Dìtɔ̀wáɖánámɛ̀ 11 - Ɓǎsɔ́ɔ̀ Báɓòɔ̀

Bounɓoɔ̀ jè kpa kpé

¹ “Ɓě mɛ ɖɛ̀ɓɛ̀ Bounɓo mɔ̀à ɓěɛ̀ Gèɖèpɔ́ɔ̀ kɛɛ mú, ɓɛ́ ɓě ké ɔ gma séín ɓěɔ̀ dyi kpɔ̃ tee.

² Ɔ mɛ nì ɓě hwìɖǐi ɓó zɛ̃̌ɛ̀ kà ɓěɛ̀ dyú ɓěɔ̀ mɔ̀ nyɔ se ma kà Bounɓo mɔ̀à ɓěɛ̀ Gèɖèpɔ́ɔ̀ kɛɛ nyɔ-kpeɖe-zà-zàɔ̀ dyéɛ̀, kɛɛ ɓě mɔ̀ nyɔ dyéɛ ma kà kɛ̀. Ɓě mɔ̀ nyɔ dyé ma kà Bounɓoɔ̀ kpé vɛ̀nɛ̀ɔ̀ kè ɖɛ ɓɛ́ ɔ gana-sɔ̃̀ɔ̀ nyuɛ

³ kè zɛ̃̀ìn-ɖɛ̀ ɓě ɔ nyu ma kà Íjè-kã̀ǎɔ̀ kè ɔ ɓóɖó gànáɔ̀ bũ̌ɛ̀.

⁴ Ké ɓě dyé ɖɛ Bounɓoɔ̀ nyu ma kà Íjè-sòjà ɓěɔ̀ kè waà sǒ ɓěɔ̀ ɔ kè waà hwíì-sǒ ɓěɔ̀ bũ̌ɛ. Ti wa nì ma ɓě kíɖíí kpáuń wɛ̃ɛ, Bounɓoɔ̀ nyuɛ ké Dyóó Zĩ-zãɔ̀ zi ma wa kɔ̃in, ké wa gbɔɔ̀ ma mú nyɛ̀nɛ̀ɛ̀. Kǎà ɔ dyà ma wa gǎ-dyé-dyé kɔ̃, ké wa se kpé ɖò ɓéɖé ɖe ɓó zɛ̃̌ɛ̀.

⁵ Ké ɓó kɔ̃in ɖeɛɛ, hwɛ̀ ɓɛ́ ɓě kéà pá nìà kɛ mú nyiniɛɛ, ɓě dyé ɖɛ ɓě ɓɛ́ Bounɓoɔ̀ nyu ma kà ɓě bìì ɖé gbǎùn-fúɖúáɔ̀ kɔ̃ɛɛ ní.

⁶ Ké ɓě dyé ɖɛ kpáà Ɛ̀ɖíà mɔ̀à Wuɖuɓíínɛ̀ xwíníín-dyù ɓěɔ̀ ɖò kɛɛ dyú-gàà sɔ̃́ ɓě mɔ̀à Dáfàùn kè Àbíwàɖàùn kɛɛ gboɛ. Ɓóɖó-kpàɔ̀ ɓáà ma wɔ̃, ké ɔ mana ma wa kè waà gbǒ-xwíníín-nyɔ̀ ɓěɔ̀ kè waà jàɖàìn-gbò ɓěɔ̀ ɔ kè nyɔ séín sí ma wa kíɖííɛɛ ɓó ɓě mɔ̀ Éézùɖùɛ̀-nyɔ̀ séín ɓěɛ̀ dyéɖé waí.

⁷ Ɓě mìɔùn kpa ma dyéɖé, ké ɓě dyé ma ɖɛ vɛ̀nɛ̀-vɛ̀nɛ̀ séín ɓɛ́ Bounɓoɔ̀ nyu ma kà kɛ.

Mana ɓě nì ɖé nyɛ́nɛ́ín-ɖáìn-ɓòɖòɔ̀ múɛ

⁸ “Ɔ jèɛɛ, ɓě mɛ kpɔ̃ gma séín ɓě ɓɛ́ ḿ nìà zɛ̃̌ɛ̀ ɓě gbo cɛ̃iń nyɛɛ dyi. Ɓě dyiɛ náa nyuín, nìí, ɓě mu kpé ɓéɖéìn, ɓɛ́ ɓě ké ɓóɖó kɔ̃̀ jè ɓě nìà Jɔ́nì-nìɔ̀ péɖéɛń nyɛɛ kɔ̃ mu, ɓɛ́ ɓě kéɛ dyí ɖú, ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ.

⁹ Ké ɓě mu hwèɖèìn ɖé bãa-ɓòɖò ɓɛ́ Bounɓoɔ̀ ɖáìn zɔ̃̌ɔ̀ kà ɓě ɓǎ nììn ɓǎ ɓěɔ̀ kè waà xwíníín-dyù ɓěɔ̀ nyɛ́nɛ́ín nyɛɛ kɔ̃.

¹⁰ Ɓóɖó ɓě nìà mú muɛń, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ se nì kà Íjè-ɓòɖò ɓɛ́ ɓě cĩ́ ma kà kɔ̃ɛɛ nìà kɛ. Ɓě dyi ma ɖé Íjè-ɓòɖòɔ̀ kɔ̃ geɖe nyu ní, nìí, ɓě nyu ma kũ̀à mìɔ ɓó ɓěɛ̀ ɓáá-ɖɛ̀ ɓěɔ̀ ní gbo hwùɖǔìn jè kà nyɔ hwùɖǔìn kà ɓáá-ɖɛ̀ ní gbo ɖé ɓáá-ɖɛ̀-pà ɖò múɛ.

¹¹ Kɛɛ ɓóɖó kɔ̃̀ jè ɓɛ́ ɓě nìà Jɔ́nì-nìɔ̀ péɖéɛń, ɓɛ́ ɓě kéà dyí ɖú, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ mɔ̀ toɖo kè bɔɔ-ɓòɖò. Ɔ mɔ̀ ní-mú-ɖaɓa-ɓòɖò.

¹² Bounɓo mɔ̀à ɓěɛ̀ Gèɖèpɔ́ɔ̀ kɛɛ kɔ̃̀ ɖé ɓóɖó nìà kɛ jè gbo, ké ɔ gmɔ̀ɔ̀ dyí zɔ̃ kè zɔ̃ xwíníín.

¹³ “Ɔ jèɛɛ, ɓě mɛ kpɔ̃ gma ɓě ɓɛ́ ḿ nìà zɛ̃̌ɛ̀ ɓě gbo cɛ̃iń nyɛɛ dyi. Ɓě mɛ ɖɛ̀ɓɛ̀ Bounɓo mɔ̀à ɓěɛ̀ Gèɖèpɔ́ɔ̀ kɛɛ mú, ɓɛ́ ɓě ké ɔ ɓiè hwòɖǒɛ̀-ɖé-hwɛ̀-kà.

¹⁴ Ɔ jǔ ké ɓě dyiɛ náa nyuín, nìí, ɔ mu ní tòùn ɓó ɓěɛ̀ ɖɛ-ɓá-tìǐn kè ɓó ɓěɛ̀ ɓáá-ɖɛ̀ ɓěɔ̀ tòɖò-tìǐn, ɓɛ́ ɓě ké ɖii-ɖɛ̀ kè wã́ìn ɔ kè ɔ́ɖè-cànà ɓéɖé.

¹⁵ Ké pìǐ ɓɛ̀ɖɛ̀ɛ̀-ɓɛ̀ɖɛ̀ɛ̀ mu ɖé ɓěɛ̀ nyúà-ɖɛ̀ dyi-ɖi-naín ɓěɔ̀ nììn ɓó ɓěɛ̀ nyúà-ɖɛ̀ ɓěɔ̀ bìì. Ké ɓě mu ɖɛ ɖiìn, ɓɛ́ ɓěɛ̀ hwòɖǒ ké dyi dè.

¹⁶ Kɛɛ nyɔ ɖò mɛ ɓɔ́ ɓě zùɖùɛ̀n, ɓɛ́ ɓě ké Bounɓoɔ̀ bũ̌ sɔ̀, ɓɛ́ ɓě ké gèɖèpɔ́ɔ̀ kà kò ɖò ɓě dyúa dú hwuɖu taɓa, ɓɛ́ ɓě ké wa ɓiè.

¹⁷ Ɓě dyiɛ náa nyuín, nìí, Bounɓoɔ̀ mu ɓě dyoɖoún kpáìn, ké ní se bãa-ɓòɖò ɓɛ́ Bounɓoɔ̀ nìà ɓě nyíɛń nyɛɛ kɔ̃ ɖaɓaá mu, ké ɓóɖóɔ̀ mu kɔ̃in dyɛìn, ké ɓáá-ɖɛ̀ ɖò seɛ kɔ̃ mɛɛ́ mu, ké ɓě mu ɓóɖóɔ̀ kɔ̃ dyi mɛ́ìn.

¹⁸ “Ɔ jèɛɛ, gma ɓě ḿ nìà ɓě gbo cɛ̃́iń nyɛɛ mɛ nì ɖé ɓě hwòɖǒ bũ̌, ɓɛ́ ɓě ké wa jè hwìɖǐi poìn. Ɓě po wa sɔ̃, ɓɛ́ ɓě ké wa ɓó ɓěɛ̀ dyúa-kpà ɓěɔ̀ kɔ̃ jìnììn, ɓɛ́ wa ké ɓěɛ̀ ɖɛ-hwìɖǐi-dyàìn-ɖɛ̀ jǔ.

¹⁹ Ké ɓě mɛ tɛ̀mɛ̀ìn ɓěɛ̀ dyú ɓěɔ̀ gma ɓěɔ̀. Ɓě mɛ dèìn wa jè dɔ́ɔ́ múin, ti ɓě mu ɖé taún nììn nyɛ, kè ti ɓě mu hwìè xwíníín nàǔn nììn nyɛ, kè ti ɓě mu dyi pɛ̃́ìn nyɛ, ɔ kè ti ɓě mu dyí sɔ̀ùn wɛ̃.

²⁰ Ké ɓě mɛ céè gma ɓěɔ̀ ɓó ɓěɛ̀ gbǒ-wɔ̃̀ ɓěɔ̀ xwìɖì-tɛ̃́ín ɓěɔ̀ kè ɓěɛ̀ gmɔ-wɔ̃̀ ɓěɔ̀ kɔ̃ dyi.

²¹ Ɔ dyi ná nìǐn, ɓě kè ɓěɛ̀ dyú ɓěɔ̀ mu hwèɖèìn ɖé ɓóɖó ɓɛ́ Bounɓoɔ̀ ɖáìn zɔ̃̌ɔ̀ kà ɓě ɓǎ nììn ɓǎ ɓěɔ̀ nyɛ́nɛ́ín nyɛɛ kɔ̃ kà ɓóɖó-kpàà mu dyɔɔ̀ xwíɖíi nììn keɛ.

²² “Ɓě mɛ kpɔ̃ gma séín ɓě ḿ nìà ɓě gbo cɛ̃iń ɓɛ́ ɓě kéà kíɖíí síɛɛ dyi kóɖó-kóɖó. Gma ɓěɔ̀ mɔ̀, ɓě mɛ ɖɛ̀ɓɛ̀ Bounɓo mɔ̀à ɓěɛ̀ Gèɖèpɔ́ɔ̀ kɛɛ mú, ɓɛ́ ɓě ké ɔ kpeɖe séín ɓěɔ̀ kíɖíí sí, ɓɛ́ ɓě ké ɓó ɔ gboi kpɔ̃ kóɖó-kóɖó.

²³ Ɓě dyiɛ náa nyu ní, nìí, Bounɓoɔ̀ mu ɓóɖó-dù vɛ̀nɛ̀ séín kɔ̃̀ kpé ɓúá dyí ɓɛ́ wa zi ɓě dyíɛɛ ɓó ɓě dyúa dyi kúmúùn, ké ɓě mu wa dyí ɖúùn.

²⁴ Pá séín ɓɛ́ ɓě mu kɔ̃in nàùn wɛ̃ɛ mu ɓěɛ̀ kɔ̃̀ɔ̀-ɖɛ̀ jǔùn. Kà ɓěɛ̀ ɓóɖóɔ̀ mu ɓɛ́ìn nyɛɛ mɔ̀ sɔ̀ìn ɖé gbǎùn-fúɖúá nìà ɖé ɓóɖóɔ̀ zɔ̃̌in nyɛɛ gbo, nyinià ɖé Ɖɛ́ɓèɖɔ́ùn-tòɖò ɓě nìà ɖé ɓóɖóɔ̀ xwía kɛɛ gboɛ kè sɔ̀ìn ɖé Dyùféɖétì-nì nìà ɖé dyóɖó-xwáɖáún-wóɖóìn-naínɔ̀ kɛɛ wĩín, muà ɖé Mɛ́ɖɛ̀tɔ̀wéɖénìà-dyòǒ nìà ɖé dyóɖó-dyi-kpáìn-naínɔ̀ kɛɛ wĩín nyɛ.

²⁵ Dà séín ɓě mu muùn ɖé ɓóɖóɔ̀ kɔ̃ɛɛ, Bounɓo mɔ̀à ɓěɛ̀ Gèɖèpɔ́ɔ̀ kɛɛ mu ɓěɛ̀ díɖí kè fã̀à nyɔ ɓěɔ̀ mú poùn kà ɔ nyuà cɛ̃ɛ kɛ, ké nyɔ ɖò se ɓě dyúa dyi nyànàà ɓɛ́ǐn mu.

²⁶ “Gmɔ̀ nɔ̄, ɓó zɛ̃̌ɛ̀ kɛɛ, ḿ nì ɓě mana kè gboò-wùɖù dyúa dyi pɛ̃́ǐn.

²⁷ Ɔ mu mana jǔùn, ɔ jǔ ké ɓě dyi Bounɓo mɔ̀à ɓěɛ̀ Gèɖèpɔ́ɔ̀ kɛɛ gma ɓě ɓɛ́ ḿ nìà zɛ̃̌ɛ̀ ɓě gbo cɛ̃iń nyɛɛ dyi kpɔ̃ ní.

²⁸ Kɛɛ ɔ mu gboò-wùɖù jǔùn, ɔ jǔ ké ɓě se Bounɓo mɔ̀à ɓěɛ̀ Gèɖèpɔ́ɔ̀ kɛɛ gma ɓě ɓɛ́ ḿ nìà ɓě gbo cɛ̃iń nyɛɛ dyi kpɔ̃, ké ɓě dyi gèɖèpɔ́ɔ̀ kà kò ɖò ɓě ɓɛ́ ɓě séè ɓiè ɖòɛɛ gbo gmɔ̀ìn, ké ɓě dyi wa ɓiè ní.

²⁹ Ti ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ mu ɓě ɓóɖó ɓɛ́ ɓě nìà mú muɛń ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ kɔ̃ kpaùn wɛ̃ɛ, ɓě mɛ cɛ̃ manaɔ̀ jè ɖé Gèwíɖízĩ̀ìn-tòɖòɔ̀ gbo, ké ɓě mɛ cɛ̃ gboò-wùɖùɔ̀ jè ɖé Éɓàò-tòɖòɔ̀ gbo.

³⁰ Toɖo sɔ̃́ ɓěɛ̀ nì ɖé Jɔ́nì-nìɔ̀ ɖeín, hwɔ ɖé Jɔ́nì-nìɔ̀ dyóɖó-dyi-kpáìn-naínɔ̀ dyí. Wa nì ɖé Kénà-nyɔ̀ ɓě cĩ́à ɖé Jɔ́nì-nìɔ̀ bɔɔ-kpàɔ̀ kɔ̃ɛɛ ɓóɖóɔ̀ mú. Wa nì ɖé Gíógàò-hwɔ̀ɖɔ̀ɔ̀ wĩín, hwɔ ɖé Mɔ́wɛ̀ɖɛ̀ɛ̀ cu vɛ̀nɛ̀ ɓěɔ̀ gbo dyí.

³¹ Ɓě mɛ péɖé Jɔ́nì-nìɔ̀, ɓɛ́ ɓě ké ɓóɖó ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ nìà ɓě nyíɛń nyɛɛ kɔ̃ mu, ɓɛ́ ɓě kéɛ dyí ɖú, ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ. Ké ti ɓě mu ɓóɖóɔ̀ dyí ɖúùn, ɓɛ́ ɓě kéɛ kɔ̃ cĩ́ɛɛ,

³² nìí, ɓě mɛ kpɔ̃ gma séín ɓě ɓɛ́ ḿ nìà zɛ̃̌ɛ̀ ɓě nyíɛń nyɛɛ dyi kpɔ̃ kóɖó-kóɖó.