Dìtɔ̀wáɖánámɛ̀ 12 - Ɓǎsɔ́ɔ̀ Báɓòɔ̀

Pá dyúáɖò kɔ̃̀ mú wa ké ɓièìn nyɛ

¹ “Kà ɓě mu ɖé ɓóɖóɔ̀ kɔ̃ cĩ́ìn nyɛɛ, gma ɓě ɓɛ́ ɓě ké dyi kpɔ̃ kóɖó-kóɖó ɖé ɓóɖó ɓɛ́ Bounɓo mɔ̀à ɓě ɓǎ nììn ɓǎ ɓěɛ̀ Gèɖèpɔ́ɔ̀ kɛɛ ɖǎà ɓě nyí ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛ múɛɛ kɛà kɛ̀.

² Ɖé ɓóɖó ɓɛ́ ɓě nìà dyí ɖúɛń muɛń nyɛ kɔ̃ɛɛ, ɓě mɛ gbaà dà séín ɓɛ́ ɓóɖóɔ̀ nyɔ ɓěɔ̀ ɓièìn kà waà gèɖèpɔ́ɔ̀ ɓěɔ̀ ɖé toɖo vɛ̀nɛ̀ ɓěɔ̀ dya kè ɖé toɖo-dyù ɓěɔ̀ dya ɔ kè ɖé cu gùsùù ɓěɔ̀ xwíɖíiɛɛ dyi.

³ Ɓě mɛ wáɖá waà sáa-kɔ̃-zàìn-gbàà ɓěɔ̀, ɓɛ́ ɓě ké ɓiè-sɔ̀ɔ̌-kpò ɓě ɓɛ́ wa nyànàìn dyiɛɛ dyi wàìn, ɓɛ́ ɓě ké cu-kpóɖó ɓě mɔ̀à waà gèɖèpɔ́ɔ̀-màà kɔ̃̀ nyɛ́nɛ́ mɔ̀à Àséwàɖà kɛɛ hwɔìn-ɖɛ̀ ɓě ɓɛ́ wa nyànàìn dyiɛɛ fɔ̃, ɓɛ́ ɓě ké waà kũùn-kpò tɔ̀ɔ̀ ɓěɔ̀ dyi cɛ̃ìn, ɓɛ́ ɓě ké waà gèɖèpɔ́ɔ̀ ɓěɔ̀ nyɛ́nɛ́ ɓěɔ̀ ɓó pá ɓěɔ̀ mú dyi sámá.

⁴ “Ɓě ní ɓiè Bounɓo mɔ̀à ɓěɛ̀ Gèɖèpɔ́ɔ̀ kɛ kà nyɔ ɓěɔ̀ nyuà waà gèɖèpɔ́ɔ̀ ɓěɔ̀ ɓièɛ̀ kɛ.

⁵ Kɛɛ ɖé ɓóɖóɔ̀ múɛɛ, Bounɓoɔ̀ mu pá ɖò ɖé ɓěɛ̀ xwéɖé-dù séín ɓěɔ̀ hwìɛ̀ gãùn, ɓɛ́ ɖé ké ɔ cĩ́-naín jǔ, ɓɛ́ ɓě ké ɖé ɔ ɓièìn.

⁶ Ké ɖéɛ̀ ɓě mɛ tòìn ɓěɛ̀ fɔ̃ɔ-sàǎ-zàìn-ɖɛ̀ ɓěɔ̀ kè ɓěɛ̀ sáa-zàìn-ɖɛ̀ ɓě ɓá wuɖu-ɖi-ɖi jè dyíɛ kè ɓěɛ̀ sáa-zàìn-ɖɛ̀ tɔ̀ɔ̀ ɓěɔ̀ kè ɓěɛ̀ ɓàɖàìn-bùè ɓěɔ̀ kè ɓěɛ̀ hwòɖǒ-wáɖáá-nyìǐ-ɖɛ̀ ɓěɔ̀ kè ɓěɛ̀ nyíí-ɖɛ̀ tɔ̀ɔ̀ ɓěɔ̀ ɔ kè ɓěɛ̀ ɓìɖǐ kè ɓěɛ̀ ɓáɖáá kè ɓěɛ̀ wiɖi ɓěɔ̀ nyíɔ́-dyù ɓěɔ̀.

⁷ Ké ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ dyúa, ɓó ɓě kè ɓěɛ̀ gbǒ-xwíníín-nyɔ̀ ɓěɔ̀ mɛ ɖììn ɖɛ, ɓɛ́ ɓě ké ɓěɛ̀ nyuu-ɖɛ̀ séín múàǔn dyi kpáìn, sepóɛɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ ɖǎ ɓě mana kɔ̃ po jè.

⁸ “Ti ɓɛ́ tiɔ̀ mu ɓó nyìnììn nyɛɛ, ɓě ní nyuɛ kà à nìà zɛ̃̌ɛ̀ nyuɛń nyɛ. Ɔ mɔ̀ nyɔǔn séín nì ɖɛ sɛ́ɖɛ́ìn dyí ɖé wa mìɔùn dyéɖéín nyɛɛ nyuɛń,

⁹ sepóɛɖé ɓě séè ɖé ɓóɖó kɔ̃̀ kɔ̃ ɓě kéà gìɖìǐ mú cĩ́, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔ, ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ nìà ɓě nyíɛń nyɛɛ kɔ̃ nyini ke.

¹⁰ Kɛɛ kà ɓě muà Jɔ́nì-nìɔ̀ péɖéìn, ɓɛ́ ɓě kéà ɓóɖó ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ nyíà ɓě, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ kɔ̃ cĩ́ìn nyɛɛ, ɔ jǔ ké ɔ ɖǎ ɓěɛ̀ mú-nyɛ́-nyɔ̀ séín ɓěɔ̀ ɓě xwíɖíi po, ké ɓě ɖǎ gìɖìǐ ɓéɖé ní,

¹¹ nìí, pá ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ muà gãùn, ɓɛ́ ɓě kéà ɖé ɔ ɓièìn nyɛɛ mú, ɖéɛ̀ ɓě mɛ dyà ɖɛ séín ɓě kɔ̃̀ jè ḿ cɛ̃à ɓě gboɛ. Ɔ hwɔìn kà ɓěɛ̀ fɔ̃ɔ-sàǎ-zàìn-ɖɛ̀ ɓěɔ̀ kè ɓěɛ̀ sáa-zàìn-ɖɛ̀ ɓě ɓá wuɖu-ɖi-ɖi jè dyíɛ kè ɓěɛ̀ sáa-zàìn-ɖɛ̀ tɔ̀ɔ̀ ɓěɔ̀ ɔ kè ɓěɛ̀ ɓàɖàìn-bùè ɓěɔ̀.

¹² Ké ɓě kè ɓěɛ̀ dyú-gàà ɓěɔ̀ kè ɓěɛ̀ dyú-màà ɓěɔ̀ kè ɓěɛ̀ gbo-nì-gàà ɓěɔ̀ kè ɓěɛ̀ gbo-nì-màà ɓěɔ̀ ɔ kè Ɖíìváà-nyɔ̀ ɓě muà ɖé ɓěɛ̀ hwɔɖɔ ɓěɔ̀ mú cĩ́ìn, sepóɛɖé wa se pá ɖò kɔ̃̀ jèɛɛ mɛ kpá múàǔn ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ dyúa.

¹³ Ɓěǐn ɖá ɓɛ́ ɓě ké ɓěɛ̀ fɔ̃ɔ-sàǎ-zàìn-ɖɛ̀ ɓěɔ̀ dà séín fɔ̃̀ìn pū.

¹⁴ Kɛɛ ɓě mɛ fɔ̃̀ìn ɓěɛ̀ fɔ̃ɔ-sàǎ-zàìn-ɖɛ̀ ɓěɔ̀ ɖé pá ɓɛ́ Bounɓoɔ̀ muà gãùn ɖé ɓěɛ̀ xwéɖé-dù ɓěɔ̀ ɖò hwìɛ̀ kɛɛ mú, ké ɖéɛ̀ ɓě mɛ nyùìn ɖɛ séín ḿ cɛ̃à ɓě gboɛ.

¹⁵ “Kɛɛ wɛ̃́ɛ́ kɛɛ, ɓě mɛ ɖáɓáìn ɓěɛ̀ ɖii-sùàɖɛ̀ ɓěɔ̀ dà séín ɖé ɓěɛ̀ hwɔɖɔ ɓěɔ̀ mú. Ɓě mɛ ɖi suaɖɛ̀ jĩ̀ kà ɓěɛ̀ hwòɖǒ mɔ́ ɖiɛ dyi kà Bounɓo mɔ̀à ɓěɛ̀ Gèɖèpɔ́ɔ̀ kɛɛ nyu ɓě mana kɔ̃ poɛ kɛ. Ɓěɛ̀ nyɔ ɓě hwɛ̀ múɛ kè ɓěɛ̀ nyɔ ɓě se mú hwɛ̀ɛ ɓɛ́ìn wa ɖiɛ kà nyɔ ɖià xwáɖá-xwíɖíi-nìmìì ɓě mɔ̀à déɖé kè xwɛɛ.

¹⁶ Kɛɛ ɓě ní ɖi waà nyɔmɔɔ̀. Ɓě mɛ wáɖá waà nyɔmɔɔ̀ ɓíɖíi dyi kà nyɔ wáɖáà ní dyiɛ.

¹⁷ Ké ɓě ní ɖììn ɖɛ séín ɓě ɓɛ́ ɓě nyíà Bounɓoɔ̀ kɛɛ ɖò ɖé ɓěɛ̀ hwɔɖɔ ɓě cĩ́à múɛɛ mú. Ɖɛ ɓěɔ̀ mɔ̀ ɓěɛ̀ ɓàɖàìn-bùè ɓě ɓá ɓěɛ̀ ɖii-ɖɛ̀ ɓěɔ̀ kè ɓěɛ̀ wã́ìn ɓěɔ̀ kè ɓěɛ̀ ɔ́ɖè-cànà ɓěɔ̀ jè dyíɛ ɔ kè ɓěɛ̀ ɓìɖǐ kè ɓěɛ̀ ɓáɖáá kè ɓěɛ̀ wiɖi ɓěɔ̀ nyíɔ́-dyù ɓěɔ̀ kè ɓěɛ̀ sáa-zàìn-ɖɛ̀ ɓě ɓá wuɖu-ɖi-ɖi jè dyíɛ kè ɓěɛ̀ hwòɖǒ-wáɖáá-nyìǐ-ɖɛ̀ ɓěɔ̀ ɔ kè ɓěɛ̀ nyíí-ɖɛ̀ tɔ̀ɔ̀ ɓěɔ̀.

¹⁸ Kɛɛ ɓě mɛ ɖììn wa ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ dyúa, ɖé pá ɔ muà gãùn wɛ̃ɛ mú. Ɓě kè ɓěɛ̀ dyú-gàà ɓěɔ̀ kè ɓěɛ̀ dyú-màà ɓěɔ̀ kè ɓěɛ̀ gbo-nì-gàà ɓěɔ̀ kè ɓěɛ̀ gbo-nì-màà ɓěɔ̀ ɔ kè Ɖíìváà-nyɔ̀ ɓě cĩ́à ɓěɛ̀ hwɔɖɔ ɓěɔ̀ múɛɛ mɛ ɖìɛ̀n ɓó pá dyúáɖòɔ̀ mú. Ké ɓě mɛ kpá múàǔn ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ dyúa, ɓó ɓěɛ̀ nyuu-ɖɛ̀ séín ɓěɔ̀ jè.

¹⁹ Ké kà ɓě mu ɓěɛ̀ ɓóɖóɔ̀ kɔ̃ cĩ́ìn nyɛɛ, ɓě mɛ ma mú, Ɖíìváà-nyɔ̀ ɓěɔ̀ jè ní kɔ̃̀ ɖà ɓě hwìɖǐi sɔ̀.

²⁰ “Ti ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ ɖǎ ɓěɛ̀ ɓóɖóɔ̀ dyí ɓúáìn kà ɔ nyuà ɓě nyɛ́nɛ́ín ɖáìn nyɛ, ké ɓě dyi suaɖɛ̀ mɔ́, ké ɓě dyiɛ cɛ̃, ké ɓě dyi níiń, ‘À mɔ́ suaɖɛ̀ ɖiɛ dyio’ ní, nìí, ɓě mɛ ɖi suaɖɛ̀ jĩ̀ kà ɓěɛ̀ hwòɖǒ mɔ́ ɖiɛ dyiɛ.

²¹ Ɔ jǔ ké pá ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ gãà, ɓɛ́ ɓě kéà ɖé ɔ ɓièìn nyɛɛ dyi gbo tɔ̀mɔ̀ ɓó ɓě bìì ní, nìí, ɓě ɓɛ́ìn ɓěɛ̀ ɓìɖǐ ɓě mɔɔ ɓěɛ̀ ɓáɖáá ɓě mɔɔ ɓěɛ̀ wiɖi ɓě ɓɛ́ Bounɓoɔ̀ ɖǎà ɓě nyíɛɛ ɖò ɖáɓáa, ɓɛ́ ɓě ké ɔ jĩ̀ kà ɓěɛ̀ hwòɖǒ mɔ́ɛɛ ɖi ɖé ɓěɛ̀ hwɔɖɔ ɓěɔ̀ mú kà ḿ nyuà ɓě gbo cɛ̃ɛ kɛ.

²² Ɓěɛ̀ nyɔ ɓě hwɛ̀ múɛ kè ɓěɛ̀ nyɔ ɓě se mú hwɛ̀ɛ ɓɛ́ìn suaɖɛ̀ɔ̀ ɖiɛ kà nyɔ ɖià xwáɖá-xwíɖíi-nìmìì ɓě mɔ̀à déɖé kè xwɛɛ.

²³ Kɛɛ ɓě ní ɖi suaɖɛ̀ɔ̀ nyɔmɔɔ̀, sepóɛɖé fɛ̀ɛ̀ nì ɖé nyɔmɔɔ̀ mú. Ɔ jèɛɛ, ɓě mɛ ɓɔ́ suaɖɛ̀ sè nyɔmɔɔ múɛɛ ɖiɛ.

²⁴ Ɓě mɛ ɓɔ́ suaɖɛ̀-nyɔ̀mɔ̀ɔ̀ ɖò ɖiɛ. Ɓě mɛ púè nyɔmɔɔ̀ ɓíɖíi dyi kà nyɔ púè kà ní dyiɛ.

²⁵ Ɓě mɛ ɓɔ́ suaɖɛ̀-nyɔ̀mɔ̀ɔ̀ ɖò ɖiɛ. Ɓě dyi ɖɛ dè Bounɓoɔ̀ hwìɖǐiɛɛ nyuín, nìí, mana mu ɓě kè ɓěɛ̀ xwíníín-dyù ɓěɔ̀ kɔ̃ nììn.

²⁶ Kɛɛ ɖɛ ɓě ɓɛ́ ɓě ɖǎ wáká po ɓó Bounɓoɔ̀ bììɛ kè ɓěɛ̀ sáa-zàìn-ɖɛ̀ ɓě ɓá wuɖu-ɖi-ɖi jè dyíɛɛ, ɓě mɛ kpa wa ɖé pá ɓɛ́ Bounɓoɔ̀ gãà kɛɛ mú.

²⁷ Ké ɓě mɛ fɔ̃̀ìn ɓěɛ̀ fɔ̃ɔ-sàǎ-zàìn-ɖɛ̀ ɓěɔ̀ suaɖɛ̀ ɓěɔ̀ kè waà nyɔmɔɔ̀ ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ sáa-kɔ̃-zàìn-gbààɔ̀ kɔ̃. Kɛɛ ɓě mɛ púè ɓěɛ̀ sáa-zàìn-ɖɛ̀ tɔ̀ɔ̀ ɓěɔ̀ nyɔmɔɔ̀ ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ sáa-kɔ̃-zàìn-gbààɔ̀ gbɔí, ké ɓě mɛ ɖi waà suaɖɛ̀ ɓěɔ̀.

²⁸ Ɓě mɛ kpɔ̃ gma séín ɓě ɓɛ́ ḿ nìà ɓě gbo cɛ̃iń nyɛɛ dyi kóɖó-kóɖó. Ɔ dyi ná nìǐn, nìí, mana mu ɓě kè ɓěɛ̀ xwíníín-dyù ɓěɔ̀ kɔ̃ nììn kánáá pū, sepóɛɖé ɓě nyu ɖɛ mɔ̀ ɖɛ nɔ̀mɔ̀ dyíin ɓɛ́ ɔ dè Bounɓo mɔ̀à ɓěɛ̀ Gèɖèpɔ́ɔ̀ kɛɛ hwòɖǒ dyiɛɛ jè.

Ná-wùɖù ɓá kũùn-kpò ɓiè jè dyíɛ

²⁹ “Ti ɓě muà ɓóɖóɔ̀ dyí ɖúɛ muùn wɛ̃ɛ, Bounɓo mɔ̀à ɓěɛ̀ Gèɖèpɔ́ɔ̀ kɛɛ mu ɓóɖóɔ̀ nyɔ ɓěɔ̀ mu gbɔɔ̀ùn ɓó ɓě dyúa, ké ɓě mu waà ɓóɖóɔ̀ dyí ɖúùn, ké ɓě muɛ kɔ̃ cĩ́ìn.

³⁰ Ké ti wa ɖǎ mú gbɔɔ̀ hwɛ̀ ɓó ɓě dyúa kɛɛ, ɓěǐn ɖá ɓɛ́ ɓě ké waà gèɖèpɔ́ɔ̀ ɓěɔ̀ ɓiè jè dyi diè, ɓɛ́ ɓě ké níiń, ‘Xwɛ̌ ɓóɖóɛ̀ nyɔ ɓěɔ̀ nyu waà gèɖèpɔ́ɔ̀ ɓěɔ̀ ɓièɛ̀ kɛ́? À mɔ́ ɓɛ́ à kéɛ náa nyu ɖekè.’ Ɓě dyiɛ náa nyuín, nìí, ɔ mu xwáɖá-gbǎ-mú jǔùn, ɓɛ́ ɔ ké ɓě kpɔ̃.

³¹ Ɓě ní ɓiè ná Bounɓo mɔ̀à ɓěɛ̀ Gèɖèpɔ́ɔ̀ kɛ kà ɓóɖóɔ̀ nyɔ ɓěɔ̀ ɓiè kà waà gèɖèpɔ́ɔ̀ ɓěɔ̀ kɛ, sepóɛɖé ɖé waà gèɖèpɔ́ɔ̀ ɓěɔ̀ ɓiè-ɓièɔ̀ múɛɛ, wa nyu kpeɖe séín ɓɛ́ wa nyàìn Bounɓoɔ̀ dyiɛ, hwɛ̀ ḿ po níiń, wa po waà dyú ɓěɔ̀ dyéɖé, ɓɛ́ wa ké sáa-zàìn-ɖɛ̀ jǔ ɓó waà gèɖèpɔ́ɔ̀ ɓěɔ̀ bìì.

³² “Ɓě mɛ kpɔ̃ gma séín ɓě ɓɛ́ ḿ ɖǎà ɓě gbo cɛ̃ɛ dyi kóɖó-kóɖó. Ɓě mɛ ɓɔ́ wa kɔ̃ poɛ, mɔɔ ké ɓě mɛ ɓɔ́ wa kɔ̃ zàà.