Dìtɔ̀wáɖánámɛ̀ 14 - Ɓǎsɔ́ɔ̀ Báɓòɔ̀

Ɖɛ nyɔ se kɔ̃̀ ɓɛ́ nyɔ ké nyu ɓá xwɛ́ jè dyíɛ

¹ “Ɓě mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛɛ dyú ɓě. Ɔ jèɛɛ, ɓě mɛ ɓɔ́ ɓě mìɔùn dyi ɖaɓaìn, mɔɔ ké ɓě mɛ ɓɔ́ mí dú zàà ɓó nyɔ ɖǎ mɛ́ɛ jè.

² Sepóɛɖé ɓě kpá wáká ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ bìì. Ɔ gã ɓě sɔ̀ìn ɖé nyɔǔn séín nìà ɓóɖó-kpàà kɔ̃ɛɛ hwìɛ̀, ɓɛ́ ɓě ké ɔ mìɔùn nììn kɔ̃̀ɔ̀-ɖɛ̀ jǔ.

Suaɖɛ̀ ɓɛ́ wa ɓɛ́ìn ɖiɛ kɛ

³ “Ɓě mɛ ɓɔ́ nimii séín ɓě ɓɛ́ wa nyàìn Bounɓoɔ̀ dyiɛɛ ɖò ɖiɛ.

⁴ Nimii ɓě ɓɛ́ ɓě ké ɖiɛɛ kɛà kɛ̀: ɓìɖǐ kè ɓáɖáá kè wiɖi

⁵ kè xwɛ kè déɖé kè ɓǎà kè xwáɖá-xwíɖíi-wìɖì kè ɖíɓíí kè nyàɖàǎ ɔ kè ɓáɖáá nìà ɖé toɖo gboɛ.

⁶ Nimii kã̀ìn séín ɓɛ́ wa kɔ̃̀ zùǎ ge mú, ké wa tà wĩin nyɛɛ, ɓě mɛ ɖi wa.

⁷ Kɛɛ ɓě mɛ ɓɔ́ nimii ɓě ɓɛ́ wa tà wĩin, kɛɛ waà zùǎ se mú geɛɛ ɖiɛ. Wa hwɔìn kà sǒ-nì-gbu-kɔ̃ún kè weɖema ɔ kè waɖa. Wa mɛ mɔ̀ se-mú-hwɛ̀-ɖɛ̀ ɓó ɓě bìì.

⁸ Ké ɓě mɛ ɓɔ́ nimii ɓě ɓɛ́ wa kɔ̃̀ zùǎ ge mú, kɛɛ wa ní tà wĩin nyɛɛ ɖiɛ. Ɔ hwɔìn kà ɓeé. Ɔ mɛ mɔ̀ se-mú-hwɛ̀-ɖɛ̀ ɓó ɓě bìì. Ɓě mɛ ɓɔ́ nimii ɓěɛ̀ ɖò ɖiɛ, mɔɔ ké ɓě mɛ ɓɔ́ wa ɖòɛ̀ xwɛ́ dyi tìnìɛ̀n.

⁹ “Ké zimii kã̀ìn séín ɓɛ́ wa ɓéɖé séá kè xwɛ̃́ kɛɛ, ɓě mɛ ɖi wa.

¹⁰ Kɛɛ zimii tɔ̀ɔ̀ séín sè ɓó ɖe ɓɛ́ wa se séá kè xwɛ̃́ ɓéɖéɛɛ, ɓě mɛ ɓɔ́ wa ɖiɛ. Wa mɛ mɔ̀ se-mú-hwɛ̀-ɖɛ̀ ɓó ɓě bìì.

¹¹ “Ɓě mɛ ɖi naà séín ɓɛ́ wa hwɛ̀ múɛ.

¹² Kɛɛ ɓě ní ɖi naà ɓě nìà kɛ. Wa mɔ̀ ke kè fɔ́ɔ́ kè jìbǎ

¹³ kè ɖuú-ɖuú kè géé-kpá

¹⁴ kè hwĩ́ín-hwã

¹⁵ kè hã́à-hãà kè máaún-gèě kè gmàà-nàà kè géé dú kò-kò ɓě

¹⁶ kè kùnǔù kè jìɔ-gbɔ̀ǔn-bòò

¹⁷ kè kɔ̀-hwɔ̀ɖɔ̌ɔ̀ kè tɔ̀-pùɖù kè hwò kè dyóó-nàà

¹⁸ kè bá-bá kè zɔ̀ɔ̀ kè kú-dù-nàà ɔ kè zĩ́á-gã.

¹⁹ “Ke wãa-ɖɛ̀ séín ɓɛ́ wa mɔ̀ se-mú-hwɛ̀-ɖɛ̀ ɓó ɓě bììɛɛ, ɓě mɛ ɓɔ́ wa ɖiɛ.

²⁰ Kɛɛ wãa-ɖɛ̀ séín ɓɛ́ wa hwɛ̀ múɛɛ, ɓě mɛ ɖiɛ.

²¹ “Ɓě ní ɖi ɖɛ kã̀ìn séín mɛ́ìn ɓíɖíiɛ. Ɓě mɛ nyíɛ ɖíà ɓě nìà ɖé ɓěɛ̀ hwɔɖɔ ɓěɔ̀ múɛ ɓɛ́ wa kéɛ ɖi, mɔɔ ɓě mɛ pèɖèɛ̀n ɓóɖó-dù kà kò ɖòɛ̀ nyɔ ɓě gbo. Sepóɛɖé ɓě kpá wáká ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ bìì. “Ɓě ɖò ní ɖá ɓɛ́ ɓě ké wiɖi-dyù ɖò mɔɔ ɓáɖáá-dyù ɖò ɔ ɖeɛ̀ nɛɛ̀-nì dyí pĩ̀ìn.

Gma ɓě ɓá ɓàɖàìn-bùè jè dyíɛ

²² “Ɖɛ séín ɓě ɓɛ́ ɓě ɓá ɖé ɓěɛ̀ geɖe ɓěɔ̀ gboɛɛ, ɓě mɛ tò ɖɛ séín ɓɛ́ wa mu tòɖòùn wɛ̃ɛ ɓàɖàìn-bùè ɓó zɔ̃ séín xwíníín.

²³ Ké ɓě mɛ kpa ɓěɛ̀ ɓàɖàìn-bùè ɓěɔ̀ ɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ dyúa, ɖé pá ɓɛ́ ɔ muà gãùn, ɓɛ́ ɓě kéà ɖé ɔ ɓièìn nyɛɛ mú. Ké ɖé páɔ̀ múɛɛ, ɖéɛ̀ ɓě mɛ ɖììn ɓěɛ̀ ɓàɖàìn-bùè ɓě ɓá ɓěɛ̀ ɖii-ɖɛ̀ ɓěɔ̀ kè ɓěɛ̀ wã́ìn ɓěɔ̀ kè ɓěɛ̀ ɔ́ɖè-cànà ɓěɔ̀ jè dyíɛ ɔ kè ɓěɛ̀ ɓìɖǐ kè ɓěɛ̀ ɓáɖáá kè ɓěɛ̀ wiɖi ɓěɔ̀ nyíɔ́-dyù ɓěɔ̀, ɓɛ́ ɓě kéɛ cɛ̃́ kà ɓɛ́ ɓě ké Bounɓo mɔ̀à ɓěɛ̀ Gèɖèpɔ́ɔ̀ kɛɛ dyi fɛ̃̀ìn nyu kánáá pū kɛ.

²⁴ Kɛɛ ɔ jǔ ké dɛ̀ ɓɛ́ Bounɓoɔ̀ gãà kɛɛ dyi gbo tɔ̀mɔ̀ ɓó ɓě bìì, ké ɓě se ɖɛ ɓě ɓɛ́ Bounɓoɔ̀ ɖǎà ɓě mana kɔ̃ pòìn nyɛɛ ɓàɖàìn-bùè ɓěɔ̀ ɖé páɔ̀ mú kpaa ɓɛ́ìn ní,

²⁵ nìí, ɓě mɛ zĩàìn ɓàɖàìn-bùè ɓěɔ̀ wíɖí gboi, ɓɛ́ ɓě ké wíɖíɔ̀ dyí ɖú, ɓɛ́ ɓě kéɛ ɖéɛ pá ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ gãà kɛɛ mú kpa.

²⁶ Ké ɓě mɛ dɔ̃ wíɖíɔ̀ ɖɛ séín ɓěɛ̀ hwòɖǒ mɔ́ɛɛ mú. Ɓě ɓɛ́ìn ɓìɖǐ mɔɔ ɓáɖáá mɔɔ wiɖi mɔɔ wã́ìn mɔɔ kàmàà-nɔ̀mɔ̀ɔ̀ mɔɔ ɖɛ tɔ̀ɔ̀ séín ɓěɛ̀ hwòɖǒ mɔ́ ɖiɛ dyiɛɛ mú dɔ̃ɔ. Ké ɓě kè ɓěɛ̀ gbǒ-xwíníín-nyɔ̀ ɓěɔ̀ mɛ ɖìɛ̀n ɓóɛ Bounɓo mɔ̀à ɓěɛ̀ Gèɖèpɔ́ɔ̀ kɛɛ dyúa, ɓɛ́ ɓě ké múàǔn kpá.

²⁷ “Ɓě ní ɖá ɓɛ́ Ɖíìváà-nyɔ̀ ɓě ɓɛ́ wa cĩ́à ɓěɛ̀ hwɔɖɔ ɓěɔ̀ múɛɛ jè ké ɓě hwìɖǐi sɔ̀, sepóɛɖé wa se pá ɖò kɔ̃̀ ɖé ɓě hwìɛ̀.

²⁸ Ɖé zɔ̃ tã séín mánáín-hwɛ̀-tìǐn nyɛɛ, ɓě mɛ dyà ɓěɛ̀ ɓáá-ɖɛ̀ ɓěɔ̀ ɓàɖàìn-bùè ɓěɔ̀, ɓɛ́ ɓě kéɛ ɖéɛ ɓěɛ̀ hwɔɖɔ ɓěɔ̀ múin dèìn.

²⁹ Nyɔ ɓě kɔ̃̀ ɖii-ɖɛ̀ nìà kɛɛ mɔ̀ Ɖíìváà-nyɔ̀ ɓě ɓɛ́ wa seà pá ɖò ɖé ɓě hwìɛ̀ kɔ̃̀ɛ kè ɖíà ɓě kè xwíè-dyù ɓě ɔ kè jɔ̌ɔ̀-màà ɓě ɓɛ́ wa cĩ́à ɖé ɓěɛ̀ hwɔɖɔ ɓěɔ̀ múɛ. Wa mɛ dyi, ɓɛ́ wa ké ɔ séín wa mɔ́ɛɛ ɖi, ɓɛ́ wa ké ɖoɓo. Ɓě mɛ nyu ɖɛ nìà kɛ, ké Bounɓo mɔ̀à ɓěɛ̀ Gèɖèpɔ́ɔ̀ kɛɛ mu ɓěɛ̀ kũ̀à-sɔ̃̀ séín mana kɔ̃ poùn.