kɛɛ wɛ̃́ɛ́ kɛɛ, nyɔ-kpò sɔ̃́ mɔɔ nyɔ-kpò tã mɛ nyuɛ zàse, hwɛ̀ ɓɛ́ ɓě kéà nyɔɔ̀ ɖáɓá kɛ̀, kɛɛ ɓě ní ɖáɓá nyɔɔ̀ ɓó nyɔ-kpò dyúáɖòɛ̀ zàse jè.

⁷ Zàse ɓěɔ̀ mɛ po nyɔɔ̀ sɔ̃ dya kĩ́ín. Ɔ ɖǎ ná nìǐn, nyɔ séín ɓěɔ̀ mɛ kpá wa gbo, ɓɛ́ wa ké ɔ ɖáɓá. Kǎà ɓě mɛ zà ɖɛ gbàɔ̀ ɖé ɓě hwìɛ̀.

⁸ “Ɔ jǔ ké zaa ɖò dyi mú kàmà, ké tɔ̀ɔ̀-ɓìɔ̀ ɓě nìà ɖé ɓěɛ̀ hwɔɖɔ ɓěɔ̀ múɛɛ seɛ wɔ̃ poɛ ɓɛ́ìn ní, nìí, ɓě mɛ kpa ɓěɛ̀ zaaɔ̀ ɖé pá ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ muà gãùn wɛ̃ɛ mú. Zaa kɔ̃̀ jè ɓě kéà ɖé páɔ̀ mú muɛɛ hwɔìn kà kú-ɖáɓá-zàà mɔɔ kɔ̃̀ɔ̀-ɖɛ̀ kɔ̃in vɔ̃̀ìn jè mɔɔ hwɔ̀ɖɔ̀-gbàà-zàà.

⁹ Ɓě mɛ kpa ɓěɛ̀ zaa ɓěɔ̀ ɖé Ɖíìváà-nyɔ̀ ɓě mɔ̀à sáa-zà-nyɔ̀ ɓěɔ̀ kɛ kè tɔ̀ɔ̀-ɓìɔ̀ vɛ̀nɛ̀ muà kũ̀à kɔ̃ún nììn ɓó tia ɓaɖaa gbo, ɓɛ́ ɓě ké wa dyi diè ɓó ɖɛ ɓá zaa ɓěɔ̀ jè dyíɛ, ké wa muɛ wɔ̃ poùn.

¹⁰ Nìí, ɓě mɛ kpɔ̃ waà zaa-wɔ̃-po-poɔ̀ dyi ɖé páɔ̀ mú. Ɓě mɛ nyu ɖɛ séín wa cɛ̃ ɓě gbo ɓɛ́ ɓě ké nyuɛ.

¹¹ Ɓě mɛ kpɔ̃ waà zaa-wɔ̃-po-poɔ̀ dyi. Ɓě mɛ sí ná-wùɖù séín ɓɛ́ wa mu ɓě nyíìn nyɛɛ kíɖíí.

¹² Ké nyɔ ɖò se ɖɛ ɓɛ́ sáa-zà-nyɔ̀ nìà Bounɓo mɔ̀à ɓěɛ̀ Gèɖèpɔ́ɔ̀ kɛɛ kũ̀à nyuɛń nyɛ mɔɔ tɔ̀ɔ̀-ɓìɔ̀ vɛ̀nɛ̀ɔ̀ muà wɔ̃ poùn wɛ̃ɛ kpéín dyé, ké ɔ se waà wuɖuɔ̀ dyi kpɔ̃ ní, nìí, ɓě mɛ ɖáɓá nyɔɔ̀, ɓɛ́ ɓě ké ɖɛ gbàɔ̀ Éézùɖùɛ̀-nyɔ̀ ɓěɔ̀ hwìɛ̀ zà.

¹³ Ɓě dyiɛ náa nyu ní, nìí, nyɔ tɔ̀ɔ̀ séín muɛ wɔ̃́ùn, ɓɛ́ wa ké fã̀àǔn kpá, ké wa se zaa-wɔ̃-po-nyɔ̀ ɖò dyií dyi poɛ́ mu ɖe.

Gma ɓě ɓá kã́á jè dyíɛ

¹⁴ “Ɔ jǔ ké ɓě ɖǎ ɓóɖó ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ nìà ɓě nyíɛń nyɛɛ dyí ɖú, ké ɓě ɖǎa kɔ̃ cĩ́ ní, nìí, ɓěɛ̀ hwòɖǒ mu kã́á mɔ́ùn, ɓɛ́ ɓě kè ɓóɖó-dù tɔ̀ɔ̀ ɓě nìà ɓě ɖeiɛɛ ké hwɔìn.

¹⁵ Kã́á ɓě muà gãùn wɛ̃ɛ mɛ mɔ̀ gàa ɓɛ́ Bounɓoɔ̀ ɖǎ gã kĩ́ín nyɛ. Ɔ mɛ mɔ̀ ɓě mìɔùn nììn nyɔ ɓěɔ̀ ɖò. Ɓě ní gã ɖíà ɖò, ɓɛ́ ɔ ké ɓěɛ̀ kã́á jǔ.

¹⁶ Kã́áɔ̀ mɛ ɓɔ́ sǒ pàɖǎ ɓéɖéɛ ɓó ɔ sójà ɓěɔ̀ bìì. Ké ɔ mɛ ɓɔ́ nyɔ ɖò Íjè-ɓòɖòɔ̀ kɔ̃ ɖoɓoɛ, ɓɛ́ wa ké sǒ dɔ̃, sepóɛɖé Bounɓoɔ̀ ɖǎa cɛ̃ kà ɓɛ́ ɔ nyɔ ɓěɔ̀ mɛ ɓɔ́ ɖé Íjè-ɓòɖòɔ̀ kɔ̃ ɖe kɔ́ìn fɔɔ kɛ.

¹⁷ Ké ɔ mɛ ɓɔ́ nyɔ́nɔ́ pàɖǎ dyi kpɔ̃ɔ, sepóɛɖé wa muɛ nyuùn ɓɛ́ ɔ ké Bounɓoɔ̀ kɔ̃ín pòìn. Ké ɔ mɛ ɓɔ́ ɔ mìɔùn bã̀ìn dyììn ɖé séɓàɖà kè góò pàɖǎ dyí-poìn-poìn mú.

¹⁸ “Ti ɓɛ́ kã́áɔ̀ muà kã́á-gmɛ̀ɛ̌ɔ̀ dyí ɖúùn wɛ̃ɛ, ɔ mìɔùn mɛ céè gma ɓěɔ̀ céè-ɖɛ̀-kpò ɖò mú ɓó ɔ mìɔùn bìì. Ɔ mɔ̀ gma ɓě ɓɛ́ Ɖíìváà-nyɔ̀ ɓě mɔ̀à sáa-zà-nyɔ̀ ɓěɔ̀ kɛɛ ɓéɖéà kɛ.

¹⁹ Ké céè-ɖɛ̀ɔ̀ mɛ nì ɓó kã́áɔ̀ gbo, ɓɛ́ ɔ kéɛ wuɖuún zà wé séín. Ké ɔ muɛ nyuùn ɓɛ́ ɔ ké Bounɓo mɔ̀à ɔ Gèɖèpɔ́ɔ̀ kɛɛ dyi fɛ̃̀ìn, ɔ kè ɓɛ́ ɔ ké gma-dù kò-kò ɓěɔ̀ dyi kpɔ̃ kóɖó-kóɖó.

²⁰ Ké ɖɛ nìà kɛ muɛ nyuùn ɓɛ́ kã́áɔ̀ ké seɛ hwìɖǐi poìn kà ɓɛ́ ɔ kpa ɖɛ ké ɔ zi Éézùɖùɛ̀-nyɔ̀ tɔ̀ɔ̀ ɓěɔ̀ dyíɛ, ké ɔ muɛ nyuùn, ɓɛ́ ɔ ké Bounɓoɔ̀ gma ɓěɔ̀ dyi kpɔ̃ kóɖó-kóɖó. Ɔ dyi ná nìǐn, nìí, ɔ mu ɓóɖóɔ̀ wuɖuí kɔ̃̀ùn ɓó zɔ̃ ɓáún-ɓáún xwíníín, ké ɔ xwíníín-dyù ɓěɔ̀ mu Éézùɖùɛ̀-nyɔ̀ ɓěɔ̀ wuɖuí kɔ̃̀ùn kánáá pū.