Dìtɔ̀wáɖánámɛ̀ 15 - Ɓǎsɔ́ɔ̀ Báɓòɔ̀

Gma ɓě ɓá zɔ̃ɔ̀ mɛ̀nɛ̌ìn-sɔ̃́ nììnɔ̀ jè dyíɛ

¹ “Ɖé zɔ̃ mɛ̀nɛ̌ìn-sɔ̃́ séín mánáín-hwɛ̀-tìǐn nyɛɛ, ɓě mɛ táà nyɔ séín ɓéɖé ɓěɛ̀ kpa kɛɛ dyi.

² Kǎà ɓě mɛ nyu kà kpaɔ̀ dyi táà jèɔ̀ nyuɛ. Kpa-po-nyɔ̀ séín mɛ táà ɖɛ séín ɓɛ́ wa ɖǎà wa mǔè Éézùɖùɛ̀-nyɔ̀ ɖò kpaún pòìn nyɛɛ dyi. Wa mɛ ɓɔ́ wa mǔèɔ̀ mɔɔ waà ɖííɔ̀ kpaɔ̀ gbo tɔ́mɔ́ɔ ɖe, sepóɛɖé wa ɖǎ Bounɓoɔ̀ nyɔ kpa kɔ̃in zĩ̀ìn jè zio mú pòìn.

³ Ɓě mɛ tɔ́mɔ́ ɓěɛ̀ kpa ɓě nì ɖíà ɓěɔ̀ múɛ, kɛɛ ɓě mɛ táà kpa séín nì ɓěɛ̀ ɖíí ɓěɔ̀ múɛɛ dyi.

⁴ “Nyɔ ɖò se ɓéɖé ɔ kéɔ́ gǎ dyé ɖé ɓě hwìɛ̀, sepóɛɖé Bounɓoɔ̀ mu ɓě mana kɔ̃ poùn ɖé ɓóɖó ɓɛ́ ɔ nìà ɓě nyíɛń, ɓɛ́ ɓě kéà dyí ɖú, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ kɔ̃.

⁵ Ɔ mu ná nììn, ɔ jǔ ké ɓě dyi ɔ wuɖu nyu, ké ɓě dyi gma séín ɓɛ́ ḿ nìà zɛ̃̌ɛ̀ ɓě gbo cɛ̃iń nyɛɛ dyi kpɔ̃ kóɖó-kóɖó ní.

⁶ Bounɓo mɔ̀à ɓěɛ̀ Gèɖèpɔ́ɔ̀ kɛɛ mu ɓě mana kɔ̃ poùn kà ɔ nyuà ɓě nyɛ́nɛ́ín ɖáìn nyɛ. Ké ɓě mu ɓóɖó-dù ɓáún-ɓáún kpaún poùn, kɛɛ ɓě se ɓóɖó ɖò gbo kpa kpɔ̃ɔ́ mu. Ké ɓě mu ɓóɖó-dù ɓáún-ɓáún wuɖuí kɔ̃̀ùn, kɛɛ ɖò se ɓě wuɖuí kɔ̃̀ɔ̌ mu.

⁷ “Ɔ jǔ ké ɓě mǔè Éézùɖùɛ̀-nyɔ̀ ɓěɔ̀ ɖò dyi gǎ dyé ɖé ɓě hwìɛ̀, ɖé ɓěɛ̀ hwɔɖɔ ɓěɔ̀ ɖò mú, ɖé ɓóɖó ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ nìà ɓě nyíɛń nyɛɛ kɔ̃ɛɛ ní, nìí, ɓě mɛ ɓɔ́ nyɔɔ̀ gbo hwòɖǒ nyìnìɛ̀n, ɓɛ́ ɓě ké se ɔ gbo kpáa.

⁸ Kɛɛ ɓě mɛ pɛ́ɛ̀ sɔ̃ dyí ɖé ɓě mǔè ɓɛ́ ɔ nì gǎ dyéɛń nyɛɛ gbo, ɓɛ́ ɓě ké ɖɛ ɔ muà mɔ́ùn, ɓɛ́ ɔ seà ɖò ɓéɖéɛɛ ɔ kpaún pòìn.

⁹ Ɓě mɛ ɓɔ́ hwòɖǒ-kɔ̃in-nyìnììn-ɖɛ̀ nìà kɛ nyuɛ, ɓɛ́ ɓě ké níiń, ‘Zɔ̃ mɛ̀nɛ̌ìn-sɔ̃́ nììn mɔ̀ zɔ̃ kɔ̃̀ mú ɓɛ́ nyɔ táà kà kpa dyiɛɛ nìǎ dyi xwɛ̃́ǐn,’ ɔ jèɛ̀ ɓě nyu ɓě mǔè ɓɛ́ ɔ nì gǎ dyéɛń nyɛɛ kànàǎ-ɖɛ̀ bũ̌, ké ɓě se ɖɛ ɔ mɔ́à kɛɛ ɖò ɔ nyí. Ɓě dyiɛ náa nyu ní, nìí, ɔ mu Bounɓoɔ̀ kpéi pòìn ɓó ɖɛ ɓě nyuà ɔ bũ̌ɛɛ jè, ké zaa mu ɓě kpɔ̃ùn ɓóɛ jè.

¹⁰ Ɓě mɛ pɛ́ɛ̀ sɔ̃ dyí, ɓɛ́ ɓě ké ɔ ɖɛ nyí ɖé hwòɖǒ wáɖáá mú, sepóɛɖé ɓó ɖɛ nìà kɛ jè Bounɓo mɔ̀à ɓěɛ̀ Gèɖèpɔ́ɔ̀ kɛɛ muà ɓěɛ̀ kũ̀à séín ɓěɔ̀ kè ɓěɛ̀ nyuu-ɖɛ̀ séín ɓěɔ̀ mana kɔ̃ poùn wɛ̃̀.

¹¹ Gǎ-dyé-nyɔ̀ ɓě mu ɖé ɓěɛ̀ ɓóɖóɔ̀ mú nììn tee. Ɔ ná nì jèɛɛ, ḿ nìɛ̀ ɓě gbo cɛ̃iń, ɓɛ́ ɓě ké sɔ̃ dyí pɛ́ɛ̀ ɖé ɓě mǔè Éézùɖùɛ̀-nyɔ̀ ɓě ɓɛ́ wa nì gǎ dyéɛń ɖé ɓěɛ̀ ɓóɖóɔ̀ múɛɛ gbo.

Gma ɓě ɓá kà gǐì-ɓǎ ké ɔ gǐì-dyù kpɔ̃ɔ nyuɛɛ jè dyíɛ

¹² “Ɔ jǔ ké nyɔ ɖò dyi ɔ mǔè Éézùɖùɛ̀-nyɔ̀ ɖò dɔ̃, ɓɛ́ ɔ ké ɔ gǐì jǔ ní, kɛbì ɔ mɛ mɔ̀ gàa mɔɔ màa kɛɛ, ɔ mɛ nyu nyɔɔ̀ kũ̀à ɓó zɔ̃ mɛ̀nɛ̌ìn-ɖò xwíníín. Kɛɛ ɖé zɔ̃ɔ̀ mɛ̀nɛ̌ìn-sɔ̃́ nììnɔ̀ xwíníín nyɛɛ, gǐì-ɓǎɔ̀ ɓéɖé ɓɛ́ ɔ ké gǐìɔ̀ dyi táà.

¹³ Ké ti ɓɛ́ gǐì-ɓǎɔ̀ muà ɔ gǐìɔ̀ dyi táàùn wɛ̃ɛ, ɔ mɛ ɓɔ́ ɔ xwa fɔ̀nɔ̀ìn.

¹⁴ Gǐì-ɓǎɔ̀ mɛ pɛ́ɛ̀ sɔ̃ dyí, ɓɛ́ ɔ ké ɖɛ ɓě ɓɛ́ Bounɓoɔ̀ ɖǎà ɔ mana kɔ̃ pòìn nyɛɛ ɖò gǐìɔ̀ nyí. Ɔ mɛ nyí ɔ gǐìɔ̀ ɓáɖáá kè wiɖi kè ɖii-ɖɛ̀ ɔ kè wã́ìn.

¹⁵ Ɔ mɛ nì ɓě hwìɖǐi kà ɓě mɔ̀ ma gǐì ɖé Íjè-ɓòɖòɔ̀ kɔ̃, ké Bounɓo mɔ̀à ɓěɛ̀ Gèɖèpɔ́ɔ̀ kɛɛ gbǎà ma ɓěɛ. Ɔ jèɛɛ, ḿ nì ɓě gma nìà kɛ gbo cɛ̃iń ɓó zɛ̃̌ɛ̀.

¹⁶ “Kɛɛ ɔ jǔ ké ɔ gǐìɔ̀ se mɔ́ ɓɛ́ ɔ ké mu, sepóɛɖé ɔ ɖɛ̀ɓɛ̀ ɔ gǐì-ɓǎɔ̀ kè ɔ gbǒ-xwíníín-nyɔ̀ ɓěɔ̀ mú, ké ɔ hwòɖǒ dyi dyi dè ɓɛ́ ɔ ké ɓó ɔ gbo nìǐn,

¹⁷ nìí, gǐì-ɓǎɔ̀ mɛ kpa gǐìɔ̀ ɓó ɔ gbǒɔ̀ wĩín ɓó xwìɖì-tɛ̃́ínɔ̀ gbo, ɓɛ́ ɔ ké sṹɔ̀ dyí ɖú, ɓɛ́ ɔ ké gǐìɔ̀ ɖùǔɔ̀ fíè. Ɔ ɖǎ ná nìǐn, nìí, ɔ mɔ̀ǎ ɔ gǐì ɖé ɔ fɛ̀ɛ̀-wè séín mú. Kà dyúáɖòɔ̀ kǎà ɓě mɛ nyu gǐì-màà nyuɛ ɖekè.

¹⁸ Ɔ mɛ ɓɔ́ mú-kàmà-ɖɛ̀ jǔɛ ɖé ɓě gbo ɓó ɓěɛ̀ gǐì buɛ̀ jè, sepóɛɖé kũ̀à ɓɛ́ ɔ nyuà ɓě bìì ɓó zɔ̃ mɛ̀nɛ̌ìn-ɖò xwíníín nyɛɛ pɛ́ɛ̀-ɖɛ̀ se nyɔ ɓɛ́ ɔ muɔ́ ɓě bìì pɛ́ɛ̀-kũ̀à nyuùn wɛ̃ɛ pɛ́ɛ̀-ɖɛ̀ɔ̀ fáún-fáún dyɛ mɔ̀ùn. Ké Bounɓo mɔ̀à ɓěɛ̀ Gèɖèpɔ́ɔ̀ kɛɛ mu ɖɛ séín ɓɛ́ ɓě mu nyuùn wɛ̃ɛ mana kɔ̃ poùn.

Gma ɓě ɓá ɓìɖǐ kè ɓáɖáá kè wiɖi ɓěɛ̀ nyíɔ́-dyù ɓěɔ̀ jè dyíɛ

¹⁹ “Ɓě mɛ po ɓěɛ̀ ɓìɖǐ kè ɓěɛ̀ ɓáɖáá ɔ kè ɓěɛ̀ wiɖi ɓěɔ̀ nyíɔ́-dyù ɓě mɔ̀ ɔ ɓíɔ́ kɛɛ wáká ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ bìì. Ɓě mɛ ɓɔ́ ɓìɖǐ ɓěɔ̀ nyíɔ́-dyù ɓěɔ̀ ɖò kũ̀à mú nyùɛ̀n, ké ɓě mɛ ɓɔ́ ɓáɖáá ɓěɔ̀ nyíɔ́-dyù ɓěɔ̀ ɖò mí bũ̌in cɛ̃ɛ.

²⁰ Ɓó zɔ̃ séín xwíníín nyɛɛ, ɓě kè ɓěɛ̀ gbǒ-xwíníín-nyɔ̀ ɓěɔ̀ mɛ ɖììn wa ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ dyúa, ɖé pá ɓɛ́ ɔ muà gãùn wɛ̃ɛ mú.

²¹ Kɛɛ ɔ jǔ ké nyúà-ɖɛ̀ ɓěɔ̀ dyi kɛɛ ɖò ɓéɖé, ké ɔ dyiɛ nyu ké wa dyi gbùàǔn nàìn, mɔɔ ké wa dyi dyéɖéín dyi kpè, mɔɔ ké wa dyi dyí kɔ́ ní, nìí, ɓě mɛ ɓɔ́ wa sáa zàìn ɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ gbo.

²² Ɓě mɛ ɖììn nyúà-ɖɛ̀ kɔ́ dyí ɓěɔ̀ ɖé ɓěɛ̀ hwɔɖɔ ɓěɔ̀ mú. Ɓěɛ̀ nyɔ ɓě hwɛ̀ múɛ kè ɓěɛ̀ nyɔ ɓě se mú hwɛ̀ɛ ɓɛ́ìn wa ɖiɛ kà nyɔ ɖià xwáɖá-xwíɖíi-nìmìì ɓě mɔ̀à déɖé kè xwɛɛ.

²³ Kɛɛ ɓě ní ɖi waà nyɔmɔɔ̀. Ɓě mɛ wáɖá waà nyɔmɔɔ̀ ɓíɖíi dyi kà nyɔ wáɖáà ní dyiɛ.