Dìtɔ̀wáɖánámɛ̀ 13 - Ɓǎsɔ́ɔ̀ Báɓòɔ̀

¹ “Ɔ jǔ ké kpáá-ɖɛ̀-cɛ̃-nyɔ̀ ɖò mɔɔ dya-nyɔ̀ ɖò dyi ɓě hwìɛ̀ dyí sɔ̀, ké ɔ dyiɛ cɛ̃ kà zɛ̃̀ìn-ɖɛ̀ ɖò mɔɔ ɖɛ dĩ́ín-dĩ̀ìn ɖò mu kpáùn wɛ̃,

² ké ɖɛ kɔ̃̀ jè ɔ cɛ̃à kɛɛ dyi kpá jǎà, hwɛ̀ ké ɔ dyiɛ ɓě gbo cɛ̃, ɓɛ́ ɓě ké gèɖèpɔ́ɔ̀ kà kò ɖò ɓě ɓɛ́ ɓě séè ɓiè ɖòɛɛ kíɖíí sí, ɓɛ́ ɓě ké wa ɓiè ní,

³ nìí, ɓě mɛ ɓɔ́ kpáá-ɖɛ̀-cɛ̃-nyɔ̀ɔ̀ mɔɔ dya-nyɔ̀ɔ̀ wuɖu ɓěɔ̀ gbo ɖùǔ tòɛ̀, sepóɛɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ nì ɓě sɔ̃ kɔ̃ún dyi poɛń, ɓɛ́ ɔ kéɛ dyé kɛbì ɓě ɖɛ̀ɓɛ̀ ɔ mú hwòɖǒɛ̀-ɖé-hwɛ̀-kà ní.

⁴ Ɓě mɛ sí Bounɓo mɔ̀à ɓěɛ̀ Gèɖèpɔ́ɔ̀ kɛɛ kíɖíí, ɓɛ́ ɓě ké ɔ dyi fɛ̃̀ìn. Ɓě mɛ kpɔ̃ ɔ gma ɓěɔ̀ dyi. Ɓě mɛ ɓiè Bounɓoɔ̀, ɓɛ́ ɓě ké ɓó ɔ gboi kpɔ̃ kóɖó-kóɖó.

⁵ Kɛɛ ɓě mɛ ɖáɓá kpáá-ɖɛ̀-cɛ̃-nyɔ̀ɔ̀ mɔɔ dya-nyɔ̀ɔ̀, sepóɛɖé ɔ ɖǎa ɓě tɛ̀mɛ̀ìn, ɓɛ́ ɓě ké Bounɓo mɔ̀à ɓěɛ̀ Gèɖèpɔ́ɔ̀ mɔ̀ nyɔ gbǎà ma kà ɓě ɖé Íjè-ɓòɖò kɔ̃̀ kɔ̃ ɓě mɔ̀ ma kà gǐìɛɛ gbo vɔ̃. Ɔ ɖǎa nyu ɓɛ́ ɓě ké hwìè kɔ̃̀ xwíníín ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ cɛ̃à ɓɛ́ ɓě kéà mú nàa xwíníín sɔ̀. Kǎà ɓě mɛ zà ɖɛ gbàɔ̀ ɖé ɓě hwìɛ̀.

⁶ “Ɔ jǔ ké ɓěɛ̀ nyɔ ɖòɛ̀ ɖíí-gàà ɓɛ́ ɔ kèɔ̀ kè wóɖó ɖɛ̌ǐn nyɛ mɔɔ ɔ dyú-gàà mɔɔ ɔ dyú-màà mɔɔ ɔ gmàà ɓɛ́ ɔ ɖɛ̀ɓɛ̀ múɛ mɔɔ ɔ ɓǎto ɓɛ́ ɔ dè hwòɖǒ kɔ̃ɛɛ dyi ɔ pɛ́í po, ké ɔ dyiɛ ɔ gbo cɛ̃ ɓá gèɖèpɔ́ɔ̀ ɓě ɓɛ́ ɓě kè ɓě ɓǎ nììn ɓǎ ɓěɔ̀ séè ɓiè ɖòɛɛ jè dyí, ké ɔ dyi níiń ‘À mu, ɓɛ́ à ké gèɖèpɔ́ɔ̀ kà kò ɖò ɓě ɓièo’ ní,

⁷ kɛbì ɔ mɛ mɔ̀ nyɔ ɓě ɓɛ́ wa xwɛ̃́ìn ɓě bũ̌in nyɛɛ gèɖèpɔ́ɔ̀ ɓě, mɔɔ kɛbì ɔ mɛ mɔ̀ nyɔ ɓě ɓɛ́ wa tɔmɔìn ɓě bũ̌in nyɛɛ gèɖèpɔ́ɔ̀ ɓěɛɛ, kɛbì ɔ mɛ mɔ̀ sɔ̀ ɓóɖó-kpàà máná ɖò gbo, kéɛ máná tɔ̀ɔ̀ gbo nyiniɛɛ,

⁸ ɔ ní wɔ̃́ìn nyɔ poà ɔ pɛ́íɛɛ gbo, mɔɔ ké ɔ mɛ ɓɔ́ ɔ ɖùǔ gbo tòɛ̀, mɔɔ ké ɔ mɛ ɓɔ́ ɔ wìì ɖò kɔ̃ ɓéɖéɛ, mɔɔ ké ɔ mɛ ɓɔ́ ɔ póɛ̀n.

⁹ Kɛɛ ɓě mɛ ɖáɓá nyɔɔ̀. Nyɔ ɓɛ́ ɔ poà pɛ́í kɛɛ mɔ̀ nyɔ mɛ po nyɔɔ̀ sɔ̃ dya kĩ́ín. Ɔ ɖǎ ná nìǐn, nyɔ séín ɓěɔ̀ mɛ kpá ɔ gbo, ɓɛ́ wa ké ɔ ɖáɓá.

¹⁰ Ɓě mɛ taɓaìn ɔ sɔ́ɔ́-kpò dyi, ɓɛ́ ɔ ké mɛ́, sepóɛɖé ɔ mɔ́ ɓɛ́ ɔ ké ɓě Bounɓo mɔ̀à ɓěɛ̀ Gèɖèpɔ́ɔ̀ mɔ̀ nyɔ zà ma kà ɓě ɖé Íjè-ɓòɖò kɔ̃̀ kɔ̃ ɓě mɔ̀ ma kà gǐìɛɛ bũ̌ zà.

¹¹ Ɓě dyiɛ náa nyu ní, nìí, Éézùɖùɛ̀-nyɔ̀ tɔ̀ɔ̀ séín ɓěɔ̀ muɛ wɔ̃́ùn, ɓɛ́ wa ké fã̀àǔn kpá, ké wa se ɖɛ gbà nìà kɛ ɖé ɓě hwìɛ̀ nyuɛ́ mu ɖe.

¹² “Ti ɓɛ́ ɓě mu hwɔɖɔ ɓě ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ muà ɓě nyíìn nyɛɛ mú cĩ́ɛń nììn, ké ɓě dyiɛ wɔ̃́

¹³ kà hwòɖǒ-kɔ̃in-nyìnììn-gàà ɓě ɖò nì ɓóɖóɔ̀ hwɔɖɔ ɖò múɛɛ ɖǎ nyɔ ɓě hwìǐ zàìn, ké wa nì gèɖèpɔ́ɔ̀ kà kò ɖò ɓě ɓɛ́ ɓě séè ɓiè ɖòɛɛ ɓièɛ̌n nyɛɛ ní,

¹⁴ nìí, ɓě mɛ ɖe ɖɛ ɓě wɔ̃́à náa jè múin nɔ̀mɔ̀ dyíin. Ɔ jǔ ké ɔ dyi jǎà jǔ jɛ́ɛ́ kà ɓɛ́ wa ɖǎ ɖɛ ɓɛ́ ɔ nyàìn kà Gèɖèpɔ́ɔ̀ dyiɛɛ nyu ɖé ɓě hwìɛ̀ kɛɛ ní,

¹⁵ nìí, ɓě mɛ ɖáɓá ɖɛ séín cĩ́ ɖé hwɔɖɔɔ̀ múɛɛ gàsíà dyí. Ɓě mɛ ɖáɓá nyɔ ɓě cĩ́ ɖéɛ ɔ kè waà nyúà-ɖɛ̀ ɓěɔ̀.

¹⁶ Ɔ ɖǎ ná nìǐn, ɓě mɛ poìn ɖɛ séín nì hwɔɖɔɔ̀ múɛɛ dyí ɖé hwɔɖɔɔ̀ píé hwòɖǒǔn, ɓɛ́ ɓě ké hwɔɖɔɔ̀ kè ɖɛ séín nìɛ̀ múɛɛ fɔ̃, ɓɛ́ ɔ ké fɔ̃ɔ-sàǎ-zàìn-ɖɛ̀ jǔ ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ bìì. Hwɔɖɔɔ̀ mɛ mɔ̀ hwùɖùǎ kánáá pū, ké wa mɛ ɓɔ́ɔ poɛ ɖe fɔɔ.

¹⁷ Ɓě ní ɖú ɖɛ séín ɓě ɓɛ́ ɓě kɔ̃̀ ɓě kéà mú gbɔɔ̀ kɛɛ ɖò dyí, ké Bounɓoɔ̀ dyoɖo-hwòɖò ku wɔ̃ɔ̀ mu ɓě kɔ̃ sɔ̀ùn, ké ɔ mu ɓě wìì kɔ̃ ɓéɖéìn, ɓɛ́ ɔ ké ɓě jĩ́á-jè dyí nyu. Ɔ muɛ nyuùn ɓɛ́ ɓě ké dúún zaìn, ɓɛ́ ɓě ké dyí vò kà ɔ ɖǎà ɓě ɓǎ nììn ɓǎ ɓěɔ̀ nyɛ́nɛ́ín ɖáìn nyɛ.

¹⁸ Ɔ mu ná nììn, ɔ jǔ ké ɓě dyi Bounɓo mɔ̀à ɓěɛ̀ Gèɖèpɔ́ɔ̀ kɛɛ wuɖuɔ̀ ɖùǔ gbo tò, ké ɓě dyi gma ɓě ɓɛ́ ḿ nìà zɛ̃̌ɛ̀ ɓě gbo cɛ̃iń nyɛɛ dyi kpɔ̃, ké ɓě dyi ɖɛ dè ɔ hwìɖǐiɛɛ nyu ní.