Dìtɔ̀wáɖánámɛ̀ 10 - Ɓǎsɔ́ɔ̀ Báɓòɔ̀

Gèɖèpɔ́ɔ̀ nyí Mózè gma ɓěɔ̀ ɖe

¹ “Ɓó tia ɓaɖaa, Bounɓoɔ̀ cɛ̃ɛ ma ḿ gbo, ké ɔ ɖá, ‘Wa sɔ́ɔ́-pĩ̀à sɔ̃́ bũ̌in kà ɔ kĩ́ín-kĩ́ín nììn ɓěɔ̀ nì ma kà kɛ, ɓɛ́ m̀ ké ɖé ḿ gbo toɖoɔ̀ dya dyi. Ké m̀ mɛ kɔ gbɔ̀ɖɔ̀ɔ̀ ɖò.

² Ké ní mu wuɖu ɓě nì ma kà sɔ́ɔ́-pĩ̀à kĩ́ín ɓě ɓɛ́ m̀ wàìn ma kà dyiɛ kɔ̃ɛɛ ɓó wa kɔ̃ céèìn ɖe, ké m̀ mɛ po ɖé wa gbɔ̀ɖɔ̀ɔ̀ mú.’

³ “Ɔ jèɛɛ, ḿ ɖú ma àkésìà-cù dyí, ké ḿ kɔɔ ma gbɔ̀ɖɔ̀ɔ̀ ɖò mú, ké ḿ wa ma sɔ́ɔ́-pĩ̀à sɔ̃́ bũ̌in kà nyɔ kĩ́ín ɓěɔ̀ nì ma kà kɛ. Ké ḿ mu ma ɖé toɖoɔ̀ dya. Ḿ kpa ma sɔ́ɔ́-pĩ̀à sɔ̃́ɔ̀ ní.

⁴ Ké Bounɓoɔ̀ céè ma gma ɓaɖa-bùè ɓěɔ̀ ɓó sɔ́ɔ́-pĩ̀à ɓěɔ̀ kɔ̃ kà ɔ nyu ma kà sɔ́ɔ́-pĩ̀à kĩ́ín-kĩ́ín ɓěɔ̀ nyuɛ kɛ. Wa mɔ̀ gma ɓě ɓɛ́ ɔ nyí ma kà ɓě sɔ̀ìn ɖé nyɛɔ̀ mú ti ɓɛ́ ɓě poìn kà ɓó toɖoɔ̀ xwíɖíi dyíɛ. Ké Bounɓoɔ̀ nyí ma ḿ sɔ́ɔ́-pĩ̀à ɓěɔ̀.

⁵ Hwɛ̀ ké ḿ sɔ̀ ma ɖé dyí, ké ḿ dyi ma ɖé toɖoɔ̀ ɓíɖíi. Ké ḿ po ma sɔ́ɔ́-pĩ̀à ɓěɔ̀ ɖé gbɔ̀ɖɔ̀ɔ̀ ɓɛ́ ḿ kɔ ma kà kɛɛ mú kà Bounɓoɔ̀ nyuà ḿ gbo cɛ̃ɛ kɛ, ké wa nìà ɖé gbɔ̀ɖɔ̀ɔ̀ mú keɛ̀.

⁶ “Sɔ̀ìn ɓóɛ gboɛɛ, à sɔ̀ ma ɓó Jáákàùn-nyɔ̀ ɓěɔ̀ ní-ɓì ɓěɔ̀ gbo, ké à mu ma ɖé Mòséwàɖà-pàɔ̀ mú. Ké Eɖóún mɛ́ìn ma ɖé Mòséwàɖà-pàɔ̀ mú, ké wa zàìn ma ɖé ɔ dyóɖóún. Ɔ dyú-gàà Ɛ̀ɖɛ̀ázà sè ma ɔ dúí, ké ɔ mɔ̀ ma sáa-zà-nyɔ̀ vɛ̀nɛ̀ɔ̀.

⁷ Ké sɔ̀ìn ɓóɛ gboɛɛ, à dyi ma ɖé pá ɖò mɔ̀ Gùgóɖà kɛɛ mú. Ké sɔ̀ìn ɖé Gùgóɖà-pàɔ̀ múɛɛ, à dyi ma ɖé pá ɖò mɔ̀ Jòbáfà kɛɛ mú. Ní-dyù ɓě vò ma ɖé páɔ̀ mú dyí.

⁸ Ɓó tia ɓaɖaa, Bounɓoɔ̀ po ma Ɖíìváà xwéɖé-dùɔ̀ wáká, ɓɛ́ wa ké Bounɓoɔ̀ gma-gbɔ̀ɖɔ̀ɔ̀ ɓéɖé-nyɔ̀ jǔ, kè ɓɛ́ wa ké ɓó ɔ dyúa dyi, ɓɛ́ wa ké ɔ kũ̀à nyu, ɔ kè ɓɛ́ wa ké nyɔǔn mana kɔ̃ po ɖé ɔ nyɛ́nɛ́ɔ̀ mú kà ɔ nìà ɓó zɛ̃̌ɛ̀ keɛ.

⁹ Ɔ jèɛɛ, Ɖíìváà xwéɖé-dùɔ̀ se ma ɓóɖóɔ̀ pá ɖò dyé, ɓɛ́ ɔ ké waà kɔ̃̀ɔ̀-ɖɛ̀ jǔ kà xwéɖé-dù tɔ̀ɔ̀ ɓěɔ̀ nìà kɛ, sepóɛɖé Bounɓoɔ̀ cɛ̃ɛ ma Ɖíìváà xwéɖé-dùɔ̀ gbo, ké ɔ ɖá, ‘Ɓě nììn kɔ̃̀ɔ̀-ɖɛ̀ mɔ̀ kpé ɓɛ́ ḿ nyíà ɓě, ɓɛ́ ɓě kéà ní sáa-zà-nyɔ̀ ɓě jǔɛ.’

¹⁰ “Ti ɓɛ́ ḿ muà ɖé toɖoɔ̀ dya ɖeɛɛ, ḿ nyu ma dyóɖóaún-wè kpáɖá-nyɔ sɔ̃́ kè máaún-hwùɖù kpáɖá-nyɔ sɔ̃́ ɖé kà ḿ nyuɛ ma kà kĩ́ín nyɛ. Ɓó tia ɓaɖaa, Bounɓoɔ̀ tò ma ní wuɖuɔ̀ gbo ɖùǔ, ké ɔ hwòɖǒ se ma ɓě mú gbɔɔ̀ mɔ́ ɖe.

¹¹ Hwɛ̀ ké Bounɓoɔ̀ cɛ̃ɛ ma ḿ gbo, ɓɛ́ ḿ ké ma ɓě nàìn, ɓɛ́ ɓě ké ɓóɖó ɓɛ́ ɔ ɖǎà ɓě ɓǎ nììn ɓǎ ɓěɔ̀ nyɛ́nɛ́ín ɖáìn nyɛɛ kɔ̃ mu, ɓɛ́ ɓě kéɛ dyí ɖú.

Ɖɛ Gèɖèpɔ́ɔ̀ mɔ́ ɓɛ́ wa ké nyuɛ

¹² “Óó Éézùɖùɛ̀-nyɔ̀ ɓě, ɓě tò ɖɛ Bounɓo mɔ̀à ɓěɛ̀ Gèɖèpɔ́ɔ̀ kɛɛ mɔ́ ɓɛ́ ɓě ké nyuɛɛ gbo ɖùǔ. Ɓě mɛ fɛ̃̀ìn Bounɓoɔ̀ dyi, ɓɛ́ ɓě ké ɔ kpeɖe séín ɓěɔ̀ kíɖíí sí. Ɓě mɛ ɖɛ̀ɓɛ̀ ɔ mú, ɓɛ́ ɓě ké ɔ ɓiè hwòɖǒɛ̀-ɖé-hwɛ̀-kà.

¹³ Ɓě mɛ kpɔ̃ ɔ gma séín ɓě ɓɛ́ ḿ nìà zɛ̃̌ɛ̀ ɓě gbo cɛ̃iń nyɛɛ dyí ɓó ɓě mìɔùn nììn kpáná dyé jè.

¹⁴ Dyéɛ, Bounɓo mɔ̀à ɓěɛ̀ Gèɖèpɔ́ɔ̀ kɛɛ mɔ̀ nyɔ kɔ̃̀ dyɔún dà séín wuɖuí. Ɓóɖó-kpàà kè ɖɛ séín nìɛ̀ kɔ̃ɛɛ mɔ̀ ɔ kɔ̃̀ɔ̀-ɖɛ̀ ɖekè.

¹⁵ Kɛɛ ɖɛ̀ɓɛ̀ǐn-ɖɛ̀ɓɛ̀ǐn ɓɛ́ Bounɓoɔ̀ ɓéɖéà ɓó ɓě ɓǎ nììn ɓǎ ɓěɔ̀ bììɛ jèɛɛ, ɔ gãà ɓě ɖé nyɔ ɓěɔ̀ hwìɛ̀, ké ɓě mɔ̀à ɔ nyɔ ɓě keɛ̀.

¹⁶ Ɔ jèɛɛ, ɓěɛ̀ hwòɖǒ-dyùà kùmù-kùmù ɓěɔ̀ mɛ ɓɛɖɛɛ̀ dyí, ɓɛ́ ɓě ké ɓěɛ̀ dú-kùmùìn-kùmùìnɔ̀ dyi táà.

¹⁷ Sepóɛɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ mɔ̀ Gèɖèpɔ́ɔ̀ ɓɛ́ ɔ nì gèɖèpɔ́ɔ̀ séín kè nyɔ-wuɖuí-kɔ̃̀-nyɔ̀ séín kɔ̃in nyɛ. Ɔ gã̌, ké ɔ ɓéɖé kpé kè gana. Ɔ ní zĩ̀ìn nyɔ ɖò hwòɖǒǔn gbo, ké ɔ ní kpɔ̃ nyɔ-gbo-pa-wìɖì dyi.

¹⁸ Ɔ po jǎà-ɖɛ̀ wɔ̃ ɓó xwíè-dyù ɓě kè jɔ̌ɔ̀-màà ɓě bìì, ké ɔ ɖɛ̀ɓɛ̀ ɖíà ɓě mú, ké ɔ nyí wa ɖii-ɖɛ̀ kè mú-po-ɖɔ̀.

¹⁹ Ɔ jèɛɛ, ɓě mɛ ɖɛ̀ɓɛ̀ ɖíà ɓěɔ̀ mú, sepóɛɖé ɓě mɔ̀ùn mɔ̀ ma ɖíà ɖé Íjè-ɓòɖòɔ̀ kɔ̃.

²⁰ Ɓě mɛ fɛ̃̀ìn Bounɓo mɔ̀à ɓěɛ̀ Gèɖèpɔ́ɔ̀ kɛɛ dyi, ké ɓě mɛ ɓiè ɔ. Ɓě mɛ kpɔ̃ ɓó ɔ gboi kóɖó-kóɖó, ké ɔ ɖòùn kɔ̃̀ nyɛ́nɛ́ mú ɓě mɛ ɖììn wuɖu.

²¹ Bounɓoɔ̀ mɔ̀ ɓěɛ̀ Gèɖèpɔ́ɔ̀, ké ɔ mɔ̀ nyɔ ɓě mɛ ɓàìn. Ɔ ɖǎ ɖɛ vɛ̀nɛ̀ kè gã̌ǎ-ɖɛ̀ ɓě ɓó ɓě dyéɖé waí nyu.

²² Ti ɓě ɓǎ nììn ɓǎ ɓěɔ̀ muó zɔ̃̌ɔ̀ ɖé Íjè-ɓòɖòɔ̀ kɔ̃ɛɛ, wa mɔ̀ǒ nyɔ-kpò kpáɖá-nyɔ tã ɓaɖa-bùè. Kɛɛ ɓó kàǔn wɛ̃ɛ, Bounɓo mɔ̀à ɓěɛ̀ Gèɖèpɔ́ɔ̀ kɛɛ ɖǎa nyu ké ɓě ɖǎ dyí vò kà dɛ̀nɛ̀ mɛ́nɛ́ɛ́ ɓě nìà ɖé dyɔɔ̀ dyíɛɛ vòà dyíɛ.