Dìtɔ̀wáɖánámɛ̀ 16 - Ɓǎsɔ́ɔ̀ Báɓòɔ̀

Zĩ̀ìn-Kɔ̃in-hwɔ̀

¹ “Ɓě mɛ pa Bounɓo mɔ̀à ɓěɛ̀ Gèɖèpɔ́ɔ̀ kɛɛ Zĩ̀ìn-Kɔ̃in-hwɔ̀ɔ̀ ɖé dɛ̀nɛ̀ mɔ̀à Áɓì kɛɛ mú, sepóɛɖé Bounɓoɔ̀ zà ma ɓě ɖé Íjè-ɓòɖòɔ̀ kɔ̃, ɖé Áɓì-dɛ̀nɛ̀ɔ̀ mú, ɓó máaún.

² Ɓě mɛ mu ɖé pá kɔ̃̀ mú ɓɛ́ Bounɓoɔ̀ muà gãùn, ɓɛ́ ɓě kéà ɖé ɔ ɓièìn nyɛ, ɓɛ́ ɓě ké ɓěɛ̀ ɓáɖáá mɔɔ ɓěɛ̀ wiɖi mɔɔ ɓěɛ̀ ɓìɖǐ ɓěɔ̀ ɖò sáa zàìn ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ Zĩ̀ìn-Kɔ̃in-hwɔ̀ɔ̀ jè.

³ Ti ɓě muà suaɖɛ̀ɔ̀ ɖiìn nyɛɛ, ɓě mɛ ɓɔ́ɔ bɛɖɛɛ̀ nì dyáìn-ɖɛ̀ gboɛɛ dyí ɖìɛ̀n. Ɓó wé mɛ̀nɛ̌ìn-sɔ̃́ múɛɛ, ɓě mɛ ɖi bɛɖɛɛ̀ se dyáìn-ɖɛ̀ gbo nìɛ, kà ɓě nyuɛ ma kà ɖiɛ ti ɓɛ́ ɓě sɔ̀à ɖé Íjè-ɓòɖòɔ̀ kɔ̃ wàɖà-wàɖà kɛ. Ɓě mɛ ɖi bɛɖɛɛ̀ nìà kɛ. Ɔ mɔ̀ gǎà-nyɔ-dyi-pĩ́à-bɛ̀ɖɛ̀ɛ̀, ɓɛ́ wé kɔ̃̀ ɓaɖa ɓɛ́ ɓě sɔ̀à ɖé Íjè-ɓòɖò mɔ̀à gǎà-nyɔ-dyi-pĩ́à-ɓòɖòɔ̀ kɛ kɔ̃ɛɛ jè ké ɓě hwìɖǐi nì kánáá pū.

⁴ Nyɔ ɖò mɛ ɓɔ́ bɛɖɛɛ̀-dyáìn-ɖɛ̀ ɖò ɖé ɔ ɓíɖí-taún ɓéɖéɛ fɔɔ ɖé ɓóɖóɔ̀ kɔ̃ ɓó wé mɛ̀nɛ̌ìn-sɔ̃́ɔ̀ xwíníín. Ké ɓě ní ɖá nyúà-ɖɛ̀ ɓě ɓɛ́ ɓě muà sáa zàìn ɓó wé kĩ́ín-kĩ́ínɔ̀ hwìo-kà kɛɛ suaɖɛ̀ɔ̀ ɖò ké goò.

⁵ “Ɓě ɖò ní zàìn ɓěɛ̀ nyúà-ɖɛ̀ ɓě ɓá Zĩ̀ìn-Kɔ̃in-hwɔ̀ɔ̀ jè dyíɛɛ ɖò sáa ɖé ɓěɛ̀ hwɔɖɔ ɓě ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ nìà ɓě nyíɛń nyɛɛ ɖò mú,

⁶ ɔ sèìn pá ɓɛ́ Bounɓoɔ̀ muà gãùn, ɓɛ́ ɓě kéà ɖé ɔ ɓièìn nyɛɛ ɖòùn mú. Ɖéɛ̀ ɓě mɛ zàìn nyúà-ɖɛ̀ ɓěɔ̀ sáa ɓó hwìo ti dyóɖóɔ̀ nìǎ kà dyi kpáuń wɛ̃, ɓó ti jɛ́ɛ́ ɓɛ́ ɓě sɔ̀ìn ma kà ɖé Íjè-ɓòɖòɔ̀ kɔ̃ dyíɛ.

⁷ Ké ɓě mɛ po suaɖɛ̀ɔ̀ dyéɖé, ɓɛ́ ɓě kéɛ pá ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ muà gãùn wɛ̃ɛ mú tàìn. Ké ɓó gànà-kṹún ní, ɓě mɛ kɔ́ìn ɖé ɓěɛ̀ jàɖàìn-gbò ɓěɔ̀ mú ɖe.

⁸ Ké ɓó wé mɛ̀nɛ̌ìn-ɖò xwíníín nyɛɛ, ɓě mɛ ɖi bɛɖɛɛ̀ se dyáìn-ɖɛ̀ gbo nìɛ. Ké ɓó wéɔ̀ mɛ̀nɛ̌ìn-sɔ̃́ nììnɔ̀ ɓaɖaa, ɓě mɛ poìn dyí, ɓɛ́ ɓě ké Bounɓo mɔ̀à ɓěɛ̀ Gèɖèpɔ́ɔ̀ kɛɛ ɓiè. Ɓě mɛ ɓɔ́ kũ̀à ɖò nyuɛ ɓó wéa ɓaɖa.

Geɖe-Kɔ́-Ɓàɖà-hwɔ̀ mɔ̀à Wíkì-hwɔ̀ kɛ

⁹ “Sɔ̀ìn ɓó ti ɓě dèà ɓěɛ̀ geɖe ɓěɔ̀ cɛ̃ɛ gbɔ nyɛ̀nɛ̀ɛ̀ kɛ gboɛɛ, ɓě mɛ zɛɖɛ wíkì mɛ̀nɛ̌ìn-sɔ̃́,

¹⁰ ké ɓě mɛ pa Wíkì-hwɔ̀ɔ̀ ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ bìì. Ɓě mɛ tò hwòɖǒ-wáɖáá-nyìǐ-ɖɛ̀ ɓě dyììn ɖé kà Bounɓoɔ̀ nyu ɓě mana kɔ̃ poɛ kɛɛ mú.

¹¹ Ké ɓě kè ɓěɛ̀ dyú-gàà ɓěɔ̀ kè ɓěɛ̀ dyú-màà ɓěɔ̀ kè ɓěɛ̀ gbo-nì-gàà ɓěɔ̀ kè ɓěɛ̀ gbo-nì-màà ɓěɔ̀ kè Ɖíìváà-nyɔ̀ ɓě ɓɛ́ wa nìà ɖé ɓěɛ̀ hwɔɖɔ ɓěɔ̀ múɛ kè ɖíà ɓě kè xwíè-dyù ɓě ɔ kè jɔ̌ɔ̀-màà ɓě ɓɛ́ wa cĩ́à ɖé ɓě hwìɛ̀ kɛɛ mɛ kpá múàǔn ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ dyúa, ɖé pá ɓɛ́ ɔ muà gãùn, ɓɛ́ ɓě kéà ɖé ɔ ɓièìn nyɛɛ mú.

¹² Ké ɔ mɛ nì ɓě hwìɖǐi kà ɓě mɔ̀ǒ zɔ̃̌ɔ̀ gǐì ɖé Íjè-ɓòɖòɔ̀ kɔ̃ɛ. Ɔ jèɛɛ, ɓě mɛ kpɔ̃ gma ɓě nìà kɛ dyi kóɖó-kóɖó.

Hwɔ ɓá ɓeè-dyù ɓě jè dyíɛ

¹³ “Ké ti ɓě ɖǎ ɓěɛ̀ mɔɔ́ ɓěɔ̀ sáɖáún poɛ hwɔ, ké ɓě ɖǎ ɓěɛ̀ géɖéè ɓěɔ̀ mú píníɛ hwɔɛɛ ní, nìí, ɓě mɛ pa Ɓeè-Dyù-hwɔ̀ɔ̀ ɓó wé mɛ̀nɛ̌ìn-sɔ̃́ xwíníín.

¹⁴ Ɓě kè ɓěɛ̀ dyú-gàà ɓěɔ̀ kè ɓěɛ̀ dyú-màà ɓěɔ̀ kè ɓěɛ̀ gbo-nì-gàà ɓěɔ̀ kè ɓěɛ̀ gbo-nì-màà ɓěɔ̀ kè Ɖíìváà-nyɔ̀ ɓě kè ɖíà ɓě kè xwíè-dyù ɓě ɔ kè jɔ̌ɔ̀-màà ɓě ɓɛ́ wa cĩ́à ɖé ɓěɛ̀ hwɔɖɔ ɓěɔ̀ múɛɛ mɛ kpáìn Ɓeè-Dyù-hwɔ̀ɔ̀ jè múàǔn dyi.

¹⁵ Ké ɓě mɛ pàìn hwɔɔ̀ wé mɛ̀nɛ̌ìn-sɔ̃́ ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ bìì, ɖé pá ɓɛ́ Bounɓoɔ̀ muà gãùn wɛ̃ɛ mú, sepóɛɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ mu ɖɛ séín sɔ̀à ɖé ɓěɛ̀ geɖe ɓěɔ̀ gboɛ kè ɓěɛ̀ kũ̀à-sɔ̃̀ séín mana kɔ̃ poùn, ɓɛ́ ɓěɛ̀ múàǔn-kpá-kpáɔ̀ ké gbɔ hwɛ̀.

¹⁶ “Ɓěɛ̀ gàa séín ɓěɔ̀ mɛ poìn dyí kpa tã ɓó zɔ̃ séín xwíníín, ɓɛ́ wa ké ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ dyúa dyi ɖé pá ɔ muà gãùn wɛ̃ɛ mú. Ti kɔ̃̀ mú ɓɛ́ wa kéà dyí poìn nyɛɛ mɔ̀ ɓó Bɛɖɛɛ̀-Se-Dyáìn-Ɖɛ̀-Gbo-Nì-hwɔ̀ɔ̀ kè ɓó Wíkì-hwɔ̀ɔ̀ ɔ kè ɓó Ɓeè-Dyù-hwɔ̀ɔ̀ ɓaɖa. Ké gàa ɖò mɛ ɓɔ́ xwa fɔ̀nɔ̀ɔ̀ ɓɛ́ ɔ ké Bounɓoɔ̀ ɓièɛ̌n dyi.

¹⁷ Gàa ɖò-ɖò séín mɛ dyà nyíí-ɖɛ̀ kà Bounɓo mɔ̀à ɓěɛ̀ Gèɖèpɔ́ɔ̀ kɛɛ nyu nyɔɔ̀ mana kɔ̃ poɛ kɛ.

Kà tɔ̀ɔ̀-ɓìɔ̀ ɓěɔ̀ ké zaa cɛ̃ɛ nyuɛ

¹⁸ “Ɓě mɛ gã tɔ̀ɔ̀-ɓìɔ̀ ɓě kè nàìn-nyɔ̀ ɓě ɖé ɓěɛ̀ hwɔɖɔ séín ɓě ɓɛ́ Bounɓoɔ̀ nìà ɓě nyíɛń nyɛɛ mú kà ɓěɛ̀ xwéɖé-dù ɓěɔ̀ nyuà nìɛ̀ kɛ, ké wa mɛ po nyɔ ɓěɔ̀ zaa wɔ̃ dyí-sɛ́ɖɛ́ìn-kà.

¹⁹ Wa mɛ ɓɔ́ ɖɛ mɔ̀ dyí-sɛ́ɖɛ́ìn-ɖɛ̀ kɛɛ xwa cɛ́ɛ̀, mɔɔ ké wa mɛ ɓɔ́ nyɔ ɖò hwòɖǒǔn gbo zĩ̀ɛ̀n, mɔɔ ké wa mɛ ɓɔ́ nyɔ-gbo-pa-wìɖì dyi kpɔ̃ɔ, sepóɛɖé nyɔ-gbo-pa-wìɖì kpèìn hwòɖǒ-fɔ̀nɔ̀-nyɔ̀ dyéɖéín dyi, ké ɔ cɛ́ɛ̀ zaa-wɔ̃-po-po sɛ́ɖɛ́ìn dyíɛɛ xwa.

²⁰ Ké ɖɛ mɔ̀ dyí-sɛ́ɖɛ́ìn-ɖɛ̀ kɛɛ ɖòùn ɖéɛ̀ ɓě mɛ sí kíɖíí, ɓɛ́ ɓě ké ɓóɖó ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ nìà ɓě nyíɛń nyɛɛ kɔ̃ cĩ́, ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ.

²¹ “Ti ɓě mu Bounɓo mɔ̀à ɓěɛ̀ Gèɖèpɔ́ɔ̀ kɛɛ sáa-kɔ̃-zàìn-gbàà ɖò poùn wɛ̃ɛ, ɓě mɛ ɓɔ́ cu-kpóɖó mɔ̀à gèɖèpɔ́ɔ̀-màà kɔ̃̀ nyɛ́nɛ́ mɔ̀à Àséwàɖà kɛɛ hwɔìn-ɖɛ̀ɔ̀ kɛɛ ɓó gbààɔ̀ wáún dyi nyànàìn.

²² Ké ɓě mɛ ɓɔ́ sɔ́ɔ́-kpò ɓě dyi nyànàìn ɓó kũùn-kpò ɓiè jè, sepóɛɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ nyɛ́ wa mú.